Tutelonomi 2 - Chahta Holisso Holitopa 1886

¹ Yʋmohmi ho̱ e fullota cha, Chihowah yʋt ʋm anumpuli tuk mak o̱; yakni haiaka pilla, Okhʋta humma aiitʋnowʋt il ia tok: mihmʋt nitak laua nʋnih Sei ya̱ il apakfoyupa tok.

² Mihma Chihowah yʋt ʋm anumpulit,

³ Nʋnih ilʋppa hʋsh apakfoyupa tok a̱ hopaki kʋt ʋlhpesʋshke: falʋmmi pilla ho̱ hʋsh fullotashke.

⁴ Micha okla ha̱ im apesʋt, Hʋsh itibapishi ʋhleha Esau im ʋlla ʋhleha Sei aiasha ka̱ im aiʋhli ont hʋsh hlopulla chi̱ hoke; mikma hʋchi̱ nukshopa chi̱ hoke; yʋmohmi hoka, ahah, hʋsh il ai ahni fehnashke.

⁵ Micha hʋsh in tanampi na, i̱ yakni peh iyi pʋtta ahabli achʋfa chohmi kia, hʋchima la chi̱ keyu hoka; nʋnih Sei ya̱ Esau ʋt aiasha he a̱ ima li hatuk oka.

⁶ Ilimpa ya̱ tʋli holisso ya̱ isht hʋsh in chumpa hosh hʋsh impa chi̱ hoke; micha oka aiena ka̱ tʋli holisso ya̱ isht hʋsh in chumpa hosh hʋsh ishka chi̱ hoke, achi tok.

⁷ Hʋchin Chitokaka Chihowah yʋt chibbak na hʋsh toksʋli puta ka̱ na hʋchi yukpali tuk oka: yakni haiaka chito ilʋppa hlopullit hʋsh itʋno̱ho̱wa ka̱ ithana hoke; afʋmmi pokoli ushta ilʋppak ash chin Chitokaka Chihowah yʋt chiba foyuka tuk oke: nana ik chim iksho kit iksho tuk oke, achi tok.

⁸ Atuk osh il itibapishi ʋhleha Esau im ʋlla ʋhleha, yʋmmʋt Sei ya̱ a̱sha ka̱ issʋt ant il iʋt, Elalh micha Esion‐kaba ʋttʋt aiia, yakni patali hlopulli ya̱ il ona mʋt, e fullota cha, Moab yakni haiaka hina ya̱ ont il ia tok.

⁹ Mihma Chihowah yʋt ʋm achi mʋt, Moabait ʋhleha ha̱ ish ilbʋshali na, micha in tanampi hosh ish itibi na: chi̱ yakni ya chi̱ ho̱, i̱ yakni a̱ chima la he keyu hoka; Lot im ʋlla ʋhleha hʋt i̱ yakni ya chi̱ ho̱ Ah ya̱ ima li tuk oka.

¹⁰ Chashpo ma, yʋmmak o̱ Emim ʋhleha hosh okla chito, micha laua, micha chaha kʋt Anakim ak o̱ chohmi hosh aiasha tok.

¹¹ Yʋmmak kia Anakim ak inli chohmit hatak chaha hohchifo tok; amba Moabait ʋhleha hʋt Emim hochifo tok.

¹² Holim ʋhleha hoh kia chashpo ka̱ Sei ya̱ a̱sha beka tok; yohmi tok kia Esau im ʋlla ʋhleha ak osh itikba ya̱ ai ishit kanchi ha yʋt, iakaiya tok; micha Islael ʋt yakni aiasha Chihowah yʋt ima tuk a̱ yʋmi̱hinchi tuk a̱ chohmichi cha ʋlhtobʋt aiasha tok.

¹³ Himak a̱ hʋsh wakaya cha, bok ushi Selet a̱ hʋsh hlopullashke, achi li tok; mihma bok ushi Selet a̱ e hlopulli tok.

¹⁴ Mihma Katesh‐banea ashʋt e minti tok, ʋttʋt bok ushi Selet a̱ e hlopulli tok, ant ʋhli ka̱ iti takla kʋt, afʋmmi pokoli tuchina akucha untuchina tok; pola̱ka hatak tʋnʋp a̱ya ai iti shali moma kʋt Chihowah yʋt anumpa kʋllo im anumpuli tuk mak o̱, okla itin takla ya̱ akohchʋt ont taiyaha tok.

¹⁵ Chihowah yʋt okla chito ai iti takla ai ishit ka̱hanchi na, ont moshola chi̱ ka̱ ibbak ʋt i̱ sanali ho̱ mʋhli ha tuk oka.

¹⁶ Yohmi ho̱ yakohmi tok, hatak tʋnʋp a̱ya moma kʋt okla ai iti takla ya̱ kohchʋt ont mosholit illit taiyaha ma,

¹⁷ Chihowah yʋt ʋm anumpulit,

¹⁸ Himak nitak a̱ Moab im ai ʋhli Ah ya̱ hʋsh hlopulla chi hoke.

¹⁹ Atuk osh Ammon im ʋlla ʋhleha ha̱ ichapa ka̱, bili̱ka ish onakmʋt ish ilbʋshala he keyu, micha ish ataklʋmma he keyu, Ammon im ʋlla ʋhleha i̱ yakni a binila he a̱ chima la he keyu hoka; Lot im ʋlla ʋhleha i̱ yakni ya chi̱ ho ima li tuk okʋt, achi tok.

