Tutelonomi 20 - Chahta Holisso Holitopa 1886

¹ Tanampit kohchʋt ish ia tuk osh, issuba puta, micha tʋnʋp iti chunaha puta, micha okla laua kʋt chi̱ shahli ho̱, ish pisakmʋt chik i̱ nukshopo kashke: chin Chitokaka Chihowah (yʋmmak) osh Echip yakni ya̱ apehlichit chi kohchi tok ʋt chiba foyuka hoka.

² Atukma yakohma hi oke; itibit bili̱ka hʋsh onakma, naholitompa isht ʋtta yʋt bili̱ka onʋt okla ha̱ im anumpula hi oke.

³ Micha Islael ma, hʋsh haklashke; himak nitak a̱ hʋchin tʋnʋp a̱ hʋsh itiba chi̱ hosh bili̱ka hʋsh onashke: hʋchi chu̱kʋsh ʋt ik ello kashke; hʋchi nukshopa na, micha hʋchi wʋnihinchi na, micha yʋmma pulla kak o̱ ik hʋchi nukhlakancho kashke.

⁴ Hʋchin Chitokaka Chihowah ak osh hʋchin tʋnʋp a̱ hʋchim itibit, hʋchi okchalincha chi̱ hosh hʋchi awant ia hoka im acha hi oke.

⁵ Mikma nan ʋlhtoka ʋhleha hʋt okla ha̱ im anumpulit, Hatak nanta hosh chuka himmona ikbi tuk osh ik hullocho ki̱sha cho? falamʋt in chuka iashke: keyukmʋt itin tanampi kʋt illi na, hatak inla hosh hullochi ná.

⁶ Mikma hatak nanta hosh pa̱kʋpi a̱ hollokchi ya̱ hokchi tuk osh waya ka̱ ik aiapo ki̱sha cho? yʋmmak okʋt falamʋt in chuka iashke, keyukmʋt itin tanampi kʋt illi na, hatak inla hosh ai ʋpa na.

⁷ Mikma hatak nanta hosh ohoyo itim ʋlhpoa tuk osh, ik esho ki̱sha tuk oh cho? yʋmmak okʋt falamʋt in chuka iashke, keyukmʋt itin tanampi kʋt illi na, hatak inla hosh ishi na, achashke.

⁸ Mikmʋt ʋlhtoka ʋhleha hʋt achakalichit okla ha im anumpulit, Hatak nanta hosh nukshopa, micha chu̱kʋsh elli cho? yʋmmak okʋt falamʋt in chuka iashke, keyukma chu̱kʋsh elli ka̱ chohmit itibapishi ʋhleha hʋt chu̱kʋsh elli na, acha hi oke.

⁹ Atukma yakohma hi oke, nan ʋlhtoka ʋhleha hʋt okla ha̱ im anumpulit ont tahlikmʋt, okla ha̱ pehlicha chi̱ ka̱ tʋshka chipota i̱ kapotʋni ʋhleha okla atokola hi oke.

¹⁰ Tʋmaha holihta ish itiba chi̱ hosh bili̱ka ish onakmʋt iti̱ nanaiya anumpa ish im anumpula hi oke,

¹¹ Atukma yakohma hi oke, iti̱ nanaiya anumpa falama chima cha, chin tiwikma, yohmikma yakohma hi oke, yʋmma aiasha tuk okla moma kʋt chi̱ nutaka cha, chin toksʋla hi oke.

¹² Amba chiti̱ nanaiya he keyukma, amba chin tanampi pulla kak o̱ ahnikma, abinachit ish apakfoyupa hi oke.

¹³ Atuk o̱ chin Chitokaka Chihowah yʋt chibbak fohkikma, nakni yʋmma moma ka̱ bʋshpo falaia ishit fahamʋt ish kanchashke.

¹⁴ Amba ohoyo micha ʋlla, micha nan ʋlhpoba, micha nana hosh tʋmaha holihta ya̱ aiasha kʋt moma, na wehpoa puta moma fehna ka̱ ish isha hi oke; chin tʋnʋp ʋhleha i̱ na wehpoa yʋmmak oka chin Chitokaka Chihowah yʋt chima tuk oka, ish ai ʋpa hi oke.

¹⁵ Ilʋppak o̱ tʋmaha holihta chi̱ hopaki fehna puta oklushi ilʋppak inli in tʋmaha holihta aiachʋfa keyu puta ka̱ ish yʋmihchashke.

¹⁶ Amba okla ilʋppa in tʋmaha holihta puta chi̱ yakni ya chi̱ ka̱, chin Chitokaka Chihowah yʋt chima tok ano, nana hosh fiopa kʋt a̱shakma ish okchalincha he keyu hoke.

¹⁷ Amba ishit kanchit ish ʋmohmicha hi oke: yʋmmʋt Hittait, micha Amolait, micha Kananait, micha Pelissait, Hifait, micha Chebusait aiena ka̱, chin Chitokaka Chihowah yʋt chi̱ miha tuk mak o̱ ish yʋmihcha hi oke.

¹⁸ Yʋmohmi hosh nan ashʋchi ishit yuwala i̱ naholbʋt toba i̱ yʋmihchi chatuk ʋt ik hʋchik hanancho ho̱: yohmikmʋt hʋchin Chitokaka Chihowah ya̱ hʋchik i̱ yoshobo kashke.

¹⁹ Tʋmaha holihta ya̱ abinachit ish aiasha tok hopaki cha, in tanampit ish isha chi̱ kʋt, iti ya̱ iskifa ishit chanlit ish okpʋna he keyu, ish ai ʋpa hinla hokʋt (osapa iti aiasha kʋt hatak aiokcha̱ya yoka:) abinanchit ish aiasha chanlit akakohlit isht ish i̱ sanala he keyu hoke.

²⁰ Peh iti ai ʋpa chatuk keyu puta ish ithana kak illa hosh okpʋnit chanlit ish akakohla hi oke: tʋmaha holihta yosh chin tanampikma, aiatukko holihta ish ikbi cha, ish im aiya hi oke. (achi tok.)