Tutelonomi 14 - Chahta Holisso Holitopa 1886

¹ Hʋchin Chitokaka Chihowah im ʋlla hʋchia hoke; illi pulla kak o̱ hʋsh ile bʋshla he keyu, micha hʋchi nishkin iti takla ya̱ hʋsh yushmilalicha he keyu hoke.

² Chin Chitokaka Chihowah ya̱ i̱ holitopa okla chia hokʋt; micha oklushi puta yakni paknaka aiasha moma ka̱ i̱ shahlechit im okla hosh inla fehna chia ha chi̱ ho̱ Chihowah yʋt chi atokoli tok oke.

³ Nana yuwala ya̱ ish pa he keyu hoke.

⁴ Nampoa ilʋppa puta ka̱ hʋsh pa hi oke: wak, chukfi, micha issi kosoma.

⁵ Issa nakni, micha issi tek, micha issi humma, micha issi kosoma nukshopa, micha issi antilop achi, micha issi kasel achi, micha issi shammi achi.

⁶ Micha nampoa moma hosh iyi akchush a̱ iti̱ filʋmmichit pahlʋllichi mʋt, iyi akchush tuklochi cha, hʋshuk ʋpa tuk ʋt, falaminchit kohchit hopa̱sa puta kʋt nampoa ai itin takla a̱sha ka̱ yʋmmak o̱ hʋsh pa hi oke.

⁷ Yohmi kia ilʋppa puta kak osh hʋshuk ʋpa tuk ʋt kohchit hopa̱sa kia, micha iyi akchush pahlata ya̱ iti̱ filʋmminchi ak inli kia; yʋmmak o̱ hʋsh aiʋpa he keyu hoke: kamel, micha pʋtta kitta, micha chukfi holba, chohmi ka̱; yʋmmʋt hʋshuk ʋpa kohchit hopa̱sa kia, iyi akchush a̱ iti̱ filʋmmichi keyu hoka; yʋmohmi hokʋt hʋchin litiha ya hi oke.

⁸ Mikma shukha yʋt iyi akchush a̱ iti̱ filʋmmichi hakinli kia, hʋshuk ʋpa tuk ʋt kohchit hopa̱sa keyu hokʋt, hʋchin liteha ya hi oke; nipi ya̱ hʋsh pa he keyu, micha yʋmma nipi illi ya̱ hʋsh potola he keyu hoke.

⁹ Ilʋppa puta kak osh oka aiasha ya̱ hʋsh pa hi oke; sanahchi im a̱sha, micha hakshup facho̱wa im a̱sha aiena kak o̱ hʋsh pa hi oke.

¹⁰ Micha nana hosh sanahchi ik im iksho, micha hakshup facho̱wa ik im iksho ka̱ hʋsh pa he keyu hoke; hʋchin litiha ya hi oke.

¹¹ Hushi kashofa puta moma ka̱ hʋsh pashke.

¹² Yohmi kia ilʋppa puta kak o̱ hʋsh pa he keyu hoke; o̱ssi micha ossi̱filachi, micha ospila.

¹³ Micha kileti, micha kait, micha fʋlta itiakaiya achʋfa puta,

¹⁴ Micha fʋla chito ai iti akaiya ai achʋfa puta.

¹⁵ Micha opa, micha oksupafohli, micha kuku, micha na hokli hak achi, ai iti akaiya achʋfa,

¹⁶ Micha opa iskitini, micha opa chito, micha okak,

¹⁷ Micha chilantakoba, micha kie o̱ssi, micha komolant,

¹⁸ Micha istak, micha itikushayaiya ai iti akaiya achʋfa, micha lapwin, micha halambisha,

¹⁹ Mi̱cha na balahanli hʋt heli puta kʋt hʋchin litiha ha chi̱ hoke, ʋpa he keyu hoke.

²⁰ Amba hushi kashofa puta hokʋno hʋsh pa hi oke,

²¹ Nana hosh ilap ak inli hosh illi tuk ano hʋsh pa he keyu: okla inla yosh chi̱ holihta okhissa hikia kak o̱ ish ema na, ʋpa hi oke; keyukmʋt okla inla yo̱ ish i̱ kancha hi oke; chin Chitokaka Chihowah ya̱ alitiha ik im iksho yosh im okla hʋchia hokʋt. Issi kosoma ushi ya̱ ishki i̱ pishukchi ya̱ isht ish hona he keyu hoke.

²² Osapa yʋt chi̱ na nihi ya̱ afʋmmi hosh ont afʋmmikma, nawayahanchi ka̱ ishit pokoli ho̱ a̱hli hosh ish onohunchashke.

²³ Kanima ho̱ hohchifo a bohla chi̱ hosh atokolikma, yʋmmak o̱ chim onush, micha chim oka‐pa̱ki, micha chi̱ bila ishit pokoli, micha chi̱ nan ʋlhpoa hochito, micha chi̱ nan ʋlhpoa chipunta ushi ʋtta ahpi puta aiena ka̱ chin Chitokaka Chihowah itikba ya̱ ish ai ʋpashke; yʋmohmi hosh chin Chitokaka Chihowah ya̱ i̱ nukwia bilia ka̱ ish ithanashke.

²⁴ Atuk o̱ hina ʋt chi̱ falaia fehna cha, isht ish ia he keyukmʋt, micha chin Chitokaka Chihowah yʋt hohchifo ha̱ yʋmmak o̱ a bohla chi̱ hosh atokoli tuk ʋt chi̱ hopaki fehnakmʋt, chin Chitokaka Chihowah yʋt na chi yukpa li mʋt;

²⁵ Yohmikmʋt tʋli holisso isht ish itatoba cha, tʋli holisso yash takchit, chibbak ish foyuki cha, chin Chitokaka Chihowah yʋt ai atokoli tuk a̱ ish ona hi oke.

²⁶ Micha chimi shilombish ʋt nana ho̱ bʋnnakmʋt, wak okma keyukmʋt chukfi, keyukmʋt okapaki, keyukmʋt nan ishko kʋllo, keyukmʋt chimi shilombish ʋt nana ho̱ bʋnnakmʋt, yʋmmak o̱ Chihowah chin Chitokaka itikba ya̱ chishno micha chin chuka achʋfa aiena kʋt na yukpʋt impʋt hʋsh ma̱ha̱ya hi oke.

²⁷ Micha Lefait ʋt chi̱ holihta okhissa anu̱kaka aiasha ha̱ ish kancha he keyu; yʋmmʋt chin ta̱kla i̱ kashapa yʋt ai isha he ai ʋlhpiesa yʋt ik im iksho hoke.

²⁸ Afʋmmi ont a tuchina kʋt ont taha ma, afʋmmi yʋmmak inli ho̱, chi̱ nawaya ishit pokoli moma ka̱ isht ish kohchi cha, chi̱ holihta okhissa anu̱kaka ish ashacha hi oke.

²⁹ Mikma Lefait ʋt (yʋmmʋt i̱ kashapa, micha ai isha he ʋlhpesa yʋt chiba fo̱kʋt ik im iksho hokʋt) micha okla inla, micha i̱ki iksho, micha i̱ hatak illi, chi̱ holihta okhissa anu̱kaka aiasha aiena kʋt ʋla cha, ʋpʋt fihopashke; yʋmohmi ho̱ chin Chitokaka Chihowah yʋt chibbak na toksa̱hanli moma isht ish ahanta ka̱ chi yukpalashke, achi tok.