Titus 3 - Chahta Holisso Holitopa 1886

Nana ho̱ ithʋnancha he, mikmʋt nana ho̱ ik ithʋnancho ka he aiena ka Titʋs a̱ im abʋchi, 1; 12 im ʋla hi a̱ pit i̱ miha.

¹ Mi̱ko, nan apesa, nan ʋlhtoka ʋhleha moyuma ka im antia achukma, nan toksʋli achukma puta ka isht ahanta chi̱ kʋt im ʋlhtaha he,

² Hatak nana kia kʋllakshichit isht ik anumpulo, it i̱ nokowʋt ik itachowo, amba anukfila yohbi, hatak moma ka i̱ kana aiena he mak o̱, ithana chi̱ ka ish im anohonlashke.

³ Yohmi ka pishno ak kia ti̱kba hokʋno nana kil ithano, Chihowa kil im antio, pi yoshubʋt, anukfila okpulo ilaiyuka, micha haknip isht ai yukpa aiena ka i̱ yuhu̱kʋt, hotopali bʋnna, it i̱ potʋnno aiena isht il ahanta kʋt, nan isht ik pi ahobo fehna hosh it i̱ nukkillit il ahanta tok.

⁴ Yohmi tok kia Chihowa pi okchalinchi yʋt hatak isht i̱ kana, micha isht i̱ nukha̱klo aiena kʋt otaiyani ha yano,

⁵ Nan ai ʋlhpiesa isht ahantʋt il atahli tok ak o̱ keyu, amba pi nukha̱klo kak osh himona toba isht ʋlhchihi̱fa kʋt, Shilombish Holitopa yak o̱ himona isht a toba ho̱ isht a pi okchalinchi tok oke;

⁶ Yohmi kʋt yʋmmak ash o̱ Chisʋs Klaist pi okchalinchi yʋt nan atahli tok ak pulla kak o̱, lauachi fehna hosh pi o̱ fohobli tok:

⁷ Yohmi na isht i̱ kana yo̱ isht a pi ʋlhpiesa hosh, ai okcha̱yʋt bilia il isha he pim ai ʋlhpiesa hosh e toba hinla hoke.

⁸ Anumpa ilʋppʋt ai a̱hli yoke, yohmi kʋt nana yʋmmak ash puta ka kʋllochi fehna hosh isht ish anumpohonla he chim ai ahni li; yohmi na Chihowa i̱ yimmi tok ʋhleha hʋt ahah! ahnit, nan toksʋli achukma puta ka achunanchit isht ahantashke. Nana ilʋppa puta kʋt achukma, micha hatak a̱ isht im achukma hoke.

⁹ Nan isht a ponaklo isht ik ahobo, in tikba ai unchululit isht auehinchi isht annoa, nan isht itachowa, micha Chu i̱ nan ʋlhpisa isht itachowa aiena ka chik ahalaio kashke; yʋmmʋt nan isht ik ahobo, micha nan isht ai achukma hi ʋt iksho hoka.

¹⁰ Hatak kʋna hosh ʋbanumpuli iksa i̱ sanalit it a kʋshkoli bʋnna hokma, ʋmmona, micha atuklant ish im olabi ha yoka yʋmihchi kʋt imoma hokma, chik aiokpancho kashke.

¹¹ Yʋmma chiyuhmi hokʋto ai a̱hli ka i̱ filʋmmit kʋnia hosh, nan ashahanchi kʋt, ilap inli kʋt ik ai a̱hlo kʋt otʋninchi hoka ish ithaiyanashke.

¹² Tikikʋs, Atemas, kanimampo ka pit chim pila li hokma, Nikopolis ak o̱ anta li hoka ik kaniohmi kia ish la pullashke: hʋshtula ya yʋmmak o̱ anta la chi̱ hoke.

¹³ Nan ʋlhpisa imponna Senas, micha Apollos ita tuklo kʋt im ʋlhtaha achukma cha, nana a bʋnna kʋt ik im iksho ka chi̱ ka ish im atahli cha, auet ish pilashke.

¹⁴ Mikma pimmi yokʋt nan isht ai ʋni ik im iksho hosh ik anto ka chi̱ kʋt, nana ka ai yʋmohma he ai ʋlhpiesa nan toksʋli achukma puta ka achunanchit isht ahanta chi̱ kʋt, moyumʋt ithʋna mak inlashke,

¹⁵ Si api̱ha kʋt moyumʋt pit chi aiokpʋchishke. Na yimmi pia ha̱ pi̱ hullo ka moyuma ish aiokpʋchashke. Isht i̱ kana yʋt hʋsh moyuma ka hʋchi anukfoyukashke. Amen.