1 Corintios 12 - Manityanati Tupax

Axɨba makumanataka uiti Espíritu Santo

¹ Masarukityaiki, ixhanka atusi aume axɨba makumanataka uiti Espíritu Santo.

² Axaño tusiu aume naukiche chapikokokatikipɨ Jesús amekatɨatai isiu matupaka nisamuku mañoñɨnka.

³ Sane naukiche, ixhanka kaɨma atusi aume tapɨ anati naki nanti axɨna chuxiampɨ kɨtɨpɨti Jesús, axtɨ anati profeta. Tapɨ anatityo naki nanti: “¡Axti Jesús Yɨriabuxti!”, axtɨ chɨmanityanatipɨ ui noñemaxti Espíritu Santo.

⁴ Abe sɨrɨmana bachɨkoboibo axɨpekuma axɨbama ikokoromati Jesús, naki uiche aityoximiati oemo kunauntañati naki Espíritu Santo.

⁵ Abe sɨrɨmana bachɨkoboibo, nanaiña yakɨpukuxti Yɨriabux Jesús.

⁶ Abetyo sɨrɨmana kausane nosɨriaka, tapɨti Tupax tyonentiki, ui noñemaxti isamutenti nanaiña aɨbu namanaiña.

⁷ Axti Tupax toxio uiti taikiana ɨmoti taman ñakokotoxti axɨna noñemaxti Espíritu ochepe, nauki namanaiña uxia nisɨborikixhimia.

⁸ Ui noñemaxti Espíritu Santo, aboma axɨbama toxio ɨmoma taruku nipiakaxɨma anityama. Makiataka toxio ɨmoma uiti Espíritu Santo taruku ñapanaunkuxɨma axtɨ manityanama.

⁹ Makiataka toxio ɨmoma aikokoromati Jesús ui noñemaxti Espíritu Santo, tapɨ makiataka toxio ɨmoma nauki uxiankama tato uimia axɨbama maunxokonoma.

¹⁰ Makiataka toxio ɨmoma noñemaxti Tupax nauki aisamunema axɨna champɨ tubastai, makiataka toxio ɨmoma nauki profetas Abomaintyo axɨbama toxio ɨmoma asuputaramati Espíritu Santo pɨnanakiti chobores, makiataka ipiakama anityama aruki nanaiña manityakaka, makiataka tusiu ɨmoma axɨmanio aruki nanaiñantai manityakaka.

¹¹ Nanaiña axɨba sane toxio oemo ui noñemaxti naki kunauntañati Espíritu Santo, axɨna uxia au ñakionkoxti.

¹² Axɨna nokɨtɨpɨ, abe kɨtɨpɨ sɨrɨmana axɨba nenaxixh, tapɨ tyone tamantai nakax. Sanentityo Cristo.

¹³ Tyopiki uiti kunauntañanti Espíritu Santo namanaiña osɨrikia, axɨbama judíos axɨbamaintyo chɨtɨpɨ judíos, axɨbama kumanakaka axɨbamaintyo chɨtɨpɨ kumanakaxɨma nauki chepe nusaka ui noñemaxti Espíritu Santo. Namanaiña uchaka uiti maniki Espíritu Santo.

¹⁴ Axɨna nokɨtɨpɨ abe sɨrɨmana kɨtɨpɨ axɨba nenaxixh.

¹⁵ Axtɨ nampɨtɨ axɨna nopope: “Axɨñɨ chɨtɨpɨ eeseñɨ sane naukiche axɨñɨ chɨtɨpɨ kɨtɨpɨxɨñɨ”, uixh axɨna sane chityonempɨ okɨtɨpɨki.

¹⁶ Axtɨ umasux nantɨ: “Axɨñɨ chɨsɨtoxɨpɨñɨ, sane naukiche axɨñɨ chɨtɨpɨ kɨtɨpɨxɨñɨ”, uixh axɨna sane chityonempɨ okɨtɨpɨki.

