Tutelonomi 31 - Chahta Holisso Holitopa 1886

¹ Mihma Moses ʋt anumpa ilʋppa puta kak o̱ Islael moma ka̱ ont im anumpuli tok.

² Micha himak nitak a̱ afʋmmi tahlepa cha, pokoli tuklo li hoke; himakma kuhchʋt iʋt, ant chukowa la he keyu hoke; micha Chihowah yʋt Chatan ilʋppa ish hlopulla he keyu, a̱ miha ha tuk oke;

³ Chin Chitokaka Chihowah ak osh chi tikba iʋt hlopulli cha oklushi ilʋppa puta ka̱ chi tikba ai isht kancha chi̱ hoke, mikma ish isha chi̱ hoke: mikma Chihowah yʋt achi tuk mak o̱, Choshua yʋmmak osh chi tikba iʋt hlopulla chi̱ hoke.

⁴ Mikma Chihowah yʋt Amolait i̱ mi̱ko tuklo Sihon, micha Ok, micha i̱ yakni aiena yʋmmak oka ishit kanchi tuk ʋt chohmicha chi̱ hoke.

⁵ Micha Chihowah yʋt anumpa ʋlhpisa moma hʋchi̱ miha li tuk mak o̱, hʋsh yʋmihcha chi̱ ho̱, hʋchi tikba hʋchima chi̱ hoke,

⁶ Hʋchi kʋllashke, micha hʋsh aiyimitashke, hʋsh i̱ nukshopa na; chin Chitokaka Chihowah yʋmmak osh chi auwant ia hoka, ik chim ai a̱hlo ka he keyu, micha chi kancha he keyu hoke, achi tok.

⁷ Mihmʋt Moses ʋt Choshua ya̱ hoyo cha, Islael moma kʋt pi̱sa ho̱, Ish kʋllashke; micha ish aiyimitashke; okla ilʋppa pehlichit, Chihowah yʋt i̱ki ʋhleha ha̱ yakni ya̱ ima chi̱ hosh anumpa kʋllo im ilonochi tok a̱ ish onashke; micha ish a binilicha chi̱ hoke,

⁸ Mikma Chihowah yʋmmak osh chi tikba ia hoke, yʋmmak osh chiba foyuka chi̱ hoke; ik chim ai a̱hlo ka he keyu, micha chi kancha he keyu hoka; ik chi nukshopo kashke, micha ik chi nukhlakancho kashke, im achi tok,

⁹ Mihmʋt Moses ʋt nan ʋlhpisa ilʋppa holissochi cha, Lefai ushi ʋhleha naholitompa isht asha Chihowah nan itim apesa a fohka itombi holitopa sholi tuk a̱, micha Islael im asʋnonchi moma ka̱ ibbak fohki tok.

¹⁰ Micha Moses ʋt i̱ mihʋt, Afʋmmi untuklo kʋt ont taha aiyukali i̱ hotofa afʋmmi chu̱kʋsh nuktaiyala ya̱ tabenakel ai impʋchi,

¹¹ Islael moma kʋt chin Chitokaka Chihowah itikba hʋsh hiela chi̱ hosh, kanima ho̱ ai atokoli tuk o̱, ʋlakma, Islael moma kʋt ha̱klo ho̱ nan ʋlhpisa ilʋppa itikba ish ai itim anumpula hi oke.

¹² Okla, hatak, ohoyo, micha ʋlla ʋhleha, micha okla inla yosh chi̱ holihta okhissa anu̱kaka chim ahanta aiena ka̱ hoyot ish itʋnahlashke; yʋmohmi hosh haklashke, micha yʋmohmi hosh ithʋnashke, micha hʋchin Chitokaka Chihowah ya̱ i̱ nukwia cha nan ʋlhpisa ilʋppa anumpa moma ka̱ ithaiyanʋt yʋmihchashke.

¹³ Mikma im ʋlla ʋhleha nana ka̱ ithana tuk keyu kʋt, haklo cha, hʋchin Chitokaka Chihowah ya̱ okcha̱yʋt yakni ya̱ hʋsh isha chi̱ hosh Chatan a̱ hlopullit, yʋmma pilla hʋsh ia kʋt hʋsh aiasha ka̱ ithaiyanʋt i̱ nukwiashke, achi tok.

¹⁴ Mihma Chihowah yʋt Moses a̱, Yakeh, chilla chi̱ chi̱ nitak ʋt mihintishke: Choshua ya̱ hoyo cha, okla moma in tabenakel a̱ hʋsh hieli na, anumpa ima lashke, im achi tok. Mihma Moses micha Choshua ʋt ia cha, okla moma in tabenakel a̱ hieli tok.

¹⁵ Mihma Chihowah yʋt tabenakel a̱ hoshonti toni̱k afoyukʋt haiaka tok: mihma hoshonti toni̱k ʋt tabenakel okhissa paknaka hikia tok.

¹⁶ Mihma Chihowah yʋt Moses a̱, Chi̱ki ʋhleha ha̱ ta̱kla chi nusa chi̱ hoke; mikma okla ilʋppʋt, takla aiasha chi̱ hosh, yʋmma ia kʋt wakaya cha, hauit yakni yash okla inla i̱ naholbʋt toba puta ka̱ iakaiyʋt itʋnowa chi̱ hoka; micha sa kanchikmʋt, nana itim apesa li tuk a̱ kobʋffa hi oke.

