Tutelonomi 16 - Chahta Holisso Holitopa 1886

¹ Hʋshi Abib a̱ ish ithaiyana cha, chin Chitokaka Chihowah ya̱ ʋbanʋblit ontia isht ish im ieshashke: hʋshi Abib ak o̱ chin Chitokaka Chihowah yʋt ninak o̱ Echip a̱ apehlichit chi kohchi tok oke.

² Chihowah yʋt kanima ho̱ ai atokolit hohchifo a bohlikma, yʋmmak o̱ chi̱ nan ʋlhpoa chipunta, micha chi̱ nan ʋlhpoa hochito aiena ka̱ ai ishit ʋbanʋblit ontia ya̱ ʋbit chin Chitokaka Chihowah ya̱ isht ish ai okpʋchashke.

³ Pʋska shatʋmmi ya̱ aieninchit ish pa he keyu; nitak untuklo ho̱ pʋska ik shatʋmmo, ilbʋsha pʋska pulla ka̱ aieninchit ish pa hi oke; (anukwa̱ya hosh Echip yakni ya̱ kohchʋt ish minti tok okʋt:) yʋmohmi hosh chi okcha̱ya nitak moma kʋt Echip yakni ya̱ kohchʋt ish minti tok nitak a̱ ish ithaiyanashke.

⁴ Hʋsh aiasha fullota moma ka̱ pʋska shatʋmmi nana kia ik a haiako ho̱ nitak untuklashke; micha nitak ʋmmona opiaka ʋbit isht ish aiokpʋchi nipi ʋt ninak a̱ itonla na onna he keyu.

⁵ Chi̱ holihta okhissa kanima kia chin Chitokaka Chihowah yʋt chima ka̱ anu̱kaka ya̱ ʋbanʋblit ontia ai ʋbit isht ish aiokpʋcha he keyu hoke.

⁶ Amba chin Chitokaka Chihowah yak osh kanima ho̱ atokolit hohchifo a bohlikma, yʋmmak o̱ opiakma hʋshi ʋt okatula ho̱ Echip a̱ a kohchʋt ish minti tok ont ʋlhpiesakma, ʋbanʋblit ontia ya̱ isht ish aiokpʋcha hi oke.

⁷ Mikmʋt chin Chitokaka Chihowah yʋt kanima ho̱ ai atokolikma ish ai apushli cha, ish pa hi oke: atuk osh onnahinlikma falamʋt chi̱ bina ha̱ ish ona hi oke.

⁸ Nitak hannali ho̱ pʋska ik shatʋmmo ya̱ ish pa hi oke; atuk osh nitak isht untuklo hokʋto chin Chitokaka Chihowah im itʋnaha holitopa ya̱ hi oke: yʋmmak oka na toksʋli nana kia ish yʋmihcha he keyu.

⁹ Nitak hullo untuklo ho̱ ish hotihna hi oke; nitak kaniohmi ho̱ onush a̱ ishit bʋsha ya̱ ishit bʋshlit, isht ish ia mak inli hosh, nitak hullo untuklo ka̱ hotihnʋt isht ish iashke.

¹⁰ Micha nitak hullo puta impʋchi ya̱ chin Chitokaka Chihowah ya̱ isht ish aiashakmʋt, chin Chitokaka Chihowah yʋt na chi yukpali tuk pulla mak o̱ ilap ahnit chibbak foyuka im issa ya̱ aieninchit chin Chitokaka Chihowah ya̱ ish imashke.

¹¹ Micha chin Chitokaka Chihowah itikba ya̱, chishno micha chiso, micha chiso tek, micha chin tishu hatak, micha chin tishu ohoyo, micha Lefait ʋt chi̱ holihta okhissa anu̱ka aiasha, micha okla inla, micha i̱ki iksho, micha ohoyo ʋlhtakla hʋch iti̱n takla aiasha aiena kʋt, kanima ho̱ chin Chitokaka Chihowah yʋt hohchifo a bohla chi̱ hosh ai atokoli tukma, yʋmma a yukpʋt ish aiashashke.

¹² Micha Echip a̱ hatak yuka hosh ish aiahanta tuk ʋt ish ithaiyanashke: micha nan ʋlhpisa bilia ilʋppa puta ka̱ ithaiyanʋt, ish yʋmihchashke.

¹³ Chim onush micha chi̱ pa̱ki ya̱ hoyot ish tahli ha yʋt, tabenakel ai impʋchi ya̱ nitak untuklo ho̱ isht ish aiasha hi oke.

¹⁴ Micha chim impʋchi ya̱ nan isht chi yukpashke, chishno, micha chiso, micha chiso tek, micha chin tishu hatak, micha chin tishu ohoyo, micha Lefait, micha okla inla, micha i̱ki iksho, micha ohoyo ʋlhtakla chi̱ holihta okhissa anu̱ka aiasha aiena kʋt na yukpashke:

¹⁵ Chihowah ak osh kanima ho̱ ai atokolikma, chin Chitokaka Chihowah ya̱ nitak untuklo ho̱ impʋchi holitopa isht ish im aiashashke: na chi̱ waya moma, micha chibbak na toksa̱hanli tuk moma ka̱ chin Chitokaka Chihowah yʋt na chi yukpala chi̱ hoka; yʋmohmi hoka na chi yukpa pulla hi oke.

¹⁶ Kanima ho̱ ai atokoli tukma, nakni chim a̱sha moma kʋt chin Chitokaka Chihowah ya̱ afʋmmi achʋfakma, hituchina ha̱ itikba ya̱ im itʋnaha hi oke: pʋska ik shatʋmmo impʋchi, micha nitak hullo puta impʋchi, micha tabenakel ai impʋchi: micha ibbak bieka hosh Chihowah itikba ya̱ ona he keyu hoke:

¹⁷ Chin Chitokaka Chihowah yʋt nan ishit yukpali chima tuk pulla mak o̱, hatak puta kʋt ai ima he ʋlhpiesa puta kʋt imashke.

¹⁸ Chim apehlichi puta hlopulli, chi̱ holihta okhissa chin Chitokaka Chihowah yʋt chima tok a̱ nan apesa ʋhleha, micha nan ʋlhtoka ʋhleha aiena ka̱ ish ikbashke; mikma okla ha̱ nan ʋlhpisa aiʋlhpiesa ho̱ im api̱hi̱sa hi oke,

¹⁹ Aiʋlhpiesa ʋlhpisa ka̱ ish shanaiyacha he keyu: hahatak yohmi hoka, ish ahna he keyu, micha nahʋlbina ish isha he keyu; na hʋlbina hʋt hopoyuksa nishkin a̱ lʋplichi hoke; micha aiʋlhpiesa im anumpa ha̱ shanaiyʋchi hoke.

²⁰ Aiʋlhpiesa bieka kak o̱ ish iakaiya hi oke; yʋmohmi hosh chin Chitokaka Chihowah yʋt yakni chima ka̱ chi okcha̱ya cha ieshit ish aiasha hi oke.

²¹ Chin Chitokaka Chihowah im alta bili̱ka yʋmma ish ikba chi̱ kʋt itilokoli nana kia ish hokcha he keyu.

²² Micha na holbʋt toba nana kia chin Chitokaka Chihowa yʋt shitilema ka̱ ish hilecha he keyu, (achi tok.)