Tutelonomi 32 - Chahta Holisso Holitopa 1886

¹ Ʋba puta ma, hʋsh haklashke, mikma anumpule lashke, mikma yakni ma, sʋtih anumpa ha̱ ish haklashke.

² Ʋm anumpa hʋt umba chiyuhmit itola chi̱ hoke, micha ʋm anumpa hʋt fichak chiyuhmit chilofa chi̱ hoke, okshimi̱hinchi yosh haiyu̱kpulo waloha onʋtola kak o̱ chiyuhmi, micha umba hosh hʋshuk onʋtola kak o̱ chiyuhmi hoke.

³ Chihowah hohchifo kak o̱ anoli la chi̱ hokʋt; pin Chitokaka yo̱ isht a holitopa ya̱ hʋsh imashke.

⁴ Yʋmmak osh tʋli chito ak oke; nan isht ai ahanta yʋt ʋlhtaha hoke; nan im a kaniohmi puta kʋt aiʋlhpiesa hoke; Chitokaka ai a̱hli, micha nan ashʋchi iksho: aiʋlhpiesa, micha ʋlhpesa yoke.

⁵ Il okpʋni tuk oke; litelit takali kʋt im ʋlla ʋhleha liteli yo̱ keyu; ai itishali nan ashʋchi, micha shanaiowa ʋhleha ak oke.

⁶ Okla im anukfila iksho, micha ik hopoyukso ma; yʋmohmi hosh Chihowah ya̱ hʋsh im atobbi cho? chi̱ki yosh chi chumpa tuk keyu cho? chikbi cha kʋllochit chi hilechi tuk keyu cho?

⁷ Nitak cha̱shpo a tok a̱ ish ithaiyanashke, micha ai iti shali laua afʋmmi puta ka̱ ish anukfillashke; chi̱ki ya̱ ish i̱ ponaklashke, chi pisʋcha hinla hoke, mikmʋt chim asʋnonchi ma yʋmmak okʋt chim anola hinla hoke,

⁸ Chaha Moma i̱ Shahli ʋt oklushi puta ka̱ i̱ yakni ya chi̱ ho̱ ita kʋshkoli tok, Alam ushi ʋhleha ha̱ ita filʋmmichi mʋt, Islael im ʋlla ʋhleha ho̱lhtina ha tuk mak o̱, okla im ai ʋhli ya̱ apesa tok.

⁹ Chihowah immi hato im okla hak oke: im ai isha he ʋlhpesa yʋt Chekob ak oke.

¹⁰ Yakni chokushmi foka yo̱, micha yakni haiaka achukillissa, nampoa a woha ai ahayuchi tok; fullota hosh ilauelit isht a̱ya tok: im abʋchi tok, ilap nishkin lumbo ak o̱ im itilauit ieshi tok.

¹¹ O̱ssi yosh im ʋlhpichik a̱ koyohlit, ushi ya̱ paknaka hlopohʋchit, sanahchi ashatablit ishi sanahchi ya̱ ishit shaiyali chatuk ak o̱ chiyuhmit,

¹² Chihowah ak illa hosh ilaueli tok: mihma okla inla i̱ naholbʋt toba ʋt ik ibafoyuko tok.

¹³ Osapa nan awaya ka̱ ai ʋpa chi̱ kak o̱, yakni achahaka ya̱ om binilichi tok; micha tʋli chito foe‐bila yo̱, micha tasonak tʋli chito bila yo̱ a shu̱kʋchi tok.

¹⁴ Wak i̱ pishukchi nia, micha chukfi i̱ pishukchi, chukfushi nia aiena, micha Bashan aiʋlhpoa chukfi nakni, micha issi‐kosoma yosh haiyihchi nia aiena, micha onush aiena ho̱ ish impʋchi tok: mihma pa̱ki okchi a̱hli issish chohmi ka̱ ish ishko tok.

¹⁵ Yohmi tuk kia Cheshulʋn ʋt niʋt taha mʋt, hʋhli tok: chi niʋt tahʋshke, chi chitot tahʋshke, nia yosh ishit chi ompoholmoshke: yohmi mʋt ikbi tok Chitokaka ya̱ kanchi tok, micha aiokcha̱ya tʋli chito yosh ik ahobalo tok.

¹⁶ Okla inla i̱ naholbʋt toba ishit nuktahlali mʋt, na yuwala ya̱ ishit nukowʋchi tok.

¹⁷ Shilombish okpulo ak o̱ nan ʋbit isht aiokpʋchi tok, Chihowah ak a tok keyu; naholbʋt toba ithana ya tuk keyu, naholbʋt toba himona, himona yosh hikia tuk hʋchi̱ki ʋhleha hʋt i̱ nukshopa tok keyu ya tuk oke.

