Tutelonomi 29 - Chahta Holisso Holitopa 1886

¹ Ilʋppa puta kak osh nan itim apesa anumpa ho̱ Holeb a̱ nan ai itim apesa tok ʋt a̱sha na, Chihowah yʋt Moses a̱ tohno na, Islael im ʋlla ʋhleha ha̱ Moab yakni ya̱ ai itim apesa tok mak oke.

² Mihma Moses ʋt Islael moma ka̱ hoyo cha, im anumpulit, Echip yakni chi tikba ya̱ Falaoh, micha in tishu ʋhleha moma aiena, micha i̱ yakni moma aiena ka̱ Chihowah yʋt kaniohmichi tok moma ka̱ hʋsh pi̱sa ha tuk oke.

³ Nan isht imomaka pisa hochito, micha nan isht atokowa, micha na fehna hochito yʋmma aiena ka̱ chi nishkin ʋt pisa ha tuk oke.

⁴ Yohmi kia Chihowah yʋt chu̱kʋsh nan isht akostininchi, micha nishkin isht pisa, micha haksobish isht haponaklo ya̱ ik hʋchimo tok, himak nitak ant ʋhlishke.

⁵ Mikma afʋmmi pokoli ushta ho̱ yakni haiaka ya̱ hʋchi pehlichit a̱ya li tuk oke; micha nafohka hʋsh foyuka kʋt tahʋt ishtia keyu, mikma shulush chiyi isht ish holo kʋt tahʋt isht ik aiyo tuk oke.

⁶ Pʋska hʋchik po, micha oka pa̱ki, micha nan ishko homi nana kia hʋsh ishko tuk keyushke; yʋmohmi hosh ʋno ak osh hʋchin Chitokaka Chihowah sia ka̱ hʋsh ithaiyana chi̱ hatuk oke

⁷ Atuk osh ilʋppa hʋsh la ma, Heshbon i̱, mi̱ko Sihon, micha Bashan i̱ miko Ok ita tuklo kʋt kohchʋt pi̱ sanalit pitibi tok; mikma issot e kanchi tok.

⁸ Mihmʋt i̱ yakni ya̱ il ishi cha, Lubenait micha Katait, micha Manasseh apelichi iklʋnna aiena kʋt i̱ yakni ya chi̱ ho̱ il ima tok.

⁹ Yʋmohmi hoka anumpa nan itim apesa ilʋppa hʋsh ieshi cha, hʋsh yʋmihchashke; yʋmohmi hosh nana hʋsh yʋmihinchi moma kʋt hʋchim aia̱hli hʋchim achukmashke.

¹⁰ Himak nitak a̱ hʋsh moma kʋt hʋchin Chitokaka Chihowah itikba ya̱ hʋsh hielishke, hʋchim apehlichi puta i̱ kʋpotʋni ʋhleha, hʋchim asʋnonchi ʋhleha, micha na hʋchim ʋlhtoka ʋhleha Islael hatak ʋhleha moma aiena,

¹¹ Hʋchim ʋlla ʋhleha, hʋchi tekchi ʋhleha, micha chim okla inla ʋhleha hosh chi̱ binah ha̱ aiasha ya̱ aienʋt iti chin chanli ʋttʋt ia hosh, oka chim ochi ont ʋhli ya̱ aienʋt hʋsh hieli kʋt;

¹² Chin Chitokaka Chihowah ya̱ nan itim apesa, micha im anumpa kʋllo anumpulit, himak nitak a̱ chin Chitokaka Chihowah yʋt chitim api̱hi̱sa ka̱ ish itim apesa chi̱ ha tuk oke.

¹³ Yʋmohmi ho̱ himak nitak a̱ nana hʋchi̱ miha tok mak o̱, micha chi̱ki ʋhleha Eblaham micha Aisak, micha Chekob aiena ka̱ anumpa kʋllo im il onochi tok mak osh, kʋllochit im okla hʋch ikbi cha, hʋchin Chitokaka chi̱ ha tok.

¹⁴ Micha hʋchishno ak bano ho̱ nan itim apesa ilʋppa, micha anumpa kʋllo anumpuli ilʋppa hʋchitim apesa li keyu.

¹⁵ Amba himak nitak a̱ pi apehʋt pin Chitokaka Chihowah itikba hieli, micha himak nitak a̱ pi apehʋt ik hinlo aiena hoke.

¹⁶ Echip yakni ya̱ kaniohmit il aiasha tok, micha oklushi puta kaniohmit hlopullit il itʋnowa tok a̱ hʋsh ithana.

