Tutelonomi 30 - Chahta Holisso Holitopa 1886

¹ Atukma yakohma hi oke; nana ilʋppa puta moma na yukpali, micha nan isht kallakshi chi tikba takalichi li kʋt chi onʋtoyula cha, oklushi puta itin takla chin Chitokaka Chihowah yʋt chi tihleli tuk a̱ hieli ont ish anukfilli,

² Micha chin Chitokaka Chihowah ya̱ falamʋt ish im ona cha, chishno, micha chim ʋlla ʋhleha aienʋt chi chu̱kʋsh mominchit, micha chimi shilombish mominchit himak nitak a̱ nana moma chim ahanchi li tuk mak o̱, yʋmohmit im anumpa ha̱ ish im antiakma;

³ Yohmikma chin Chitokaka Chihowah yʋt chi nukha̱klokmʋt, falama cha, chi yuka tuk a̱ chi falʋmminchi cha, oklushi moma chin Chitokaka Chihowah yʋt pit chi fimmi tuk ʋt, a hoyot chitʋnala hi oke.

⁴ Chimmi ha̱ tihlelit shutik a tahaka pilla isht ik ona tuk oh kia, yʋmmak o̱ chin Chitokaka Chihowah yʋt ont a hoyot chitʋnala he, micha yʋmmak o̱ ont chisht ʋla hi oke,

⁵ Micha chin Chitokaka Chihowah yʋt, yakni chi̱ki ʋhleha hʋt a binili tuk a̱ chisht ʋla na, ish a binila hi oke; micha nana achukma chi yʋmihchikmʋt, chi apaknʋchi kʋt chi̱ki ʋhleha ha tok a̱ i̱ shahlicha hi oke.

⁶ Mikma chin Chitokaka Chihowah yʋt chi chu̱kʋsh, micha chim ʋlla ʋhleha chu̱kʋsh aiena ka̱ hakshup tʋbli na, chin Chitokaka Chihowah ya̱ chi chu̱kʋsh mominchit micha chimi shilombish a̱ mominchit isht ish holitobli cha chi okchaya hi oke,

⁷ Mikmʋt chin Chitokaka Chihowah yʋt chin tʋnʋp puta micha chi̱ nukkillit chilbʋshali tuk puta kak o̱ kalakshichi ilʋppa puta ka̱ onocha hi oke.

⁸ Mikma ish falama cha, Chihowah im anumpa ha̱ ish im antiakmʋt, im anumpa moma himak nitak a̱ chi̱ miha li ka̱ ish yʋmihcha hi oke.

⁹ Mikma chin Chitokaka Chihowah yʋt na toksʋli puta chibbak isht ish ishi ka̱, chi haknip a toba micha chi̱ wak a toba micha chi̱ yakni a toba aiena ka̱ achukma ho̱ anukfillit, chin lauacha hi oke: Chihowah yʋt chi̱ki ʋhleha anukfilli mʋt, yukpa tok mak osh, anonti achukma ho̱ chi anukfillit yukpa chi̱ hoke,

¹⁰ Chin Chitokaka Chihowah ya̱ im anumpa ha̱ i̱sh i̱ haponaklo cha, im anumpa ʋlhpisa, micha i̱ nan ʋlhpisa bilia, nan ʋlhpisa holisso ilʋppa aholisso tuk a̱ ish ieshikma, micha falamʋt chi chu̱kʋsh a̱ mominchit, micha chimi shilombish a̱ mominchi hosh ish im onakma,

¹¹ Anumpa ilʋppa himak nitak a̱ chim anumpohonli li kʋt chin luma keyu; micha chi̱ hopaki keyu hoka;

¹² Ʋba yakni ak o̱ itonla tuk o̱, Kʋta hosh ʋba yakni ya̱ pim ia cha, ont isht pim ʋla na, e haklo cha e yʋmihcha chi̱ cho? ish acha he o̱ keyu hoka,

¹³ Micha okhʋta mish tʋnnʋp ak o̱ itonla tuk o, Kʋta hosh okhʋta ha̱ pit pi̱ hlopulli cha, ont isht pim ʋla na, e haklo cha e yʋmihcha chi̱ cho? ish acha he o̱ keyu hoka,

¹⁴ Amba ish yʋmihcha chi̱ kʋt anumpa hʋt chi̱ bilinchi fehnʋt, chitih, micha chi chu̱kʋsh a̱ foyuka hoke.

¹⁵ Yakeh, himak nitak a̱ okcha̱ya micha achukma, illi micha nan ik achukmo aiena ka̱ chi tikba takalichi lishke,

¹⁶ Yohmi hosh himak nitak a̱ chin Chitokaka Chihowah ya̱ ish holitobli cha, i̱ hina ya̱ ish ai itʋnowʋt, im anumpa, micha i̱ nan ʋlhpisa bilia, micha im aiʋlhpesa yʋmi̱hinchi ya̱ ish ieshi cha, chi okchayʋt ish apaknʋcha he o̱ chi̱ miha lishke: mikma chin Chitokaka Chihowah yʋt yakni ya̱ ish isha chi̱ hosh yʋmma pilla ish ia ka̱ a chi yukpala hi oke,

¹⁷ Amba chi chu̱kʋsh ʋt filʋmmi, yohmi hosh ish i̱ haponakla he keyu; amba naksika ia cha, naholbʋt toba puta aiokpʋchi, micha ish im antiakma;

¹⁸ Himak nitak a̱ anumpa a̱hli mak o̱ hʋch illi pulla he: micha yakni a̱ ish isha chi̱ hosh, Chatan a̱ hlopullit, yʋmma pilla ish ia kʋt hʋchi̱ nitak a̱ hʋsh falaiacha he keyu ka̱ hʋchi miha lishke.

¹⁹ Ai okcha̱ya micha ai illi, aiyukpa micha akalakshi aiena ka̱ hʋchi tikba takalichi li ka̱, ʋba micha yakni aiena kʋt himak nitak a̱ hʋchi atokolit holissocha chi̱ ka̱ hoyo lishke; yʋmohmi hoka ai okcha̱ya ak o̱ ish atokolashke: yʋmohmi hosh hʋchishno micha chim isht atiaka yʋt okcha̱yashke,

²⁰ Yʋmohmi hosh chin Chitokaka Chihowah ya̱ ish holitoblashke, micha yʋmohmi hosh im anumpa ha̱ ish im antiashke, micha yʋmohmi hosh hʋsh asitiashke, (yʋmmak osh chi ai okcha̱ya, micha nitak isht chi̱ falaia yoke;) yʋmohmi hosh Chihowah yʋt chi̱ki ʋhleha Eblaham, Aisak, micha Chekob aiena ka̱ ima chi̱ hosh anumpa kʋllo im il onochi tok a̱, yakni ya̱ ish aiashashke, (achi tok.)