Tutelonomi 5 - Chahta Holisso Holitopa 1886

¹ Mihma Moses ʋt Islael moma ka̱ hoyo cha, Islael ma, nan ʋlhpisa bilia puta, micha aiʋlhpiesa yʋmi̱hinchi puta hʋsh ha̱klo ho̱, himak nitak a̱ anumpo̱honli li ka̱ hʋsh haklashke; yʋmohmi hosh hʋsh ithana cha, ieshit hʋsh yʋmi̱hinchashke.

² Pin Chitokaka Chihowah yʋt pishno ak o̱ Holeb a̱ nan a pitim api̱hi̱sa tok oke.

³ Chihowah yʋt pi̱ki ʋhleha ilʋppa nan itim api̱hi̱sa tok keyu; amba pishno ya̱ pishno fehna kak a tok o̱, himak nitak a̱ pi okcha̱ya hosh momʋt ilʋppa il aiashʋshke.

⁴ Chihowah yʋt nashuka iti̱ sanali hosh nʋnih ha̱ luak iklʋnna et hʋchim ai anumpohonlit,

⁵ (Luak pulla kak o̱ hʋchi nukshopa cha, nʋnih ha̱ hʋsh oiya he keyu ma, ʋno ak osh nitak yʋmma Chihowah micha, hʋchishno ya̱ hʋch itin takla hikiʋt Chihowah im anumpa ha̱ hʋchim ano̱honli li tok oke,)

⁶ Ʋno ak osh chin Chitokaka Chihowah sia hosh, Echip yakni, micha aboha a yuka chi pehlichit a kohchi li tok oke.

⁷ Sa tikba ya̱ Chitokaka inla yʋt ik chim iksho kashke.

⁸ In chu̱wʋt na holbʋt toba, micha nana kia, ʋba yakni a̱sha, keyukmʋt nutaka yakni a̱sha, keyukmʋt yakni nutaka oka aiasha yʋmma holba kia chik ik bo kashke.

⁹ Aka pit ish im akachunola he keyu, micha ish im antia he keyu: Chitokaka chin Chihowah sia hʋt, Chitokaka nukta̱ha̱hla sia hosh, i̱ki ʋhleha nan ashʋchi yash im ʋlla ʋhleha hʋt ai iti shali ont isht atuchina, micha ont isht ai ushta kia a̱ nukkilli ka̱ im a̱ya li hoke.

¹⁰ Micha tahlepa sipokni hoh kia sa holitobli cha, ʋm anumpa ha̱ ʋm anti̱hi̱ya ya̱ i̱ nukha̱klo li hoke.

¹¹ Yʋmmakfokalechit chin Chitokaka Chihowah hohchifo ka̱ ish hochifa he keyu hoke; hohchifo ha̱ yʋmmakfokalechit hochifo tukma nan ik ashacho, Chihowah yʋt ahna he keyu hoka.

¹² Chitokaka chin Chihowah chim achi tuk mak o̱, nitak hullo nitak a̱ holitoblit ish hullochashke.

¹³ Nitak hannali ho̱ ish toksʋli cha, chi̱ na pilesa moma ka̱ ish yʋmihchashke.

¹⁴ Amba nitak isht untuklo hokʋto Chitokaka chin Chihowah i̱ nitak hullo yoke: yʋmmak okʋno chishno, micha chiso, micha chiso tek, micha hatak chin tishu, micha ohoyo chin tishu, micha chi̱ wak toksʋli, micha chim issnba nashoba, micha chi̱ nan ʋlhpoa nana kia, micha hatak ik ithano yosh chi̱ holihta okhissa chi̱ hikia kia na pilesa nana kia yʋmihcha he keyu; yʋmohmi ho̱ hatak chin tishu, micha ohoyo chin tishu aiena kʋt chishno ak inli chohmit fohashke.

¹⁵ Micha chishno yak kia Echip yakni ya̱ tishu chia ha tok, atuk o̱ Chitokaka chin Chihowah yʋt ibbak kʋllo, micha shakba ashatapa hosh yʋmma chi kohchi tok a̱ ish ithaiyanashke: yʋmohmi hatuk osh Chitokaka chin Chihowah yʋt nitak hullo nitak a̱ ish holitobla he a̱ chim apesa tok oke.

¹⁶ Chitokaka chin Chihowah yʋt chim achi tuk mak o̱, chi̱ki, micha chishki ya̱ ish holitoblashke; yʋmohmi ho̱ yakni Chitokaka chin Chihowah yʋt chima tok a̱ ish aiahanta he a̱ nitak ʋt chin lauashke, micha chim ai achukma̱kashke.

