1 Corintios 11 - Manityanati Tupax

¹ Apisamuse isiukiñɨ takana axɨna isamaute, takana axɨña isamute nanaiña isiukiti Cristo.

Niñokoñokoko paɨka

² Uxia iñemo axɨna apisamute sane, masarukityaiki, tyopiki taikiana apakionkaño iyoñɨ apisamutentyo nanaiña nixhanunekaka aume.

³ Ixhanka atusi aume axti Cristo tyonenti yɨriabuxti ɨmo mañoñɨnka, axtityo ñoñɨnx yɨriabuxti ɨmo nikɨpostoti, sane takanati Tupax Yɨriabuxti ɨmoti Cristo.

⁴ Axtɨ tamanti ñoñɨnx tabuxioti axtɨ meaboti axtɨ manunekanati noñemaxti Tupax champɨ ñanaunkuxti ɨmo nityanuxti.

⁵ Tapɨ axtɨ taman paɨx, champɨ nityabuxixh axtɨ meabo axtɨ manunekana noñemaxti Tupax, champɨ ñanaunkux ɨmo nityanux. Isiukiatai takana axtɨ tapakio.

⁶ Tyopiki axtɨ taman paɨx chɨtabuxiopɨ, uxia axtɨ tapakio. Tapɨ axtɨ paɨx kɨsobo au ñakionkox tyopiki tapakio, auki tari aiña tyabuxibo.

⁷ Axti ñoñɨnx tapɨ tabuxioti, tyopiki tyonenti nausɨpɨtuxti Tupax uitityo aityusiankati niyarusɨrɨkɨxti Tupax. Tapɨ axɨna paɨx uixh aityusianka niyarusɨrɨkɨxti ñoñɨnx,

⁸ tyopiki axti ñoñɨnx chɨkaɨburutipɨ kɨtɨpɨki paɨx, ta axɨna paɨx kaɨburu kɨtɨpɨkiti ñoñɨnx.

⁹ Axtityo ñoñɨnx chuxiankatipɨ auki naka paɨx, ta auki nakaxti ñoñɨnx uxiane.

¹⁰ Sane naukiche axɨna paɨx tari anati yɨriabux ɨmo, tyopikimia axɨbama ángeles.

¹¹ Tapɨ au axɨna nisɨborikixhimia axɨbama ikokoromati Jesús, axti ñoñɨnx chɨsɨborikotipɨ axtɨ champɨ paɨx, saneityo paɨx chɨsɨborikopɨ axtɨ champɨti ñoñɨnx.

¹² Ñemanauntu axɨna paɨx uxiante kɨtɨpɨkiti ñoñɨnx, ñemanauntuityo axti ñoñɨnx anati iku kɨx kɨtɨpɨki paɨx. Chepema tyonema nisamukuxti Tupax.

¹³ Amasasai aboiyapatoe axaño axtɨ uxia axɨna paɨx meabo ɨmoti Tupax champɨ nityabuxixh.

¹⁴ Ui axɨna nosɨboriki aiñununekana oñɨ ta ɨmo nokɨso axtɨ axti ñoñɨnx chɨtapakiotipɨ.

¹⁵ Tapɨ axɨna paɨx koñotɨ ɨmo abaesa nityanux. Tyopiki toxio ɨmo abaesa nityanux nauki ane tyabuxibo.

¹⁶ Axtɨ aboma axɨbama xhanxɨma uratokimia kɨtɨpɨ axɨna sane, tari atusi ɨmoma axoñɨ takanaintyo axɨbama ikokoromati Jesús chɨtusiupɨ oemo.

Axɨna chuxiampɨ axtɨ ubaka nikɨtɨpɨxti Jesús

¹⁷ Iku axɨna nixhakonomoso aume, champɨ ityopikiche ñachampienka aume kanapae apiyoberabakaño nantax ɨmo axɨna chuxiampɨ tapɨ axɨna uxia chapisamutempɨ.

