Tutelonomi 7 - Chahta Holisso Holitopa 1886

¹ Chin Chitokaka Chihowah yʋt ish a binila chi̱ hosh ish ia ka̱ yakni ya chishtona cha, oklushi laua, Hittait, micha Kikashait, micha Amolait micha Kananait, micha Pelisait, micha Hifait, micha Chebusait, oklushi untuklo hochito, micha kʋllo kʋt, chishno ya̱ chi̱ shahli ho̱ chi tikba ya akohchit kanchikmʋt;

² Micha chin Chitokaka Chihowah yʋt chi tikba ya̱ chibbak fohkikma, issot ish kanchi, mosholichit ish kanchit ish ʋmohmichashke, nan ish itim apesa he keyu, micha ish i̱ nukha̱kla he keyu hoke;

³ Micha ish itauwaya he keyu; chiso tek a̱ ushi ya̱ ish i̱ bohla he keyu, micha ushetik a̱ im ai ishit chiso ha̱ ish ima he keyu hoke.

⁴ Chiso hʋt si akaiya ya tuk a̱ fullolichi na, na holbʋt toba puta inla yak o̱ ai okpʋcha chi̱ hoke; yohmi ho̱ Chihowah im ai i̱ nukkilli ʋt chi̱ sanalit libbi cha, yakosi itin takla kia ishit chi kancha hi oke.

⁵ Amba yakohmichi hosh hʋsh yʋmihcha hi oke: im alta puta hoka okpʋnit hʋsh tahli cha, im in chu̱wʋt naholbʋt toba puta ka̱ chanlit hʋsh kinahlichashke, micha im iti lokoli puta hoka chanlit hʋsh kinahlichi cha, im i̱ chu̱wʋt na holbʋt toba puta ka̱ luak ishit hukmit hʋsh tahlashke.

⁶ Chin Chitokaka Chihowah ya̱ im okla holitopa chia hoka; chin Chitokaka Chihowah yʋt okla moma yakni paknaka aiasha ka̱ i̱ shahlit immi atokowa chia ha chi̱ ho̱ atokolit chishi tok.

⁷ Laua kʋt okla inla ya̱ hʋsh i̱ shahli kak o̱, Chihowah yʋt hʋchi̱hullot hʋchi atokoli tok keyu; okla laua kʋt okla moma ka̱ hʋchik lauwo ke tuk oka.

⁸ Amba Chihowah yʋt hʋchi̱ hullo kak a tok, micha hʋchi̱ki ʋhleha anumpa kʋllo im ilonochi tok ʋt a̱hlicha he ahni pulla kak osh, ibbak kʋllo hosh pehlichit hʋchi kohchi tok oke; micha hatak yuka hosh aboha hʋsh aiasha tuk a Echip i̱ mi̱ko Falaoh ibbak a̱ kohchit hʋchi okchalinchi tuk oke.

⁹ Yʋmohmi hoka ish ithaiyana, Chihowah chin Chitokaka ak osh Chitokaka, micha Chitokaka aia̱hlichi ʋt holitobli cha, im anumpa ha̱ ieshikma, nan itim apesa, micha nan isht i̱ nukha̱klo ya̱ ai iti shali tahlepa sipokni hoh kia im iesha hi oke.

¹⁰ Micha i̱ nukkilli puta ka̱ pisanchi hosh im atobbi cha, ishit kancha hi oke: i̱ nukkilli tuk a̱ i̱ sʋlaha he keyu, pisanchi hosh im atobba hi oke.

¹¹ Yʋmohmi hoka anumpa ʋlhpisa puta, nan ʋlhpisa bilia, ai ʋlhpiesa yʋmihinchi, himak nitak a̱ chi̱ miha li ka̱ ish ieshi cha, ish yʋmi̱hinchashke.

¹² Yʋmohmi kak o̱ yakohma hi oke, aiʋlhpiesa yʋmi̱hinchi ilʋppa puta ka̱ haklot hʋsh ieshi cha, hʋsh yʋmi̱hinchikma, chin Chitokaka Chihowah yʋt chi̱ki ʋhleha anumpa kʋllo im ilonochi tok ʋt nan itim apesa, micha isht i̱ nukha̱klo aiena ka̱ hʋchim iesha hi oke.