¹⁷ Kʋna kia ish bi ná,

¹⁸ Micha kʋna kia ish itin luma̱ka ná,

¹⁹ Micha ish hu̱kopa ná,

²⁰ Micha chin chuka a bili̱ka hatak ahanta ka̱ anumpa a̱hli keyu ka̱ isht chik atokolo kashke.

²¹ Micha chin chuka a bili̱ka hatak tekchi ya̱ ish ahni na, micha chin chuka a bili̱ka hatak in chuka, im osapa, keyukmʋt in tishu hatak, keyukmʋt in tishu ohoyo, i̱ wak toksʋli, im issuba nashoba, keyukma nana kia chin chuka a bili̱ka hatak immi hokma, hʋchik im anushkunno kashke, ahanchi tok.

²² Anumpa ilʋppa puta kak o̱ Chihowah yʋt chim okla moma ka̱ nʋnih ha̱, luak, micha hoshonti, micha okhlili sukko ka̱ ai iklʋnna chitoli hosh et ai im anumpohonli tok; mihmʋt himakma ik achakalo tok, Mihmʋt tʋli patʋssa tuklo ho̱ ai o̱holissochi cha, sʋbbak fohki tok.

²³ Atuk o yakohmi tok ai okhlilika iklʋnna ya̱ et ai anumpa na ish haklo mʋt, (nʋnih hʋt luak ishit lua tuk oka,) yohmi ma hʋchim apehlichika noshkoboka ʋhleha, micha hʋchim asʋnonchi ʋhleha aiena kʋt a̱ bili̱ka hʋshla tok.

²⁴ Micha, Yakeh, pin Chitokaka Chihowah yʋt im aholitopa, micha nan isht im aia̱hli ataha iksho pi pesʋchi hoke; mikma luak iklʋnna ya̱ im anumpa ha̱ il a ha̱ha̱klo tuk oke; Chitokaka yʋt hatak a̱ im anumpuli kia okcha̱ya hinla ka̱ himak nitak a̱ e pisʋshke.

²⁵ Yʋmohmi hoka nanta katiohmi ho̱ himak a̱ pilla hinla cho? luak chito ilʋppʋt hukmit pi tahla chi̱ hoke. Himak ma Chitokaka pin Chihowah im anumpa ha̱ e haklokmʋt pilla chi̱ hoke.

²⁶ Hatak nipi moma ka̱ kʋta hosh Chihowah okcha̱ya yosh luak iklʋnna et ai anumpohonli na haklo pishno chohmi mʋt okcha̱ya chatuk atuma?

²⁷ Chishno ak osh bili̱ka ish ona cha, Chitokaka pin Chihowah yʋt nana achi moma ka̱ ish haklashke; micha Chitokaka pin Chihowah yʋt nana chim achi moma ka̱ ish pim anumpulashke; mikma e haklo cha, e yʋmihchashke, hʋs sʋm achi tok.

²⁸ Mihma Chihowah yʋt chim anumpa hʋs sʋm anumpuli ka̱ ha̱klo tok; micha Chihowah yʋt, Okla ilʋppʋt anumpulit chim anumpuli ha̱ haklo lishke: nana moma achi kʋt ʋlhpesa bano ho̱ achishke.

²⁹ Chu̱kʋsh ʋt yakohmi nukfoyuka tuk okbano, yohmi hosh a̱ nukwia cha, ʋm anumpa ʋlhpisa moma ka̱ ieshi na, bilia cha, yʋmma mihcha im ʋlla ʋhleha aiena kʋt im ai achukma na, biliakbano ahnit ʋm achi tok.

³⁰ Ia cha, anonti hʋchi̱ bina im aiyukali hʋsh onashke, ont ish im achashke,

³¹ Amba chishno ʋto a̱ bili̱ka ilʋppa ish hikiakma, anumpa moma micha nan ʋlhpisa bilia, aiʋlhpiesa yʋmi̱hinchi puta ka̱ chim anumpohonli likma, yʋmmak oka ish im abʋchikma aiasha chi̱ ka, yakni ima li tok a̱ aiashʋt yʋmihinchashke, im achi tok.

³² Yʋmohmi hoka, Chitokaka hʋchin Chihowah yʋt hʋchim apesa tuk mak o̱ hʋsh ithaiyana cha, hʋsh yʋmi̱hinchashke; fullotʋt naksika isht impakimma, micha ʋlhfʋbekimma pit hʋsh fullota he keyu hoke.

³³ I̱ hina puta Chitokaka hʋchin Chihowah yʋt hʋchim api̱hi̱sa tuk mak o̱ hʋsh ai itanowa cha, hʋchi okcha̱yashke, micha hʋchim ai achukmashke, micha yakni hʋsh aiasha chi̱ ka̱, hʋsh aiasha kʋt nitak ʋt hʋchi̱ falaiashke, achi tok.