Tutelonomi 19 - Chahta Holisso Holitopa 1886

¹ Oklushi puta ka̱ chin Chitokaka Chihowah yʋt i̱ yakni ya̱ chima tuk ʋt ai ishit kanchikma, ʋlhtobʋt in tʋmaha holihta puta, micha in chuka puta ish aiashakmʋt,

² Ish ai asha chi̱ ho̱ chin Chitokaka Chihowah yʋt chima ka̱ chi̱ yakni iklʋnna tʋmaha holihta tuchina ho̱ ish ilai atokola hi oke.

³ Hina ish ilai ikba hi oke: micha chi̱ yakni aiʋhli ish aiasha chi̱ ho̱, chin Chitokaka Chihowah yʋt chima tuk a̱ kʋshkoa tuchina ho̱ ish ita kʋshkola hi oke: yohmikma hatak bi̱ka ʋbi puta kʋt yʋmmak o̱ pit malela hi oke.

⁴ Hatak ʋbi ʋt okcha̱ya chi̱ hosh yʋmma pit maleli kʋt yakohma hi oke: Kʋna hosh ik akostinincho hosh, yʋmmak oka cha̱shpo ka̱ i̱ nukkilli chatuk keyu hosh, chuka a bili̱ka hatak o̱ ʋbi;

⁵ Yohmi kʋt hatak osh chuka a bili̱ka hatak o̱ ita tuklo cha iti chanla chi̱ hosh iti anu̱kaka ya̱ itonachi mʋt, iti chanlit kinʋffa chi̱ hosh, iskifa ya̱ ibbak ishit fahama na, noshkobo ʋt ʋpi ya̱ shu̱fa cha, chuka a bili̱ka hatak ash onʋtola na, illi; yohmikma tʋmaha holihta ilʋppa puta ai achʋfa ka̱ malelit ona cha, okcha̱ya hi oke.

⁶ Issish hlatapa tuk a̱ il aiokha hʋt chu̱kʋsh lʋshpa moma hosh, hina ʋt falaia ha tuk o̱, hatak ʋbi yash hliolit sakki cha, ʋbi yoba na, cha̱shpo i̱ nukkilli ha tuk keyu hokʋt, illa he ʋlhpesa keyu kia,

⁷ Yʋmohmi hoka tʋmaha holihta tuchina ho̱ ila filʋmmichit ish atokola chi̱ ka̱ chi̱ miha lishke.

⁸ Atuk o̱ chin Chitokaka Chihowah yʋt chi̱ki ʋhleha ha̱ anumpa kʋllo il onochit im issa tuk mak osh, chim aiʋhli ya̱ chitoli cha, chi̱ki ʋhleha ha̱ im issa tok yakni moma ka̱ chimakma,

⁹ Ʋm anumpa puta ilʋppa himak nitak a̱ chim ahanchi li ka̱ holitoblit ish yʋmi̱hinchit, chin Chitokaka Chihowah ya̱ ish holitobli cha, i̱ hina puta ka̱ ish ano̱ho̱wa na biliakmʋt: tuchina ilʋppak ash, himakma tʋmaha holihta tuchina ho̱ ish il ibafohkashke,

¹⁰ Yʋmohmi ho̱ chi̱ yakni ya̱ chimmi ha chi̱ ho̱ chin Chitokaka Chihowah yʋt chima tok a̱, nan ashʋchi keyu issish ʋt ik ahlatapo kashke: micha yohmi ho̱ issish ʋt ik chi onʋtolo kashke.

¹¹ Yohmi kia hatak nana hosh chuka a bili̱ka hatak a̱ i̱ nukkilli cha, im aiehchit itonla tuk osh, i̱ sanalit wakaya cha, isht illa he ʋlhpesa ho̱ fahama na, illi ma, malelit tʋmaha holihta ilʋppa puta kash achʋfa ka̱ onakma:

¹² Yohmikma in tʋmaha holihta im asʋnonchi ʋhleha hʋt pit hoyot, ont ishtʋla cha, issish hlatapa tuk a̱ aiokha ya̱ ibbak fohkashke, yohmi na illashke.

¹³ Chi nishkin ʋt ik i̱ nukha̱klo kashke; amba nan okpʋni keyu issish hlatʋbli ya̱ Islael a̱ ai ishit ish kanchashke, yʋmohmi ho̱ aiʋlhpesʋt chi̱ ma̱ha̱yashke.

¹⁴ Yakni a binilit ish iesha chi̱ chin Chitokaka Chihowah yʋt chima tok, chi̱ yakni ya̱ chin chuka abili̱ka i̱ yakni ʋlhpisa, yʋmmʋt nitak cha̱shpo ma, a hilechi ha tok a̱ ish kanʋllicha he keyu.

¹⁵ Witnes achʋfa hokʋt hatak osh yoshuba tok, keyukmʋt nan ashʋchi tuk nan ashʋchi nana ho̱ ashʋchi tuk a̱ i̱ sanalit hikia he keyu; witnes tuklo nana itih ho̱ keyukmʋt, witnes tuchina nana itih hok mak o̱ nana kʋt isht aia̱hla hi oke.

¹⁶ Witnes ik a̱hlo yosh hatak nana kia i̱ sanalit nan ik achukmo anola chi̱ hosh wakayʋt hikiakma;

¹⁷ Yohmikma hatak ita chowa kash osh ita tuklo hosh Chihowah itikba, na holitompa isht asha, micha nan apesa ʋhleha aiena kʋt nitak yʋmma aiasha tuk a̱ itikba hiela hi oke.

¹⁸ Mikma nan apesa ʋhleha hʋt achukmalit asilhhʋcha hi oke: a tuk o̱, yakeh, witnes ʋt witnes ik a̱hlo yosh anumpa ik a̱hlo ya̱ itibapishi ha̱ isht i̱ sanalit anoli tukma,

¹⁹ Yohmikma itibapishi ha̱ nana yʋmihcha he im anukfila tuk a̱ ilap ak o̱ chohmit ish yʋmihcha hi oke: yohmi hosh a hʋch iti takla ya̱ nan ik achukmo ka̱ isht ish kancha hi oke.

²⁰ Mikma inla aiasha yʋt haklo cha, nukshopakmʋt, himmakma nan ik achukmo yohmi ka̱ a hʋch iti takla ya̱ ik yʋmihcho kashke.

²¹ Micha chi nishkin ʋt ik i̱ nukha̱klo kashke: amba im ilhfiopak atukma im ilhfiopak ashke, nishkin atukma nishkin ashke, noti yatukma noti yashke, ibbak atukma ibbak ashke, iyi yatukma iyi yashke. (achi tok)