¹⁷ Axtɨ nanaiñampɨ nokɨtɨpɨ sɨtox, champɨpɨ uiche oñonsape. Axtɨ nanaiñampɨ nokɨtɨpɨ umasux, champɨpɨ uiche uñuniu.

¹⁸ Tapɨti Tupax omeno uiti nanaiña axɨba nenaxi nokɨtɨpɨ axɨna kauta uxia au ñakionkoxti.

¹⁹ Axtɨ nanaiñantaipɨ taman nakax nenaxi nokɨtɨpɨ, kautapɨ naka nokɨtɨpɨ.

²⁰ Axɨna kɨtɨpɨx sɨrɨmana nenaxixh, tapɨ axɨna kɨtɨpɨx kunauntaña nakax.

²¹ Axɨna nosɨto chɨnampɨtɨ ɨmo noñe: “Champɨ nɨmochekɨ sobi.” Axɨnaintyo nutanu chɨnampɨtɨ ɨmo nopope: “Champɨ nɨmoche año sobi.”

²² Axɨba nenaxi nokɨtɨpɨ takana axtɨ chupasɨurupɨ, tyoneio axɨba taruku nɨmoche.

²³ Tapɨ axɨba nenaxi nokɨtɨpɨ axɨba chɨbukuasɨrɨpɨ nuxia oemo, tyoneio axɨba ane nuxia nubaibixh osoi. Tapɨ axɨba pikiataka nenaxi nokɨtɨpɨ axɨba champɨ nuxia niñokoñopox, tyoneio axɨba chɨbukuasɨrɨpɨ nuxia oemo,

²⁴ sane naukiche champɨ nɨmoche sane osoi yupu nenaxi nokɨtɨpɨ axɨba aneampae niñokoñopox. Axti Tupax koñokono uiti axɨna nokɨtɨpɨ nauki axɨba nenaxixh chɨbukuasɨrɨpɨapae oemo taruku niyukuax,

²⁵ nauki axɨba nenaxi nokɨtɨpɨ tapɨ opiñanaño pese, ta yakɨna nanaiña axɨba nenaxi nokɨtɨpɨ tari umasaratɨ yutakuapatoe.

²⁶ Axtɨ ane taman nenaxi nokɨtɨpɨ takisɨrɨ, saneityo pikiataka butakisɨrɨ. Axtɨ taman nenaxi nokɨtɨpɨ tyoneantai kuasɨrɨ, nanaiña axɨba pikiataka mupukɨnuña ichepe.

²⁷ Sane naukiche, axaño tyone nikɨtɨpɨxti Cristo, taikianati taman abaxɨpekuki ane yachɨkoboibotiatoe.

²⁸ Aboma axɨbama sɨroma uiti Tupax axɨpekuma axɨbama ikokoromati Jesús, kusɨrɨboma axɨbama amonkoma tɨkañe isiuti. Auki aboma axɨbama manityanama ui noñemaxti. Auki aboma axɨbama manunekanabo. Auki aboma axɨbama masamunuma axɨba champɨ tu bastai, makiataka axɨbama bakurarama ɨmoma axɨbama maunxokonoma, axɨbama asaramatɨ tyaku makiataka, axɨbama mayɨriabuka, makiataka tusiu ɨmoma axɨmanio aruki nanaiñantai manityakaka.

²⁹ Chɨtɨpɨ namanaiña apóstolexɨma, chɨtɨpɨtyo namanaiña profetaxɨma. Chɨnamanaiñampityo ipiakama anunekama, champɨityo axtɨ namanaiña masamunuma axɨba champɨ tubastai,

³⁰ chɨnamanaiñampɨ uxiankama tato uimia axɨbama maunxokonoma. Champɨityo axtɨ namanaiña ipiakama anityama aruki nanaiñantai manityakaka, chɨnamanaiñampityo ipiakama nura makiataka.

³¹ Apapache nikiubu año kausane nauki aye aboi axɨba omixhia apachɨkoboibo. Axɨñɨ iñununekakaño axɨna kutubiux taruku nikoñokokox