Tutelonomi 4 - Chahta Holisso Holitopa 1886

¹ Yʋmohmi hoka Islael ma, himak a̱ nan ʋlhpisa, micha aiʋlhpiesa yʋmihinchi hʋchim abʋchi li ka̱ hʋsh yʋmihcha chi̱ kʋt, hʋsh haklashke; yʋmohmi hosh hʋchi okcha̱ya cha, hʋchi̱ki ʋhleha in Chitokaka Chihowah yʋt yakni chima tok a̱ chukowʋt hʋsh a binilashke.

² Anumpa hʋchim apesa li tuk a̱ hʋsh ibafohka he keyu, micha hʋsh ola taklʋcha he keyu; yʋmohmi hosh hʋchin Chitokaka Chihowah i̱ nan ʋlhpisa puta hʋchim apesa li tuk a̱ hʋsh holitoblashke.

³ Baal‐peo pulla ho̱ Chihowah yʋt kaniohmichi tuk a̱ hʋchi nishkin ʋt pi̱sa tuk oke; chin Chitokaka Chihowah yʋt hatak Baal‐peo iakaiya tuk moma ka̱ hʋch itin takla ya̱ ai ishit kanchi tuk oka.

⁴ Amba hʋchin Chitokaka Chihowah ya̱ hʋsh asitia tok ʋto hʋsh moyuma kʋt himak nitak a̱ hʋchi okcha̱yʋshke.

⁵ Yakeh, yakni yʋmma hʋsh ia kʋt, hʋsh binilikmʋt, hʋsh yʋmihcha chi̱ ho̱, an Chitokaka Chihowah yʋt ʋm apesa tuk mak o̱, chohmit, nan ʋlhpisa, micha aiʋlhpiesa yʋmihchi puta ka̱ hʋchim abʋchi li tuk oke.

⁶ Yʋmohmi hoka hʋsh holitobli cha, hʋsh yʋmihchashke; ilʋppak osh oklushi puta nan ʋlhpisa ilʋppa haha̱klokmʋt, Oklushi chito ilʋppʋt okla hopoyuksa, micha nan ithana a̱hli yoke, chi acha he, itikba ya̱ hʋsh apoyuksa, micha na hʋsh ithaiyana hokʋt.

⁷ Oklushi nanta hak osh holitopa kʋt yakohmi hotuma? yʋmma in Chitokaka yʋt pin Chitokaka Chihowah ya̱ nana moma ka̱ il im asilhha chatuk a̱ i̱ bilinchi hʋt chohmi hotuma?

⁸ Micha oklushi nanta hak osh holitopa kʋt yakohmi cha, nan ʋlhpisa, micha aiʋlhpiesa yʋmihchi aiena kʋt ʋlhpesa fehna, nan ʋlhpisa ilʋppa moma himak nitak a̱ chi tikba hilechi li ka̱ chohmi kʋt in tonla hotuma?

⁹ Peh ahah, hʋsh il ahni cha, hʋchimi shilombish a̱ achunanchit hʋsh ieshashke, keyukmʋt, nana puta hʋchi nishkin ʋt pi̱sa tuk ʋt hʋchim ahaksi ná, micha chi okcha̱ya nitak moma ka̱ hʋchi chu̱kʋsh a̱ akohchʋt kʋnia na: amba chiso puta, micha chiso ha̱ ushi puta ka̱ ish im abʋchashke.

¹⁰ Micha Holeb a̱ hʋchin Chitokaka Chihowah itikba ya̱ hʋsh hieli tok nitak fehna ka̱ hʋsh ithanashke; Chihowah yʋt ʋm achi mʋt, Okla ha̱ is sʋm ai itʋnahlashke, mikma ʋm anumpa ha̱ haklochi lashke, yohmi ho̱ nitak moma okcha̱yʋt yakni paknaka aiasha takla kʋt, a̱ nukwia he osh ithana cha, im ʋlla ʋhleha ha̱ im abʋchashke, achi tok.

¹¹ Mihma bili̱ka onʋt, nʋnih nutaka ya̱ hʋsh hieli tok; mihma nʋnih hʋt luak ishit lua hosh shutik iklʋnna ona ma, okhlili, hoshonti, micha okhlili sukko aiena tok.

