Tutelonomi 9 - Chahta Holisso Holitopa 1886

¹ Islael ma, ish haklashke, himak nitak a̱ oklushi hochito, micha kʋllo kʋt chi̱ shahli, tʋmaha holihta hochito, micha a holihta kʋt shutik ont ʋhli ho̱, chukowʋt ish isha chi̱ hosh Chatan a̱ ish hlopullachi̱shke.

² Okla hochito, micha chaha, Anakim im ʋlla ʋhleha yʋmmak oka ish ithana, micha yʋmmak oka, Kʋta hosh Anakim im ʋlla ʋhleha ha̱ itikba hikia hinla cho? achi ka̱ ish ha̱klo chatuk oka.

³ Yʋmohmi hoka himak nitak a̱ chin Chitokaka Chihowah yʋmmak osh chi tikba hlopullit ia hoke; luak na hukmit tahli chiyuhmit ishit kancha chi̱ hoke, micha chi tikba ya̱ aka isht ona chi̱ hoke. Yʋmohmi hoka Chihowah yʋt chim achi tuk mak o̱, tihlelit ish kocha wehli cha, chekosi ishit ish kancha hi oke.

⁴ Chin Chitokaka Chihowah yʋt chi tikba ya̱ ishit kanchi ha ya̱, chi chu̱kʋsh anu̱kaka ya̱ anumpulit, Ai ʋlhpiesa li pulla kak o̱ yakni ilʋppa a binili la chi̱ ho̱, Chihowah yʋt sʋsht ʋla tuk oke; chik acho kashke; amba oklushi ilʋppa puta haksi kak o̱, Chihowah yʋt chi tikba a tihlelit kocha weli hoke.

⁵ Ish ai ʋlhpiesa, micha chi chu̱kʋsh ʋt ai ʋlhpiesa kak osh i̱ yakni ya ishit a binilit ish ia keyu; amba oklushi ilʋppa puta haksi kak o̱, micha anumpa kʋllo ya̱ chi̱ki ʋhleha Eblaham, Aisak, micha Chekob aiena im il onoch i tok anumpa ha̱ aia̱hlicha chi̱ hosh chin Chitokaka Chihowah yʋt chi tikba a tihlelit kocha weli hoke.

⁶ Yʋmohmi hoka chin Chitokaka Chihowah yʋt yakni achukma ilʋppa ish a binila chi̱ ho̱ chima kʋt, chi ai ʋlhpiesa kak o̱ keyu ka̱ ish ithaiyanashke; okla ikunla kʋllo chia hoka.

⁷ Yakni haiaka ya̱ chin Chitokaka Chihowah im ai i̱ nukkilli ya̱ ish nokowʋchi tok ʋt, ish ithaiyana cha, ik chim a hakso kashke; Echip yakni ya̱ kohchʋt ish minti tok, nitak yʋmma ʋttʋt mihintit ilʋppa hʋshla tuk ant ʋhli ka̱ Chihowah ya̱ i̱sanalit hʋsh i̱ fila̱hʋmmi tuk oke.

⁸ Holeb ak kia, Chihowah im ai i̱ nukkilli ya̱ hʋsh nokowʋchi tok; yohmi na Chihowah yʋt nuklibisha cha, ishit hʋchi kancha chi̱ ha tok.

⁹ Tʋli patʋssa tuklo nan itim apesa tʋli patʋssa tuklo Chihowah yʋt chitim apesa tuk fehna ka̱ ishe la chi̱ hosh, nʋnih ha̱ oiya li mʋt; yohmi cha, nʋnih ha̱ nitak pokoli ushta, micha ninak pokoli ushta ho̱ anta li tok; pʋska ya̱ ak po, micha oka ya̱ ak ishko tok.

¹⁰ Mihma tʋli patʋssa tuklo ka̱ Chitokaka ibbak ushi yosh a holissochi ya̱, Chihowah yʋt sʋbbak fohki tok; mihma itʋnaha chitot aiasha nitak o̱, Chihowah yʋt nʋnih ha̱ luak iklʋnna et ai anumpohonli tuk mak o̱, anumpa hʋt moma hosh ai o̱ holisso tok.

¹¹ Atuk o̱ yakohmi tok, nitak pokoli ushta, micha ninak pokoli ushta kʋt ont taha ma, Chihowah yʋt tʋli patʋssa tuklo, nan itim apesa tʋli patʋssa fehna kash ʋma tok.

¹² Mihma Chihowah yʋt, Wakaya cha tu̱shpʋt ilʋppa ʋttʋt ish akowashke; chim okla Echip a̱ pehlichit ish kohcha kash osh ile litehlishke; chekosi i̱ miha li kash hina ya̱ kohchʋt fullotʋt naksika iʋshke; bilʋt akmot na holbʋt toba ikbishke, im achi tok.

¹³ Micha Chihowah yʋt ʋm anumpulit, Okla ilʋppa pisa lishke; mihma yakeh, okla ikunla kʋllo yoke.

