Tutelonomi 6 - Chahta Holisso Holitopa 1886

¹ Yohmi ka̱ anumpa puta, micha nan ʋlhpisa bilia puta, micha ai ʋlhpiesa yʋmi̱hinchi ilʋppa puta hʋchim ʋlbʋcha he, Chitokaka hʋchin Chihowah yʋt anumpo̱honli na, yakni hʋsh aiasha chi̱ hosh hʋsh ia kʋt hʋsh a yʋmi̱hincha chi̱ kak a tok oke.

² Chitokaka hʋchin Chihowah ya̱ ish i̱ nukwia cha, i nan ʋlhpisa bilia moma ka̱, micha im anumpa chim anumpohonli li ka̱, chishno micha chiso, micha chiso ha̱ iso aiena kʋt chi okcha̱yʋt ish ahanta nitak moma kʋt ish ieshi cha, chi̱ nitak ʋt falaiashke.

³ Yʋmohmi hoka Islael ma, ish haiyaklashke, micha ithaiyanʋt, ish yʋmihchashke; yʋmohmi hosh chi̱ki ʋhleha ha̱ in Chitokaka Chihowah yʋt achit, im issa tok mak o̱, yakni pishukchi micha foebila ayanahanli ya̱ aiasha apaknʋt isht i̱ shahli fehnʋt hʋsh ma̱ha̱yashke.

⁴ Islael ma, hʋsh haklashke, Chitokaka pin Chihowah yʋt Chihowah achʋfa hoke.

⁵ Yohmi ka̱ Chitokaka chin Chihowah ya̱ chi chu̱kʋsh a̱ mominchit, micha chi shilombish ma mominchit, micha chi kʋllo ya̱ mominchit ishit ish holitoblashke,

⁶ Mikma anumpa ilʋppa himak nitak a̱ chim anumpo̱honli li kʋt, chi chu̱kʋsh a̱ foyukashke.

⁷ Yohmi ka̱ chim ʋlla ʋhleha ha̱ achunanchit ish im abʋchashke; micha chin chuka ish binilikmʋt, micha hina takla ish ayakmʋt, micha ish itoyulakmʋt, micha ish wakayakmʋt isht ish anumpo̱honlashke.

⁸ Micha nan isht atokowa yo̱ chibbak a̱ isht ish a tak chashke, micha bita hosh chi nishkin itin takla takali ka̱ chin chiyuhmashke.

⁹ Micha chin chuka toni̱k puta ka̱ micha chi̱ holihta okhissa puta ka̱ ish ai o̱ holissochashke.

¹⁰ Atukma yakohma hi oke, Chitokaka chin Chihowah yʋt yakni ya̱ chi̱ki ʋhleha Eblaham, micha Aisak, micha Chekob aiena ka̱ anumpa il o̱nochit im issa tuk ʋt chisht onakmʋt, tʋmaha holihta ho chito, micha hochukma aiokli ish ikbi tok keyu yo̱,

¹¹ Micha ish alotoli tuk keyu aboha puta nana achukma moma alota, micha ish kulli tuk keyu ho̱ kʋli hofobi kula, micha ish hokchi tuk keyu ho̱, pa̱kʋpi ahollokchi, micha alif iti puta aiena hʋchima na aiʋpʋt chikaiyakmʋt;

¹² Yʋmohmikmʋt ahah, ish ahnashke, keyukmʋt Chihowah ak osh Echip yakni, micha aboha a yuka pehlichit chi kuchi tuk a̱ chim ahaksa hinla hoke.

¹³ Chin Chitokaka Chihowah ya̱ ish i̱ nukwia cha, ish im antiashke, micha yʋmma hochifot anumpa kʋllo il onochit ish anumpulashke.

¹⁴ Naholbʋt toba puta, okla hʋchi apakfoyupa aiasha ka̱ i̱ naholbʋt toba puta ka̱ iakaiyʋt hʋsh ia he keyu hoke.

¹⁵ Chin Chitokaka Chihowah yʋt Chitokaka nukta̱hla yosh hʋchi takla ahanta hoka; keyukmʋt, chin Chitokaka Chihowah im ai i̱nukkilli ʋt chi̱ sanalit libbi na, yakni pakna ya̱ ai okpuloka hʋchi taha yoba ná.

¹⁶ Massah ya̱ ai imoma ka̱ hʋsh pisa tuk a̱ chohmit, hʋchin Chitokaka Chihowah ya̱ imomaka chik peso kashke.

¹⁷ Hʋchin Chitokaka Chihowah im anumpa ʋlhpisa puta, micha i̱ nan isht atokoli puta micha i̱ nan ʋlhpisa bilia aiena chim anumpuli tuk a̱ achunanchi hosh hʋsh ieshashke.

¹⁸ Micha Chihowah itikba ya̱ nana ai ʋlhpiesa micha achukma kak o̱ ish yʋmihchashke; yohmi hosh hʋchim achukma̱kashke, micha yohmi hosh Chihowah yʋt chi̱ki ʋhleha ha̱ anumpa kʋllo ilonochit im issa tok yakni achukma ya̱ chukowʋt ish abinilashke,

¹⁹ Chihowah yʋt anumpuli tok mak osh, chin tʋnʋp ʋhleha moma ka̱ chi tikba akohchit kanchashke.

²⁰ Atuk o̱ nitak inla ʋla ha ya̱, chiso hʋt chim ponaklot, iban isht atokowa micha nan ʋlhpisa bilia, micha ai ʋlhpiesa yʋmi̱hinchi ilʋppa puta aiena pin Chitokaka Chihowah yʋt pim apesa tok, nanta ho̱ miha hoh cho? achikma,

²¹ Yʋmohmikma, chiso hash, Echip yakni a̱ Falaoh i̱ yuka hosh il aiasha tok; atuk o̱ Chihowah yʋt ibbak kʋllo hosh Echip a̱ apehlichit pi kohchi tok.

²² Micha Chihowah yʋt nan isht atokowa, micha na fehna chinto micha palʋmmi ho̱, Echip, micha Falaoh, micha in chuka achʋfa moma aiena ka̱ e pi̱sa ho̱ onochit otʋni̱hinchi tok.

²³ Micha pi̱ki ʋhleha ha̱ anumpa kʋllo im ilono̱honchi tuk mak osh, pisht ʋla cha, yakni ya̱ pima chi̱ hosh yʋmma pi pehliechit pi kohchi tok.

²⁴ Micha Chihowah yʋt pim apesʋt, nan ʋlhpisa bilia ilʋppa moma e yʋmihcha he ishit pim aiachukma̱ka na bilia chi̱ kʋt, pin Chitokaka Chihowah ya̱ il i̱ nukshoyupa he a̱, achi tok; yohmi hosh pi okchalincha he a tok o̱ himak nitak a̱ ayʋmohmi hoke.

²⁵ Mikma ilʋppa puta moma ka̱ pi̱ miha tok mak o̱, ithanʋt e yʋmi̱hinchikmʋt, pim ai ʋlhpiesaka ya chi̱ hatok oke, ish im achashke.