1 Corintios 10 - Manityanati Tupax

Makuansomokokox ɨmo namanaiña

¹ Masarukityaiki, ixhanka tapɨ takɨrusu napakionko axɨbama uyaɨtaiki tɨkañe amonkoma kiana axɨmanu kɨsaɨbox, namanaiñaintyo tompɨkana uimia axɨmanu narubaityu Tux Kɨturiki.

² Ui axɨna sane, namanaiña amonkoma tyupekuti Moisés naukiche ɨrioma ui axɨmanu kɨsaɨbox eanaintyo axɨmanu narubaityu tux.

³ Namanaiñaintyo basoma axɨmanu utuburibo kuatɨ auki napes.

⁴ Chabomaintyo axɨmanu nityɨpoxɨma kuatɨ auki napes. Tyopiki chaboma axɨmanu tux kuatɨ auki axɨmanu kanx auki napes axɨna sɨrotɨ isiuma kauta niyɨkɨxɨma, axɨmanu ta tyonenti Cristo.

⁵ Sɨrɨmanama axɨpekukimia, chuxiampɨ nisɨborikixhimia ɨmoti Tupax, tyopiki koiñoma kauta champɨ sɨborikixh.

⁶ Nanaiña axɨna sane uxiante ɨmo machepekatax oemo, tapɨ uisamute axɨba chomixhampɨ takana axɨma isamutema.

⁷ Sane naukiche tapɨ apanaunka ɨmo matupaka nisamuku mañoñɨnka, takana axɨbama isamutema axɨpekukimia tɨkañe, sane nantɨ iku Nikorox: “Tɨmonsoma a'ama nauki achamaintyo, auki atɨraimia atokoma.”

⁸ Tapɨ uityoximiaka oñɨ ɨmo axɨna chuxiampɨ nosɨboriki, takana axɨna aboma isamutema tɨkañe axɨpekukimia, tyopiki axɨna sane au taman nanenes koiñoma veintitres mil.

⁹ Tapɨ uiñataityo numakokoto ɨmoti Cristo, takana axɨna isamutema axɨpekukimia, sane naukiche koiñoma oboi noixhoboka.

¹⁰ Tapɨ chuxiampɨ nabura ɨmoti Tupax, takana axɨna isamutema axɨpekukimia, sane naukiche axti ángel nesa konkox koiñoma uiti.

¹¹ Nanaiña axɨna sane uxiante ɨmoma axɨbama uyaɨtaiki tɨkañe takana machepekatax kaɨma oemo, tyone ane iku Nikorox ɨmo makuansomokokox oemo axɨbama osɨborikia axɨba tyakɨrux naskɨbeka.

¹² Sane naukiche, axtɨ anati naki au ñakionkoxti axone nuxia ñakokonaunkuxti, tari asaratitɨ nuxia tyakutiatoe tapɨ tapenekoti.

¹³ Axaño chɨtoxiopɨ aume makokotox axɨna chichepepɨ napasɨu. Axti Tupax chɨmapañantipɨ champɨ ñana makokotox uiti aume axɨna chichepepɨ napasɨu. Axtɨ ane ñana makokotox aume, axti Tupax ityusiankatati ausukarɨ kausane tapɨ abeka ui axɨmanu makokotox, nauki ane napasɨu ɨmo.

Manaunkux au yarusɨrɨx basapakax

¹⁴ Sane naukiche masarukityaiki, tapɨ apanaunka ɨmo matupaka.

¹⁵ Xhanityaka takana ɨmoma axɨbama taruku ñapanaunkuxɨma: amasasai aboiyapatoe axɨna sukanañɨ aume.

¹⁶ Axtɨ uchaka auki axɨmanu taropes kurusɨu axɨna uiche uiñanaunkati Tupax, chepe makonte notoxti Cristo. Axtɨ ubaka axɨmanu pan chepesɨro osoi, chepetyo makonte nikɨtɨpɨxti Cristo.

¹⁷ Champɨ nɨmoche axtɨ sɨrɨmana oñɨ, namanaiña ubaka auki axɨmanu kunauntaña pan, sane naukiche kunauntaña nakax osoi axɨmanu kɨtɨpɨx.

