Tutelonomi 3 - Chahta Holisso Holitopa 1886

¹ Yohmi ma e fullota cha, Bashan hina ia kak o̱ il ia tok mihma Bashan i̱ mi̱ko Ok yʋmma, micha im okla moma aiena kʋt pi̱ sanalit pitiba chi̱ hosh, kohchʋt Etlei ya̱ ʋla tok.

² Mihma Chihowah yʋt, Ish i̱ nukshopa na, yʋmma micha im okla moma, micha i̱ yakni ya̱ chibbak fohki la chi̱ hoke; mikma Amolait ʋhleha, yʋmmʋt Heshbon aiasha tuk i̱ mi̱ko Sihon a̱ ish yʋmihchi tuk ʋt ish chohmicha chi̱ hoke, ʋm achi tok.

³ Yohmi hosh pin Chitokaka Chihowah yʋt Bashan i̱ mi̱ko Ok ak kia micha im okla moma ka̱ pibbak fohki tok; atuk o̱ issot e kanchi na, i̱ hlakofi kʋt iksho tok.

⁴ Micha nitak yʋmma in tʋmaha holihta moma ka̱ il ishi tok; tʋmaha holihta kil im esho tuk achʋfa kia iksho tok, Bashan i̱ mi̱ko Ok im apehlichika Akob aiʋhli fullota moma ka̱ tʋmaha holihta pokoli hannali tok.

⁵ Tʋmaha ilʋppa puta kʋt holihta chaha isht aholihta hosh holihta okhissa, micha im okhowatkʋchi yokma, tʋmaha ushi ik aholihto laua fehna tok.

⁶ Micha Heshbon i̱ mi̱ko Sihon a tok a̱ chohmichit ishit kanchit, il ʋmohmichi tok, tʋmaha holihta puta hatak, micha ohoyo, micha ʋlla ʋhleha aiena ka̱ ishit kanchit il ʋmohmichi tok.

⁷ Amba nanʋlhpoa moma, micha tʋmaha holihta puta na welhpoa yo̱ il il ai ishi tok.

⁸ Micha nitak yʋmma Amolait okla i̱ mi̱ko tuklo ka̱ i̱ yakni Chatan ola in tʋnnʋp Anon okhina ʋttʋt ia hosh nʋnih Hemon ont ʋhli ka̱ ibbak a̱ akohchit il im ishi tok;

⁹ Hemon yʋmma Sitonian ʋhleha hʋt Silion achikma, Amolait ʋhleha hʋt Sheni achi chatuk;

¹⁰ Yakni patali tʋmaha holihta moma, micha Kileat moma, micha Bashan moma, Bashan ʋtta Ok im apehlichika, in tʋmaha holihta Salkah micha Etlei ont ʋhli tuk a̱ il ishi tok.

¹¹ Hatak chaha ʋhleha a̱sha hatuk a̱ Bashan i̱ mi̱ko Ok ak bano hosh okcha̱yʋt ahanta tok; yakeh, in topa hʋt tʋli topa hatok; Ammon im ʋlla ʋhleha aiasha Labbah hiki̱a keyu cho? hatak i̱ kubit ʋlhpisa hosh falaia kʋt kubit chakkali tok, micha auahta kʋt kubit ushta tok.

¹² Mihma yakni ilʋppa nitak yʋmma, Aloe yʋmmʋt Anon okhina bili̱ka talaia ka̱ ʋttʋt ia hosh Kileat nʋnih iklʋnna ʋhli kʋt in tʋmaha holihta puta aiena il ishi tuk a̱ Lubenait ʋhleha, micha Katait ʋhleha aiena kak o̱ ima li tok.

¹³ Mikma Kileat atampa ka̱, micha Bashan moma, yʋmmʋt Ok im apehlichika ya̱ Manasseh ishtatiaka iklʋnna ya̱ ima li tok; Akob aiʋhli moma, Bashan aiena moma, yʋmmʋt hatak chaha yakni hohchifo ha tok.

¹⁴ Manasseh ushi Chai ʋt Akob yakni moma Cheshuli micha Maakahli ont ʋhli ka̱ ishi cha, ilap hohchifo ya̱ ahochifochit Bashan‐hafolh‐Chai, achi tok, himak nitak a̱ moma hoke.

¹⁵ Mihma Kileat a̱ Maki ak o̱ ima li tok.

