Tutelonomi 1 - Chahta Holisso Holitopa 1886

¹ Anumpa ilʋppa puta kak o̱ Moses ʋt Islael moma ka̱ Chatan ola in tʋnʋp, yakni patali, yakni haiaka okhʋta humma ichapaka ya̱, Palan micha Tofel, micha Laban, micha Haselolh, micha Tisahab iti takla ya̱ ai im anumpo̱honli tok.

² Holeb a̱ ʋttʋt Sei nʋnih ha̱ ont ia hosh Katesh‐banea ona ka̱ nitak auahchʋfa ka̱ anowa yoke.

³ Atuk o̱ yakohmi tok; afʋmmi ont ishit pokoli ushta, hʋshi ont ishit auahachʋfa, nitak ʋmmona ma, Moses ʋt Islael im ʋlla ʋhleha ha̱, Chihowah yʋt nanʋlhpisa imma ima tuk mak o̱, moma ka̱ im anumpuli tok.

⁴ Amolait okla i̱ mi̱ko Sihon Heshbon ai ʋtta tok, micha Bashan i̱ mi̱ko Ok Etlei talaia Ashtalolh ʋtta yo̱ ʋbi ha yʋt:

⁵ Chatan ola in tʋnnʋp Moab yakni ya̱, Moses ʋt nan ʋlhpisa ilʋppa ai im anumpulit ishtiʋt,

⁶ Pin Chitokaka Chihowah yʋt Holeb a̱ a pim anumpulit, Nʋnih ilʋppa hʋsh ahanta tok a̱ hopaki kʋt ʋlhpesʋshke.

⁷ Hʋsh fullota cha, itʋnowʋt a̱yʋt, Amolait okla i̱ nʋnih, micha bili̱ka taloha moma, yakni patali, micha nʋnih foka, micha okfa, micha okamahli, micha okhʋta lapalika aiena, Kananait okla i̱ yakni, micha Lebanon aiena ka̱ onʋt okhina chito Eufalates okhina ya̱ hʋsh onashke.

⁸ Yakeh, yakni ya̱ hʋchi tikba talali lishke; chukowʋt yakni ya̱ Chihowah yʋt hʋchi̱ki ʋhleha Eblaham, micha Aisaak, micha Chekob, micha im ishtiaka iakaiyʋt mihinti aiena ka̱ anumpa kʋllo anumpulit, ima tok a̱ hʋsh ishashke, achi tok oke, achi tok.

⁹ Mihmʋt nitak yʋmma hʋchim anumpulit, Ʋno ak bano kʋt hʋchi laue la he keyushke, achi li tok.

¹⁰ Hʋchin Chitokaka Chihowah yʋt hʋchi apaknʋchi tuk oke; atuk o̱ yakeh, hʋchi apakna kʋt himak nitak a̱ ʋba fochik puta ka̱ hʋsh chohmishke.

¹¹ Hʋchi̱ki ʋhleha in Chitokaka Chihowah yʋt himak a̱ hʋsh kaniohmi ka̱ laua kʋt tahlepa sipokni hoh kia i̱ shahli ha̱ hʋch ikbashke; yʋmihcha he hʋchi̱ miha tok mak osh, hʋchi yukpalashke.

¹² Katiohmi kak osh ʋno ak bano kʋt nan isht hʋsh ataklʋma, micha na hʋchi̱ weki, micha hʋsh itachowa aiena ka̱ shaiyali la hinla cho?

¹³ Hatak hopoyuksa, nan ithana hʋchim apehlichi ʋt ithana hoka, hʋsh ishi na, hʋchi pehlicha he a̱ ikbi lashke, achi li tok.

¹⁴ Mikma hʋchishno ak osh afalaminchit, Nana ish anumpuli ka̱ e yʋmihchikmʋt pim achukma hinlʋshke, hʋs sʋm achi tok.

¹⁵ Yohmi ho̱ hʋchim apehlichi puta ka̱ i̱ shahli ʋhleha hatak hopoyuksa, ithana ʋhleha ha̱ ishi lish, hʋchi̱ noshkoboka puta ikbit tahlepa sipokni puta i̱ kʋpotʋni, micha tahlepa puta i̱ kʋpotʋni, micha pokoli tahlapi puta i̱ kʋpotʋni, micha pokoli puta i̱ kʋpotʋni hʋchim ikbi li tok: micha hʋchim apehlichi puta ai itin takla ya̱ nan ʋlhtoka puta ka̱ ikbi li tok oke.

