Tutelonomi 25 - Chahta Holisso Holitopa 1886

¹ Hatak ʋt anumpa itachowa nan apesa ʋhleha hʋt nan im apesa chi̱ ho̱, nan ai ʋlhpisa ya̱ ʋlakma, aiʋlhpiesa yano i̱ kashofi cha, yoshuba tuk a̱ anumpa onucha hi oke.

² Atukma yakohma hi oke, hatak yoshuba tuk ʋt boa he ʋlhpesakma, pi̱sa ho̱ ishtakanumi tuk a̱ itʋlhpisa ho̱ holhtina kaniohmi kʋt aka itola cha, onʋtola chi̱ ka̱ nan apesa ʋt apesashke.

³ Fahama pokoli ushta ho̱ ima hinla; micha ʋbanʋpa he keyu; keyukma ilʋppa ʋbanʋblichit fahama laua ishit boli hokma, chitibapishi hʋt nan isht ik chim ahobo na.

⁴ Waktoksʋli ʋt onush a̱ nihechikma, ibichilu fohka ish fohka he keyu.

⁵ Itibapishi ʋhleha hʋt itapihʋt a̱sha tuk o̱, achʋfa kʋt illi mʋt, ʋlla ik im ikshokma illi yash tekchi ya tuk ʋt naksika hatak inla yo̱ auwaya he keyu; i̱ hatak itibapishi ak osh iba chukowʋt itauwaya cha, i̱ hatak itibapishi nana akaniohma he ʋlhpesa kak o̱ i̱ yʋmihchashke.

⁶ Atukma yakohma hi oke; ʋtta ahpi ishikma itibapishi hohchifo illi tuk a̱ ʋlhtobʋt hikiashke: yʋmohmi ho̱ hohchifo kʋt Islael a̱ ik mosholo kashke.

⁷ Atuk o̱ hatak ash osh itibapishi tekchi yash ishi ikbʋnnokma, yohmikma itibapishi tekchi ʋt holihta okhissa ya̱ onʋt im asʋnonchi ʋhleha ha̱ im ona cha, A̱ hatak itibapishi hʋt itibapishi hohchifo ha̱ ikbit Islael a̱ ai i̱ hilechi ik bʋnnoshke; a̱ hatak itibapishi nana akaniohma he ʋlhpesa ka̱ yʋmihchi ik bʋnnoshke, achashke.

⁸ Yohmikma in tʋmaha holihta im asʋnonchi ʋhleha hʋt hoyo cha, im anumpulashke; mikma kʋllot hikia cha, ishi ik sa bʋnnoshke, achikma,

⁹ Yohmikma itibapishi tekchi ash osh im asʋnonchi ai itin takla ho̱ bili̱ka ona cha, iyi shulush honlo tuk a̱ i̱ shufi cha, nashuka ya̱ on tofashke, micha afalaminchit, Itibapishi ha̱ chuka ikbit i̱ hilechi ik bʋnno yano, hatak a̱ yakohmichashke achashke.

¹⁰ Mikma hohchifo kʋt Islael a̱; shulush i̱ shu̱fa in chuka, achashke.

¹¹ Hatak ʋt ita pakshʋnʋt a̱sha ma, achʋfa kash tekchi ʋt i̱ hatak isso ka̱ ibbak a̱ ahlakoficha chi̱ hosh bili̱ka ona cha, ibbak pit weli mʋt, obʋlh takla ya̱ isht ishikma,

¹² Yohmikma ibbak a̱ ish tʋblashke; chi nishkin ʋt i̱ nukha̱kla he keyu.

¹³ Chi̱ bahta ya̱ ishit weki itaiyukali chito, micha iskitini ʋt ik chi̱ fohko kashke.

¹⁴ Chim aboha ya̱ isht ʋlhpisa ilaiyukali, chito, micha iskitini aiena kʋt chim aiasha keyu kashke.

¹⁵ Amba nan isht weki a̱hli, micha aiʋlhpiesa yo̱, micha nan isht ʋlhpisa a̱hli, micha aiʋlhpiesa yosh chim aiashashke, micha yʋmohmi hosh nitak chi̱ falaiʋt chin Chitokaka Chihowah yʋt yakni chima tok a̱ hʋsh aiashashke.

¹⁶ Nana yakohmi ka̱ yʋmihchi moma kʋt, micha aiʋlhpiesa keyu yʋmihchi moma kʋt chin Chitokaka Chihowah nan isht yuwala yoka.

¹⁷ Echip a̱ kohchʋt ish minti ma, hina takla ya̱ Amalek ʋt chi kaniohmichi tok a̱ ish ithaiyanashke.

¹⁸ Hina takla yash chi afama cha, olbʋl a̱ya ya̱, olbʋl a̱ya ik kʋllo fehna moma ka̱ chi hoyʋblit chi kota ma, chi fahama tok; micha Chitokaka ya̱ ik i̱ nukshopo tok.

¹⁹ Yʋmohmi hoka yakohma hi oke, yakni yash a binilit ish iesha chi̱ ho̱ chin Chitokaka Chihowah yʋt chima tok a̱, chin tʋnʋp puta fullota ka̱ chin Chitokaka Chihowah yʋt chi fohʋchikma, shutik nutaka ya̱ Amalek isht ithana ya̱ kashofit ish kanchashke, ik chim ahakso kashke. (achi tok.)