Tutelonomi 27 - Chahta Holisso Holitopa 1886

¹ Micha Moses ʋt Islael im asʋnonchi ʋhleha aienʋt okla ha̱ im anumpulit, Anumpa moma himak nitak a̱ hʋchim anumpohonli li ka̱ hʋsh ieshashke.

² Atuk osh yakohma hi oke, Chatan a̱ ʋbanʋblit chin Chitokaka Chihowah yʋt yakni chima tok a̱ hʋsh ona, nitak mʋt, tʋli hochito ish hiohlichi cha, isht ʋlhpolosa ya̱ isht ish apoluslashke.

³ Micha chi̱ki ʋhleha in Chitokaka Chihowah yʋt mihʋt im issa tuk mak osh, chin Chitokaka Chihowah yʋt yakni chima tok; yʋmmʋt yakni pishukchi, micha foe‐bila aiena kʋt ayana̱hanli ya̱ ish chukowa chi̱ hosh ish ʋbanʋblikmʋt, nan ʋlhpisa ilʋppa moma anumpa ha̱ ish ai o̱ holissochashke.

⁴ Yʋmohmi hoka yakohma hi oke: Chatan a̱ hʋsh ʋbanʋblikmʋt, himak nitak a̱ Ebal nʋnih ha̱ a hʋchi̱ miha li ka̱, tʋli puta ilʋppa hʋsh hiohlichi cha, isht ʋlhpolosa isht ish apoluslashke.

⁵ Micha yʋmmak o̱ chin Chitokaka Chihowah ya̱ alta tʋli alta yo̱ ish im ikbashke; tʋli ishit pilesa nana kia ish o̱ wiela he keyu,

⁶ Chin Chitokaka Chihowah ya̱ tʋli kaniohmi tuk ʋt moma yo̱ alta isht ish im ikbashke; micha hukmit im issa onochit chin Chitokaka Chihowah ya̱ ish im issa hi oke,

⁷ Micha iti̱ nanaiyʋchit im issa ish im issakmʋt, yʋmmak o̱ ish impa cha, chin Chitokaka Chihowah itikba ya̱ na yukpʋt ish aiashashke.

⁸ Micha haiaka achukma fehna ho̱ nan ʋlhpisa ilʋppa anumpa moma ka̱ tʋli yash ish ai o̱ holissochashke, im achi tok.

⁹ Mihmʋt Moses micha naholitoblit isht asha, Lefait ʋhleha aiena kʋt Islael moma ka̱ im anumpulit, Ahah ish ahni cha ish haklashke, Islael ma, Himak nitak a̱ chin Chitokaka Chihowah ya̱ im okla ish tobʋshke.

¹⁰ Yʋmohmi hoka chin Chitokaka Chihowah im anumpa ha̱ i̱ haponaklot, im anumpa ʋlhpisa, micha nan ʋlhpisa bilia himak nitak a̱ chi̱ miha li ka̱ ish yʋmi̱hinchashke, achi tok.

¹¹ Micha Moses ʋt mih nitak ak inli ho̱ okla atokolit i̱ mihʋt,

¹² Chatan hʋsh ʋbanʋbli tukma ilʋppa puta, Simeon, Lefai, micha Chuta, micha Issaka, micha Chosif, micha Benchamin aiena kak osh nʋnih Kelisim paknaka ya̱ hieli cha, okla ha̱ na yukpali anumpa onochashke,

¹³ Mikma ilʋppa puta, Luben, micha Kat, micha Asha, micha Sebulun, Tan, micha Naftali aiena kak osh Ebal nʋnih paknaka hieli cha, kallakshichi anumpa onochashke,

¹⁴ Mihma Lefai ʋhleha hʋt Islael hatak ʋhleha moma ka̱ im anumpulit anumpa chitoli hosh,

¹⁵ Hatak nana hosh tʋhlit naholbʋt toba, keyukmʋt bilʋt akmot naholbʋt toba, Chihowah nan isht yuwala, hatak nan ikbi imponna ibbak osh atahli yo̱ ikbi cha, alumaka hilechikmʋt, kallakshashke: mikma okla moma kʋt, Amen, achashke;

¹⁶ Kʋna hosh i̱ki keyukmʋt ishki ya̱ ik ahobalokmʋt kallakshashke, mikma okla moma kʋt, Amen, achashke.

¹⁷ Kʋna hosh in chuka abili̱ka hatak i̱ yakni ʋlhpisa ya̱ kanʋllichikmʋt, kallakshashke: mikma okla moma kʋt Amen, achashke.

¹⁸ Kʋna hosh nishkin lʋpa ya̱ i̱ hina kohchichikmʋt kallakshashke: mikma okla moma kʋt, Amen, achashke.

¹⁹ Kʋna hosh okla inla, ʋlla i̱ki illi, micha ohoyo ʋlhtakla aiena nan im apesa kʋt shanaiyʋchikmʋt, kallakshashke: mikma okla moma kʋt, Amen, achashke.

²⁰ Kʋna hosh i̱ki tekchi ya̱ iba tʋshki kʋt i̱ki im anchi ya̱ wakʋmmi hokʋt, kallakshashke; mikma okla moma kʋt, Amen, achashke.

²¹ Kʋna hosh ʋlhpoa kaniohmi hoh kia iba tʋshkikmʋt, kallakshashke: mikma okla moma kʋt, Amen, achashke.

²² Kʋna hosh in tek, i̱ki ushetik, keyukmʋt ishki ushetik a̱ iba tʋshkikmʋt kallakshashke, mikma okla moma kʋt, Amen, achashke.

²³ Kʋna hosh ipochi ohoyo iba tʋshkikmʋt kallakshashke: mikma okla moma kʋt, Amen, achashke.

²⁴ Kʋna hosh in chuka abili̱ka hatak a̱ luma hosh fahamakmʋt kallakshashke: mikma okla moma kʋt, Amen, achashke.

²⁵ Kʋna hosh hatak nan okpʋni keyu ho̱ ʋba chi̱ hosh nahabenakmʋt kallakshashke; mikma okla moma kʋt, Amen, achashke.

²⁶ Kʋna hosh nan ʋlhpisa ilʋppa anumpa moma ka̱ iakaiyʋt ik yʋmihchokmʋt kallakshashke: mikma okla moma kʋt, Amen, achashke. (achi tok)