Tutelonomi 21 - Chahta Holisso Holitopa 1886

¹ Yakni ish ai isha chi̱ ho̱ chin Chitokaka Chihowah yʋt chima tok a̱ achʋfa hosh illi cha, osapa ai itonlʋt haiakakma, micha kʋna hosh ʋbi tuk a̱ ik ithanokma,

² Yohmikma chim asʋnonchi ʋhleha, micha chi̱ nan apesa ʋhleha aiena kʋt kohchʋt ia cha, illi itola kash hikiʋt ia hosh tʋmaha holihta puta apakfoyupa ka̱ onʋt apesa hi oke.

³ Yohmikma yakohma hi oke, hatak illi yash et i̱ bili̱ka tʋmaha holihta ak osh tʋmaha holihta yʋmma im asʋnonchi ʋhleha fehna kʋt wak tek himmita ishit toksʋli chatuk keyu, micha ikunla abanʋt nana shali chatuk keyu ka̱ ish ashke.

⁴ Micha tʋmaha holihta yʋmma im asʋnonchi ʋhleha hʋt wak tek himmita yash oka akinafa okfa nana awaya keyu, micha ahollokchi keyu yo̱ isht ona cha, wak tek himmita yash ikunla ya̱ okfa yʋmma a chanlit tʋblashke.

⁵ Mikma na holitompa isht asha ʋhleha, Lefai ushi ʋhleha hʋt bili̱ka onʋt (yʋmmak osh nan isht im ahanta he, micha hochifot aiokpa̱hancha he, chin Chitokaka Chihowah yʋt atokoli tok oka,) yʋmmak ash im anumpa ho̱ anumpa itachowa puta, micha isso tok moma aiena ka̱ nana kʋt ʋlhpesa hi oke.

⁶ Mikma tʋmaha holihta hatak illi tuk et i̱ bili̱ka, yʋmma im asʋnonchi ʋhleha moma kʋt okfa yʋmma wak tek himmita noshkobo atʋpa tuk ash paknaka ya̱ ibbak ai achefa hi oke.

⁷ Micha afalaminchit, Issish ilʋppa pibbak ak osh hlatʋbli tuk keyu, micha pi nishkin ʋt pisa tuk keyu.

⁸ Chihowah ma, chim okla Islael a̱ falʋmminchit ish chumpa tuk ʋt ish i̱ nukha̱klashke, micha chim okla Islael apehlichi a̱ nan okpʋni tuk keyu issish hlatapa ya̱ chik onocho kashke, acha hi oke. Mikma issish hlatapa tuk ʋt i̱ kashofa hi oke.

⁹ Yʋmohmi hosh Chihowah itikba ya̱ ai ʋlhpiesa ish yʋmi̱hinchikmʋt, nan okpʋni tuk keyu issish hlatapa ya̱ ishit ish kanchashke.

¹⁰ Hʋchin tʋnʋp a̱ in tanampit kohchʋt ish ia tuk a̱, chin Chitokaka Chihowah yʋt chibbak a̱ fohki na, yukachit ish ishi tuk osh,

¹¹ Atuk osh yuka ʋhleha ha̱ ohoyo pisa ai okli kʋt ibafoyuka na, ish pisa cha, itauwaya chi bʋnnakmʋt,

¹² Yohmikmʋt ishit chin chuka isht ish ona hi oke; mikma noshkobo ha̱ ʋmo cha, ibbak ushi akchush a̱ ʋma hi oke.

¹³ Mikmʋt yuka i̱ nafohka ya̱ shu̱fi cha, chin chuka ya̱ ahantʋt i̱ki, micha ishki ya̱ ishit ya̱ha̱ya na, hʋshi achʋfa ʋlhpiesashke; atuk o̱ i̱ himmak a yo̱ ish iba chukowa cha, i̱ hatak ish tobakma, chi tekchi toba hi oke.

¹⁴ Atukma yakohma hi oke, chik ahnincho hokmʋt kanima ho̱ ia bʋnnakma ik ia, ish im ahna hi oke; amba tʋli holisso isht ish chumpa he keyu pulla; ʋlhpoyak nan aiʋlbi ish ikba he keyu, ish hofahyali hatuk okʋt.

¹⁵ Hatak osh tekchi in tuklo cha, achʋfa kʋt i̱ holitopa mʋt, achʋfa kano ik ahnincho; atuk o̱ holitopa yash osh, micha ik ahnincho yash osh ita tu̱klot ʋlla im ashakma, atuk o̱ ik ahnincho ushi yash osh ushi ʋtta ahpi yokma,

¹⁶ Yohmikma yakohma hi oke, ushi ʋhleha nana im a̱sha tuk ʋt imakmʋt holitopa ushi atuk a̱, ik ahnincho ushi ak osh ʋtta ahpi yo̱ mʋhli tuk a̱, tikba ʋtta ahpi ikba he keyu.

¹⁷ Amba ik ahnincho yash ushi ak o̱ nan im asha moma kash osh kʋshkoa tuklo ho̱ ima cha, yʋmmak osh ʋtta ahpi ya̱ anolashke; yʋmmak osh imi hlampko ishtia ʋmmona yokʋt, ʋtta ahpi ai isha he ʋlhpesa ʋt immi hoke.

¹⁸ Hatak osh ushi ʋt chu̱kʋsh ilapunla, micha anumpa i̱ kobʋffi shahli yosh im anta kʋt, i̱ki micha ishki im anumpa ha̱ i̱ haponakla he keyu, micha fʋmmi kia, im anumpa ha̱ haponakla he keyukma;

¹⁹ Yohmikma i̱ki, micha ishki ita tuklo kʋt halʋllit ishi cha, aiʋtta holihta okhissa, micha in tʋmaha holihta im asʋnonchi ʋhleha itikba ya̱ isht im onashke.

²⁰ Micha in tʋmaha holihta im asʋnonchi ʋhleha, Piso ilʋppʋt chu̱kʋsh ilapunla, micha pim antia he keyu, pim anumpa ha̱ im antia he keyushke, isikopa micha okishko shahli yoke, im acha hi oke.

²¹ Mikma in tʋmaha holihta hatak moma kʋt tʋli ishit boli na illa hi oke: yʋmohmi hosh ahʋchi iti takla nan ik achukmo ka̱ ishit ish kanchashke, mikma Islael moma kʋt haklokmʋt nukshopashke.

²² Micha hatak ʋt isht illa he ʋlhpesa ho̱ nan ashʋchi yʋmihchi cha, illa chi̱ ʋlhpesa na, iti ish in takalichi tukma;

²³ Nipi ʋt iti ya̱ takali na ont onna he keyu, ik kaniohmi kia nitak yʋmmak inli ho̱ ish hohpi pullashke; (iti yo̱ atakali hokʋto Chitokaka a kallakshi hoka,) yʋmohmi ho̱ chi̱ yakni ya chi̱ ho̱ chin Chitokaka Chihowah yʋt chima tok ʋt ik liteho kashke, (achi tok.)