Tutelonomi 22 - Chahta Holisso Holitopa 1886

¹ Chitibapishi i̱ wak toksʋli, keyukmʋt in chukfi ʋlhpoa yʋt kʋnia na, ish pisakmʋt, i̱ filʋmmit ish luma he keyu; ik kaniohmi kia falʋmminchit chitibapishi a̱ isht ish im ona pullashke.

² Atuk o̱ chitibapishi hʋt chi̱ bili̱ka keyu, keyukmʋt chik ithano yohmit, yʋmohmikmʋt chin chuka isht ish ona na, chim ahanta tuk o̱, chitibapishi ʋt hoyot a̱ya hi oke: mikma falʋmminchit ish ima hi oke.

³ Im issuba nashoba ya̱ ish yʋmihchikmʋt, i̱ nafohka ya̱ ish yʋmihcha hi oke: micha na kʋnia puta chitibapishi ʋt i̱ kʋnia tuk o̱ ish ahayuchikmʋt ish yʋmihchi ak inla hi oke, ish luma he keyu hoke.

⁴ Chitibapishi im issuba nashoba, keyukmʋt i̱ wak toksʋli hina takla aka itula tuk osh itonla na, ish pisa mʋt, i̱ filʋmmit ish luma he keyu: yʋmma apelʋchit anonti ish wakayʋchi pulla hi oke.

⁵ Ohoyo hʋt hatak immi ha̱ fohka he keyu, mikma hatak ak kia ohoyo i̱ nafohka ya̱ fohka he keyu hoke: yʋmma yʋmohmi moma kʋt chin Chitokaka Chihowah nan isht yuwala yoka.

⁶ Hina takla iti hikia ho̱, keyukmʋt aka yo̱ hushi im ʋlhpichik ʋt chi tikba talaia yobakmá, hofʋllichi yokmá lubonchi yokmá, nana ho̱ ishki ʋt hofʋlli yash, keyukmʋt lubonchi on ashakma, ishki yo̱ ushi aieninchit ish isha he keyu hoke.

⁷ Amba ik kaniohmi kia ishki ya̱ ish hikʋchi cha, ushi ya̱ ish isha hi oke: yʋmohmi hosh chim achukma cha, chi̱ nitak a̱ ish falaiachashke.

⁸ Chuka himona yo̱ ish ikbikmʋt, chin chuka paknaka ya̱ aholihta ish ikbashke: yʋmohmi ho̱ hatak nana kia yʋmma aka ont itula ma, issish a̱ chin chuka ya̱ isht chik onocho pullashke,

⁹ Pa̱kʋpi chim ahollokchi ya̱ na nihi ilaiyukali ho̱ ish ahokcha he keyu: ish yohmi na, chi̱ na nihi ish hokchi tuk waya kʋt, micha pa̱kʋpi chim ahollokchi a waya kʋt ik achukmo na.

¹⁰ Wak toksʋli ya̱ issuba nashoba itapotolit yakni ish patʋfficha he keyu hoke.

¹¹ Nafohka ilaiyukali chukfi hishi tʋnna, micha linen chohmi ka̱ himona achʋfa ish fohka he keyu hoke.

¹² Chim anchi ya̱ ish il anchi ʋt chukbi ushta ka̱ i̱ poshota ish ikbashke.

¹³ Hatak kʋna hosh ohoyo itauwaya tuk osh iba chukowa mʋt shitilema,

¹⁴ Micha na mihachit isht anumpula he anumpa onochit anumpa ik achukmo ka̱ hohchifo ha̱ onochi cha, Ohoyo ilʋppa ishi li tuk osh im ona li mʋt, ohoyo himita keyu ha̱ pisa lishke, achikma;

¹⁵ Mikma ohoyo hash i̱ki, micha ishki ita tuklo kʋt ohoyo himita yʋt hatak haleli yatuk keyu ishtatokowa ya̱ tʋmaha holihta im asʋnonchi ʋhleha ha̱ isht im onʋt holihta okhissa ya̱ isht im onashke.

¹⁶ Mikmʋt ohoyo himita i̱ki ʋt im asʋnonchi ʋhleha ha̱, Sʋso tek ʋt hatak ilʋppa tekchi ya chi̱ ho̱ ima li tuk ak o̱ shitilemʋshke.

