Tutelonomi 26 - Chahta Holisso Holitopa 1886

¹ Atukma yakohma hi oke, chi̱ yakni ya chi̱ ho̱ chin Chitokaka Chihowah yʋt yakni chima tok a̱ ish ona cha, yʋmmak o̱ abinilit ish aiashakmʋt,

² Yakni awaya ʋmmona moma chi̱ yakni chin Chitokaka Chihowah yʋt chima tok a̱ ish ai ishi cha̱ isht a̱yʋt, kishi ish fohkikmʋt, kanima ho̱ chin Chitokaka Chihowah yʋt aiatokolit hohchifo ha̱ a bohla he ahnikma, yʋmma isht ish onashke.

³ Micha naholitompa isht ʋtta ʋt nitak yʋmma anta tuk a̱ im ona cha, Himak nitak a̱ Chihowah yʋt yakni pima chi̱ hosh pi̱ki ʋhleha ha̱ anumpa kʋllo il im onochi tok a̱ ʋla li kʋt, chin Chitokaka Chihowah ya̱ im anohonli lishke, ish im acha hi oke.

⁴ Mihma naholitompa isht ʋtta yʋt kishi chibbak fohka kash ishi cha chin Chitokaka Chihowah im alta itikba ya̱ talala hi oke.

⁵ Mikma chin Chitokaka Chihowah itikba ya̱ ish anumpulit, A̱ki ʋt Silian illa̱ hosi a tok; atuk osh kanomosi hosh aiitʋpehʋt Echip a̱ ona cha, yʋmmak o̱ aiasha tok, micha yʋmmak o̱ aiashʋt oklushi chito, kʋllo, micha laua aiena toba tok.

⁶ Mihma Echip okla hʋt na ik achukmo ka̱ pi yʋmihchit, pilbʋshali cha, yuka kʋllo pi onuchi tok.

⁷ Mihma pi̱ki ʋhleha in Chitokaka Chihowah ya̱ il i̱ pa̱ha̱ya ma, Chihowah yʋt pi̱ haponaklo mʋt, pilbʋsha ka̱, micha pim atoksʋli ka̱, micha pissikkopali ka̱ pi̱hi̱sa tok.

⁸ Micha Chihowah yʋt ibbak kʋllo hosh, micha shakba ashatapa hosh, micha palʋmmi chito hosh micha nan ishtatokowa, micha na fehna yʋmi̱hinchit pi pehlichit Echip a̱ kohchi tok.

⁹ Atuk osh ilʋppa pisht ʋlʋshke, micha yakni ilʋppa, yakni pishukchi, micha foe‐bila aiena kʋt ayana̱hanli ilʋppa fehna ka̱ pimʋshke.

¹⁰ Atuk o̱ himak a̱ yakeh, Chihowah ma, is sʋma tok a̱ yakni yash awaya ʋmmona ka̱ isht chim ʋla lishke, ish acha hi oke; micha chin Chitokaka Chihowah itikba ya̱ ish talalashke, micha chin Chitokaka Chihowah itikba ya̱ ish aiokpʋchashke.

¹¹ Micha nana achukma puta chin Chitokaka Chihowah yʋt chima tok a̱ micha chin chuka achʋfa, chishno, micha Lefait, micha okla ik ithano chi takla aiasha ka̱ ima tuk a̱ isht ish aiyukpashke,

¹² Afʋmmi ont isht atuchina yʋmmak osh ishit pokoli ishi afʋmmi hoka, na chi̱ waya ishit pokoli moma ka̱ ishit pokoli ya̱ apesʋt chim ʋlhtaha cha, chi̱ holihta okhissa anu̱kaka ya̱ impʋt kaiyʋt aiasha chi̱ ka̱ Lefait, okla inla, ʋlla i̱ki illi, micha ohoyo ʋlhtakla aiena ka ish emakmʋt,

¹³ Yohmikmʋt chin Chitokaka Chihowah itikba ya̱, Na hullochi yash an chuka ya̱ ishit kohcha lishke, micha chim anumpa moma is sʋm api̱hi̱sa tuk mak o̱, Lefait, micha okla inla, ʋlla i̱ki illi, micha ohoyo ʋlhtakla aiena ka̱ ima lishke; chim anumpa ha̱ ak ʋbanʋbloshke, micha ik sʋmahakoshke,

¹⁴ Ya̱ya li moma kʋt ak po tuk oke; micha nana achʋfa kia na liteha isht ikbi li tuk keyu, micha nana achʋfa kia illi ya̱ ima li tuk keyu hoke; amba an Chitokaka Chihowah im anumpa ha̱ haiyaklo li mʋt, nana is sʋm apesa tuk moma ka̱ yʋmihchi li tuk oke.

¹⁵ Ish aiahanta holitopa, ʋba aholitopa ya̱ binilit aka et ish hopo̱koyashke, micha chim okla Islael, micha yakni ilʋppa pi̱ki ʋhleha ha̱ anumpa kʋllo ish im ilonochi tok mak osh, yakni pishukchi micha foe‐bila aiena kʋt ayanahanli ya̱ ish pima tok ʋt na yukpali ish onochashke, ish achashke.

¹⁶ Himak nitak a̱ nanʋlhpisa bilia, micha aiʋlhpiesa ish yʋmi̱hincha chi̱ ho̱, chin Chitokaka Chihowah yʋt chim apesʋshke; yʋmohmi hoka chu̱kʋsh aioklu̱hʋt, micha chimi shilombish aioklu̱hʋt ieshit ish yʋmi̱hinchashke.

¹⁷ Himak nitak a̱ Chihowah ak osh chin Chitokaka ya̱ chi̱, micha i̱ hina ak o̱ ish ai itʋnowa chi̱, micha i̱ nanʋlhpisa bilia, micha im anumpa micha aiʋlhpiesa yʋmi̱hinchi aiena ka̱ ish iesha chi̱, micha im anumpa ha̱ ish i̱ haponakla chi̱, a̱hli hosh ish mihʋshke.

¹⁸ Mikma mihʋt chim issa tok mak osh himak nitak a̱, Chihowah yʋt im okla ila chia ha chi̱ ho̱ a̱hli hosh mihʋshke; mikma im anumpa moma ka̱ holitoblit ish ieshikma;

¹⁹ Anumpuli tuk mak osh, chi chahʋchit, ahninchit isht anumpuli ya̱ micha hohchifo ha̱, micha holitopʋt ʋmmona ka̱, oklushi puta moma ka̱ yʋmmak oka ikbi tok ʋt i̱ shahlechi ya̱ chishno ak o̱ chi i̱hi̱kbi ha tuk oke; yʋmohmi ho̱ chin Chitokaka Chihowah ya̱ okla i̱ holitopa chia ha chi̱ ha tok, im ahanchi tok.