¹⁸ Tʋli chito chi tobachi tok ano chik anukfilloshke, micha chikbi tok Chitokaka ano issʋt ish kanchishke.

¹⁹ Atuk o̱ Chihowah yʋt pisa mʋt shitilema tok; ushi ʋhleha micha ushetik ʋhleha hʋt nokowʋchi ha tuk oka.

²⁰ Micha sa nashuka ya̱ in luhmi lashke: ishtaiopi kaniohmi na pisa lashke: ai itishali ila filimmi fehna, micha aiyimmi ka iksho ʋlla ʋhleha hoka.

²¹ Chihowah keyu ka̱ ishit sa nuktahlali tuk oke; i̱ na makali ya̱ ishit sa nokowʋchi tuk oke. Atuk o̱ ʋno ʋt okla keyu yo̱ ishit nuktahlali la chi̱ hoke; oklushi im anukfila iksho yo̱ ishit nokowʋchi la chi̱ hoke.

²² Sa nokowa ma luak ʋt libbi kʋt hukmit aiokpuloka aka pilla ishtona chi̱: micha yakni, nan awaya ai ona ka̱ hukmit tahli cha, nʋnih chaha puta in tola puta ka̱ luak tikelicha chi̱ hoke.

²³ Nana ik achukmo ka̱ o̱ fohobli la chi̱ hoka, ʋm oski naki ya̱ a tahli la chi̱ hoke.

²⁴ Hochʋfo ho̱ ishit lua he, micha naluachi lʋshpa yo̱ micha okpulot taha homi ho̱ ishit taha hi oke: micha nampoa noti, micha lukfi pushi sinti im isht illi aiena ka̱ on tihleli la hi oke.

²⁵ Kocha ya̱ bʋshpo falaia, micha anu̱kaka ya̱ komunta yosh hatak himita, micha ohoyo himita hatak ik halelo, micha pi̱shi hatak noshkobo tohbi aiena ka̱ ʋbit tahla hi oke.

²⁶ Ita fimmit achukbeli ya̱ isht ona lashke; ithaiyana ka̱ hatak ai itin takla ya̱ ai issʋchi lashke, achi li tuk oke.

²⁷ In tʋnʋp ʋhleha nukhobela ha tuk micha i̱ sanali ʋhleha hʋt kaniohmi kʋt inla fehna, micha pibbak ʋt chahʋshke, Chihowah ak osh ilʋppa moma ka̱ yʋmihchi tuk keyu hoke, acha he ak o̱, ik sa nukwio tuk okmʋt.

²⁸ Oklushi ahopoyuksa kʋt ik im iksho, micha nana ithana anukfoka keyu hokʋt.

²⁹ Hopoyuksa tuk okbano, ilʋppa ithana tuk okbano, im isht aiopa he ʋt anukfilli tuk okbano.

³⁰ Katiohmi kak osh achʋfa kia tahlepa sipokni hoh kia tihlela he tuk keyu? micha tuklokmʋt tahlepa sipokni pokoli kia tihlela he tuk keyu? in Tʋli chito yak osh kanchi tuk keyukma: micha Chihowah ak osh im okshita tuk keyukma?

³¹ In tʋli chito ʋt pin Tʋli chito ya̱ chohmi keyu hoka; pin tʋnʋp ʋhleha ak inli kʋt nan apesa hoka.

³² I̱ pa̱kʋpi ʋt Sotom i̱ pa̱kʋpi, micha Komolah osapa ak o̱ ai achʋfa chohmi hoka; i̱ pa̱ki ʋt basunlʋsh pa̱ki yoke, in lokoli ʋt homi hoke.

³³ Im oka pa̱ki ʋt sinti ʋt isht illichi, micha asp ʋt isht illichi isht ilbʋshali yoke.

³⁴ Ilʋppʋt ʋm ʋlhtahʋt an toyula keyu cho? micha ʋm ila̱yak takla ashanʋt itoyula keyu cho?

³⁵ Il aiokhʋt hotopali, micha falʋmminchit im atobbi ʋt ʋmmi hoke: ont aiʋlhpesakma iyi yʋt shakalʋlla hi oke; nan isht im aiokpuloka chi̱ nitak ʋt olanlosi hoke: micha nana onʋtola chi̱ kʋt tu̱shpa hoke.

³⁶ Chihowah yʋt im okla ha̱ nan im apesa chi̱ hoka; micha isht akʋllo ʋt i̱ kʋnia, micha im okshilita kʋt iksho, micha hlakofi kʋt iksho ma, pisa kak osh, in tishu ʋhleha ha̱ ishit i̱ nukha̱kla hi oke.