¹⁷ Yohmikma nitak yʋmma ʋm ai i̱ nukkilli ʋt i̱ sanalit libba hi oke; micha kanchi likmʋt, sa nashuka ya̱ in luhmi likma, okpulot taha hi oke; micha nan ik achukmo, micha ishtataklʋma laua kʋt onʋtoyula hi oke; yohmi cha nitak yʋmma, Nan ik achukmo ilʋppa puta kʋt pin Chitokaka osh pitakla anta keyu kak o̱ pi onʋtola keyu cho? acha hi oke,

¹⁸ Mikma fullotʋt naholbʋt toba inla asitiʋt nan ik achukmo moma toksʋli tuk pulla kak o̱, nitak yʋmma sa nashuka ya̱ luhmi li pulla hi oke.

¹⁹ Yʋmohmi hoka himak a̱ taloa ilʋppa ish holissochi cha, Islael im ʋlla ʋhleha ha̱ ish im abʋchashke; itih ho̱ ish fohkashke; yʋmohmi na, taloa ilʋppʋt Islael im ʋlla ʋhleha ha̱ i̱ sanalit a̱ witnes ak ashke.

²⁰ I̱ki ʋhleha ha̱ anumpa kʋllo im ilonochi li tuk ʋt yakni pishukchi, micha foe‐bila ayʋna̱hanli ya̱ pehlichit isht ona li tuk o̱; impa tuk osh kaiyʋt taha cha, niakmʋt; fullotʋt naholbʋt toba inla iakaiyʋt im antiakmʋt sa nokowʋchi cha, a̱ nan itim apesa ya̱ kobʋffa hi oke,

²¹ Atukma yakohma hi oke, nan ik achukmo, micha aiataklamoa laua hosh onʋtolakma, taloa ilʋppʋt witnes mak osh i̱ sanalit atokolashke; im ishtatia ka̱ itih ha̱ foyuka ka̱ im ahaksa chi̱ keyu hoke; himak a̱ fehna kak kia anumpa kʋllo im ilonochi li tuk ʋt yakni ya̱ isht ak ono ki̱sha ka̱ im anukfila hʋt kaniohmit itʋnowa ka̱ ithana li hoka, im achi tok.

²² Yʋmohmi ma Moses ʋt mih nitak ak inli ho̱ taloa ilʋppa holissochi cha, Islael im ʋlla ʋhleha ha̱ im abʋchi tok.

²³ Mihma Nʋn ushi Choshua ya̱ anumpa imʋt, chi kʋllashke, micha chi aiyimitashke, anumpa kʋllo im ilonochi li tok mak o̱ Islael im ʋlla ʋhleha ha̱ pehlichit yakni ya̱ isht ish chukowa chi̱ hoke; mikma chibafoyuka la chi̱ hoke, achi tok.

²⁴ Atuk o̱ yakohmi tok, Moses ʋt nan ʋlhpisa ilʋppa anumpa ha̱ holisso ha̱ atakalichit tahli na ont taiyaha ma,

²⁵ Moses ʋt Lefait ʋhleha Chihowah nan itim apesa afohka itombi holitopa sholi ya tuk a̱ i̱ mihʋt,

²⁶ Nan ʋlhpisa holisso ilʋppa ishi cha, hʋchin Chitokaka Chihowah nan itim apesa afohka itombi holitopa anu̱kaka hʋsh bohlashke; yʋmohmi ho̱ witnes chi̱ sanalit yʋmma itoyulashke.

²⁷ Ish ile filʋmmichi, micha chikunla kʋllo ka̱ ithana li hoke; yakeh, himak nitak a̱ si okcha̱yʋt hʋchi takla anta li moma ka̱ Chihowah ya̱ i̱ filʋmmi hʋchi shahli fehnʋshke; a sʋlli ha yok mak heno i̱ shahli fehna chi̱ keyu cho?

²⁸ Hʋchim apehlichi puta im asʋnonchi, micha hʋchi̱ nan ʋlhtoka puta ka̱ hʋs sʋm itʋnahli na, anumpa ilʋppa puta ka̱ haksobish a̱ haklochi lashke; micha ʋba, micha yakni ʋt i̱ sanalit holisso takalicha chi̱ ka̱ hoyo lashke.

²⁹ Sʋlli ha ma il okpʋnit hʋsh kaiyanchi cha, hina nana hʋchi̱ miha li tuk a̱ pit hʋsh filema chi̱: atuk o̱ nitak ont ishtaiopikma, Chihowah itikba ya̱ nan ik achukmo ka̱ yʋmi̱hinchit hʋchibbak isht hʋsh toksʋlit, hʋsh nokowʋchi kak o̱ nana ik achukmo kʋt hʋchi onʋtola chi̱ ka̱ ithana li hoka, im achi tok;

³⁰ Mihmʋt Moses ʋt Islael okla moma ka̱ haklochit taloa ilʋppa anumpa ha̱ im anumpohonli na ont taiyaha tok.