¹² Mihma Chihowah yʋt luak iklʋnna et a hʋchim anumpuli tok; anumpa ola hokʋno hʋsh haklo tok, yohmi kia na holba ka̱ hʋchik peso tok; peh ola kak illa ho̱ hʋsh haklo tok.

¹³ Micha i̱ nan itim apesa hʋsh yʋmihcha chi̱ ho̱ hʋchim apesa tok, nan ʋlhpisa pokoli ka̱ hʋchim anoli tuk oke; micha tʋli patʋssa tuklo ho̱ ai o̱ holissochi tok.

¹⁴ Mihma nitak yʋmma nan ʋlhpisa, micha aiʋlhpesa yʋmihinchi ya̱ yakni yʋmma onʋt hʋsh a binilikmʋt hʋsh yʋmihcha he yo̱ hʋchim abʋchi la chi̱ ka̱, Chihowah yʋt ʋm apesa tok.

¹⁵ Yʋmohmi hoka, ahah, hʋsh ibai ahni fehnashke; nitak yʋmma Chihowah yʋt Holeb a̱ luak iklʋnna ho̱ et hʋchim ai anumpuli ma, na holba nana kia hʋsh pi̱sa tok keyu hokʋt;

¹⁶ Keyukmʋt hʋsh il okpʋni cha, tʋhlʋt na holbʋt toba ikbit na pisa kaniohmi, nakni, keyukmʋt, tek nana kia holba;

¹⁷ Nampoa yakni paknaka aiasha holba, hushi sanachi a̱sha helit ʋba itanowa holba,

¹⁸ Nana kia yakni pakna om balahanli holba, nʋni nana kia yakni nutaka oka ai itanowa holba ya̱ hʋchik bo kashke;

¹⁹ Micha keyukmʋt, hʋchi nishkin a̱ shutik pilla aka chakalichi cha, hʋshi micha hʋshi ninak a̱ya, micha fochik puta, ʋba nana moma fehna ka̱ hʋsh pisakmʋt, yʋmmak oka chin Chitokaka Chihowah yʋt oklushi puta ʋba moma nuta ka̱ im ita kashʋbli tok a̱, yoshoba cha aiokpʋchit hʋsh im antia na.

²⁰ Amba Chihowah yʋt hʋchishno ya̱ hʋch ishi cha, tʋli abila Echip fehna ka̱ hʋchi kohchi kʋt, okla immi ha chi̱ ha tok o̱, hima̱k nitak a̱ hʋsh yʋmohmishke.

²¹ Micha Chihowah yʋt hʋchishno ak a tuk pulla mak o̱, a̱ nukhobela cha, anumpa kʋllo anumpulit, Chatan a̱ ak hlopullo ka he, micha yakni achukma yʋmma hʋchi̱ yakni ya̱ chi̱ ho̱ chin Chitokaka Chihowah yʋt hʋchima tok a̱ ak chukowo ka chi̱ miha tok,

²² Amba yakni ilʋppak o̱ a sʋlla chi̱ hoke, Chatan a̱ hlopulli la he keyu hoke; amba hʋchishno ʋto hʋsh hlopulli cha, yakni achukma yʋmma hʋsh iesha chi̱ hoke.

²³ Ahah, hʋsh il ahnashke; keyukmʋt nan itim apesa yʋmma hʋchin Chitokaka Chihowah yʋt hʋch itim apesa tok a̱ hʋchim a haksi cha, tʋhlʋt na holbʋt toba, keyukmʋt nana kia holba yʋmma chin Chitokaka Chihowah yʋt hʋchim olʋbi tok a̱ hʋsh ikbi ná,

²⁴ Chin Chitokaka Chihowah yʋt luak na hushmit tahli, Chitokaka nukta̱ha̱hla yoka.

