Tutelonomi 33 - Chahta Holisso Holitopa 1886

¹ Micha nan isht yukpali Chitokaka im antia hatak Moses ʋt ik illo ki̱sha mʋt, Islael im ʋlla ʋhleha ha̱ isht yukpali tok.

² Micha Chihowah yʋt Sinai a minti tok, micha Sei yak o̱ i̱ wakaya tok, Palan nʋnih hak o̱ atohwikelit et a kohcha tok: micha saint ʋhleha tahlepa sipokni pokoli ho̱ pehlichit ʋla tok: ibbak isht impakimma ya̱ nan ʋlhpisa libbi ʋt ʋttʋt ia tok.

³ A̱hli, okla ha̱ i̱ holitopa tok, imi saint ʋhleha moma kʋt chibbak foyuka hoke, micha chiyi ituma chieya tok: moma kʋt chim anumpa ha̱ ai isha hi oke.

⁴ Moses ʋt nan ʋlhpisa pim apesa tok, Chekob okla moma immi ha chi̱ im aiʋlhpiesa.

⁵ Micha okla i̱ noshkoboka ʋhleha, micha Islael im apehlichi puta kʋt iti hoyot itʋnaha ma, Cheshulʋn a̱ mi̱kot ahanta tok.

⁶ Luben ʋt ik okcha̱ya cha, ik illo kashke; micha hatak ʋt ik i̱ kanomoso kashke.

⁷ Mikma ilʋppak osh Chutah nan isht aiyukpa yoke, micha Chutah ʋt anumpohonlikmʋt, Chihowah ma, im anumpa ha̱ ish haklo cha, im okla ha̱ isht ish im onashke; ibbak ak inli kʋt im ʋlhpesashke; apela chia hosh in tʋnʋp ʋhleha ha̱ ish i̱ hlakofichashke, achi tok.

⁸ Micha Lefai ano Chin Hlʋmmim, micha chim Ulim ak osh chi̱ holitopa takla yashke, yʋmmak oka Massa ya̱ ai i̱ momaka ish pisa tok; micha yʋmma Melibah oka ya̱ ish iti̱ kʋllo tok.

⁹ Yʋmmak osh i̱ki, micha ishki ya̱ pisa li tuk keyu, im achi tok: micha itibapishi ʋhleha ha̱ ik ithano, micha im ʋlla ʋhleha hak inli kash mih yoh ik acho tok: chi̱ nan ʋlhpisa ha̱ ithaiyana cha, chi̱ nan itim apesa ieshi ha tuk okʋt.

¹⁰ Nana chim ai ʋlhpiesa yʋmi̱hinchi ak o̱ Chekob a̱ im abʋcha chi̱, micha chi̱ nan ʋlhpisa Islael a̱ im abʋcha hi oke; na balama ya̱ chi tikba talalikmʋt, mominchit hukmit isht aiokpʋchi ya̱ chim alta ya̱ onocha hi oke.

¹¹ Chihowah ma, im ila̱yak a̱ ish yukpalashke, micha ibbak toksʋli tuk a̱ ish im aiokpʋchashke; i̱ sanalit wakayʋt hikia, micha i̱ nukkilli puta aiena in chʋshwa ya̱ nʋhlit ish hlopullichi na, anonti ik wakayo kashke, achi tok.

¹² Micha Benchamin ano, Chihowah i̱ holitopa ʋt achukma̱ka bili̱ka ai ahanta hi oke, micha Chihowah yʋt nitak moma ompohoma hi oke; mikma tahchi itin takla ya̱ ahanta hi oke, achi tok.

¹³ Micha Chosef ano, I̱ yakni ʋto Chihowah yʋt yukpali ashke, micha ʋba nan achukma puta, micha fichak, micha oka hofobi yakni nutaka et a tobo̱honli kak o̱,

¹⁴ Micha na waya holitopa puta hʋshi ʋt tobahanchi ya̱, micha nana holitopa puta hʋshi ninak a̱ya ʋt tobahanchi puta kak o̱,

¹⁵ Micha cha̱spo atok nʋnih chaha puta nan i̱ shahli kak o̱; micha nʋnih hikia na bilia puta nana holitopa aiasha kak o̱,

¹⁶ Micha yakni ya̱ na holitopa aiasha, micha isht alotowa aiena kak o̱, micha bʋfaha ya̱ ahanta tok ʋt aiokpanchi kak o̱, holitopashke, nan isht yukpali ʋt Chosef noshkobo ha̱, micha itibapishi ha̱ ila filʋmmi tok noshkobo paknaka ya̱ onʋtolashke.