¹⁶ Micha nitak yʋmma hʋchi̱ nan apesa ʋhleha ha̱ atokolit i̱ mihʋt, Hʋchitibapishi ʋhleha itin takla nan iti̱ kaniohmi ya̱ hʋsh im ahaponaklashke; micha hatak puta, micha itibapishi nan iti̱ kaniohmi, micha okla inla takla a̱sha tuk aiena ka̱ ai ʋlhpiesa ho̱ hʋsh im apesashke.

¹⁷ Nan apesa kʋt, hatak yohmi hoka, ish ahna he keyu hoke: amba chipunta kak kia hochito ka̱ iti lauechit hʋsh i̱ haponaklashke; hatak nashuka ya̱ hʋchik i̱ nukshopo kashke; nan im apesa yʋt Chitokaka immi hoka; atuk osh nana kʋt hʋchi̱ kʋllo fehnakmʋt, isht hʋs sʋm ala na, ʋno ak osh haponaklo lashke, im achi li tok.

¹⁸ Micha nitak yʋmma nana moma hʋsh yʋmohma chi̱ ka̱ hʋchim apesa li tok.

¹⁹ Atuk o̱ Holeb a̱ ashʋt il ia mʋt, yakni haiaka chito, micha palʋmmi, hina takla Amolait okla i̱ nʋnih ha̱ hʋsh a pisa chash pin Chitokaka Chihowah yʋt pim apesa tuk mak o̱ mominchit e hlopulli tok; mihmʋt Katesh‐banea ya̱ ela tok.

²⁰ Mihma Amolait okla i̱ nʋnih, yʋmmak oka pin Chitokaka Chihowah yʋt pima tuk mak o̱ hʋshlʋshke, hʋchim achi li tok.

²¹ Yakeh, Chin Chitokaka Chihowah yʋt yakni yash chi tikba talalishke: hʋchi̱ke ʋhleha in Chitokaka Chihowah yʋt chim achi tuk mak o̱, iʋt ishi: chi nukshopa na, micha chi chu̱kʋsh ʋt ik ello kashke, chim achi li tok.

²² Mihma hʋsh moma kʋt a̱ bili̱ka hʋshla tok; micha, Hatak ak o̱ pi tikba e pilakma, yʋmmak osh yakni ya̱ pim ahopo̱koyot tahli cha, hina kanima ho̱ il ia hinla, micha tʋmaha holihta kanima ho̱ il ona chi̱ ka̱, anonti anumpa ishit pim ʋlashke, hʋsh achi tok.

²³ Mihma nana hʋsh achi ka̱ ʋm ʋlhpesa tok; mihmʋt hatak hʋsh auahtuklo, apehlichi achʋfakma achʋfʋt ia ho̱ ishe li tok.

²⁴ Mihma fullotʋt nʋnih ha̱ ia tok; atuk osh okfa Eshkol a̱ ona cha, ahopo̱koyot tahli tok.

²⁵ Micha yakni nana awaya ai ishit ibbak a̱ ishit pim ʋla mʋt, anonti anumpa isht pim ʋlʋt, Yakni achukma pin Chitokaka Chihowah yʋt pimʋshke, achi tok.

²⁶ Yohmi hak inli kia hʋsh ia he keyu tok; amba hʋchin Chitokaka Chihowah im anumpa ha̱ hʋsh kobʋffi tok.

²⁷ Mihmʋt hʋchi̱ bina puta a̱shʋt na mihʋt anumpulit, Chihowah yʋt pi nukkilli kak osh Echip yakni ya̱ pi kohchit pisht ʋla cha, Amolait ibbak a̱ pi fohki na, ʋbit pi tahla chi̱ ha tuk oke.

²⁸ Katima hak o̱ il ia chi̱ cho? pitibapishi ʋhleha hʋt, Okla hatak hochito, micha chaha kʋt pi̱ shahli hoke; tʋmaha holihta ʋt hochito, micha aholihta kʋt shutik a̱ ona hoke; micha Anakim ushi ʋhleha ha̱ yʋmma il api̱sa tuk oke, achit pi chu̱kʋsh a̱ iellichishke, hʋsh achi tok.

²⁹ Yohmi ma, Hʋsh i̱ komunta na, micha yʋmmak o̱ hʋsh i̱ nukshopa na,

³⁰ Hʋchin Chitokaka Chihowah ak osh hʋchi tikba iʋt hʋsh pi̱sa ho̱, Echip a̱ hʋchim a yʋmihchi tok moma ka̱ chohmit hʋchim itiba chi̱ hoke.

