Tutelonomi 17 - Chahta Holisso Holitopa 1886

¹ Wak hobʋk nana kia, keyukmʋt chukfi ʋt ik ai ono, keyukmʋt pisa ik achukmo aiena ʋbit, chin Chitokaka Chihowah ya̱ isht ish aiokpʋcha he keyu: yʋmmak okʋt chin Chitokaka Chihowah ya̱ nan isht i̱ yuwala yoka.

² Hʋch itin takla chi̱ holihta okhissa, chin Chitokaka Chihowah yʋt chihima aiachʋfona anu̱kaka ya̱ hatak okmá, keyukmʋt ohoyo hokmá nana hosh chin Chitokaka Chihowa itikba ya̱ nan itim apesa ya̱ ʋbanʋbli cha yoshuba yʋmihchi tuk,

³ Micha iʋt na holbʋt toba inla, hʋshi, keyukmʋt hʋsh ninak a̱ya, keyukmʋt ʋba nana puta, yʋmmak oka miha li tuk keyu ho̱ im antia tuk, micha aiokpʋchi tuk osh haiakakma;

⁴ Atuk o̱ chim annoa cha, ish haklo mʋt, achukmalit ish asilhhʋchi tuk, atuk o̱ yakeh, a̱hli ho̱ micha nana kʋt atokowa ka̱ na yuwala yʋmma chiyuhmi kʋt Islael a̱ yʋmohmi tuk achinikma;

⁵ Yohmikma hatak, keyukmʋt ohoyo yʋmmʋt na yoshuba yʋmma yʋmihchi kash, hatak yʋmma, keyukmʋt ohoyo yʋmma pulla ka̱ chi̱ holihta okhissa ya̱ isht ish ona cha, tʋli ishit ish boli na, illa hi oke.

⁶ Witnes tuklo, keyukmʋt tuchina kanima hosh anoli ho̱, illa he ʋlhpesa kʋt illashke, amba witnes achʋfa hosh anoli ho̱, illa he keyu hoke.

⁷ Ʋba chi̱ kʋt witnes puta ibbak ak osh ti̱kba onʋtola hi oke, i̱ himmak a yak o̱ okla moma ibbak ʋt onʋtola hi oke; Yʋmohmi hosh nana ik achukmo hʋch itin takla itoyula hash ishit hʋsh kancha hi oke.

⁸ Issish hlatapa tuk o̱ issish hlatapa chi̱, anumpa iti onochi, micha iti fahama puta, anumpa ishit itachowa puta nana kʋt chi̱ kʋllo fehna ho̱ ish im apesa chi̱, chi̱ holihta okhissa anukaka ya̱ isht chim ʋlakma, ish wakaya cha, chin Chitokaka Chihowah ak osh ai atokoli tukma yʋmmak o̱ ish onashke.

⁹ Micha naholitompa isht asha ʋhleha, Lefait ʋhleha, micha nan apesa aiena nitak yʋmma a̱sha tuk a̱ ish im ona cha, ish im asilhha hi oke; mikma yʋmmak osh nan ʋlhpisa anumpa hoka chim anola hi oke.

¹⁰ Micha kanima ho̱ chin Chitokaka Chihowah ak osh ai atokoli tuk a̱ a̱sha yosh anumpa chim anoli tuk mak o̱, ish yʋmihcha hi oke; micha nana chim anoli tuk mak o̱ moma ka̱ ithaiyanʋt ish yʋmi̱hinchashke,

¹¹ Nan ʋlhpisa anumpa apesʋt chim abʋchi tuk mak o̱, micha anumpa ʋlhpisa chim anoli tuk mak o̱ ish yʋmihchashke: anumpa ʋlhpisa chim otʋninchi tuk a̱ fullotʋt isht impakma, keyukmʋt ʋlhfʋbekimma ish ia he keyu hoke.

¹² Mikma hatak kʋna hosh ilapunla cha, naholitompa isht ʋtta yʋt chin Chitokaka Chihowah itikba ya̱ hikiʋt, yʋmmak o̱ nan isht ai ahanta ka̱ ik i̱ haponaklo, keyukmʋt nan apesa yo̱ ik i̱ haponaklokmʋt, hatak yʋmmʋt illi pulla hi oke; micha Islael a̱ nan ik achukmo ya̱ ishit ish kancha hi oke.

¹³ Mikma okla moma kʋt haklokmʋt nukshopa cha, himmakma nana ka̱ ilapunlʋt ik yʋmihcho ka hi oke.

¹⁴ Chin Chitokaka Chihowah yʋt yakni chima tok a̱ ish onakmʋt, ish ishi cha ish aiashakmʋt, Oklushi inla puta si apakfoyupa aiasha ka̱ chohmit sa pehlicha chi̱ ka̱, mi̱ko ikbit binilichi lashke, ish achikmʋt,

¹⁵ Ik kaniohmi hoh kia kanima ho̱ chin Chitokaka Chihowah ak hosh atokolikma, chi pehliecha chi̱ ka̱, mi̱ko ikbit ish binilicha hi oke, chitibapishi ʋhleha aiachʋfa ho̱ chi pehlihchi mi̱ko ikbit ish binilicha hi oke, chitibapishi keyu, okla i̱nla yo̱ chi pehliechi ikbit ish binilicha he keyu hoke.

¹⁶ Yohmi kia issuba ha̱ apaknʋchit il ai asha he keyu; micha issuba ha̱ apaknʋcha chi̱ kak osh okla ha̱ falʋmminchit Echip a̱ pila he keyu hoke; Chihowah yʋt Himak a̱ pilla ha̱ yʋmma pilla ka̱ falamʋt ish ia he keyu chim achi tok oka.

¹⁷ Micha chu̱kʋsh ʋt fullotʋt naksika ik aiyo ka chi̱, ohoyo ha̱ hullocha hi oke; ʋttahpi chi̱ wak hobʋk a̱ isht ish toksʋla he keyu, micha chin chukfi ʋlhpoa ʋttahpi hishi ya̱ ish ma he keyu hoke.

¹⁸ Atuk osh yakohma hi oke; im apehliechika mi̱ko im ai om binili holitompa ya̱ om binilikmʋt, nan ʋlhpisa ilʋppʋt na holitompa isht ʋtta Lefait ʋhleha itikba itoyula ka̱ akohchit hobachit holisso ha̱ a fohkit a holissochashke.

¹⁹ Mikma iba itoyulashke, mihma okcha̱yʋt ahanta he nitak moma ka̱ yʋmma ai itim anumpo̱honlashke; yʋmohmi hosh Chitokaka in Chihowah ya̱ i̱ nukwia he, micha nan ʋlhpisa ilʋppa anumpa puta, micha anumpa ʋlhpisa bilia ilʋppa puta aiena ka̱ yʋmihincha chi̱ hosh ithaiya na hi oke.

²⁰ Yʋmohmi hosh chu̱kʋsh ʋt ʋba takalit itibapishi ʋhleha ha̱ ik i̱ shahlo, micha anumpa hash naksika pit fullotʋt ishtimpakimma, keyukmʋt ʋlhfʋbekimma ik aiyo kashke: yʋmohmi hosh Islael ai itin takla ya̱, yʋmma micha im ʋlla ʋhleha aiena im apehliechika ieshi nitak falaiachashke. (achi tok.)