¹⁷ Micha yakeh, na mihachit isht anumpula he anumpa onochit, chiso tek ʋt ohoyo himita ya tuk keyu ho̱ pisa lishke, achishke; atuk o̱, yohmi kia sʋso tek ʋt hatak haleli ya tuk keyu isht otʋni ilʋppak oke, achashke. Mikmʋt tʋmaha holihta im asʋnonchi ʋhleha itikba ya̱ nantʋnna yash patalashke.

¹⁸ Mikma tʋmaha holihta yʋmma im asʋnonchi ʋhleha hash osh hatak yʋmmak ash ishi cha na hotopa onocha hi oke.

¹⁹ Micha tʋli hʋta shekel tahlepa achʋfa ho̱ i̱ hoyo cha, ohoyo himita yash i̱ki ya imashke: Islael ohoyo himita hatak haleli keyu ho̱ hohchifo ik achukmo onochi hokʋt; mikma tekchi yashke; okcha̱yʋt ahanta nitak ta̱kla kʋt kancha he keyu.

²⁰ Amba nana ilʋppʋt a̱hli ha tuk ma, atuk o̱ ohoyo himita ʋt hatak haleli ya tuk keyu isht atokowa ʋt ik im ikshokma,

²¹ Yohmikma ohoyo himita yash i̱ki in chuka okhissa ya̱ isht onakma, in tʋmaha holihta yash hatak ʋhleha hʋt tʋli ishit boli na, illashke; i̱ki in chuka ya̱ haui tobʋt ahanta cha, Islael i̱ yakni ya̱ nana makali ya̱ yʋmihchi hokʋt: yʋmohmi hosh nan ik achukmo ka̱ hʋch itin takla ai ishit ish kanchashke.

²² Hatak ʋt ohoyo i̱ hatak a̱sha yo̱ iba tʋshki na, pisakma, ita tuklo hosh illashke; ohoyo iba tʋshki tuk hatak ash: micha ohoyo hash ita tuklot illashke: yohmi hosh nan ik achukmo ya̱ Islael a̱ ai ishit ish kanchashke.

²³ Ohoyo himita hatak haleli keyu hosh hatak im ʋlhpoa tuk osh tʋmaha holihta anta na, hatak ʋt pisa cha, iba tʋshki tukma;

²⁴ Yohmikma kohchit tʋmaha holihta, okhissa yʋmma ita tuklo ka̱ ishit hʋsh ona cha, tʋli ishit boli na, illashke; ohoyo hʋt tʋmaha holihta anta hok akosh ik pa̱yo tuk okʋt: mikma hatak ʋt in chuka a bili̱ka hatak tekchi ya̱ hofahyali hokʋt: yʋmohmi hosh nan ik achukmo ka̱ hʋch iti takla ya̱ ai ishit ish kanchashke.

²⁵ Amba hatak ʋt ohoyo himita yosh inla im ʋlhpoa yosh osapa anta na, ahayuchi cha, ai issʋt iba tʋshkikmʋt, hatak ash illa hosh illa hi oke.

²⁶ Amba ohoyo himita ano nana ish kaniohmicha he keyu; ohoyo himita ʋt nan ashʋchi isht illa he ʋlhpesa kʋt atokoli keyu hoke: hatak osh in chuka a bili̱ka hatak a̱ i̱ sanali cha, hikia cha, ʋbi chatuk a̱ nana ilʋppa yʋmmak inli chohmi hoka.

²⁷ Osapa anta na pisa ma, inla im ʋlhpoa ohoyo himita kash osh pa̱ya tuk, mihma hlakoficha he ʋt iksho tuk oka.

²⁸ Hatak osh ohoyo himita hatak haleli keyu hosh inla im ʋlhpoa keyu ho̱ pisa mʋt, hoklit ishi cha, iba tʋshki tuk osh haiakakma,

²⁹ Yohmikma iba tʋshki tuk hatak ash osh ohoyo himita i̱ki ya tuk shekel pokoli tahlapi ho̱ imakma, tekchi ya hi oke, hofahyali tuk okʋt, okcha̱yʋt ahanta kʋt kancha he keyu hoke.

³⁰ Hatak okʋt i̱ki tekchi ya̱ isha he keyu, micha i̱ki im anchi a̱ wakʋmma he keyu hoke. (achi tok)