Tutelonomi 23 - Chahta Holisso Holitopa 1886

¹ Tʋli i̱ kʋhla, keyukmʋt im a luma̱ka tʋpa yokʋt Chihowah im okla moma itʋnaha ka̱ iba chukowa he keyu hoke.

² I̱ki iksho ʋt Chihowah im okla moma itʋnaha ka̱ iba chukowa he keyu hoke; ai iti shali ont ishit pokoli ont ʋhli takla kʋt Chihowah im okla moma itʋnaha ka̱ iba chukowa he keyu hoke.

³ Ammonait, keyukmʋt Moabait ʋt Chihowah im okla moma itʋnaha ka̱ iba chukowa he keyu; ai iti shali ont ishit pokoli ont ʋhli takla hokʋt Chihowah im okla moma itʋnaha ka̱ ik iba chukowo bilia hi oke.

⁴ Echip a̱ kohchʋt hʋsh minti ma hina takla ya̱ pʋska micha oka aiena isht ik hʋchi afamo tok oka; micha Mesopotamia Pehlu minti Beo ushi Balaam ʋt kallakshichi anumpa hʋchi onocha chi̱ ho̱ tohno tok okʋt.

⁵ Yohmi kia chin Chitokaka Chihowah yʋt Balaam a̱ i̱ haponakla he keyu tok; amba chin Chitokaka Chihowah yʋt chi holitobli hatuk okʋt anumpa hallakshichi yash filimmit na yukpali chim ikbi tok.

⁶ Chi okcha̱ya nitak moma ka̱ im iti̱ nanaiya, micha nana kʋt im aia̱hli achukmʋt ma̱ha̱ya he a̱ chik i̱ ho̱ho̱yo ho̱ bilia hi oke.

⁷ Etomait a̱ ish shitilema he keyu, chitibapishi hoka; Echip okla ha̱ ish shitilema he keyu, hatak ik ithano yosh i̱ yakni a̱ ish aiasha tok okʋt.

⁸ Yʋmmak o̱ ʋlla a toba hokʋto ai iti shali ont atuchinakmʋt, Chihowah im okla moma itʋnaha ka̱ iba chukowa hi oke.

⁹ Tʋshka chipota in tʋnʋp a̱ itibit ish iakma, nana okpulo moma ka̱ chik ahalaiyo kashke.

¹⁰ Hatak kʋna kia hʋch itin takla ya̱ na liteha ninak a̱ yohmi yoba cha, litihakmʋt binah ha̱ kohcha ia hi oke, binah anu̱kaka ya̱ ant ikchukowo ka hi oke.

¹¹ Yohmi tuk kia yakohma hi oke, opiʋt tahakma, oka isht il achefa hi oke; atuk osh hʋshi ʋt okatulakma anonti binah ha̱ ant chukowashke.

¹² Micha binah kohcha ya̱ ai ʋtta ʋt chin talaia cha, yʋmmak o̱ kohchʋt ish onashke,

¹³ Micha chi̱ na haluppa ha̱ patʋssa ish aienchashke: atuk osh yakohma hi oke: kohchʋt ish ia cha, ish ile nuktalala chi̱kmʋt, yakni isht ish kullashke; atukmʋt ish filema cha, chi a kohcha kash ish ompohomashke.

¹⁴ Chin Chitokaka Chihowah yʋt chi okchalincha chi̱ hosh, micha chi tikba chin tʋnʋp a̱ a chim issa chi hosh, hʋch itin takla chi̱ binah ano̱ho̱wa hoka; yʋmohmi hoka chi̱ binah hʋt kashofashke; yʋmohmi ho̱ naliteha hʋt chi a takali na, ik peso hosh chi̱ filʋmmit ik aiyo kashke.

¹⁵ Tishu hʋt impushnayo ya̱ i̱ maleli cha, chim ʋlakma, falʋmminchit impushnayo ibbak a̱ ish fohka he keyu.

¹⁶ Chi takla ahanta hi oke, hʋch itin takla kanima ho̱ atokolikmʋt chi̱ holihta okhissa puta achʋfa kanima ho̱ ahnikmʋt, yʋmma fehna ak a hi oke; ish ilbʋshala he keyu hoke.

¹⁷ Islael ushetik ʋhleha ha̱ hauit iksho kashke, micha Islael ushi ʋhleha Sotomait ʋt iksho kashke.

¹⁸ Anumpa il onochi ya̱ haui isht ʋlhtoba, keyukmʋt ofi isht ʋlhtoba ya̱ chin Chitokaka Chihowah im aboha ya̱ isht ish ona he keyu; ilʋppa ita tuklo kʋt chin Chitokaka Chihowah ishit yuwala yoka.

¹⁹ Chitibapishi nana ish im pota kʋt chelichi ish i̱ hoya he keyu, tʋli holisso chelichi, ilhpak chelichi, micha nana hoh kia chelicha chi̱ hosh im pota ya̱ chelichi a̱ ish i̱ hoya he keyu.

²⁰ Okla inla hano impotʋt ish chelicha hinla hoke: amba chitibapishi hano impotʋt ish chelicha he keyu: yʋmohmi ho̱ yakni ish isha chi̱ hosh ishia kʋt yʋmma ish ai ashʋt nana ho chibbak isht ish ishi moma ka̱ chin Chitokaka Chihowah yʋt na chiyukpalashke.

²¹ Chin Chitokaka Chihowah ya̱ anumpa ilonochi ish im ilonochi tukmʋt, atobbi kʋt ish sʋlaha he keyu; chin Chitokaka Chihowah yʋt chi̱ hoyo pulla hi oka, micha na ish ashʋchi ya̱ hinla hoke.

²² Amba anumpa ilonochi chik ilonocho tuk okmʋno na ish ashʋcha he keyu hoke.

²³ Nana kʋt chitih ha̱ a kohcha tuk a̱ ilap ahnit im issa fehna ka̱, chin Chitokaka Chihowah anumpa ish im ilonochi tuk ʋt chitih ha̱ mihʋt isht ish im issa tuk a̱ holitoblit ish ai a̱hlicha hi oke.

²⁴ Chin chuka a bili̱ka i̱ pa̱kʋpi ahollokchi ish onakmʋt, chishno ish ahni hosh pa̱ki ʋpʋt chi kaiyashke: yohmi kia nana chim aiʋlhto ya̱ ish apitta he keyu hoke.

²⁵ Chin chuka abili̱ka im onush hikia ya̱ ish iba chukowakmʋt, noshkobo ya̱ chibbak isht ish tʋptulashke: yohmi kia chin chuka abili̱ka hatak im onush hikia ya̱ ishit bʋsha ya̱ ish o̱ wiela he keyu hoke. (achi tok.)