Tutelonomi 11 - Chahta Holisso Holitopa 1886

¹ Yʋmohmi hoka chin Chitokaka Chihowah ya̱ ish holitobli cha̱, chi̱ miha tok a̱, micha i̱ nan ʋlhpisa bilia, micha im ai ʋlhpiesa yʋmihinchi, micha im anumpa aiena ka̱ ish ieshi na, biliashke.

² Micha himak nitak a̱ hʋsh ithaiyanashke; hʋchim ʋlla ʋhleha ha̱ im anumpule li keyu hoka; yʋmmak osh hʋchin Chitokaka Chihowah yʋt na hotopa onohonchi tuk, im aholitopa, ibbak a kʋllo, micha shakba ashatapa,

³ Micha i̱ na fehna, micha i̱ nan yʋmi̱hinchi Echip ai iklʋnna, Echip i̱ mi̱ko Falaoh, micha i̱ yakni moma ka̱ onohonchi tok a̱;

⁴ Micha Echip in tʋshka chipota, micha im issuba puta micha tʋnʋp, im iti chanʋlli puta ka̱, kaniohmichi tok a̱; hʋchi hliolit a̱ya ma, okhʋta humma ya̱ oka tamoʋchi tok, micha Chihowah yʋt ishit kanchi tok a̱ himak nitak a̱ yʋmi̱hinchi hoke;

⁵ Micha yakni haiaka mi̱hintit ilʋppa hʋsh la ka̱ ant ʋhli ka̱ hʋchi̱ kaniohmichi tuk a̱,

⁶ Micha Luben ushi Eliab ushi tuklo Tahlan, micha Abilam akaniohmichi tok a̱ yakni ʋt itakpashali cha, yʋmma micha in chuka achʋfa puta, micha i̱ bina puta, micha i na chokushpa puta i̱shi tuk puta Islael moma ai itin takla ishit nanʋbli tok a puta ka̱ ik ithano ki tok, micha ik peso ha tok oka;

⁷ Yohmi kia nana isht aiahanta chinto fehna moma ka̱ Chihowah yʋt yʋmihinchi tuk a̱ hʋchi nishkin ʋt pi̱sʋshke.

⁸ Yʋmohmi hoka anumpa ha̱ himak nitak a̱ hʋchim anumpo̱honli li ka̱ hʋsh ieshashke; yʋmohmi hosh hʋsh kʋllo cha, yakni hʋsh isha chi̱ hosh yʋmma pilla ia kʋt ont chukowʋt hʋsh ishashke.

⁹ Yʋmohmi hosh Chihowah yʋt hʋchi̱ki ʋhleha, micha im isht atiaka aiena ka̱ ima chi̱ hosh, anumpa kʋllo im ilonochi tok a̱ nitak hʋchi̱ falaia yakni yash pishukchi, micha foe bila ayana̱hanli yakni ya̱ hʋsh ai aha̱shwashke.

¹⁰ Yakni ya̱ ish isha chi̱ hosh, yʋmma pilla ish ia kʋt, Echip yakni ish a minti tok, yʋmmak oka chi̱ na nihi ish hokchi tuk mʋt, haiyu̱kpolo osapushi chohmichit, chiyi ak o̱ oka isht ish o̱ hlali beka tok a̱ chohmi keyu ho̱ ish ia hoka;

¹¹ Amba yakni hʋsh isha chi̱ hosh, yʋmma hʋsh ia kʋt, nʋnih, micha okfa, aiena aiasha yosh shutik ʋt et ai umba oka ak o̱ ishi hoke.

¹² Chin Chitokaka Chihowah yʋt anukfilli yakni yoke; chin Chitokaka Chihowah i̱ holhponayo yʋt onʋtoyula na, bilia, afʋmmi ishtia ʋmmona tukmʋt afʋmmi ont taha ka̱ ont ʋhli hoke.

¹³ Atukma yakohma hi oke, achunanchit ʋm anumpa himak nitak a̱ hʋchim anumpo̱honli li ka̱ hʋsh haiyaklo, hʋchin Chitokaka Chihowah ya̱ hʋsh holitobli, micha hʋchi chu̱kʋsh a̱ mominchit, micha hʋchimi shilombish ma mominchit hʋsh im antiakma,

¹⁴ Yʋmohmikma hʋchi̱ yakni im umba ont ai ʋlhpiesakma, ʋmmona umba, micha ont ishtaiopi umba ya̱ hʋchima la hi oke; mikma hʋchim onush, micha hʋchim okapa̱ki, micha hʋchi̱ bila aiena ka̱ hoyot hʋsh ashacha hi oke.

¹⁵ Micha chi̱ nan ʋlhpoa yʋt ʋpa chi̱ ka̱, yʋmohmi na, hʋsh impa cha, micha hʋchi kaiya chi̱ ka̱ hʋchim osapa puta hoka hʋshuk et hʋchi̱ pila la hi oke.

¹⁶ Ahah, hʋsh ahni na, hʋchi chu̱kʋsh ʋt hʋchi haksichi na, fullotʋt na holbʋt toba inla puta hʋsh im antia cha, hʋchik aiokpacho kashke.

