Tutelonomi 15 - Chahta Holisso Holitopa 1886

¹ Afʋmmi untuklo kʋt ont taha aiyukalikma, nan i̱ hotofi ya̱ ish apesa hi oke.

² Micha nan i̱ hotofi yʋt yakohma hi oke: nan ahekʋchi aiyukali hosh in chuka a bili̱ka hatak a̱, nana kia im pota tuk ʋt i̱ hotofa hi oke; in chuka abili̱ka hatak, keyukmʋt, itibapishi ha̱ i̱ hoya he keyu, Chihowah i̱ hotofa hohchifo hoka.

³ Okla inla yano ish i̱ hoya hi oke; amba chimmi ha tuk a̱ chitibapishi hʋt i̱shi ka̱ chibbak ʋt i̱ hotofa hi oke:

⁴ Ilbʋsha yʋt hʋch itin takla ya̱ iksho hok mak illa hi oke, ish ai isha he ʋlhpesa yosh ish ai isha chi̱ ho̱, chin Chitokaka Chihowah yʋt yakni chima tok a̱ Chihowah yʋt chi yukpali fehna chi̱ hoke.

⁵ Peh chin Chitokaka Chihowah im anumpa achukmalit haponaklot, anumpa ilʋppa puta moma himak nitak a̱ chim anumpo̱honli li ka̱ ithaiyanʋt ish yʋmihchikma.

⁶ Chin Chitokaka Chihowah yʋt chim achi tuk mak osh, chi yukpali hoka: mikma oklushi laua ho̱ ish impota hi oke; yohmi kia chishno ʋto ish pota he keyu, micha oklushi laua ho̱ ish i̱ mi̱ka hi oke; amba chishno ano chi̱ mi̱ka he keyu.

⁷ Chitibapishi ʋhleha aiachʋfa, hatak ʋt ilbʋsha hosh hʋch itin takla chi̱ holihta okhissa moma anu̱kaka chin Chitokaka Chihowah yʋt yakni chima tuk a̱ ahantakma, chi chu̱kʋsh a̱ ish i̱ kʋllocha he keyu, micha chitibapishi ilbʋsha ya̱ chibbak a̱ ish i̱ pohloma he keyu hoke.

⁸ Amba chibbak a̱ auatʋchi hosh ish i̱ wakʋmmi cha, nana bʋnna tuk yʋmma kaniohmi bʋnna ka̱ laua kʋt im ʋlhpesa ho̱ ish im pota hi oke.

⁹ Ahah ish ai ahni na, Afʋmmi isht untuklo afʋmmi ai i̱ hotofa he ʋt olanlosishke, achi, imanukfila hʋt chi chu̱kʋsh okpulo ya̱ ik chukowo kashke; micha chi holhponayo hʋt ik achukmot, chitibapishi ha̱ i̱ sanali cha, nana kia chik emokma, chi̱ sanalit Chihowah ya̱ im pa̱yakma nan ashʋchi chi̱ toba na.

¹⁰ Ish ima pulla hi oke, micha ish emakmʋt, chi chu̱kʋsh ʋt nukha̱kla he keyu: nana ilʋppa pulla kak o̱, nan ish toksʋli puta moma, micha nana moma ho̱ chibbak isht ish ishikma chin Chitokaka Chihowah yʋt na chi yukpala hi oke.

¹¹ Yakni yash ilbʋsha yʋt ik ai iksho ka he keyu hoke: yʋmohmi kak o̱ chitibapishi ha̱ ilbʋsha ya̱, micha nana ik im iksho yakni yash chim ai asha ka̱ chibbak a̱ auatʋchit ish i̱ wakʋmma hi oke, chim achi lishke.

¹² Atuk o̱ chitibapishi Heblu hatak, keyukmʋt Heblu ohoyo ha̱ chi̱ kanchi tuk o̱, afʋmmi hannali ho̱ chin toksʋlikma, afʋmmi ont isht untuklokma, pilla ho̱ chim ai ia he a̱, ish im ahnashke.

¹³ Micha pilla ho̱ ish kohchichikmʋt, ibbak bieka hosh ik ia, ish im ahna he keyu hoke.

¹⁴ Laua achukma ho̱ chi̱ nan ʋlhpoa chipunta, micha chim a nihechi, micha chi̱ pa̱ki abusha aiena ka̱ ai ishit ish im atahla hi oke: chin Chitokaka Chihowah yʋt nan isht chi yukpali tuk a̱ ai ishit ish ima hi oke.

¹⁵ Micha hatak yuka hosh Echip yakni ya̱ ish ahanta tuk o̱, chin Chitokaka Chihowah yʋt falʋmminchit chi hlakofichi tok a̱ ish ithaiyanashke: yʋmohmi kak o̱ himak nitak a̱ nana ilʋppa mihʋt chim ahanchi lishke.

¹⁶ Atukma yakohma hi oke, chishno micha chin chuka achʋfa holitobli ha tuk osh, micha chi takla ahanta kʋt im achukma ha tuk osh, chissot ia la he keyu, chim achikma,

¹⁷ Yohmikma chofak ish ishi cha, haksobish a̱ hlopullichit, okhissa ya̱ ish anʋhlicha hi oke: micha chin tishu bilia ya hi oke. Micha chin tishu ohoyo ha̱ ish yʋmihchi ak inla hi oke.

¹⁸ Pilla ho̱ ik ia, ish im ahnikmʋt chi̱ kʋllo, ahoba he keyu; afʋmmi hannali ho̱ chin toksʋli kʋt, ilhtono tishu ha̱ inlohmi tuklo ka̱ holitopa tuk ʋt chim iti laui tuk oke: micha chin Chitokaka Chihowah yʋt nana moma ka̱ ish yʋmihchikma, chi yukpala hi oke.

¹⁹ Chi̱ nan ʋlhpoa hochito, micha chi̱ nan ʋlhpoa chipunta aiena ka̱ ʋttahpi nakni puta ka̱ chin Chitokaka Chihowah ya̱ ish i̱ hullocha hi oke: ʋttahpi chi̱ wak hobʋk a̱ isht ish toksʋla he keyu, micha chin chukfi ʋlhpoa ʋttahpi hishi ya̱ ish ma he keyu hoke.

²⁰ Afʋmmi hosh ont afʋmmikma kanima ho̱ Chihowah yʋt atokolikma, yʋmmak o̱ chishno, micha chin chuka achʋfa aiena kʋt chin Chitokaka Chihowah itikba ya̱ ish ai ʋpa hi oke.

²¹ Atuk o̱ ik ai ono kʋt takali cha, hanali okpulo, keyukmʋt nishkin lʋpa, keyukmʋt ik ai onot ik achukmo nana hosh takalikma, chin Chitokaka Chihowah ya̱ ʋbit isht ish ai okpʋcha he keyu hoke.

²² Chi̱ holihta okhissa anu̱kaka yak o̱ ish ai ʋpa hi oke: hatak ik kashofo, micha kashofa aiena kʋt iti lauit issi, micha lapitta chohmichit ish pa hi oke.

²³ Peh issish ano chik po ka hi oke, oka chohmihchit aka ish hlatʋbla hi oke, achi tok.