Tutelonomi 12 - Chahta Holisso Holitopa 1886

¹ Nanʋlhpisa bilia, micha aiʋlhpiesa yʋmi̱hinchi ilʋppa puta ka̱ chi̱ki ʋhleha in Chitokaka Chihowah yʋt yakni ya̱ ish isha chi̱ ho̱ chima tok a̱ okcha̱yʋt yakni paknaka hʋsh a̱ha̱shwa nitak moma kʋt ithaiyanʋt hʋsh yʋmihchashke.

² Oklushi puta hʋsh ishi puta kʋt, nʋnih chaha paknaka, micha nʋnih paknaka, micha iti okchamali nuta puta ka̱, i̱ na holbʋt toba puta aiokpʋchit aiasha tuk moma ka̱ ieshit kanchit hʋsh ʋmohmicha hi oke.

³ Micha im alta puta ka̱ hʋsh kinahlicha hi oke, micha in toni̱k puta ka̱ kobahlichit, im iti lokoli puta ka̱ luak ishit hʋsh hukma hi oke; micha i̱ naholbʋt toba puta in chu̱wʋt na holbʋt toba ya̱ chanlit hʋsh akakohli cha, i̱ hohchifo puta ka̱ yʋmma ai ishit hʋsh kancha hi oke.

⁴ Hʋchin Chitokaka Chihowah ya̱ hʋsh i̱ yʋmihcha he keyu hoke.

⁵ Amba hʋchin Chitokaka Chihowah ak osh kanima ho̱ hʋchim apehlichi puta moma ka̱ ai atokolit, hohchifo ha̱ a bohlikma, ai ahanta ak o̱ hʋsh hoya chi̱ hoke; micha yʋmmak o̱ ish ona chi̱ hoke,

⁶ Micha yʋmmak o̱ nahukmit isht hʋsh aiokpʋchi, micha nan ʋbit isht hʋsh aiokpʋchi, micha ishit hʋchi̱ pokoli, micha pit i̱ walit isht aiokpʋchi chibbak foyuka ka̱, micha anumpa hʋsh ilonochi, micha ilap ahnit isht hʋsh aiokpʋchi, micha hʋchi̱ nan ʋlhpoa hochito, micha hʋchi̱ nan ʋlhpoa chipinta chelahpi puta aiena a puta ka̱ isht hʋsh ona hi oke.

⁷ Micha yʋmmak o̱ hʋchin Chitokaka Chihowah itikba ya̱ hʋsh ai impa hi oke; hʋchishno, micha hʋchin chuka achʋfa hʋsh aiena kʋt nana moma ka̱ hʋchibbak onochit ishit hʋsh ahanta na, Chihowah yʋt hʋchi yukpali tuk a̱ hʋchi yukpashke.

⁸ Himak nitak a̱ nana ilʋppa il akaniohmi ka̱, hatak moma kʋt ilap anukfilli kʋt ʋlhpesa ahni ka̱ iakaiya ka̱ hʋsh yʋmohma he keyu hoke.

⁹ Afoha micha aiasha he ʋlhpesa hʋchin Chitokaka Chihowah yʋt hʋchima tok a̱ hʋchik ono ki̱sha hokʋt.

¹⁰ Amba Chatan a̱ hʋsh hlopulli cha, hʋchin Chitokaka Chihowah yʋt hʋchima yakni ya̱ hʋsh aiashakmʋt, hʋchin tʋnʋp puta apakfoypʋt aiasha moma ka̱ i̱ hlakofichit hʋchi fohʋchi na, achukma ho̱ hʋsh aiashakma.

¹¹ Yʋmohmikma hʋchin Chitokaka Chihowah yʋt yʋmmak o̱ i̱ hohchifo aiahanta chi̱ ka̱ atokola chi̱ hoke; yʋmmak o̱ nana moma chim ahanchi li tuk mak o̱, na hukmit ishit hʋsh aiokpʋchi, micha nan ʋbit isht hʋsh aiokpʋchi, ishit hʋchi̱ pokoli, micha i̱ walit isht aiokpʋchi hʋchibbak foyuka aiena, micha achukma i̱ shahli moma, anumpa il onochit Chihowah ya̱ hʋsh im ilonochi tuk a puta aiena ka̱ isht hʋsh la hi oke,

¹² Mikmʋt hʋchishno, micha hʋchiso ʋhleha, micha hʋchiso tek ʋhleha, micha hʋchin tishu hatak ʋhleha, micha hʋchin tishu ohoyo ʋhleha, micha Lefait ʋhleha hʋchi̱ holihta okhissa anu̱kaka hikia aiena kʋt, i̱ kashapa micha aiisha he ʋlhpesa ʋt hʋchim ai iti takla ya̱ ik im iksho hoka; awant hʋchin Chitokaka Chihowah itikba ya̱ na hʋchi yukpashke.

¹³ Ahah ish il ahnashke, yʋmohmi hosh kanima moma ish pisakmʋt na hukmit isht ish aiokpʋchi ya̱ chik ai im isso kashke:

¹⁴ Amba chim apehlichi puta ka̱ achʋfa ho̱ kanima ho̱ Chihowah yʋt atokolikma, yʋmmak o̱ na hukmit isht ish aiokpʋchi a̱ ish ai im issa chi̱ hoke, micha yʋmmak o̱ chi̱ miha li tuk moma ka̱ ish ai yʋmihcha chi̱ hoke.

¹⁵ Yohmi kia nana ho̱ chi chu̱kʋsh ʋt bʋnnakmʋt, chi̱ holihta okhissa anu̱kaka moma ka̱, chin Chitokaka Chihowah yʋt nan isht yukpali chima tuk mak o̱, ai ʋbit nipi ish pashke: ik kashofo micha kashofa aiena kʋt issi holba nakni, micha issi nakni chohmi ka̱ ai ʋpa hinla hoke.