²⁵ Hʋchim ʋlla ʋhleha hʋt, micha ʋlla ʋhleha hash im ʋlla ʋhleha hʋt hʋchim a̱sha cha, yakni ya̱ hʋsh a̱sha hopakit taiyahakmʋt, hʋsh il okpʋnit tʋhlʋt na holbʋt toba, keyukmʋt nana kia holba hʋsh ikbi cha, chin Chitokaka Chihowah itikba ya̱ nana ik achukmo ka̱ yʋmohmit hʋsh nokowʋchikmʋt;

²⁶ Yakni ya̱ hʋsh isha chi̱ hosh Chatan a̱ hʋsh hlopulla chi̱ kʋt, chekusi a chukillissʋt, hʋsh ʋmohma he ya̱; himak nitak a̱ ʋba yakni, micha yakni aiena kʋt hʋchi atokola chi̱ ho̱ pit hoyo lishke; nitak falaiachit, hʋsh o̱ aiasha he keyu, amba mosholit, hʋsh ʋmohma hi oke.

²⁷ Mikma Chihowah yʋt oklushi puta ka̱ a hʋchi ita fimma hi oke: mikma Chihowah ik ithano okla ai iti takla yʋmma Chihowah yʋt hʋch isht a̱ya ka̱ holhtina kʋt ik lauo hosh hʋsh aiasha hi oke.

²⁸ Mikmʋt yʋmma na holba puta hatak ibbak osh toksʋli tuk, iti, micha tʋli, na pisa he keyu, micha hakla he keyu, micha impa he keyu, micha hu̱wa he keyu aiena yak o̱ hʋsh im antia hi oke.

²⁹ Yohmi tuk kia yʋmma a̱shʋt chin Chihowah Chitokaka ya̱ ish hoyokmʋt, chi chu̱kʋsh a̱ mominchit, micha chi shilombish a̱ mominchit hʋsh hoyokmʋt, hʋsh ahayucha hi oke.

³⁰ Chilbʋshakmʋt nitak ishtaiopi fehna ka̱ nana ilʋppa puta kʋt hʋchi onʋtolakmʋt, falamʋt chin Chitokaka Chihowah ya̱ ish im ona cha, im anumpa ha̱ ish im antiakma:

³¹ (Chin Chitokaka Chihowah yʋt nan i̱ nukha̱klo Chitokaka yokʋt) chi kancha he keyu hoke, micha ishit chi ʋmohmicha he keyu hoke, micha hʋchi̱ki ʋhleha ha̱ anumpa kʋllo im il onochit nan itim apesa tuk ʋt im a haksa he keyu hoke.

³² Himak a̱ nitak ant ia tok, yʋmmʋt chi tikba ya tuk, Chitokaka yʋt hatak ikbit yakni paknaka ya̱ o̱ hilechi tok, nitak ʋhlit mihinti ka̱ ish a ponaklashke; micha shutik in tʋnnʋp achʋfa ʋttʋt ia hosh in tʋnnʋp ont ʋhli ka̱ ish aponaklashke, nana chito ilʋppa chiyuhmi kʋt aiasha tok oh cho? keyukmʋt nana ilʋppa chiyuhmi ka̱ haklo tok oh cho?

³³ Okla hʋt himonna kia hʋsh haklo tuk a̱ chohmit Chitokaka yʋt luak iklʋnna ho̱ et im anumpo̱honli na, haklo mʋt okcha̱ya tuk oh cho?

³⁴ Ak cho? Chitokaka yʋt oklushi achʋfa ho̱ oklushi inla iklʋnna a kohchit il isha chi̱kmʋt im onʋt imomaka pisʋt, nan isht atokowa, micha na fehna, micha tʋnʋp, micha ibbak kʋllo hosh, micha shakba ashatapʋt nan isht nukhlakancha chinto, hʋchin Chitokaka Chihowah yʋt hʋchi nishkin itikba Echip a̱ hʋchi̱ yʋmihchi tok, chiyuhmichi tok oh cho?

³⁵ Hʋchishno ʋto Chihowah ak osh Chitokaka yoke, hʋsh ithaiyana chi̱ ho̱ hʋchi̱ haiakʋchi tok; yʋmma inla kʋt iksho hoke.

³⁶ Micha hʋsh ithaiyana chi̱ hosh im anumpa ha̱ ʋba pit a chi haklochi tuk oke: micha yakni paknaka in luak chito chi pesʋchi tuk oke; mihma im anumpa luak iklʋnna minti ka̱ ish haklo tuk oke.

