Tutelonomi 28 - Chahta Holisso Holitopa 1886

¹ Atukma yakohma hi oke, chin Chitokaka Chihowah im anumpa ha̱ achunanchit ish i̱ haponaklo cha, im anumpa moma ka̱ himak nitak a̱ chi̱ miha li ka̱ ithaiyanʋt ish yʋmihinchikma, chin Chitokaka Chihowah yʋt oklushi moma yakni paknaka ai asha ka̱ i̱ shahlechit a chaha ka̱ chi binilicha hi oke.

² Mikma chin Chitokaka Chihowah im anumpa ha̱ ish i̱ haponaklokma, na yukpali ilʋppa puta moma kʋt chi sakki cha chi onʋtoyula hi oke.

³ Tʋmaha holihta ya̱ na yukpʋt a chi onʋtoyula hi oke, osapa na yukpa ʋt chi onʋtoyula hi oke,

⁴ Chi haknip a toba tuk, micha chi̱ yakni a waya tuk, micha chi̱ nanʋlhpoba a waya tuk, micha chi̱ wak tek a waya tuk, micha chin chukfi a̱ya puta aiena kʋt na yukpa hi oke.

⁵ Chi̱ kishi micha ta̱pʋshi chim a yamʋska yʋt na yukpashke.

⁶ Ant ish chukowakmʋt na chi yukpa hi oke, micha ish kohchakmʋt na chi yukpa hi oke.

⁷ Chin tʋnʋp chi̱ sanalit wakaya ʋhleha ha̱ chin Chitokaka Chihowah yʋt chi nashuka itikba akakohʋcha hi oke; hina achʋfa ho̱ minti tuk kia, hina untuklo ho̱ chi tikba yihlepa hi oke.

⁸ Chihowah yʋt chim ʋlhpoyak ai itola chuka, micha nana ho̱ chibbak a̱ isht ish ishikma, na isht yukpali chi onucha hi oke; micha chin Chitokaka Chihowah yʋt yakni a̱ chima tok ʋt a chi yukpa la hi oke.

⁹ Chihowah yʋt anumpa kʋllo chim ilono̱honchi tok mak osh, chin Chitokaka ya̱ im anumpa ish ieshi cha, i̱ hina ya̱ ish itanowakma, im okla i̱ holitopa kʋllo hosh chikba hi oke.

¹⁰ Mikma okla moma yakni paknaka aiasha kʋt Chihowah hohchifo ak o̱ ishit chi hohchifo ka̱ ithaiyana hi oke; micha chi̱ nukshopa hi oke.

¹¹ Yakni ya̱ chima chi̱ hosh chi̱ki ʋhleha ha̱ anumpa kʋllo im ilonochi tok ʋt, Chihowah yʋt chim ʋlhpoyak, chi haknip a toba, micha chi̱ nan ʋlhpoba a waya, micha chi̱ yakni a waya aiena ka̱ a chi lauacha hi oke.

¹² Chihowah yʋt im ʋlhpoyak achukma ʋba ya̱ chin tiwi cha, ont ai ʋlhpiesakma, yakni ya̱ chim umbʋcha he, micha chibbak nan toksa̱hanli tuk moma ka̱ na chi yukpala hi oke; mikma oklushi laua ka̱ ish impota cha, chishno chik poto ka hi oke.

¹³ Micha Chihowah yʋt noshkobo ak o̱ chikba hi oke, micha hasimbish ak a he keyu: paknaka ak o̱ ish bieka, ish nutaka he keyu hoke, chin Chitokaka Chihowah im anumpa ha̱ himak nitak a̱ chim anumpohonli li ka̱ i̱ haponaklot ithaiyanʋt ish yʋmi̱hinchikmʋt,

¹⁴ Himak nitak a̱ chim anumpo̱honli li tuk a̱ anumpa kanima kia, i̱ filʋmmit naksi ka̱ ishtimpakimma, keyukmʋt ʋlhfʋbekimma, kanima kia iʋt naholbʋt toba iakaiyʋt ish aiokpʋcha he keyu hoke.