²⁰ Yʋmmak kia hatak chaha i̱ yakni hohchifo tok; nitak cha̱shpo ka̱ hatak chaha yʋt yʋmmak o̱ aiasha tok. Mihma Ammonait ʋhleha hʋt Samsʋmmim okla yoke, achi tok.

²¹ Okla chito, micha laua, micha chaha kʋt Anakim ak o̱ chohmi tok; yohmi tuk kia Chihowah yʋt itikba ya̱ ai ishit kanchi tok; mihma iakaiya cha, ʋlhtobʋt aiasha tok.

²² Holim ʋhleha hash Esau im ʋlla ʋhleha hʋt Sei aiasha tuk itikba ya̱ ai ishit kanchi ma, yʋmmak inli chohmichi tok; mikma okla iakaiya cha, ʋlhtobʋt aiasha tuk ʋt himak nitak a̱ ant ai ʋhli hoke.

²³ Mihma Afim ʋhleha yʋmmʋt Haselim a̱ aiashʋt Assa ont ʋhli tuk a̱, Kaftolim yʋmmʋt Kafto ashʋt kohcha tuk ʋt ai ishit kanchi cha, ʋlhtobʋt aiasha tok.

²⁴ Hʋsh wakaya cha nowʋt iʋt Anon okhina ya̱ hʋsh hlopullashke, yakeh, Amolait Sihon Heshbon i̱ mi̱ko, micha i̱ yakni ya̱ chibbak fohki lishke; abinilit ish wakayashke, itibi yak o̱ ish i̱ kʋllashke.

²⁵ Himak nitak a̱ oklushi puta shutik nutaka aiasha kʋt, chi annowa ka̱ haklo puta ka̱ chi̱ komunta, micha chi̱ nukshopa onochit ishtia likma, chishno pulla kak o̱ wʋni̱hinchi cha, komi̱hincha chi̱ hoke, achi tok.

²⁶ Mihma anumpa shali ʋhleha ha̱ Katemolh yakni haiaka ya̱ akohchit Heshbon i̱ mi̱ko Sihon a̱ anumpa iti̱ nanaiya ya̱ pit i̱ pilʋt.

²⁷ Chi̱ yakni ya̱ ak hlopulli, is sʋm ahni, hina ak o̱ a̱ya la chi̱ hoke, ishtimpakimma, micha ʋlhfʋbekimma pit fullota la he keyu hoke.

²⁸ Ʋpa la chi̱ ka̱ tʋli holisso ʋlhtoba ho̱ ilhpak is sʋmashke; ishko la chi̱ ho̱ tʋli holisso ʋlhtoba ho̱ oka is sʋmashke, peh aka hikia hosh chi̱ yakni ya̱ hlopulli lashke.

²⁹ (Esau im ʋlla ʋhleha, yʋmmʋt Sei aiasha kʋt, micha Moabait ʋhleha Ah aiasha kʋt si yʋmihchi tuk oka;) yʋmohmi na, Chatan a hlopullit pin Chitokaka Chihowah yʋt yakni pima tok a̱ ona lashke, achi li tok.

³⁰ Yohmi tuk kia Heshbon i̱ mi̱ko Sihon ʋt ant ik hlopulli, ik pim ahno tok; Chin Chitokaka Chihowah yʋt imi shilombish a̱ kʋllochi tok, micha chu̱kʋsh a̱ kʋllochi tok oka; yʋmmʋt chibbak a̱ fohka chi̱ kak atok, himak nitak kia yʋmohmishke.

³¹ Mihma Chihowah yʋt, yakeh, Sihon micha i̱ yakni ya̱ chitikba a chimʋt isht ia lishke, a binilit ish wakayashke; yohmi cha, i̱ yakni ya̱ ish ishashke, ʋm achi tok.

³² Yohmi ma Sihon micha im okla moma aiena kʋt pi̱ sanalit, pitiba chi̱ hosh kohchʋt Chahas ak o̱ ʋla tok.

³³ Mihma pin Chitokaka Chihowah yʋt pi tikba ya̱ pibbak a̱ fohki tok; mihma yʋmma micha ushi ʋhleha, micha im okla moma aiena ka̱ issot e kanchi tok.

³⁴ Micha nitak yʋmma in tʋmaha holihta puta moma ka̱ il ishi cha, tʋmaha holihta puta hatak, micha ohoyo, micha ʋlla aiena ka̱ ishit kanchit il ʋmohmichi tok; achʋfa kia kil apoancho tok.

³⁵ Peh nan ʋlhpoa ak illa ho̱, na wehpoa il il aieshi tok; micha tʋmaha holihta il ishi ha tuk a̱ na wehpoa aiena ak a tok.

³⁶ Aloe yʋmmʋt Anon okhina ont alaka, micha tʋmaha holihta yʋmmʋt okhina bili̱ka a talaia ka̱ ʋttʋt ia hosh Kileat ont ʋhli ka̱, tʋmaha holihta achʋfa kia kʋllo kʋt pi̱ shahli tok keyushke; pin Chitokaka Chihowah yʋt mominchit pibbak a̱ fohki tok.

³⁷ Peh Ammon im ʋlla ʋhleha i̱ yakni, micha okhina Chabbak atalaia kanima yoh kia, micha nʋnih foka tʋmaha holihta puta ka̱, micha nana ho̱ pin Chitokaka Chihowah yʋt pim alʋmmi tuk ma, chik ona tok.