Titus 1 - Chahta Holisso Holitopa 1886

Titʋs a̱ pit aiokpʋchi, mihmʋt nana kaniohmi ho̱ Kleti a̱ anta he im ahni tuk ʋt anoli, 1; 6 ʋbanumpa isht ʋtta yʋt kaniohmit nan im ai ʋhltaiyaha he; 11 nan ik ʋlhpeso anumpulit nan ithʋnanchi itakha yʋt issa he isht anumpuli.

¹ Pal, Chihowa in tishu, micha Chisʋs Klaist im apostel okʋt, ʋbanumpa ha̱ anohonli na okcha̱yʋt bilia he Chihowa hʋt im ahni tok ʋhleha hʋt yimmi cha, anumpa ai a̱hli ka achukmali fehnʋt ithʋnʋt, Chihowa ha̱ isht a holitobla hi atok;

² Yohmi cha ai okcha̱yʋt bilia pisa he ai ahna hi atok, yʋmmak oka Chihowa holaba he keyu yʋt, nana puta kʋt ik tobo pilla kash inli ho̱, im ihi̱sa tok;

³ Yohmi tok osh ont ai ʋlhpiesa ma nan im ihi̱sa tok ʋt ʋbanumpa isht anumpohonli ho̱ isht otʋnihinchi; yʋmma ʋno ak osh isht anumpohonli la he ʋm ʋlhpisa kʋt, Chihowa pi Okchalinchi nan apihi̱sa tok mak o̱ yʋmohmishke.

⁴ Yohmi kʋt nan isht a pi yimmi pulla kak o̱ sʋso, Titʋs a̱, pit chi aiokpʋchi lishke: Nan isht i̱ kana, i̱ nukha̱klo, micha isht it i̱ nanaiya aiena kʋt Pi̱ki Chihowa, micha pi Okchalinchi Chitokaka Chisʋs Klaist ita tuklo ka a mihinti kʋt chi anukfoyukashke.

⁵ Kleti a̱ ish anta he chim ai ahni li kʋt ilʋppak atok; nana kʋt ik ʋlhtaho puta tuk a̱ achukmalit isht ish ahanta kʋt, chim apesa li hatuk oka, ʋbanumpa isht ʋtta ya̱ tʋmaha puta ka ish ai atokohonlashke.

⁶ Kanima ka anumpa ik achukmo kʋt onʋtonla he keyu, ohoyo achʋfa i̱ hatak, im ʋlla mʋt ʋbanumpa yimmi nan isht yopomo anumpa kia onʋtonla he keyu, micha ilapunla keyu hok mak o̱ ish atokolashke.

⁷ Yohmi ka bishop ʋt Chihowa nan im apesʋchi yatuk osh, anumpa ik achukmo kia onʋtula he keyu ho̱ pullashke: ilap ai ahni keyu, nokowa shahli keyu, oka homi ishko shahli keyu, na‐fahama keyu, ai ʋlhpiesa keyu isht a hofahya he nan isht ahayuchi bʋnna keyu;

⁸ Amba hatak ik ithano i̱ hullo, hatak achukma puta ka i̱ hullo, kostini, ai ʋlhpiesa, Chihowa holitobli, ile oktampli;

⁹ Mikmʋt anumpa ai a̱hli im ʋlbahanchi kash o̱ kʋllot halʋlli hosh, nan isht ʋlbʋchi ai a̱hli ka isht im abahanchit, ʋbanumpa i̱ sanali ʋhleha ha̱ nan i̱ mihʋt im alʋmminchi mak inlashke.

¹⁰ Yohmi ka ilapunla, nan ik ahobo isht anumpuli, micha na haksichi yʋt laua fehna hosh ai asha hoka, mikmʋt hakshup tʋpa ʋhleha hokak heto laua hoke:

¹¹ Yʋmma itih hʋt ʋlhkʋma pullashke, yʋmmak osh chuka chʋfa moma ka ai a̱hli ka i̱ filʋmmihinchi kʋt, ai ʋlhpesa keyu isht a hofahya he nan isht ahayuchi bʋnna kak osh, yohma hi atuk keyu kia nana ka abahanchishke.

¹² Ilap ai achʋfa, ilap i̱ hopaii atuk ak inli hosh na miha kʋt, Kletian ʋhleha hʋt holabi kak bano chatuk, nampoa okpulo, intakobi, isikopa aiena hoke, achi tok.

¹³ Anumpa atokowa ilʋppʋt ai a̱hli hoke; yohmi hoka ʋbanumpa yimmi kʋt ai a̱hla chi̱ mak o̱, hotopalit ish im alʋmminchashke:

¹⁴ Yohmikmʋt Chu im anumpa ik ahobo, micha anumpa ai a̱hli ka i̱ filʋmmi hatak nan apihi̱sa aiena ka chik im antio kashke.

¹⁵ Yohmi ka kashofa hokʋno nan oklu̱ha kʋt i̱ kashofa hoke; amba ik kashofo, na yimma he keyu hokʋno nana kia ik i̱ kashofo hoke; amba nan ahni, micha isht il akostininchi aiena kʋt litehʋt kʋnia hoke.

¹⁶ Yohmi kʋt Chihowa ha̱ ithana, miha kʋt il otʋninchi ak inli kia, nana a kaniohmi puta kʋt isht ik holitoblo, na yimma he keyu, mikmʋt nan toksʋli achukma puta ka ik ai a̱hlo hoka i̱ yuwala he ʋlhpesa hoke.