¹⁶ Peh issish ano hʋsh pa he keyu, oka chohmichit, aka hʋsh hlatʋbla hi oke.

¹⁷ Chim onush isht pokoli, micha chim oka pa̱ki ishit pokoli, micha chi̱ bila ishit pokoli, micha chi̱ nan ʋlhpoa hochito ʋttahpi, micha chi̱ nanʋlhpoa chipunta ʋttahpi, micha anumpa ilonochi ish ilonochi tok, micha ilap ahnit nan im issa, keyukmʋt pit i̱ walit im issa chibbak foyuka aiena ka̱ chi̱ holihta okhissa anu̱kaka ya̱ ish aiʋpa he keyu hoke.

¹⁸ Amba chin Chitokaka Chihowah ak osh kanima ho̱ ai atokolikma, chishno, micha chiso, micha chiso tek, micha chin tishu hatak, micha chin tishu ohoyo, micha Lefait chi̱ holihta okhissa anu̱kaka ahanta aiena kʋt, chin Chitokaka Chihowah itikba ish ai impa hi oke; micha nana ho̱ chibbak isht ish ishi moma chin Chitokaka Chihowah itikba na, chi yukpashke.

¹⁹ Ahah ish il ahni cha, yakni paknaka ish ahanta moma kʋt Lefait ʋhleha ha̱ chik kancho kashke.

²⁰ Chin Chitokaka Chihowah yʋt achit chim issa tuk mak osh, chim aiʋhli ya̱ chitolikma, nipi ya̱ ʋpa lashke, ish achikmʋt, (chi chu̱kʋsh ʋt nipi ʋpa bʋnna ha tuk osh,) nipi nana ho chi chu̱kʋsh ʋt bʋnnakmʋt ish pa hinla hoke.

²¹ Chin Chitokaka Chihowah yʋt kanima ho̱ yʋmmak o̱ hohchifo ha̱ a bohla chi̱ hosh atokoli tuk ʋt chi̱ hopaki fehnakmʋt, yohmikmʋt, chi̱ nan ʋlhpoa hochito, micha chi̱ nan ʋlhpo chipunta aiena Chihowah yʋt chima tuk a̱ chi̱ miha li tuk mak o̱, nana ho̱ chi chu̱kʋsh ʋt bʋnnakmʋt chi̱ holihta okhissa anu̱kaka yak o̱ ish ai ʋpashke.

²² Issi holba nakni, micha issi nakni ʋpa chatuk mak o̱, chohmichit ish pashke, ik kashofo, micha kashofa aiena kʋt iti lauet ai ʋpa hi oke.

²³ Peh issish ano chikpo pullashke; issish ak osh isht okcha̱ya yoke; isht ai okcha̱ya ya̱ nipi aieninchit ish pa he keyu hoke.

²⁴ Ish pa he keyu; oka chohmichit aka ish hlatʋbla hi oke.

²⁵ Ish pa he keyu hoke; yʋmohmi hosh Chihowah itikba ya̱ aiʋlhpiesa ho̱ ish yʋmohmikmʋt, chishno, micha chim ʋlla ʋhleha et chi akaiya aiena kʋt chim achukmashke.

²⁶ Peh na chi̱ hullochi chim asha, micha anumpa ishi lonochi ak illa ho̱ ish ishi cha, Chihowah yʋt kanima yo̱ ai atokoli tukma ish ia hi oke.

²⁷ Micha na hukmit isht ish aiokpʋchi nipi, micha issish aiena ka̱ chin Chitokaka Chihowah im alta ya̱ onochit ish im issa hi oke: micha nan ʋbit isht ish aiokpʋchi issish ʋt chin Chitokaka Chihowah im alta ya̱ o̱ hlatapakma, nipi yano ish pa hi oke.

²⁸ Yohmi ahnit ish anukfilli cha, anumpa ilʋppa moma chi̱ miha li ka̱ ish haklashke; yʋmohmi hosh chishno, micha chim ʋlla chi akaiya aiena kʋt chin Chitokaka Chihowah itikba ya̱ achukma ho̱ micha ai ʋlhpiesa ho̱ ish yʋmihchikmʋt achukma hosh ish ma̱ha̱ya na biliashke.

²⁹ Ish isha chi̱ hosh ish ia ka̱ chin Chitokaka Chihowah yʋt oklushi puta kash chi tikba ai ishit kanchi na, ish ʋlhtoba cha, i̱ yakni ya̱ ish a̱shakmʋt;

³⁰ Ahah ish il ahnashke, yʋmohmi hosh chi tikba ai ishit kanchi ha ya̱ iakaiyʋt isht ik chi yushobo kashke, micha i̱ naholbʋt toba puta ka̱ ponaklot, Oklushi ilʋppa puta kʋt i̱ naholbʋt toba puta ka̱ katiohmit im antia tuk oh cho? ʋno ak kia yʋmmak o̱ yʋmihchi la chi̱ hoke, chik acho kashke.

³¹ Chin Chitokaka Chihowah ya̱ ish yʋmihcha he keyu; Chihowah yʋt i̱ yuwala puta moma, micha shitilema ya̱, i̱ naholbʋt toba i̱ yʋmihchi tuk oke; ushi ʋhleha micha ushetik ʋhleha aiena ka̱ i̱ naholbʋt toba luak isht i̱ hukmi fehna tuk oke.

³² Nana ho̱ hʋchim ahanchi li tukma, ithaiyanʋt ish yʋmihchashke: ish iba fohka he keyu, micha ish ola taklʋcha he keyu hoke, achi tok.