¹⁴ Is sʋssa na, ishit kanchi lashke; micha hohchifo ha̱ shutik nutaka ya̱ a kashofit kanchi lashke. Micha chishno ak o̱ oklushi kʋllo, micha chito aiena kʋt yʋmma i̱ shahli ho̱ a chikbi lashke, achi tok.

¹⁵ Yohmi ho̱ fullota li mʋt, nʋnih ha̱ akowa li tok; mihma nʋnih hʋt luak ishit lu̱hu̱wa tok; mihma nana itim apesa tʋli patʋssa tuklo kʋt sʋbbak tuklo ka̱ a̱lhto tok.

¹⁶ Atuk osh pisa li ma, yakeh, chin Chitokaka Chihowah ya̱ i̱ sanalit, yoshobʋt, wak ushi bilʋt akmot toba hʋsh ikbi tuk a tok: Chihowah yʋt hʋchi̱ miha tuk a̱ chekosi hina ya̱ kohchʋt fullotʋt naksika ya̱ hʋsh ia tuk a tok.

¹⁷ Mihma tʋli patʋssa tuklo sʋbbak a̱lhto kash hʋsh pi̱sa ho̱ hʋchi tikba ya̱ ishit aka pila lish, kobalichi li tok.

¹⁸ Micha ʋmmona tuk a̱ chohmit Chihowah itikba ya̱ nitak pokoli ushta micha ninak pokoli ushta ho̱ aka itoyula li tok: hʋchi yoshoba momá ishit a hʋchi yoshobʋt Chihowah itikba ya̱ hʋchi haksi fehnʋshke; im ai i̱ nukkilli ya̱ hʋsh nokowʋchi ha tuk oka, pʋska ya̱ ak po, micha oka ya̱ ak ishko tok.

¹⁹ (Im ai i̱ nukkilli micha nuklibisha lʋshpa ho̱ Chihowah yʋt ishit nuklibisha cha, hʋchi̱ sanalit ishit hʋchi kancha chi̱ kak a̱ sa nukshopa tuk okʋt.) Yohmi tuk kia nitak yʋmmak kia Chihowah yʋt a̱ haponaklo tok.

²⁰ Micha Chihowah yʋt Alon ak kia im i̱ nuklibi̱sha fehna cha, ishit kancha chin tok: mihma Alon ak kia nitak yʋmma isht anumpule li tok.

²¹ Micha na hʋsh ashʋchi, wak ushi hʋsh bi tuk ash ishi lish, luak ishit hukmi li mʋt, botolit, boshullichit, lipibichit, lukfi pushi chi yʋmihchi li tok; micha pushi yash bok ushi nʋnih et okʋtahaka oka hlatʋbli li tok.

²² Micha Tabelah, micha Massah, micha Kiblolh‐hattafah ya̱ ia Chihowah im ai i̱ nukkilli ya̱ hʋsh anokowʋchi tok.

²³ Micha Chihowah yʋt Katesh banea ya̱ ʋttʋt hʋchi pelʋt, oh ia cha, yakni hʋchima li tok a̱; oh binili, achi tok; yohmi ma, chin Chitokaka Chihowah im anumpa ha̱ i̱ filʋmmit hʋsh i̱ sanali tok; micha hʋsh i̱ yimma he keyukmʋt, im anumpa ha̱ hʋsh i̱ haponakla he keyu tok.

²⁴ Hʋch ithana li tok aiʋhlit mi̱hinti ka̱ Chihowah ya̱ i̱ sanalit, hʋsh i̱ filahʋmmi chatuk oke.

²⁵ Yʋmohmi ma ʋmmona ka̱, aka itola li tuk a̱ chohmit, Chihowah itikba ya̱ nitak pokoli ushta, micha ninak pokoli ushta ho̱ a̱ka itoyula li tok; Chihowah yʋt ishit hʋchi kancha chi̱, miha ha tok oka.

²⁶ Yʋmohmi ha tuk o̱ Chihowah ya̱ im ilbʋshʋt, Chitokaka Chihowah ma, chim okla, micha chimmi, yʋmmak oka a chi holitopa pulla hosh ish okchalinchi tuk; micha chibbak kʋllo hosh pehlichit Echip a̱ ish kohcha tuk okʋt, ishit chik kancho kashke.

²⁷ Chin tishu ʋhleha Eblaham, micha Aisak, micha Chekob aiena ka̱ ish ithaiyanashke; okla ilʋppa chu̱kʋsh ilapunla, micha a haksi, micha aiashʋchi aiena kano chik peso kashke.

²⁸ Yʋmohmikma yakni apehlichit ish pi kohchi tok ʋt, Chihowah yʋt yakni im issa tok ʋt isht ona he keyu ha tuk osh, micha i̱ nukkilli ha tuk osh, yakni haiaka ai ʋbit tahla chi̱ hosh pehlichit kohcha tuk oke, achi yoba na.

²⁹ Yohmi kia chim okla hoke, micha chimmi hosh nan isht chim aia̱hli kʋllo, micha chi shakba kʋllo ashatapa hosh pehlichit ish kohchi tuk oke, ahanchi li tok: im achi tok.