¹⁷ Im aholitopa yʋt i̱ wak nakni ʋttahpi ak o̱ chohmi hoke, micha in lʋpish ʋt yunikon lʋpish ak o̱ chohmi hoke; yʋmmak o̱ okla ha̱ ishit toblit yakni atahaka ya̱ isht ona hi oke; micha yʋmmʋt Eflaim in tahlepa sipokni pokoli yoke, micha yʋmmʋt Manasseh in tahlepa sipokni yoke achi tok.

¹⁸ Micha Sebulon ano, Sebulon ma, Kohchʋt ish iakmʋt chi yukpashke; mikma Issaka yʋt chi̱ binah antʋt chi yukpashke, achi tok.

¹⁹ Okla ha̱ i̱ howʋt nʋnih ha̱ isht ona hi oke; yʋmmak o̱ aiʋlhpiesa nan ʋbit isht aiokpʋchi ai im issa hi oke; okhʋta hochito nan aiapakna, micha naholitopa luma shinuk aiasha ka̱ shu̱ka hi okʋt, achi tok.

²⁰ Mikmʋt Kat ano, Kat a̱ chitolichi hokʋt, holitopashke; koi chito chiyuhmi hosh ahanta cha, shakba, noshkobo tabokaka aiena ka̱ hlillichi tuk oke.

²¹ Micha ʋmmona ka̱ yʋmmak o̱ nan ʋlhpisa ima yʋt binilichi ha tuk oka, ila tahli tok; micha okla i̱ noshkoboka apehʋt ʋla tok; Chihowah im ʋlhpiesa, micha Islael a̱ aiʋlhpiesa i̱ yʋmihinchi ya̱ aia̱hlichi tok, achi tok.

²² Mikmʋt Tan ano, Tan ʋt Koi chito ushi yoke; Bashan a̱ ʋttʋt tolubla hi oke, achi tok.

²³ Mikmʋt Naftali ano, Naftali ma, im isht i̱kana ishit fihopa, micha Chihowah ishit yukpali isht alotowa yoke; hʋshi ai okatula, micha oka mahli ya̱ ish ishashke, achi tok.

²⁴ Mikmʋt Asha ano, Asha yʋt ʋlla ʋhleha ishit yukpashke; itibapishi ʋhleha hʋt aiokpanchit ishit yukpashke, mikma iyi ya̱ bila yo̱ a hilechashke.

²⁵ Chi̱ shulush ʋt tʋli, micha asonak lakna yashke; chim i̱ hlampko ʋt chi̱ nitak puta ka̱ chohmashke.

²⁶ Cheshulʋn in Chitokaka yʋmmak okʋt chi apela kʋt ʋba a̱ya im aholitopa ʋba ya̱ chohmi kʋt iksho hoke, achi tok.

²⁷ Chitokaka ahanta bilia ak osh ish aiatuko yoke; shakba ataha iksho yak osh nuta talaiʋshke; micha tʋnʋp a̱ chi tikba ya̱ kocha pit tobla chi̱ hoke, micha, Ishit kanchi, acha chi̱ hoke.

²⁸ Yohmikma Islael ʋt ilap bano hosh ai achukma̱ka ho̱ ahanta chi̱ hoke; Chekob i̱ kʋli ak osh yakni onush, micha oka pa̱ki ya̱ onʋtoyula chi̱ hoke; micha i̱ shutik ʋt fichak o̱ akʋcha chi̱ hoke.

²⁹ Islael ma na chi yukpashke, kʋta hosh Chitokaka okchalinchi chishno ya̱ chohmi cho? okla ma, yʋmmak osh chin tilehpa chi apela, micha yʋmmak osh bʋshpo falaia ishit chi a holitopa mak oke: chin tʋnʋp ʋhleha hʋt chi̱ holabi atuk o̱ pisa chi̱ hoke, mikma im achahaka puta ish ahʋhlicha chi̱ hoke, (achi tok.)