¹⁵ Amba yakohma hi oke, chin Chitokaka Chihowah im anumpa ha̱ ish i̱ haponakla he keyukma, im anumpa moma, micha i̱ nan ʋlhpisa bilia himak nitak a̱ chim anumpohonli li ka̱ ithaiyanʋt ish yʋmihcha he keyukma, na kallakshi ilʋppa puta kʋt chi onʋtula hi oke, micha chi sakka hi oke.

¹⁶ Tʋmaha holihta ya̱ a chi kallaksha hi oke, micha osapa ya̱ a chi kallaksha hi oke.

¹⁷ Chi̱ kishi hʋt micha ta̱ pushi chim ayamʋska yʋt kallaksha hi oke.

¹⁸ Chi haknip a toba tuk, micha chi̱ yakni a waya tuk, micha chi̱ wak tek a waya tuk, micha chin chukfi ʋlhpoa a̱ya puta aiena kʋt kallaksha hi oke.

¹⁹ Ant ish chukowakmʋt chi kallaksha hi oke, micha kohchʋt ish iakmʋt, chi kallaksha hi oke.

²⁰ Chihowah yʋt nana moma yʋmihcha chi̱ ho̱ chibbak isht ish ishikma, nan isht kallakshi, micha ishit chu̱kʋsh okpulo, micha nahotupa puta et chi ono̱honchi na, aiokpulokʋt chi taha hi oke, micha tu̱shpʋt ont ish moshola hi oke; nana ish akaniohmi kʋt okpulo hosh is sa kanchi tuk oka.

²¹ Chihowah yʋt ililli okpulo ya̱ chi atakalichikma, yakni ish isha chi̱ kash osh yʋmma ont a chi taha hi oke.

²² Chihowah yʋt tahat ishit yʋnha, micha yʋnha, micha nipi lua, micha nipi lua atampa, micha bʋshpo falaia, micha bʋshshi, micha shummit toshbi aiena ka̱ isht chissa hi oke; mikma chi akaiya na, ont ish moshola hi oke.

²³ Mikma chi̱ shutik ʋt chi noshkobo paknaka talaia kʋt asonak lakna ya hi oke; mikma yakni ʋt chiyi nutaka talaia kʋt tʋli ya hi oke.

²⁴ Chihowah yʋt chi̱ yakni ai umba ka̱ hituk micha lukfi pushi chohmicha hi oke; ʋba ya̱ mintit chi onʋtohonlakma chi taha hi oke,

²⁵ Chihowah yʋt chin tʋnʋp ʋhleha itikba ya̱ a chi akakohʋcha hi oke; hina achʋfa ho̱ iʋt ish i̱ sanali tukmʋt, itikba ya̱ hina untuklo ho̱ ish yihlepa hi oke; mikma apehlichika puta yakni paknaka aiasha moma ka̱ chisht ona hi oke.

²⁶ Micha chi haknip ʋt ʋba hushi moma, micha nampoa puta yakni aiasha ka̱ im ilhpak toba hi oke, mikma hatak nana kia mahlolit tihlela he keyu hoke.

²⁷ Chihowah yʋt Echip hichi a̱, micha isht asha hlachowa, micha hlachowa fachanli, micha wʋshko aiena ka̱ isht chissokma chi hlakofa he keyu ka hi oke.

²⁸ Chihowah yʋt tasimbo, micha nishkin lʋpa, micha chu̱kʋsh okokko, ahni aiena ka̱ isht chissa hi oke.

²⁹ Mikma hʋshi tʋbokoli hoh kia posholit ish hikikia hi oke, nishkin lʋpa ʋt aiokhlileka ya̱ na posholit hikikia kak o̱ ish chohmi cha nana ish a kaniohmi kʋt chim aia̱hla he keyu; peh chilbʋshalit, chi wehpohonli na bilia; mikma hatak nana kia chi okchalincha he keyu hoke.

