Tutelonomi 13 - Chahta Holisso Holitopa 1886

¹ Hʋchim ai iti takla hopaii yosh, keyukmʋt, na holhpokuna ya̱ holhpokuna yosh wakayʋt hikia cha, nan isht atokowa, keyukmʋt, na fehna yo̱ chi̱ haiakʋchikma,

² Atuk o̱ nan isht atokowa, keyukmʋt na fehna ishit chim anumpuli tuk ʋt ont aia̱hlikma, yʋmmak oka ish ithana chatuk keyu ka̱, Naholbʋt toba inla iakaiyʋt iloh iashke, micha iloh im antiashke, achikma,

³ Hopaii yʋmma, micha na holhpokuna holhpokuna yʋmma im anumpa ha̱ ish haponakla he keyu; hʋchi chu̱kʋsh a̱ mominchit, micha hʋchimi shilombish ma mominchi hosh hʋchin Chitokaka Chihowah ya̱ ishit hʋsh holitoblikma, nanakma, isht akostinincha chi̱ hosh i̱moma ka̱ hʋchi pisa hoke.

⁴ Hʋchin Chitokaka Chihowah ya̱ iakaiyʋt hʋsh itʋnowashke, micha i̱ nukwiʋt im anumpa ha̱ holitoblit, im anumpa ha̱ hʋsh im antiʋt, in toksa̱hanlit hʋsh asitiashke.

⁵ Mikma hopaii yʋmmʋt, micha holhpokuna holhpokuna yʋmmʋt illashke; hʋchin Chitokaka Chihowah yʋmmak osh Echip yakni ya̱ apehlichit hʋchi kohchi tok; micha yʋmmak osh aboha ayuka ha̱ a hʋchi hlakofichi tok a̱, i̱ filʋmmichit hʋchisht ia chi̱ hosh, hina hʋsh ai itʋnowa chi̱ ho̱ hʋchin Chitokaka Chihowah yʋt hʋchi̱ miha tok a̱ naksika pit hʋchi tobli bʋnna hosh anumpuli ha tuk oka. Yʋmohmi hosh hʋchim ai iti takla ya̱ nan ik achukmo ka̱ isht hʋsh kanchashke.

⁶ Chitibapishi chishki ya̱ ushi yokmá, keyukmʋt chiso yokmá, keyukmʋt chisotek okmá, keyukmʋt chi tekchi chi apotoa tuk ak okmá, keyukmʋt chi̱ kana yosh chimi shilombish ak inli chiyuhmi tuk okmá, nana hosh lumʋt chi haksichit, yʋmmak oka hʋchishno, micha hʋchi̱ki ʋhleha aiena kʋt ithana tok keyu kia, Kilia cha, naholbʋt toba inla,

⁷ Yʋmmʋt okla hʋchi apakfopʋt aiasha, hʋchi̱ bili̱ka hokmá, keyukmʋt hʋchi̱ hopaki hokmá, yakni ataha ka̱ in tʋnnʋp ʋttʋt ia hosh in tʋnnʋp ont ʋhli ka̱ aiasha ka̱ i̱ na naholbʋt toba kiloh aiokpʋchi, achikma,

⁸ Ʋlhpesa, chik im ahno kashke, micha chik i̱ haponaklo kashke: micha chi nishkin ʋt ik i̱ nukha̱klo kashke, ish apoacha he keyu, micha ish luhma he keyu hoke.

⁹ Amba ish bi pulla hi oke: illichi ka̱ tikbanli hosh chishno ak osh chibbak a̱ ish onocha hi oke; mikma i̱ himmak a yo̱ okla moma kʋt ibbak onocha hi oke.

¹⁰ Tʋli o̱ isht ish boli na, illashke; chin Chitokaka Chihowah yʋmmak osh Echip yakni, micha aboha a yuka ha̱ apehlichit chi kohchi tok a̱ i̱ filʋmmichit chi tobli bʋnna tuk okʋt.

¹¹ Mikma Islael moma kʋt haklo cha, nukshopakmʋt, himmakma yoshuba fehna ilʋppa chohmi kʋt a hʋch iti takla ya̱ ik a yʋmohmho kashke.

¹² Chin tʋmaha holihta kanima ka̱ yʋmmak oka ish ai a̱sha chi̱ ka̱ chin Chitokaka Chihowah yʋt chima tok a̱ ish ha̱klo ho̱ achi kʋt,

¹³ Hatak kaniohmi kʋt Belial im ʋlla ʋhleha hʋt hʋchi̱ kohchʋt ia cha, in tʋmaha holihta okla hash pehlichit isht iʋt, Naholbʋt toba inla puta hʋsh ithana tuk keyu ya̱ ia cha, kiloh aiokpʋchi, achishke, achikma,

¹⁴ Yohmikma ish ponaklo cha, silhhit, micha achunanchit ish asilhhʋcha hi oke; atuk o̱, yakeh, na yuwala yʋmma chohmi hʋchi ai iti takla ya̱ yʋmihchi tuk ʋt a̱hlikma, micha nana kʋt ai a̱hli fehnakma;

¹⁵ Tʋmaha holihta yash okla aiasha ka̱ bʋshpo falaia ishit fahamʋt, ishit kanchit hʋsh ʋmohmichi pullashke; micha anu̱kaka nana aiasha moma ka̱, micha nanʋlhpoba yʋmma aiasha ka̱ bʋshpo falaia isht hʋsh kanchashke.

¹⁶ Micha na wehpoa moma ka̱ tʋmaha holihta iti takla ai itʋnowa iklʋnna hʋsh itʋnahli cha, tʋmaha holihta, micha na wehpoa aiena kash ant isht aiopi moma ka̱ chin Chitokaka Chihowah itikba ya̱ luak isht hʋsh hukmashke; micha chiffi̱kot chieya na biliashke; anonti ikba he keyu hoke.

¹⁷ Mikma nana achʋfa nana kia kʋllakshi yash osh chibbak a̱ foyuka he keyu hoke: yʋmohmi ho̱ Chihowah yʋt chi̱ki ʋhleha ha̱ anumpa kʋllo im il onochi tok mak osh, ai im i̱ nukkilli libbi ka̱ shʋnaiachi cha, chi̱ nukha̱klot heh chi ahni cha,

¹⁸ Chin Chitokaka Chihowah im anumpa ha̱ ish haponaklo cha, im anumpa moma ka̱ himak nitak a̱ chi̱ miha li ka̱ ieshit chin Chitokaka Chihowah itikba ya̱, aiʋlhpiesa kak o̱ ish yʋmihchikma, chi apaknʋchashke, achi tok.