³⁷ Micha hʋchi̱ki ʋhleha ha̱ holitobli ha tuk osh yʋmma iakaiya im isht atiaka atokoli tok: micha isht im aia̱hli kʋllo hosh itikba ya̱ Echip a̱ a kohchit chisht a̱ya tok;

³⁸ Oklushi hochito micha kʋllo kʋt hʋchi̱ shahli ho̱ i̱ yakni ʋt hʋchimmi ha chi̱ ho̱ hʋch isht chukowʋchi mʋt, hʋchi tikba tihlelit a kohchi tok a̱ himak nitak a̱ yʋmohmi hoke.

³⁹ Yʋmohmi hoka, himak nitak a̱ ish ithaiyanashke, micha chi chu̱kʋsh a̱ isht ish anukfillashke; Chihowah ak osh ʋba yakni, micha nutaka yakni aiena ka̱ yʋmmak osh Chitokaka yoke, inla kʋt iksho hoke.

⁴⁰ Yʋmohmi hoka i̱ nanʋlhpisa bilia, micha im anumpa puta himak nitak a̱ chim anumpo̱honli li puta ka̱ ish ieshashke: yʋmohmi ho̱ chishno micha chim ʋlla ʋhleha et chi akaiya aiena kʋt chim achukma̱kʋt ma̱ha̱yashke; micha chin Chitokaka Chihowah yʋt yakni chima tok a̱ ish aiasha kʋt nitak ish falaiachi na, biliashke, achi tok.

⁴¹ Yʋmohmi ma, Moses ʋt Chatan ola in tʋnnʋp hʋshi akochaka pilla ha̱ tʋmaha holihta tuchina ho̱ iti̱ filʋmmichi tok;

⁴² Yʋmmak o̱ hatak bi̱ka ʋbi yʋmmʋt ik nuktahlo hosh cha̱shpo ka̱ i̱ nukkilli chatuk keyu hosh in chuka a bili̱ka hatak o̱ ʋbikmʋt, yʋmma malelit ona chi̱ ha tok; micha malelit tʋmaha holihta puta ilʋppa achʋfa ka̱ onakmʋt okcha̱ya he a tok:

⁴³ Hohchifo kʋt Bese, yakni haiaka talaia, Lubenait ʋhleha i̱ yakni patali a̱ talaia; micha Katait ʋhleha i̱ yakni Kiliat talaia Lamolh; micha Manassait ʋhleha i̱ yakni Bashan talaia, Kolan aiena kak atok.

⁴⁴ Micha nan ʋlhpisa ilʋppak o̱ Moses ʋt Islael im ʋlla ʋhleha ha̱ itikba takalichi tok.

⁴⁵ Micha nan isht atokowa, micha nan ʋlhpisa bilia, micha anumpa ilʋppa puta aiena kak o̱ Moses ʋt Islael im ʋlla ʋhleha hʋt Echip yakni ya̱ kohcha ha ya̱ im anumpuli tok.

⁴⁶ Moses micha Islael im ʋlla ʋhleha aiena kʋt Echip yakni ya̱ kohcha ha yʋt issot kanchi tok, Amolait i̱ mi̱ko Sihon, yʋmmʋt Heshbon a̱ aiʋtta tok, i̱ yakni Belh‐peo ichapaka bachaya okfa Chatan ola in tʋnnʋp ak a tok:

⁴⁷ Micha i̱ yakni micha Bashan i̱ mi̱ko Ok i̱ yakni aiena a binili tok, Amolait i̱ mi̱ko tuklo, yʋmmʋt Chatan ola in tʋnnʋp hʋshi akochaka pilla ho̱ aiasha tok.

⁴⁸ Aloe yʋmmʋt Anon okhina ontalaka bili̱ka talaia ka̱ ʋttʋt ia hosh Sion nʋnih yʋmmʋt Hemon a̱ ont ʋhli,

⁴⁹ Micha Chatan ola in tʋnnʋp hʋshi akochaka pilla yakni patali moma, okhʋta yakni patali Piskah kʋli puta nutaka ont ʋhli tok a̱ abinili tok.