³⁰ Ohoyo ish itim ʋlhpoa tukma hatak inla hosh iba tʋshka hi oke, chuka ish ikbi tukmʋt yʋmma ish ai ʋtta he keyu, pa̱kʋpi ahollokchi ish hokchi tukmʋt yʋmma pa̱ki a̱ ish ai ʋma he keyu hoke:

³¹ Chi̱ wak toksʋli ya̱ ish pi̱sa ho̱ chi tikba ai ʋba he, mikma yʋmma ish ai ʋpa he keyu hoke; chim issuba haksobish falaia ya̱ afoʋt chi tikba ai isha hi oke, mikma chi̱ falama he keyu ka hi oke; chin chukfi ha̱ chin tʋnʋp a̱ ima hi oke, hlakoficha he ʋt ik chim iksho ka hi oke.

³² Chiso ʋhleha micha chiso tek ʋhleha aiena ka̱ okla inla ho̱ ima hi oke, mikma chi nishkin ʋt pisa bʋnnʋt taha hosh, anukfilli na biliat illa hi oke, mikma kʋllo kʋt chibbak a̱ ik foyuko ka hi oke.

³³ Yakni nana a chi̱ waya, micha na ish toksʋli tuk moma ka̱ oklushi chik ithano hosh ʋpʋt tahla hi oke; micha peh ilbʋsha micha litowʋt ish bilia hi oke.

³⁴ Yʋmohmi ho̱ chi nishkin ʋt pisa ka̱ ish pisa kak osh chi tasimba hi oke.

³⁵ Chihowah yʋt chiyi̱kʋlaha ya̱, micha chiyi ya̱ hichi chi hotopa fehna, micha ʋtta keyu ho̱ isht chissokma, chiyi pʋtta ʋttʋt ia hosh chi noshkobo tabokaka ont ʋhla hi oke.

³⁶ Chihowah yʋt oklushi ya̱ chishno, micha chi̱ki ʋhleha aiena kʋt ithana tok keyu ho̱, chishno micha chi̱ mi̱ko chi pehlicha he o̱ ish hilechi tuk a̱ aiena ka̱ chisht im ona hi oke; mikma yʋmmak o̱ naholbʋt toba inla iti, micha tʋli aiena ka̱ ish aiokpʋcha hi oke.

³⁷ Chihowah yʋt oklushi moma itin takla chishtia ka̱ yʋmmak o̱ okokko, isht ahni nana achi, micha isht anumpuli yo̱ ish ita nowa hi oke.

³⁸ Osapa ya̱ pehna laua ho̱ isht ish ia tukmʋt, kanomosi ho̱ ish hoya hi oke; ha̱wa yʋt tahla chi̱ hoka.

³⁹ Pa̱kʋpi ahollokchi ya̱ ish hokchi cha, ish apoksia cha hi oke; yohmi kia oka pa̱ki ya̱ ish ishka he keyu, micha pa̱ki ya̱ ish ma he keyu hoke: shu̱shi ʋt ʋpa hi oke.

⁴⁰ Chim ai ʋhli moma ka̱ alif iti ʋt chim aiasha hi oke, yohmi kia bila ya̱ isht ish il ai ahʋmma he keyu hoke: chim alif ʋni ʋt chilofa hi oke.

⁴¹ Chiso ʋhleha micha chiso tek ʋhleha ha̱ ish tobacha hi oke; yohmi kia ish aiyukpa he keyu, yuka tobacha kʋnia hi oke.

⁴² Chim iti puta ka̱ micha chi̱ yakni a waya puta ka̱ ha̱wa yʋt tahla hi oke,

⁴³ Okla inla chitin takla ahanta kʋt wakayʋt chi̱ shahlit chaha fehna hi oke; mikma akanlosi fehna ish ona hi oke.

