Numbas 9 - Chahta Holisso Holitopa 1886

¹ Mihma Chihowah yʋt Moses a̱ yakni haiaka Sinai ya̱ Echip yakni ya̱ kohcha tok afʋmmi ont atukla micha hʋshi ʋmmona ho̱ im anumpulit,

² Islael im ʋlla ʋhleha hʋt ʋbanʋblit ont ia ʋlhpisa ʋt ont ʋlhpesakma holitoblashke.

³ Himak hʋshi nitak ont isht auahushta kʋt opiakma ʋlhpisa hʋt ont ʋlhpesakma, hʋsh holitoblashke; nan ʋlhpisa moma hatuk o̱, micha nan akaniohma he moma ʋlhpisa yatuk mak o̱, hʋsh holitoblashke, im achi tok.

⁴ Mihma Moses ʋt Islael im ʋlla ʋhleha hʋt ʋbanʋblit ont ia ya̱ holitoblicha chi̱ ho̱ im anumpulit tok.

⁵ Mihma hʋshi ʋmmona nitak ont isht auahushta opia ma, yakni haiaka Sinai ya̱ ʋbanʋblit ont ia ya̱ isht aiasha tok; Chihowah yʋt Moses a̱ im apesa tuk moma kak o̱, Islael im ʋlla ʋhleha hʋt yʋmihchi tok.

⁶ Atuk o̱ hatak kaniohmi kʋt hatak illi nipi ishit liteha tuk osh, nitak yʋmma ʋbanʋblit ont ia isht asha he keyu tok; micha nitak yʋmma Moses itikba micha Alon itikba ona tok.

⁷ Micha hatak yʋmmak ash osh, Hatak illi nipi yo̱ ishit pi litehʋshke, nanta katiohmi kak o̱ pi̱ katʋbli na Islael im ʋlla ʋhleha ai itin takla ya̱ Chihowah nan im issa ya̱ ʋlhpisa ʋt ont ai ʋlhpiesakma kil im isso ka chi̱ cho? im achi tok.

⁸ Mihma Moses ʋt, Lumʋt hʋsh hinlashke, mikma hʋchishno pulla ka̱ Chihowah ak osh nan apesa he, haklo lashke, im achi tok.

⁹ Mihma Chihowah yʋt Moses a̱ im anumpulit,

¹⁰ Islael im ʋlla ʋhleha ha̱ im anumpulit, Hatak chi kanima hosh, keyukmʋt hʋchi aionchuloli yosh nipi illi yo̱ ishit litehakma, keyukmʋt yakni hopaki nowʋt aya tuk okma, nana kia, ʋbanʋblit ont ia ya̱ Chihowah isht im aiasha hi oke.

¹¹ Hʋshi atukla nitak ont isht auahushta opiakma isht ai asha cha pʋska ik shatʋmmo, micha haiyu̱kpulo homi aiena it ai impʋcha hi oke.

¹² Ilatombʋt bohli na ik onno kashke; micha foni nana kia ik kobafo kashke, ʋbanʋblit ont ia nan ʋlhpisa moma hatuk mak o̱ isht aiashashke.

¹³ Amba hatak ʋt liteha keyu, micha nowʋt a̱ya keyu hosh ʋbanʋblit ont ia ya̱ isht ik ahantokmʋt, yʋmmak okʋt im okla ai itin takla ya̱ fiopa tʋpashke, Chihowah nan im issa ya̱ ʋlhpisa tok ʋt ont ʋlhpiesakma; isht iklo hokʋt, hatak yʋmmʋt ilap nan ashʋchi ʋt onʋtoyulashke.

¹⁴ Okla inla yosh hʋchi takla ahanta tuk osh, ʋbanʋblit ont ia ya̱ Chihowah isht im ahanta he ahnikmʋt, ʋbanʋblit ont ia nan ʋlhpisa mak o̱, micha nan akaniohmi mak o̱ yʋmihchashke; okla inla, hʋchi̱ yakni yash ai ʋtta tuk aiena kʋt nan ʋlhpisa hʋchim achʋfashke, ish im achashke, im achi tok.

¹⁵ Atuk o̱ binah hʋt hikia nitak ma, hoshonti hʋt binah yʋmmʋt isht atokowa binah ha̱ onʋtoyula tok, atuk osh opia ma luak holba hosh binah ha onʋtoyula na onnahinli tok.

¹⁶ Yʋmohmi na bilia beka tok, hoshonti hosh nitak ma onʋtoyula tuk osh ninak ma luak ahoba hosh onʋtoyula tok.

¹⁷ Atuk o̱ hoshonti hosh binah paknaka ai ishit ʋba isht iakma, Islael im ʋlla ʋhleha hʋt nowʋt ia beka tok; atuk osh kanima ho hoshonti hʋt hikiakma, Islael im ʋlla ʋhleha hʋt yʋmmak o̱ binachi beka tok,

¹⁸ Chihowah hʋt im apesa ho̱ Islael im ʋlla ʋhleha hʋt nowʋt ia beka tok; atuk osh Chihowah hʋt im apesa ho̱ binachi beka tok; hoshonti hʋt binah onʋtola takla im ʋlhtipo fohʋt asha beka tok.

¹⁹ Atuk o̱ hoshonti hʋt hopaki micha nitak laua ho̱ binah paknaka onʋtoyulakma, Islael im ʋlla ʋhleha hʋt Chihowah nan isht im ahanta ka̱ holitobli cha ik a̱yo beka tok.

²⁰ Atuk o̱ yakohmi beka tok, nitak kanohmi takla ho̱ hoshonti hʋt binah ha̱ onʋtoyulakma, Chihowah im anumpa hatuk mak o̱, im ʋlhtipo puta aiasha beka tok; atuk osh Chihowah im anumpa mak o̱ nowʋt ia beka tok.

²¹ Atuk osh yakohmi beka tok, hoshonti hʋt talaia na opiaka ʋttʋt onnahinli ont ʋhlikma, atuk osh onnahinlikma hoshonti ha̱ ʋba isht iakma nowʋt ia beka tok; nitak okmá, ninak okmá nana ho̱ ʋba isht iakma nowʋt ia beka tok.

²² Keyukmʋt nitak tuklo hokmá, keyukmʋt hʋshi achʋfa hokma, keyukmʋt afʋmmi achʋfa hokma, nana ho̱ hoshonti hʋt binah paknaka talaia cha on talaia momakma, Islael im ʋlla ʋhleha hʋt im ʋlhtipo aiasha cha, nowʋt ik aiyo tok; amba ʋba isht iakma nowʋt ia beka tok.

²³ Chihowah im anumpa pulla ho̱ im ʋlhtipo fohʋt ai asha tok, anonti Chihowah im anumpa pulla ho̱ nowʋt ia beka tok; Chihowah nan isht im ahanta ha̱ holitoblit Chihowah yʋt Moses a nan im apesʋt tohno tok a̱ ieshi beka tok.