¹³ Micha chi holitobla hi oke, micha chi yukpala hi oke; micha chi apaknʋcha hi oke; micha chim oshʋto awaya, micha chi̱ yakni awaya, chim onush, micha chim oka pa̱ki, micha chi̱ bila, chi̱ wak awaya, micha chi̱ nanʋlhpoa chipunta puta aiena ka̱, yakni yo̱ chima he yash chi̱ki ʋhleha ha̱ anumpa kʋllo im ilonochi tok ʋt a na chi yukpa lashke.

¹⁴ Na yukpa kʋt okla moma ka̱ ish i̱ shahla hi oke: a hʋchiti takla ka̱ nakni yokmá, tek okmá, nana kia, micha hʋchi̱ nan ʋlhpoa ai iti takla ka̱ ushi iksho ʋt iksho ka hi oke.

¹⁵ Mikma Chihowah yʋt abeka puta moma ka̱ chim ai ishit kancha hi oke; micha Echip nan ililli okpulo, yʋmma ish ithana ka̱ chi onocha he keyu hoke; amba chi̱ nukkilli moma kak o̱ onocha hi oke.

¹⁶ Micha okla moma chin Chitokaka Chihowah yʋt chibbak fohki tuk moma ka̱ mosholichit ish ʋmohmichashke; chi nishkin ʋt i̱ nukha̱kla he keyu, micha i̱ naholbʋt toba puta ka̱ ish im antia he keyu hoke; yʋmmak okʋt ishit chi̱ nukpʋllichi ya hi oka.

¹⁷ Chi chu̱kʋsh anu̱kaka, Oklushi puta ilʋppa laua kʋt a̱ shahli hoka: katiohmi li kak osh kanalichi la hinla cho? ish achikmʋt,

¹⁸ Ish i̱ nukshopa he keyu hoke; amba chin Chitokaka Chihowah yʋt Falaoh, micha Echip moma ka̱ i̱ kaniohmichi tok a̱ ish ithaiyana fehna chi̱ hoke;

¹⁹ Imomaka pisa puta chi nishkin ʋt pisa tok, micha nan isht atokowa puta, nan isht a fehna puta, micha ibbak kʋllo, micha shakba ashatapa hosh chin Chitokaka Chihowah yʋt ishit chi pehlichit kohcha tok a̱ ish ithaiyanashke: yʋmma chi yuhmi hosh chin Chitokaka Chihowah yʋt okla ish i̱ nukshopa puta ka̱ yʋmihcha hi oke.

²⁰ Micha chin Chitokaka Chihowah yʋt fohkul a̱ i̱ pilakma, hlako̱ffi tuk, micha chim ile luhmi tuk ʋt moshola hi oke.

²¹ Ish i̱ nukshopa he keyu: chin Chitokaka Chihowah yʋt Chitokaka kʋllo, micha palʋmmi hosh hʋchi takla ahanta hoka.

²² Micha chin Chitokaka Chihowah yʋt oklushi yʋmma puta ka̱ kanomosichit, micha kanomosichi hosh ishit kancha chi̱ hoke: himona achʋfa tahlit ish mosholicha he keyu, yakni haiaka nampoa hʋt apaknʋt chi̱ sanala hinla hoke.

²³ Yohmi kia chin Chitokaka Chihowah yʋt chibbak fohka chi̱ hoke; micha okpulot taha chinto ho̱ yʋmihchit ishit kanchi na, ont moshola chi̱ hoke.

²⁴ Micha i̱ mi̱ko ʋhleha ha̱ chibbak fohkikma, shutik nutaka ya̱ hohchifo ha̱ mosholichit ish kancha chi̱ hoke: hatak nana kia chi tikba ya̱ hikia he keyu ho̱, ish mosholicha hi oke.

²⁵ I̱ na holbʋt toba, in chu̱wʋt toba puta ka̱ luak ishit hukmit hʋsh tahlashke: tʋli hʋta, micha tʋli lakna aiena alapali ka̱ ish ahna he keyu, micha ish il ai isha he keyu, ish yohmi cha, ishit ish yoshoba na; chin Chitokaka Chihowah nan i̱ yuwala yoka.

²⁶ Micha nan i̱ yuwala ya̱ chim aboha isht ish ona he keyu hoke; ish yohmi na kalakshi yʋmmak inli ish chohmi na: amba shitilemʋt ish kaiyanchi cha, yuwalʋt ish ʋmohmicha hi oka, na kalakshi yoka.