Tutelonomi 8 - Chahta Holisso Holitopa 1886

¹ Anumpa ʋlhpisa puta himak nitak a̱ chim anumpo̱honli li ka̱ ithaiyanʋt ish yʋmihchashke, yʋmohmi hosh hʋchi okcha̱yashke, micha hʋsh apakna cha, Chihowah yʋt hʋchi̱ki ʋhleha ha̱ anumpa kʋllo im il onochi tok a̱ yakni yash chukowʋt hʋsh binilashke.

² Mikmʋt chu̱kʋsh akanlosecha chi̱ hosh, micha im anumpa ha̱ ish iesha chi̱ hokmá, keyu hokmá, nana ka̱ chi chu̱kʋsh foyuka ka̱ akostinincha chi̱ hosh, imomaka chi pesʋt afʋmmi pokoli ushta ilʋppa yakni haiaka hina hlopulli moma ka̱ chin Chitokaka Chihowah yʋt chisht a̱ya tuk a̱ ish ithaiyanashke.

³ Micha chi chu̱kʋsh akanlusechit chi hohchʋfochi mʋt, ish ithana tuk keyu ho̱, micha chi̱ki ʋhleha hʋt ithana tuk keyu ho̱, manna ya̱ chipi̱hinta tok; yohmi kʋt pʋska ak illa ho̱ hatak ʋt okcha̱ya he keyu, amba Chihowah im anumpa itih ha̱ akohoncha puta kak o̱ hatak ʋt isht okcha̱ya ka̱, Chihowah yʋt chithʋnancha chi̱ ha tok.

⁴ Afʋmmi pokoli ushta ilʋppa chi̱ na fohka yʋt chin taha tok keyu, micha chiyi yʋt shatali tok keyushke.

⁵ Micha hatak osh ushi ya̱ na hotopa onochi cha tuk a̱ chohmi hosh chin Chitokaka Chihowah yʋt na hotopa chi onochi tok a̱, chi chu̱kʋsh isht anukfillit ish pi̱hi̱sashke.

⁶ Yʋmohmi hoka chin Chitokaka Chihowah im anumpa ʋlhpisa puta ish ieshi cha, i̱ hina puta ka̱ ano̱ho̱wa cha, ish i̱ nukwiashke.

⁷ Chin Chitokaka Chihowah yʋt yakni achukma, yakni bok‐ushi aiasha, kʋli puta, micha oka hofobi puta aiena kʋt okfa, micha nʋnih puta ka̱ ato̱homba;

⁸ Yakni onush aiasha, micha bali, micha pa̱kʋpi, micha fik iti, micha pomkilanit aiasha; yakni alif bila micha foebila aiasha;

⁹ Yakni yʋmma pʋska ish aiʋpa kʋt chim atikkonofa nana kia ik chim iksho ka he keyu yoke; yakni yʋmma tʋli ʋt tʋli yoke; mikma i̱ nʋnih puta ka̱ asonak lakna ish a kulla hinla ho̱ isht chisht ona hi oke.

¹⁰ Ish impa cha, chi kaiyakmʋt, yʋmohmikmʋt, chin Chitokaka Chihowah yʋt yakni achukma chima tok oka ish holitoblichashke.

¹¹ Ahah, ish ahni cha, chin Chitokaka Chihowah ya̱ im anumpa ʋlhpisa puta, micha im ai ʋlhpiesa yʋmi̱hinchi, micha i̱ nanʋlhpisa bilia, himak nitak a̱ chim anumpo̱honli li ka̱ chik ieshot ik chim a hakso kashke.

¹² Keyu hosh ish impa cha, chi kaiyakmʋt, micha aboha hochukma ish ikbi cha, ish aiashakmʋt,

¹³ Micha nanʋlhpoa chin hochito, micha nanʋlhpoa chin chipunta aiena kʋt chim apaknakmʋt, micha chin tʋli hʋta, micha chin tʋli holisso lakna ʋt chim apaknakmʋt, micha nana chim a̱sha tuk moma kʋt chim apaknakmʋt,

¹⁴ Yʋmohmikmʋt chi chu̱kʋsh ilefehnʋchi cha, chin Chitokaka Chihowah yʋmmak osh Echip yakni akohchʋt aboha yuka ai ishit chi kohchi tuk, a̱ chim a haksa hi oke.

¹⁵ Yʋmmak osh yakni haiaka chito, micha palʋmmi, micha sinti chilita, micha shu̱shi nokoa, halambia achi aiasha, micha achahto, oka ik ai ishko ya̱ pehlichit chi hlopullichi tok oke; yʋmmak osh tʋli chito tasonak chohmi ya̱ oka ya̱ a chi̱ kohchi tok oke.

¹⁶ Yʋmmak osh yakni haiaka ya̱ chi̱ki ʋhleha hʋt ithana tuk keyu ho̱ manna ya̱ chipeta kʋt, chi chu̱kʋsh a̱ akanlosechi, micha imoma ka̱ chi pesa cha, ont chim ishtaiopikma, chim achukmala chi̱ hosh yʋmihchi ma;

¹⁷ Mihma chi chu̱kʋsh anu̱kaka, Ʋno sa kʋllo, micha sʋbbak kʋllo hosh ishit holitopa ilʋppa isht ʋma tok oke, ish achi yoba na,

¹⁸ Amba chin Chitokaka Chihowah ya̱ ish ithaiyanashke: yʋmmak osh holitopa ish aiesha chi̱ ka̱, nan isht aia̱hli chima kʋt, nan itim apesa yʋmmak oka chi̱ki ʋhleha ha̱ anumpa kʋllo im ilonochi tok a̱ himak nitak a̱ yʋmohmi hoka ai a̱hlicha chi̱ kak atok.

¹⁹ Atukma yakohma hi oke, chin Chitokaka Chihowah ya̱ peh chim ahaksikmʋt, micha na holbʋt toba inla puta iakaiyʋt ish itʋnowakmʋt, micha im antiʋt ish aiokpʋchikmʋt, ont ish moshola he ya̱ himak nitak a̱ atokolit chim anoli lishke.

²⁰ Oklushi puta ka̱ Chihowah yʋt chi tikba ai ishit kanchi tok a̱ chohmit ont ish moshola chi̱ hoke; chin Chitokaka Chihowah im anumpa ish im antia he tuk keyu hoke, im achi tok.