⁴⁴ Chimpota hi oke, mikma ish impota he keyu hoke: noshkobo ya hi oke, mihma chishno ʋto hasimbish chia ya hi oke

⁴⁵ Micha na kallakshi ilʋppa puta moma kʋt chi onʋtula hi oke; micha chiakaiyʋt chi sa̱ha̱kki na, ont chi taha hi oke; chin Chitokaka Chihowah im anumpa ha̱ haponaklot, im anumpa ʋlhpisa, micha i̱ nan ʋlhpisa bilia chi̱ miha tok a̱ chik holitoblo tok oka.

⁴⁶ Micha nan isht atokowa, micha okokko, isht ahni aiena kʋt chishno micha chim isht atiaka aiena ka onʋtoyula na bilia hi oke,

⁴⁷ Nana moma apakna atuk mak o̱, na yukpʋt chu̱kʋsh yukpa hosh chin Chitokaka Chihowah ya̱ chik im antio tuk okʋt,

⁴⁸ Yʋmohmi hokʋt chin tʋnʋp ʋhleha yʋmmak oka Chihowah yʋt chi̱ sanali et pila chi̱ ka̱ hohchʋfo hosh, micha itukshila hosh, micha nipi bano, micha nana puta moma ka̱ bʋnna hosh, ish im antia chi̱ hoke; mikma tʋli ikunla abana yo̱ chikunla abanalikma ont chi taha hi oke.

⁴⁹ Chihowah yʋt oklushi chi̱ sanalichit, yakni hopaki, yakni ont a taha ka̱ shinimpa kʋt o̱ssi hika choyuhmi, oklushi yʋmma im anumpa ha̱ ish ithana keyu ho̱ isht ʋla hi oke.

⁵⁰ Oklushi pisa chilita hosh, yʋmmak okʋt sipokni yoka, ahna he keyu, micha ʋlla yoh kia i̱ nukha̱kla he keyu hoke.

⁵¹ Micha chi̱ wak awaya, micha chi̱ yakni awaya aiena ka̱ ai ihimpa na, chi taha hi oke; micha yʋmmʋt onush, oka pa̱ki, micha bila, wak tek, micha chin chukfi isht achakʋt ia yoh kia ik chim ashancho ho̱ ont chitaha hi oke.

⁵² Micha chi̱ holihta okhissa puta ka̱ abinanchit fullota na, a chin chaha ka̱ puta, micha holihta chaha puta yʋmmak o̱ ish anukchieto chatuk ʋt, chi̱ yakni hlopulli moma ka̱ aka itula hi oke; micha chi̱ yakni chin Chitokaka Chihowah yʋt chima tok hlopulli moma ka̱ chi̱ holihta okhissa puta ka̱ abinancha hi oke.

⁵³ Micha chin tʋnʋp puta kʋt abinanchit chilbʋshali na, chi hohchʋfokmʋt chi haknip atoba ak inli, chiso ʋhleha, chisotek ʋhleha nipi chin Chitokaka Chihowah yʋt chima tok a̱ ish pa hi oke,

⁵⁴ Yʋmohmi ho̱ hatak ʋt ahah ahnit, ile holitobli hosh chi takla ahanta chatuk kia itibapishi ha̱, micha tekchi i̱ holitopa tuk a̱, micha im ʋlla ʋhleha atampa ashachi tuk ʋt i̱ holhponayo ik achukmot pisa hi oke.

⁵⁵ Yʋmohmi cha, im ʋlla ʋhleha nipi ʋpa kʋt, yʋmma kanima kia ipeta he keyu hoke: chi̱ holihta okhissa moma ka̱ chin tʋnʋp ʋt abinachit, afullota cha, chilbʋshalit abinachit fullota ha tuk o̱ nana kʋt ik chim iksho ha tuk okʋt.

⁵⁶ Ohoyo ahah ahnit ile holitobli hosh, chi takla ahanta kʋt, ile holitoblit ahah ahni kʋt iyi pʋtta ya̱ aka ishit hʋhla he keyu tuk kia, i̱ hatak i̱ holitopa a tuk a̱, micha ushi a tuk, micha ushetik a tuk,

⁵⁷ Micha ʋlla yosh iyi itin takla ya̱ minti tuk, micha im ʋlla ʋhleha shoyuli tuk i̱ holhponayo ik achukmot pisa hi oke: micha chin tʋnʋp ʋt chi̱ holihta okhissa puta ka̱ a chilbʋshalikma, abinanchit a fullotʋt atikkonofikma nana moma bʋnna hosh lumʋt ʋpa hi oke.