¹⁶ Lubenait ʋhleha micha Katait ʋhleha ha̱, Kileat a̱ ʋttʋt ia hosh Anon okhina ont ʋhli okfa iklʋnna, micha aiʋhli Chabbak okhina yʋmmʋt Ammon im ʋlla ʋhleha im aiʋhli ya̱ ont ʋhli;

¹⁷ Micha yakni patali, micha Chatan, micha im aiʋhli Chinnelelh a̱ ʋttʋt ia hosh yakni patali okhʋta, hʋpi okhʋta, Ashtolh‐piskah nʋnih nuta hʋshi akochaka imma ont ʋhli ka̱ ima li tok.

¹⁸ Micha nitak yʋmma hʋchim anumpo̱honli li mʋt, hʋchin Chitokaka Chihowah yʋt yakni ilʋppa hʋsh binila chi̱ ka̱, hʋchima tuk oke; tʋnʋp a̱ya hinla moma kʋt, nahalupa hʋchim ʋlhtaha hosh, hʋchitibapishi ʋhleha Islael im ʋlla ʋhleha ha̱ itikba hʋsh hlopulla chi̱ hoke.

¹⁹ Amba hʋchi tekchi ʋhleha, micha hʋchim ʋlla ʋhleha, micha hʋchi̱ nanʋlhpoa (nanʋlhpoa hʋchi̱n laua ka̱ ithana li hoka) aiena kʋt hʋchin tʋmaha holihta puta hʋchima li tuk a̱ a̱sha na,

²⁰ Chihowah yʋt hʋchishno a̱ hʋchi̱ yʋmihchi tuk ʋt chohmichit, hʋchitibapishi ʋhleha ha̱ fohʋchashke: micha yʋmmak kia yakni ya̱ hʋchin Chitokaka Chihowah yʋt Chatan mish‐tʋnnʋp a̱ ai ima tuk a̱ abinilashke: yohmikma hʋchima li tuk hʋchi̱ yakni a̱ hatak aiyukali kʋt falamʋt hʋsh onashke, hʋchim achi li tok.

²¹ Micha nitak yʋmmak inli ka̱ Choshua ya̱ im anumpulit, Chin Chitokaka Chihowah yʋt mi̱ko tuklo ilʋppa kaniohmichi tuk moma ka̱, chi nishkin ʋt pi̱sʋshke; apehlichika puta kanima yo̱ ish hlopullikma Chihowah yʋt yʋmihcha hi oke.

²² Hʋsh i̱ nukshopa he keyu: Chin Chitokaka Chihowah yʋmmak osh chim itiba chi̱ hoke, chim achi li tok.

²³ Micha nitak yʋmma Chihowah ya̱ im asilhhʋt,

²⁴ Chitokaka Chihowah ma, a chi chito, micha chibbak akʋllo ka̱ chin tishu ha̱ im otʋninchit ish wakaya tuk oke: Chitokaka nanta hak osh ʋba ahantakmʋt, keyukmʋt yakni ahanta kʋt a chi kʋllo ka̱ yʋmohmit, ish a toksʋli ya̱ yʋmihcha hinla hotuma?

²⁵ Chim asilhha lishke, ak hlopulli cha, yakni achukma yʋmmʋt Chatan mish tʋnnʋp talaia ka̱, nʋnih aiokli, micha Lebanon yʋmma ak pesá, achi li tuk.

²⁶ Yohmi kia Chihowah yʋt hʋchishno ak a tuk pulla mak o̱, a̱ nokowa cha, a̱ haponakla he keyu tok: micha Chihowah yʋt, Ik chim ʋlhpesá, himakma nana ilʋppa isht chik sʋm anumpulo kashke.

²⁷ Oiyʋt, Piskah paknaka ya̱ ish onashke, micha hʋshi aiokatula pilla, micha falʋmmi pilla, micha oka mahli pilla, micha hʋshi akochaka pilla pit ish hopo̱koyashke, micha chi̱ nishkin a̱ isht ish pisashke: amba Chatan ilʋppa ish hlopulla chi̱ keyu hokʋt.

²⁸ Yohmi kia Choshua ya̱ atokolit im anumpulit, aiyimitʋchit, ish hlampkochashke; yʋmmak osh okla ilʋppa itikba tanʋbli cha, yakni ish pisa chi̱ ka̱ a binilicha chi̱ hoke, ʋm achi tok.

²⁹ Yohmi ho̱ Belhpeo ichapaka okfa hak o̱ il aiasha tok.