¹⁷ Micha nan isht a yuwala, micha i̱ naholbʋt toba puta, iti micha tʋli, micha tʋli hʋta, micha tʋli lakna aiena kʋt im ai itin takla ya̱ aiasha ho̱ hʋsh pisa tok okʋt.

¹⁸ Keyukma hʋch itin takla ya̱ hatak, keyukmʋt ohoyo, keyukmʋt chuka achʋfa, keyukmʋt apehlichi himak nitak a̱ pin Chitokaka Chihowah ya̱ chu̱kʋsh i̱ filʋmmi cha, oklushi ilʋppa puta i̱ naholbʋt toba puta ka̱ ona cha im antia yoba na, keyukma chu̱kʋsh homi cha, nan isht yuwala waya chi̱ kʋt, akshish hʋch itin takla ya̱ itoyula na,

¹⁹ Atuk osh yakohmi na, kallakshichi anumpa ilʋppa haklokmʋt, ilap chu̱kʋsh ʋt na ile yukpalit anumpa il onochit, Sa chu̱kʋsh ʋm anukfila hosh itukshila ya̱ oka haksi akaieninchi hoh kia nana kʋt ʋm achukma chi̱ hoka, achi yoba na:

²⁰ Chihowah yʋt apoancha he keyu hoke; amba Chihowah im ai i̱ nukkilli, micha i̱ nuktahla yʋt hatak yʋmma i̱ sanalit shobohonla hi oke; mikma kallakshichi anumpa moma holisso ilʋppa aholisso tuk ʋt onʋtoyula he; mikma Chihowah yʋt hohchifo ha̱ shutik nutaka ya̱ a kashofit kancha hi oke.

²¹ Micha Chihowah yʋt yʋmma Islael apehlichi puta moma ka̱ ila filʋmmichit, nana ik achukmo ak o̱ isht onʋt, nan ʋlhpisa holisso ilʋppa nan itim apesa ya̱ kallakshichi anumpa hʋt takali tuk mak o̱ yʋmihcha hi oke.

²² Yʋmohmi ho̱ hʋchim ʋlla ʋhleha ai iti shali ʋt hʋch iakaiyʋt aiasha he ʋt, micha okla inla yakni hopaki minti aiena kʋt, yakni ʋt na palʋmmi onʋtola tuk, micha abeka ilaiyuka puta Chihowah yʋt onochi tuk a̱ pisa ka̱,

²³ Mihma yakni yʋmma moma kʋt hituk lakna, micha hʋpi, micha lu̱hu̱a, nana ahollokchi keyu, micha nana awaya keyu, micha hʋshuk nana kia ai offo keyu, okpulot taha kʋt, Sotom micha Komolah, Atmah micha Seboim aiena okpulot taha tok mak o̱, yʋmmak oka Chihowah yʋt nukhobela hosh, micha im ai i̱ nukkilli ʋt libbi hosh okpʋnit tahli tok choyuhmi ka̱ pisa mak osh, acha hi oke.

²⁴ Oklushi moma kak kia, nanta katiohmi ho̱ Chihowah yʋt yakni ilʋppa yʋmihchi tuk oh cho? nanta katiohmi ho̱ nuklibisha chito lʋshpa kʋt yakohmi hoh cho? okla acha hi oke.

²⁵ Yohmikma hatak puta kʋt, In Chitokaka Chihowah yʋt nan itim apesa i̱ki ʋhleha ha̱ Echip yakni ya̱ pehlichit kohcha mʋt, itim apesa tok a̱ kobʋffit kanchi kak oke,

²⁶ Iʋt, naholbʋt toba inla, naholbʋt toba puta ithana tuk keyu, micha ima tuk keyu ka̱ im antia cha ai okpʋchi tuk oke.

²⁷ Mikma Chihowah im ai i̱ nukkilli ʋt yakni ilʋppa i̱ sanalit libbi cha, kallakshichi anumpa moma holisso ilʋppa a holisso tuk a̱ onohonchi tuk oke.

²⁸ Micha Chihowah yʋt nuklibisha, micha im ai i̱ nukkilli ʋt libbi kak osh, micha nukkillit shitilema kak osh tehlit i̱ yakni ya̱ kohchi tuk osh yakni inla yo̱ pit kanchi tok a̱ himak nitak a̱ yʋmohmi hoke, acha hi oke,

²⁹ Na luma puta hokʋt pin Chitokaka Chihowah immi hoke; amba nana ka̱ otʋnichi tok okʋto pishno, micha pim ʋlla ʋhleha aiena immi bilia he a tok; yʋmohmi hosh nan ʋlhpisa ilʋppa anumpa moma ka̱ e yʋmihcha chi̱ ha tok oke. (achi tok.)