Titus 2 - Chahta Holisso Holitopa 1886

Nana ho̱ isht anumpulit abahancha hi a, mikmʋt kaniohmit ai ʋlhpiesʋt a̱ya hi a̱ Titʋs a̱ im apesa, 1; 9 yuka, micha hatak moma kʋt nan akaniohma he ʋlhpesa ka anoli.

¹ Amba chishno yokʋto nan oklu̱ha kʋt nan isht ʋlbʋchi achukma ka isht ai a̱hli kak o̱ isht ish anumpohonlashke;

² Yohmi kʋt hatak asʋnochi puta kʋt ahah! ahni, yopunla iksho hosh im anukfila weki achukma, kostini, ʋbanumpa yimmi, it i̱ hullo, nuktanlʋt achunanchi aiena kʋt ai a̱hlashke:

³ Mikma ohoyo asʋnochi puta kʋt ʋbanumpuli yokʋt ai yʋmohmi ʋlhpiesa kak o̱ yʋmohmi mak inlashke; inla aholʋbechi keyu, oka homi yoka i̱ yuhu̱ka keyu, nana hochukma ka abahanchashke:

⁴ Yohmi kʋt Chihowa im anumpa hʋt ik kʋllaksho ka chi̱ ka, ohoyo himita puta kʋt ile oktampli, i̱ hatak i̱ hullo, im ʋlla ya̱ i̱ hullo aiena;

⁵ Mikmʋt kostini, haui anukfila iksho, ilap in chuka antʋt, nan isht ahanta, hochukma, ilap i̱ hatak im antia achukma aiena chi̱ ka im abahanchashke.

⁶ Hatak himita puta mʋt ile oktampla chi̱ ka nan ish i̱ mihi̱ha mak inlashke.

⁷ Nan oklu̱ha ish a kaniohmi kʋt nan toksʋli achukma puta isht ai ithʋna yo̱ ish il otʋnihinchashke: nan ish abahanchi kʋt ai a̱hli kak bano, yopunla keyu hosh anukfila weki achukma hosh ish im abahanchashke;

⁸ Yohmi kʋt anumpa achukma isht ai i̱ sanala he iksho ho̱ ish abahanchashke; yohmi na kʋna hosh chi̱ sanali hatuk mʋt, nan ik achukmo nana kia isht chi anumpula he iksho kʋt hofahyashke.

⁹ Yuka puta kʋt ilap i̱ na‐hullo yoka im antia, micha nan oklu̱ha ka isht ai yukpali, a sanalit ik anumpulo ka he;

¹⁰ Micha ik hu̱kopo, amba nan oklu̱ha ka ai a̱hli achukma he; yʋmohmi cha Chihowa pi Okchalinchi im anumpa ha̱ nan oklu̱ha ka isht a holitobla chi̱ ka ish i̱ mihi̱hashke.

¹¹ Yohmi ka Chihowa isht i̱ kana yak osh ai okcha̱ya i̱shi kʋt hatak puta ka im otʋni tok oka,

¹² Yʋmmak osh pim abahanchi kʋt, Chihowa isht ik holitoblo puta, yakni ilʋppak inli anukfila okpulo ilaiyuka ka isht kil ahanto ka he, amba ile oktampli, hatak bi̱ka it im ai a̱hli achukma, micha Chihowa ya̱ holitobli hosh himonasi yakni ilʋppa il ahanta he;

¹³ Mikmʋt ai okcha̱yʋt isht il ai yukpa bilia, micha Chihowa Chitokaka, pi okchalinchi Chisʋs Klaist ʋt isht a holitopa ieshi hosh haiaka hi a̱ pit hoho̱yot il ahanta he;

¹⁴ Yohmi kʋt yʋmmak ash osh ai ashʋchika puta ka a pi hlakofihinchi cha, pi kashofi na ilap immi okla holitopa fehna e toba cha, nan toksʋli achukma puta ka a yiminta hosh isht il ahanta he mak o̱, pi ʋlhtoba hosh illi tok.

¹⁵ Ilʋppa puta kak o̱ ish anumpulashke, yohmi kʋt Klaist im anumpa ai a̱hli ka nan isht a mihʋt ish im olahambashke. Yohmi na hatak nana kia ik chi shitilemo kashke.