³⁷ Micha, I̱ naholbʋt toba puta, in tʋli chito anukchieto tuk.

³⁸ Yʋmmak osh i̱ nan ʋbit isht aiokpʋchi nia ʋpa tuk, micha ishko im issa oka pa̱ki yo̱ im ishko tuk mʋto? Wakaya cha chi apelashke, micha chi okchalinchi yashke, acha hi oke.

³⁹ Himak a̱ pisá, ʋno, ʋno fehna kak osh mih sia hoke, yohmi ka̱ naholbʋt toba yʋt sʋba foyuka keyu hoke: ʋbe li, micha okchalinchi li hoke; hotopali li, micha hlakofiche li hoke; mikma kʋna hosh sʋbbak a̱ akohchit hlakoficha he ʋt iksho hoke.

⁴⁰ Sʋbbak a̱ ʋba pit weli lish, Okcha̱yʋt ahanta li̱ bilia yoke, achi li hoke.

⁴¹ Am bʋshpo falaia shohkauali ya̱ halupʋchi likmʋt, micha sʋbbak a̱ nana apesa isht eshi likmʋt, an tʋnʋp ʋhleha ha̱ il aiokhʋt na hotopali onochi la chi̱ hoke: micha a̱ nukkilli puta ka̱ im atobbi la chi hoke.

⁴² Ʋm oski naki ya̱ issish a̱ ishit fihobli la hi oke: mikma a̱ bʋshpo falaia yʋt nipi ya̱ tahla hi oke, micha yʋmmʋt in tʋnʋp a̱ il ai okha ishtia ʋmmona ma illi tuk issish, micha yuka tuk ak a hi oke.

⁴³ Oklushi puta ma, im okla ta̱kla hʋchi yukpashke: in tishu ʋhleha im issish atuk a̱ ilai okha chi̱, micha i̱ sanali ʋhleha ha̱ ilai okhʋt nahotopa onocha chi̱; micha i̱ yakni micha im okla ha̱ i̱ nukha̱kla hi oka, achi tok.

⁴⁴ Mihma Moses micha Nʋn ushi Choshua ʋt ʋla cha, okla hʋt ha̱kla ho̱ taloa ilʋppa anumpa moma ka̱ anumpo̱honli tok.

⁴⁵ Mihmʋt Moses ʋt anumpa ilʋppa mominchit Islael moma ka̱ im anumpuli tuk ʋt ont tahli tok.

⁴⁶ Micha anumpa moma himak nitak a̱ hʋch iti takla ya̱ ai atokoli li ka̱ hʋchi chu̱kʋsh a̱ hʋsh onochashke, micha hʋchim ʋlla ʋhleha hʋt nan ʋlhpisa ilʋppa anumpa moma ka̱ ithanʋt yʋmihcha chi̱ ka̱ hʋsh i̱ mihashke.

⁴⁷ Nan ik ahobo hʋchi̱ nana keyu hoka; hʋchim ilhfiopak okʋt; nana ilʋppak o̱ yakni hʋsh isha chi hosh Chatan hʋsh hlopullit, yʋmma hʋsh ia kʋt nitak ishit hʋchi̱ falaia chi̱ hoke, achi tok.

⁴⁸ Nitak yʋmmak inli ma, Chihowah yʋt Moses a̱ im anumpulit,

⁴⁹ Nʋnih chaha Abalim ilʋppa oiyʋt Nebo bokko, yʋmmʋt Moab yakni hikia, Cheliko ichapaka ya̱ ish onashke; micha Kenan yakni Islael im ʋlla ʋhleha hak osh i̱ yakni ya chi̱ ho̱ ima li tuk a̱ ish pisashke.

⁵⁰ Micha chitibapishi Alon ʋt Ho nʋnih ha̱ ai illi cha, im okla ha̱ ibafohka tok a̱, chohmit nʋnih yʋmma pit ish oiya kʋt chilli cha chim okla ha̱ ish iba fohka chi̱ hoke.

⁵¹ Yakni haiaka Sin Melibah‐Katesh oka ya̱ Islael im ʋlla ʋhleha ha̱ ai iti takla ya̱ a̱ sanalit ish ʋbanʋbli tok okʋt, Islael im ʋlla ʋhleha ai iti takla ya̱ chik sa holitoblo tok okʋt.

⁵² Yohmi kia yakni ʋt chi tikba talaia na ish pisa chi̱ hoke; yohmi kia yakni Islael im ʋlla ʋhleha ima li tok a̱ yʋmma iʋt ish ona he keyu hoke, achi tok.