¹⁸ Urapoimia sukarɨñɨ, axtɨ apiyoberabakaño chuxiampɨ aboi aumeampatoe, ane axɨna kauta ikokota ta ñemanauntu axɨna sane.

¹⁹ ¡Ñemanauntu uxia axtɨ apiñakaño pese amopɨnanakiapatoe, sane atusi ñakusanema axɨbama ñemanauntu ikokoromati Jesús!

²⁰ Axtɨ apiyoberabakaño, chityonenkipɨ napakionko ɨmoti Yɨriabux Jesús.

²¹ Tyopiki axtɨ aubaka, taikianati taman kusɨrɨboti a'ati. Tapɨ makiataka sɨsioma aɨbu nikɨrɨpɨxɨma, makiataka orisɨbaboma.

²² ¿Champɨ naupo kauta auba kautaityo auchaka? ¿Kausane champɨ napanaunku ɨmo nipoxti Tupax sane apikɨnsomokokama axɨbama champɨ nenaxixhimia? ¿Isane surapoboiboñɨ aume? ¿Uxiantai nisura aume? ¡Ui axɨna sane chuxiampɨ iñemo!

Tyakɨrux niyakaxti Jesús

²³ Tyopiki axɨñɨ yasutiu axɨna manunekatax uiti Yɨriabux Jesús, auki axɨñɨ iñununekakaño: Axɨmanu tobixh tɨkañe naukiche toxioti Yɨriabux Jesús ɨmo nikonkoxti, yasutiuti mekuti taman pan

²⁴ auki machampienkanati ɨmoti Tupax, chepesɨro uiti auki nanti: “Axɨna tyone nisɨtɨpɨ toxiobo autaku. Apisamuse axtɨ apakionkaño iyoñɨ.”

²⁵ Saneityo uiti naukiche tɨchauki niyakaxɨma, ikiatati axɨmanu taropes mekuti auki nanti: “Axɨna taropes tyone axɨna aɨbo tratox ui noto nisɨtɨpɨ atusi ta ñemanauntu. Axtɨ auchaka apakionsaño iyoñɨ.”

²⁶ Sane naukiche, chepe axtɨ tɨkuati tato Yɨriabux Jesús, axaño aburapoi nikonkoxti axtɨ aubaka axɨmanu pan axtɨ auchakaityo auki axɨmanu taropes.

²⁷ Sane, axtɨ anati naki basoti axɨmanu pan axtɨ chabotityo auki nichapoxti Yɨriabux Jesús axti naki chuxiampɨ nisɨborikixhti, ane nipɨnatenti ɨmo nikɨtɨpɨxti ɨmointyo notoxti Yɨriabux Jesús.

²⁸ Ui axɨna sane, amasasai axtɨ ñemanauntu uxia nausɨboriki axtɨ aubaka axɨmanu pan axtɨ auchakaityo auki axɨmanu taropes.

²⁹ Tyopiki axti naki basoti chabotityo axtɨ chasaratitɨpɨ axtɨ tyone nikɨtɨpɨxti Yɨriabux Jesús, ɨmo nityakisɨrɨkɨxtiatoe basoti chabotityo.

³⁰ Sane naukiche, sɨrɨmanama abaxɨpekuki aboma maunxokonoma chɨkusɨurupɨ nikɨtɨpɨxɨma, makiataka tɨkoiñoma.

³¹ Axtɨ bastaipɨ nuxia nosɨborikiatoe, axti yɨriabux Jesús champɨ tyakuchepɨ utakisɨrɨ uiti,

³² champɨ nɨmoche axtɨ manityomokonoti Yɨriabux oemo ta nauki tapɨ uisamute axɨna chuxiampɨ takana axɨbama ikuki axɨna kɨx.

³³ Sane, masarukityaiki, axtɨ apiyoberabakaño nauki auba, tapɨ anati naki kusɨrɨbo.

³⁴ Axtɨ anati naki taruku nikɨrɨpɨxti, tari yarati au nipoxtiatoe, sane champɨ tyakuche autakisɨrɨka uiti Tupax axtɨ apiyoberabakaño.