Tutelonomi 18 - Chahta Holisso Holitopa 1886

¹ Naholitompa isht ʋtta ʋhleha, Lefait ʋhleha, Lefait apehlichi moma aiena kʋt Islael a̱ ta̱kla akashapa, micha aiisha he ʋlhpesa ya̱ isha he keyu; luak ishit hukmit, Chihowah im issa, micha im ai isha he ʋlhpesa aiena kak o̱ ʋpa hi oke.

² Yʋmohmi hokʋt itibapishi ʋhleha itin takla ya̱ yakni ik im iksho ka hi oke, im achi tuk mak osh, Chihowah ak o̱ ai isha he ʋlhpesa yoke.

³ Micha okla ha̱ im ai ishi kʋt, wak okmá, keyukmʋt chukfi hokmá nana ho̱ ʋbit isht aiokpʋchi im issakmʋt, naholitompa isht ʋtta ya̱ fulup, itisupi tuklo micha takoba aiena kak o̱ ima hi oke, mikma ilʋppak osh naholitompa isht ʋtta yʋt immi ha hi oke.

⁴ Micha onush chi̱ waya ʋmmona, chim oka‐paki, micha chi̱ bila, micha chin chukfi hishi ʋlmo ʋmmona aiena ka̱ ish ima hi oke.

⁵ Chihowah hohchifo pulla ho̱ hikiʋt nan isht im ahanta chi̱ ho̱, yʋmma, micha ushi ʋhleha aiena kʋt bilia chi̱ ho̱, chim apehlichi moma ka̱ akohchit chin Chitokaka Chihowah yʋt atokoli tuk oke.

⁶ Yohmi ka̱ Lefait osh Islael a̱ fullota moma holihta okhissa kanima ai ʋtta tuk osh kohchʋt ʋlakma, micha kanima ho̱ Chihowah yʋt ai atokoli tuk a̱, im anukfila oklu̱hʋt bʋnna hosh ʋlakmʋt,

⁷ Yohmikmʋt itibapishi ʋhleha Lefait ʋhleha hʋt Chihowah itikba ya̱ hieli kʋt yʋmihchi ka̱ chohmit in Chitokaka Chihowah hohchifo pulla ho̱ nan isht ahanta hi oke.

⁸ In tikba im ila̱yak kʋnia tuk ʋlbi ka̱, ishikmʋt, ʋpa chi̱ kʋt ti̱kba asha, i̱ kʋshkoa chohmi ka̱ isha hi oke.

⁹ Chin Chitokaka Chihowah yʋt yakni chima tok a̱ ish onakmʋt, oklushi yʋmma puta a yʋmihchi nan isht yuwala ya̱ hobachit yʋmihcha chi̱ ka̱ ish ithʋna he keyu.

¹⁰ A hʋchi takla ka̱, ushi, keyukmʋt, ushetik a̱ luak hlopullichi keyukmʋt, nan ithana ilahobi keyukmʋt, nitak nan isht ithana ilahobi, keyukmʋt, atʋlwʋchi, keyukmʋt ohoyo isht ahullo,

¹¹ Keyukmʋt shimohʋchi, keyukmʋt, nana aholhkunna i̱ ponaklo, keyukmʋt, nakni nan ishtahullo, keyukmʋt, hatak illi itim anumpulit nan anoli nana kia ik ai iksho ka hi oke.

¹² Nana ilʋppa puta yʋmi̱hinchi moma ka̱ Chihowah yʋt nan ishit yuwala yoke: micha nan ishit yuwala ilʋppa pulla kak o̱, Chihowah yʋt chi tikba ya̱ akocha wehli tuk oka.

¹³ Chin Chitokaka Chihowah ya̱ ish im a̱hlashke.

¹⁴ Oklushi ilʋppa ish isha chi̱ puta kʋt, nitak nan isht ithana ilahobi, micha nan ithanʋt anoli ilahobi puta ka̱ i̱ haponaklo tuk oka: yohmi kia chishno ano chin Chitokaka Chihowah yʋt ish yʋmihcha he ya̱ ik chim ahno tuk oke.

¹⁵ Chin Chitokaka Chihowah yʋt a hʋch itin takla hʋsh itibapishi ʋhleha ai achʋfa yosh ʋno chohmi ho̱, Hopaii chi̱ hilecha chi̱ hoke; yʋmmak o̱ ish i̱ haponakla hi oke.

¹⁶ Holeb a̱ itʋnahʋt ish aiasha nitak mʋt, chin Chitokaka Chihowah ya̱ ish im ahni moma kʋt, An Chitokaka Chihowah itih ha̱ anonti ak haklo kashke, micha himakma luak chito ilʋppa ak peso kashke, yʋmohmi hosh ik sʋllo kashke, ish achi tok.

¹⁷ Mihma Chihowah yʋt, Anumpuli kʋt, ʋlhpesa ho̱ anumpulishke, ʋm achi tok.

¹⁸ Itibapishi ʋhleha im itin takla ya̱, Hopaii chishno chohmi ho̱ i̱ hilechi la hi oke, micha ʋm anumpa ha̱ itih ha̱ fohkalikma, im apesa li tuk mak o̱, moma ho̱ im anumpula hi oke;

¹⁹ Atukma yakohma hi oke, kʋna hosh sa hohchifo pulla ho̱ anumpulikma yʋmmʋt im anumpa ha̱ hakla he keyukma im a hoyo la hi oke.

²⁰ Amba hopaii ʋt sa hohchifo pulla ho̱, yʋmma anumpula chi̱ im apesa li tuk keyu ho̱, Anumpule lih mihakmʋt, keyukmʋt, naholbʋt toba hohchifo pulla ho̱ anumpulikmʋt, hopaii yʋmma fehna kʋt illa hi oke.

²¹ Yohmi ka̱ chi chu̱kʋsh anu̱kaka, Katiohmi kak osh anumpa Chihowah yʋt anumpuli tuk keyu ka̱ il akostinincha chi cho? ish achikma,

²² Hopaii ʋt Chihowah hohchifo pulla ka̱ anumpuli tukma, nana kʋt ik yʋmohmo, micha ik aia̱hlokmʋt, yʋmmak osh nana Chihowah yʋt anumpuli tuk keyu; amba hopaii ʋt ile yimmit anumpuli tuk a hi oke; yʋmma hʋsh i̱ nukshopa he keyu hoke, (achi tok)