¹⁷ Yʋmohmikma Chihowah im ai i̱ nukkilli ʋt hʋchi̱ sanalit libbikmʋt, shutik a̱ okshitakma, umba kʋt iksho ka he, mikma yakni ʋt i̱ nan waya puta ka̱ ik a wayo ka hi oke: mikma chekosi Chihowah yʋt yakni hʋchima tuk a̱ hʋsh a mosholi na.

¹⁸ Yʋmohmi hoka ʋm anumpa ilʋppa puta ka̱ hʋchi chu̱kʋsh, micha hʋchimi shilombish a̱ fohkit hʋsh ieshashke, micha nan isht atokowa yo̱ hʋchibbak ishit hʋsh takchi na, hʋchi nishkin itin takla ya̱ bita hosh on talaia ka̱ hʋchin chohmashke.

¹⁹ Micha yʋmma hʋchim aboha hʋsh a binilikmʋt isht hʋsh anumpohonlashke; micha hina takla hʋsh a̱yakmʋt, hʋsh itoyulakmʋt, micha hʋsh wakayakmʋt, hʋchim ʋlla ʋhleha ha̱ hʋsh im aba̱hanchashke.

²⁰ Micha chin chuka in toni̱k puta ka̱, micha chi̱ holihta okhissa puta ka̱ ish ai o̱ holissochashke.

²¹ Yʋmohmi ka̱ hʋchi̱ nitak, micha hʋchim ʋlla ʋhleha ha̱ i̱ nitak ʋt, Chihowah yʋt hʋchi̱ki ʋhleha ha̱ ima chi̱ hosh anumpa kʋllo im ilonochi tok a̱ yakni ya̱ hʋchim ai apakna kʋt, shutik nitak ʋt yakni in takali kak inli ho̱ chiyuhmashke.

²² Anumpa ilʋppa puta moma hʋchim anumpo̱honli li ka̱ achunanchit hʋsh ieshi cha, yʋmihchit hʋchin Chitokaka Chihowah ya̱ holitoblit, i̱ hina puta moma ka̱ ai itʋnowa cha, hʋsh im antiakma;

²³ Yʋmohmikma Chihowah yʋt oklushi ilʋppa puta moma ka̱ hʋchi tikba a tihlelit, kocha welikma, oklushi puta hochito, micha kʋllo kʋt hʋchi̱shahi ya̱ hʋsh isha chi̱ hoke.

²⁴ Kanima moma hʋch iyi pʋtta yʋt ano̱ho̱wa kʋt hʋchimmi ha chi̱ hoke; yakni haiaka, micha Lebanon ʋttʋt okhina Euflates okhina ʋttʋt ia hosh okhʋta ont ʋhli fehna ont ʋhli kak osh hʋchim ai ʋhli ya chi̱ hoke.

²⁵ Hatak nana kia hʋchi tikba ya̱ hikia he keyu ka chi̱ hoke; hʋchin Chitokaka Chihowah yʋt hʋchim achi tuk mak osh, yakni hʋsh ano̱ho̱wa moma ka̱ hʋchi̱ nukshopa, micha hʋchi̱ komunta aiena ka̱ onocha chi̱ hoke.

²⁶ Yakeh, himak nitak a̱ nan isht yukpa, micha nan isht kalakshi ya̱ hʋchi tikba takalechi lishke.

²⁷ Nan ishit yukpa, hʋchin Chitokaka Chihowah im anumpa himak nitak a̱ hʋchim anumpo̱honli li ka̱ hʋsh im antiakmʋt;

²⁸ Micha ishit kalakshi, hʋchin Chitokaka Chihowah im anumpa himak nitak a̱ hʋchim anumpo̱honli li ka̱ hʋchik im antio hosh, hina ya̱ kohchʋt naksika pit hʋsh fullota cha, na holbʋt toba inla puta hʋsh ithana tok keyu kʋt, iakaiyʋt hʋsh iakma.

²⁹ Atukma yakohma hi oke; yakni ya̱ ish isha chi̱ hosh, yʋmma ish ia ka̱ chin Chitokaka Chihowah yʋt chisht onakma, Kelisim nʋnih ha̱ anumpa yukpali ish onochikmʋt, Ebal nʋnih ha̱ anumpa kalakshichi ish onocha hi oke.

³⁰ Yʋmmʋt Chatan misha tʋnnʋp, hʋshi pit ai okatula pilla, Kananait okla yʋmmʋt Kilkal ichapaka yakni shahbi asha ya̱ i̱ yakni Moleh yakni patali bili̱ka hieli keyu cho?

³¹ Chihowah yʋt hʋchima tok a̱ yakni ya̱ hʋsh isha chi̱ hosh, Chatan a hʋsh hlopulla chi̱ hokʋt; micha hʋsh ishikmʋt hʋsh ai a̱ha̱shwa chi̱ hoke.

³² Mikmʋt nan ʋlhpisa bilia moma, micha ai ʋlhpiesa yʋmihinchi himak nitak a̱ hʋchi tikba ya̱ takalichi ka̱ ithaiyanʋt hʋsh yʋmihchashke.