³¹ Micha yakni haiaka hʋsh ata̱ya moma ka̱, hatak osh ushi shoyuli ka̱ chohmit, hʋchin Chitokaka Chihowah yʋt kaniohmit chi shoyuli ho̱ pi̱hi̱sʋt ilʋppa hʋshla tuk oke.

³² Yohmi kia nana ilʋppa hʋchin Chitokaka Chihowah ya̱ hʋsh i̱ yimmi tok keyu hoke.

³³ Yʋmmak osh hina ya̱ hʋchi tikba a̱ya tok, micha binah hʋsh ahilecha chi̱ ka̱ hoyot hʋchim ahayuchi tok; ninak ma, hʋsh atia chi̱ ka̱ hʋchim anola chi̱ kʋt luak a tok; atuk osh nitak hoshonti ha tok.

³⁴ Mihma Chihowah yʋt hʋchim anumpa ola ka̱ haklo cha, nukhobela mʋt, anumpa kʋllo anumpulit,

³⁵ Hatak ilʋppa puta aionchuloli haksi ilʋppa ai achʋfa tuk ʋt achʋfa kia i̱ki ʋhleha ima la he, mihʋt anumpa kʋllo anumpule li tok, yakni achukma ilʋppa pisa chi̱ keyu pulla hoke.

³⁶ Chefʋnneh ushi Kaleb ak illa chi̱ hoke: yʋmmʋt pisa hi oke: yʋmmak osh yakni anowa tuk a̱ ima la hi oke, micha yʋmma im ʋlla puta ka̱ ima la hi oke: Chihowah ya̱ aioklu̱hʋt im antia tuk oka, achi tok.

³⁷ Micha Chihowah yʋt hʋchishno pulla kak o̱ a̱ nukowa cha̱, yʋmma ish chukowa he keyu, ak inli.

³⁸ Amba Nʋn ushi Choshua chi tikba hikia kak osh yʋmma chukowa chi̱ hoke; ish ai i̱ yimitʋchashke, yʋmmak osh Islael a̱ abinilicha chi̱ hoke, ʋm achi tok.

³⁹ Mikma hʋchin chipunta ʋhleha yʋmmak osh wehpoa chi̱, hʋsh achi tok ʋto, micha hʋchim ʋlla yʋmmʋt nitak yʋmmʋt nan achukma micha ik achukmo aiena ka̱ ik ithano tok, yʋmmak okʋto yʋmma chukowa chi̱ hoke; yʋmma ima la chi̱ hoke, mikma binila chi̱ hoke.

⁴⁰ Amba hʋchishno ʋto fullotʋt yakni haiaka Okhʋta humma ak o̱ aiitʋnowʋt hʋsh iashke, achi tok.

⁴¹ Yohmi ma afalaminchit hʋs sʋm achi mʋt, Chihowah ya̱ il i̱ yoshoba tuk oke; pin Chitokaka Chihowah yʋt nana moma pim achi tuk mak o̱ il ia cha, il itibashke, hʋs sʋm achi tok, Atuk osh hatak hʋsh moma kʋt in tʋnʋp na halupa aiyukali hʋsh il apakshʋnnichi mʋt, nʋnih bokko hʋsh ia chi kʋt hʋchim ʋlhtaha tok.

⁴² Mihma Chihowah yʋt ʋm achi mʋt, Hʋsh ia ná, micha hʋsh itibi ná, hʋchiba fo̱ka li keyu hoke; keyukmʋt hʋchin tʋnʋp ʋhleha ha̱ itikba hʋchi akakoha na, ish im achashke, ʋm achi tok.

⁴³ Yohmi ho̱ hʋchim anumpule li tok; yohmi ma hʋsh haponakla he keyu tok; amba Chihowah im anumpa ha̱ i̱ filʋmmit hʋsh i̱ sanali cha, ilapunlʋt nʋnih foka hʋshla tok.

⁴⁴ Mihma Amolait ʋhleha nʋnih foka yʋmma a̱sha tuk ʋt kohchʋt hʋchi̱ sanali cha hʋchi tihlelit foishki chohmi tok, micha Sei ya̱ hʋchibit Homah ya̱ hʋchishtona tok.

⁴⁵ Mihma hʋsh falama cha, Chihowah itikba ya̱ hʋsh ya̱ha̱ya tok; yohmi kia Chihowah yʋt hʋchim anumpa ha̱ hakla he keyu tok; micha hʋchi̱ haponakla he keyu tok.

⁴⁶ Yohmi ho̱ Katesh a̱ hʋsh aiasha na nitak laua kʋt, yʋmma hʋsh aiasha atok mak atok.