⁵⁸ Nan ʋlhpisa ilʋppa anumpa moma holisso ilʋppa aholisso ka̱ ithaiyanʋt ish yʋmi̱hinchi hosh, hohchifo holitopa i̱ nukwia he ʋlhpiesa chin Chitokaka Chihowah ilʋppa hʋchik i̱ nukwiokma;

⁵⁹ Yohmikma Chihowah yʋt nan isht chim ilbʋsha palʋmmi, chim isht atiaka nan isht i̱ palʋmmi chinto, micha hopaki ho̱ yʋmohmi, micha abeka palʋmmi hopaki ho̱ yʋmohmi ya̱ chi onocha hi oke.

⁶⁰ Micha Echip ililli okpulo ish i̱ nukshopa chatuk a̱ moma chi onocha hi oke; mikma chi atakala hi oke.

⁶¹ Micha nan abeka puta, micha napalʋmmi puta nan ʋlhpisa ilʋppa aholisso ha̱ atakali keyu aiena ka̱ Chihowah yʋt chi onohonchikma, chi taha hi oke.

⁶² Mikma apakna kʋt ʋba fochik oka ish chiyuhmi tuk oh kia, holhtina kanomosi hosh ish ahomba hi oke; chin Chitokaka Chihowah anumpa ha̱ ish i̱ haponakla he keyu hokʋt.

⁶³ Atukma yakohma hi oke, Chihowah yʋt nana achukma kak o̱ chi yʋmihchi cha, chi apaknʋchi kʋt im achukma tuk ʋt, anonti chi tahlit ont chi mosholichi kʋt, im achukma hi oke; mikma yakni yʋmma ish isha chi̱ hosh ish ia ka̱, ai isht chi kancha hi oke.

⁶⁴ Micha Chihowah yʋt okla moma ka̱ aiyokomʋt, yakni a taha ka achʋfa ʋttʋt ia hosh, in tʋnnʋp ont ʋhli chi fimma hi oke; micha yʋmmak o̱ naholbʋt toba inla chishno, micha chi̱ki ʋhleha aiena kʋt ish ithana tuk keyu, iti, micha tʋli aiena yo̱ ish im antia hi oke.

⁶⁵ Micha oklushi yʋmma puta ai iti takla ya̱ anuktala ya̱ ish ahayucha he keyu; micha chiyi pʋtta yʋt afoha pisa he keyu hoke: amba Chihowah yʋt yʋmmak oka chu̱kʋsh wʋnihinchi micha nishkin elli, micha im anukfila nukha̱klo chima hi oke.

⁶⁶ Mikma chim ilhfiopak a̱ ai isht chi nuktahlakla̱ka hi oke, micha nitak, micha ninak moma ka̱ chi nukshopa cha, sai okcha̱ya fehna chi̱ chik ahno ka hi oke.

⁶⁷ Chi chu̱kʋsh nukshopa ishit chi nukshopakmʋt, micha chi nishkin pisa ish pi̱hi̱sakmʋt, onnahinlikma, Chihowah yʋt ʋlhpesa ahni, Opiakbano, ish acha hi oke; atuk osh opiakma, Chihowah yʋt ʋlhpesa ahni, Onnahinlikbano, ish acha hi oke,

⁶⁸ Mikma Chihowah yʋt anonti Echip yʋmmak oka hina ya̱ isht chim anumpule li mʋt, Anonti ish pisa he keyu hoka, achi li tok a̱ peni hochito apittʋt chisht ona hi oke: mikma yʋmmak oka ohoyo yuka micha hatak yuka ikbit chin tʋnʋp chi kancha hi oke, mikma hatak nana kia ik chi chumpo ka hi oke, (achi tok.)