Tutelonomi 34 - Chahta Holisso Holitopa 1886

¹ Mihma Moses ʋt Moab yakni patali ya̱ ʋttʋt Nebo nʋnih chaha Piskah paknaka, yʋmmʋt Cheliko ichapaka ya̱ ona tok; mihma Chihowah yʋt Kileat yakni moma Tan ont ʋhli ka̱,

² Micha Naftali moma, micha Eflaim, micha Manasseh yakni, micha Chutah yakni moma okhʋta ont ʋhli fehna,

³ Micha oka‐mahli, micha Cheliko okfa yakni patali pam iti tʋmaha holihta Soa ont ʋhli ka̱ pisachi tok.

⁴ Micha Chihowah yʋt, Yakni ilʋppak o̱ Eblaham Aisak, micha Chekob aiena ka̱ anumpa kʋllo im ilonochit, chim ishtatiaka ya̱ ima la hi yoke, achi li tok mak oke: chi nishkin ishit chi pisachi lishke, yohmi kia pit hlopullit yʋmma ish ia he keyu hoke.

⁵ Yohmi hosh Chihowah im anumpa hatuk mak o̱, Chihowah in tishu Moses ʋt Moab yakni yʋmmak o̱ ai illi tok.

⁶ Mihma Moab yakni Belhpeo ichapaka okfa ho̱ ahohpi tok; yohmi kia im a hollohpi ya̱ kʋna ik ithano ho̱ himak nitak ant ai ʋhli hoke.

⁷ Yohmi ka̱ Moses ʋt illi mʋt, afʋmmi tahlepa achʋfa cha pokoli tuklo tok; nishkin ʋt illi keyu, micha nipi kʋllo kʋt tahʋt isht ik aiyo tok.

⁸ Mihma Islael im ʋlla ʋhleha hʋt Moab yakni patali Moses a̱ ai ishit yaiya na, nitak pokoli tuchina tok; atuk o̱ Moses a̱ ishit nishkin okchi mintit, ishit yaiyʋt aiasha tuk nitak ʋt ont taha tok.

⁹ Mihma Nʋn ushi Choshua hopoyuksa shilombish a̱ alotowa tok; Moses ʋt ibbak a̱ onochi tuk a tuk oka: mihma Islael im ʋlla ʋhleha hʋt i̱ haponaklo cha, Chihowah yʋt Moses a̱ tohno tok mak o̱, yʋmihinchi tok.

¹⁰ Yohmi ka̱ ola i̱ himmak minti ka̱ Moses a̱ chiyuhmi, yʋmmak oka Chihowah yʋt nashuka iti̱ sanalit ithana tok a̱ chiyuhmi kʋt hopaii ʋt wakayʋt ik hikiyo chatuk oke.

¹¹ Yohmi kʋt nan isht atokowa puta, micha nana afehna puta, yʋmmak oka Echip yakni Falaoh, micha in tishu ʋhleha moma, micha i̱ yakni moma aiena ka̱ onochit yʋmihcha chi̱ ka̱ Chihowah yʋt tohno tok.

¹² Micha ibbak kʋllo moma yʋmma, micha napalʋmmi chinto yʋmma, Islael moma kʋt pi̱sa ho̱ Moses ʋt haiakʋchi tok, (achi tok.)