Tutelonomi 24 - Chahta Holisso Holitopa 1886

¹ Hatak osh ohoyo ishi cha, itauwaya tuk osh, atuk osh yakohmikma, aliteha kaniohmi kia takali ha tuk a̱ ahayuchi cha, ik ahninchokmʋt, yohmikmʋt iti̱ mokofa holisso yo̱ i̱ holissochit ibbak fohki cha, in chuka ya̱ kohchichashke.

² Atuk o̱ in chuka ya̱ kohchʋt iakmʋt, hatak inla tekchi toba hinla ak inli hoke.

³ Atuk o̱ i̱ hatak ishtaiopi kash osh shitilema mʋt, iti̱ mokofa holisso i̱ holissochit ibbak fohki cha, in chuka ya̱ kohchit chʋffichikma, keyukmʋt i̱ hatak ishtaiopi ʋt tekchi ya chi̱ hosh ishi kash osh illikma;

⁴ I̱ hatak ti̱kba chʋffichi tok ʋt anonti tekchi ya chi̱ ho̱ liteha ha ya hokʋno isha he keyu: yʋmmak okʋt Chihowah itikba ya̱ nan ishit yuwala yoka: mikma chi̱ yakni ya chi̱ ho̱ chin Chitokaka Chihowah yʋt chima tok a̱ ish yoshoblicha he keyu.

⁵ Hatak ʋt tekchi himonna yo̱ ishi tukmʋt kohchʋt tanampit ia he keyu, micha anumpa nana kia ʋlhtokoha he keyu: nana ataklʋma ikshot afʋmmit in chuka ahanta cha, tekchi ishi tuk ʋt yukpalashke.

⁶ Hatak nana kia tanchi afotoha nutaka itola, keyukmʋt paknaka itola ish atonichit isha he keyu, hatak im ilhfiopak o̱ isht atonichi ha hinla ishi hokʋt.

⁷ Hatak osh itibapishi ʋhleha Islael im ʋlla ʋhleha aiachʋfa yo̱ hu̱kopʋt na kʋnia ikbi, keyukmʋt kanchi, yohmikmʋt hu̱kopa yʋmmʋt illashke, micha nana ik achukmo ka̱ a hʋch iti takla ya̱ ai ishit ish kanchashke.

⁸ Leplosi ililli okpulo ya̱ ahah ish ahnashke, micha naholitompa isht asha ʋhleha Lefait ʋhleha hʋt nana moma ka̱ hʋchim abʋchi tuk mak o̱, achukmalit ithaiyanʋt ish yʋmihchashke: yʋmmak ash o̱ i̱ miha li tuk mak o̱ ithaiyanʋt ish yʋmihchashke.

⁹ Echip a̱ kohchʋt ish minti ha ya̱ hina takla chin Chitokaka Chihowah yʋt Miliam a̱ kaniohmichi tok a̱ ish ithaiyanashke.

¹⁰ Chitibapishi ha̱ nan ish impota tuk ʋt isht atonichi ya̱ im aboha ont chukowʋt ish isha he keyu.

¹¹ Kocha ish hikia na, ish impota, kash hatak ak osh isht atonichi ya kohchʋt kocha ya̱ isht chim ʋla hi oke.

¹² Micha hatak ash osh ilbʋsha yokma, nan isht atonichi yash i̱shit chi nusa he keyu hoke.

¹³ Ik kaniohmi kia nan isht atonichi yash hʋshi ʋt okatulakma, anonti ish imashke; yʋmohmi ho̱ im anchi ak inli ho̱ anchit nusa hinla cha, anumpa yukpali chi onuchashke; mikma chin Chitokaka Chihowah itikba ya̱ isht ai ʋlhpiesa yʋt chim ʋlhpisashke,

¹⁴ Ilhtohno tishu ʋhleha hʋt chitibapishi ʋhleha immi yosh keyukmʋt, okla inla immi yosh chi̱ holihta okhissa anu̱kaka chi̱ hikia yʋt nan ik im iksho hosh ilbʋshakma ish ilbʋshala he keyu hoke.

¹⁵ Nitak ont im ʋlhpesakma asitʋbi tuk a̱ ish ima hi oke; micha hʋshi ʋt ont okatula he keyu, ilbʋsha hatuk osh chu̱kʋsh ʋt onʋtoyula hoka, keyukma chi̱ sanalit Chihowah pit i̱ pa̱ha̱ya na, nan ashʋchi chin toba na.

¹⁶ Ʋlla ʋhleha ya tuk mak o̱, i̱ki ʋhleha hʋt illa he keyu, mikma i̱ki ʋhleha hatuk mak o̱, ushi ʋhleha hʋt illa he keyu ak inli; hatak puta kʋt ilap nan ashʋchi tuk mak osh illa he.

¹⁷ Okla inla micha ʋlla ʋlhtakla i̱ki iksho aiena ka̱ ai ʋlhpiesa i̱ yʋmihchi ka̱ ish shanaiyʋcha he keyu; micha ohoyo ʋlhtakla i̱ nafohka ya̱ isht atonichi ish im isha he keyu hoke.

¹⁸ Amba Echip a̱ hatak yuka hosh hʋsh aiasha tuk o̱ chin Chitokaka Chihowah yʋt falʋmminchit chumpʋt yʋmmak o̱ chi kohchi tok o̱ ish ithaiyanashke; yʋmohmi ha tuk o̱ nana ilʋppa ish yʋmihcha chi̱ ho̱ chi̱ miha lishke.

¹⁹ Chim osapa ya̱ na waya bʋshlit ish akʋchi tuk osh, sita achʋfa ka̱ chim ahaksi na, osapa itonla tukma, hoyot chik aiyo kashke; okla inla ʋlla i̱ki illi, micha ohoyo ʋlhtakla aiena kak o̱ immi ha hi oke: yʋmohmi ho̱ nana moma chibbak ʋt toksʋlikma chin Chitokaka Chihowah chi yukpa lashke.

²⁰ Chim alif iti ya̱ ish bolikmʋt, anonti naksish a̱ ʋlbitelit ish bola he keyu; okla inla ʋlla i̱ki illi, micha ohoyo ʋlhtakla aiena kak o̱ immi ha hi oke.

²¹ Pa̱kʋpi chim ahollokchi pa̱ki ish aiʋmokmʋt, himmakma ish ʋlbʋlla he keyu; okla inla ʋlla i̱ki illi, micha ohoyo ʋlhtakla aiena kak o̱ immi ha hi oke.

²² Micha Echip yakni ya̱ hatak yuka hosh hʋsh aiasha tuk ʋt, hʋsh ithaiyanashke: yʋmohmi ha tuk osh nana ilʋppa hʋsh yʋmihcha he ya̱ hʋchi̱ miha lishke (achi tok.)