¹⁸ Amasasatɨ ɨmoma axɨbama auki Israel: axɨbama basoma axɨmanio numukianka makumanataka, chepetyo nakaxɨma axtɨ meaboma.

¹⁹ Ui axɨna sane chisukanapɨñɨ axti maniki Tupax nisamuku mañoñɨnka ane nanenekicheti, axɨmaniointyo numukianka makumanataka ɨmo matupaka nisamuku mañoñɨnka ane kiatax nakax pɨnanaki kiatax nañes.

²⁰ Axɨna sukanañɨ axtɨ axɨbama chikokoropɨmati Tupax makumananama, ityoximiatama ɨmo machoboreka, chɨtɨpɨ ɨmoti Tupax, axɨñɨ chixhankapɨ nauki abasikia chepe machoboreka.

²¹ Chuxiampɨ axtɨ auchaka nityɨpoxti Yɨriabux Jesús, auki amekatɨtyo aucha nityɨpo machoboreka. Chuxiampityo axtɨ aubaka chepeti Yɨriabux Jesús, auki kaɨma amekatityo auba niyarta machoboreka.

²² Tapɨ chuxiampɨ ñakionkoxti yɨriabux Jesús aboi. ¿Ensapɨ taruku nubasɨu pɨnanakiti?

Uiñanauna nisɨborikixhti kiatax

²³ Axtɨ amukanaño: “Axɨñɨ axtɨ ixhanka isamute axɨna nixhantɨmo.” Unka ñemanauntu, ta chɨtɨpɨ nanaiña uxia axɨna nuxiantɨmo uisamune. Unka sane, axtɨ uxianka uisamute axɨna nuxiantɨmo, ta chɨtɨpɨ nanaiña uxia ɨmo nisɨboriki makiataka.

²⁴ Tapɨ apapachetio axɨna uxia aumeampatoe, ta apapachesio axɨna uxia ɨmo namanaiña.

²⁵ Aumase nanaiña nañes axɨna tabɨko aboi, tapɨ apankitio axtɨ uxia ɨmo naukɨtɨpɨ.

²⁶ Tyopiki nanaiña axɨna kɨx, axɨbaityo abe iku tyoneio nisamukuxti Tupax.

²⁷ Axtɨ ityasurutiaño auba chepeti naki chikokorotipɨ Jesús, axtɨ amekatɨ, aumase nanaiña axɨna toxio uiti aume, tapɨ apankitio pɨnanakiti axtɨ uxia ɨmo naukɨtɨpɨ.

²⁸ Axtɨ anati naki nanti aume: “Axɨna nañes tyone makumanatax ɨmo matupaka nisamuku mañoñɨnka”, sane naukiche tapɨ aumate, tyopikiti maniki uiche uraboiti tyakuityo naukɨtɨpɨ.

²⁹ Sukanañɨ sane tyopikiti axti maniki kiatax, chɨtɨpɨ autopiki axaño. Tapɨ chebo sobi chuxiampɨ nuraxti kiatax ɨmo axɨna isamute.

³⁰ Axtɨ ñachampienkaka ɨmoti Tupax tyopiki axɨna ixhate, tapɨ chebo sobi chuxiampɨ nuraxti kiatax ɨmo axɨna tyopikiche ñachampienkaka ɨmoti Tupax.

³¹ Saneityo axtɨ aubaka, axtɨ auchaka, axtɨ apisamute kiatax napachɨkoi, apisamuse nanaiña ɨmo manaunkux ɨmoti Tupax.

³² Tapɨ apisamute axɨna chuxiampɨ sukarɨ makiataka. Sukarɨ axɨbama judíos, sukarɨma axɨbama chɨtɨpɨ judíos, axɨbamaintyo ikokoromati Tupax.

³³ Axɨñɨ au nisɨboriki isamute nanaiña axɨna uxia ɨmo makiataka, chiyapachetiopɨ axɨna uxia ñemoantoe ta yapachetio axɨna uxia ɨmo namanaiña, nauki ane ɨmoma maximiakatax.