Numbas 7 - Chahta Holisso Holitopa 1886

¹ Atuk o̱ yakohmi tok, Moses ʋt ʋlhtipo ha̱ hilechit taiyahli cha, nan ahʋmmit hullochit, micha nan isht pilesa aiasha moma, micha alta, micha nan aiʋlhto aiasha moma aiena ka̱ nan ahʋmmit hullochi tok, nitak akinli ka̱.

² Islael i̱ holitopa ʋhleha i̱ki ʋhleha in chuka achʋfa i̱ noshkoboka, yʋmmʋt apehlichi puta ka̱ i̱ holitopa ʋhleha, micha holhtina tuk a̱ pehlichi yatuk osh, im issa tok.

³ Micha nan im issa yʋt itichanʋlli ompoholmo hannali, micha wak toksʋli auahtuklo ho̱ Chihowah itikba ya̱ isht ʋla tok, i̱ holitopa tuklokma itichanʋlli achʋfa, mikma aiyukali ka̱ wak achʋfa bieka tok, micha ʋlhtipo itikba isht ʋla tok.

⁴ Mihma Chihowah yʋt Moses a̱ im anumpulit,

⁵ Ish im ai ishashke, mikma okla moma i̱ binah ha̱ isht in toksʋlashke, micha Lefait ʋhleha hak o̱ hatak ʋt isht aiahanta aiyukali ʋlhpi̱sa ho̱ ish imashke.

⁶ Mihma Moses ʋt itichanʋlli micha wak aiena kash ishi cha Lefait ʋhleha ha̱ ima tok.

⁷ Itichanʋlli tuklo micha wak ushta aiena ka̱ Keshon ushi ʋhleha hak o̱ isht aiahanta ʋlhpi̱sa mak o̱ ima tok.

⁸ Micha itichanʋlli ushta micha wak untuchina aiena ka̱ Melali ushi ʋhleha hak o̱ isht aiahanta ʋlhpi̱sa mak o̱ ima na, naholitompa isht ʋtta Alon ushi Ihlama ibbak foyuka tok.

⁹ Amba Kohalh ushi ʋhleha hano ik emo, ʋlhtipo holitopa ak o̱ isht aiahanta ak osh immi hosh tahchi onochit shoyula chi̱ hatuk oka.

¹⁰ Mihma holitopa ʋhleha hʋt alta ya̱ hullochit nan ahʋmmi nitak ma nan im issa tok; holitopa ʋhleha hʋt nan im issa ya̱ alta itikba ya̱ ai im issa tok.

¹¹ Mihma Chihowah yʋt Moses a̱, I̱ nan im issa ya̱ alta hullochi hosh holitopa aiyukali kʋt i̱ nitak ont ʋlhpesakmʋt im issashke, im achi tok.

¹² Atuk o̱ nitak ʋmmona i̱ nan im issa im issa kʋt Chutah apehlichi ai achʋfa Amminatab ushi Nahshon ak atok.

¹³ Micha i̱ nan im issa yʋt tʋli hʋta ampo chito achʋfa, weki kʋt shekel tahlepa achʋfa cha pokoli tuchina, tʋli hʋta ampo achʋfa shekel pokoli untuklo ʋlhtipo holitopa i̱ shekel ʋlhpisa hatok; ita tuklo kʋt bota tohbi lipehbi bila itaiyoma ilhpak im issa ya chi̱ hosh alota bi̱ka tok.

¹⁴ Isht impa achʋfa tʋli holisso lakna shekel pokoli yosh na balama alota,

¹⁵ Hukmit im issa ya chi̱ ka̱ wak hobʋk himita achʋfa, chukfi ʋlhpoa nakni achʋfa, chukfi ʋlhpoa ushi afʋmmi ʋmmona achʋfa;

¹⁶ Nan ashʋchi im issa yʋt issi kosoma ushi achʋfa,

¹⁷ Micha isht itinnanaiyʋchi im issa ya chi̱ ka̱ wak hobʋk tuklo, chukfi nakni tahlapi, issi kosoma nakni tahlapi, chukfi ushi afʋmmi ʋmmona tahlapi aiena tok. Ilʋppak puta kak osh Amminatab ushi Nahshon nan im issa yatok.

¹⁸ Nitak atukla ka̱ Sua ushi Nehlaneel Issaka ai achʋfa hi̱ olitopa ak osh im issa tok.

¹⁹ Micha i̱ nan im issa yʋt tʋli hʋta ampo chito achʋfa, weki kʋt shekel tahlepa achʋfa cha pokoli tuchina, tʋli hʋta ampo achʋfa shekel pokoli untuklo ʋlhtipo holitopa i̱ shekel ʋlhpisa hatok; ita tuklo kʋt bota tohbi lipehbi bila itaiyoma, ilhpak im issa ya chi̱ hosh alota bi̱ka tok.

²⁰ Isht impa achʋfa tʋli holisso lakna shekel pokoli hosh na balama alota;

²¹ Hukmit im issa ya chi̱ ka̱ wak hobʋk himita achʋfa, chukfi nakni achʋfa, chukfi ushi afʋmmi ʋmmona achʋfa;

²² Nan ashʋchi im issa yʋt issi kosoma ushi achʋfa;

²³ Micha isht itinnanaiyʋchi im issa ya chi̱ ka̱ wak hobʋk tuklo, chukfi nakni tahlapi, issi kosoma nakni tahlapi, chukfi ushi afʋmmi ʋmmona tahlapi aiena tok. Ilʋppa puta kak osh Sua ushi Nehlaneel nan im issa ya tok.

²⁴ Nitak atuchina ka̱ Helon ushi Eliab Sebulon im ʋlla ʋhleha holitopa ak osh im issa tok.

²⁵ Micha i̱ nan im issa yʋt tʋli hʋta ampo chito achʋfa, weki kʋt shekel tahlepa achʋfa cha pokoli tuchina, tʋli hʋta ampo achʋfa shekel pokoli untuklo, ʋlhtipo holitopa i̱ shekel ʋlhpisa hatok; ita tuklo kʋt bota tohbi lipehbi bila itaiyoma ilhpak im issa ya chi̱ hosh alota bi̱ka tok.

²⁶ Isht impa achʋfa tʋli holisso lakna shekel pokoli ho̱sh na balama alota;

²⁷ Hukmit im issa ya chi̱ ka̱ wak hobʋk himita achʋfa, chukfi nakni achʋfa, chukfi ushi afʋmmi ʋmmona achʋfa;

²⁸ Nan ashʋchi im issa yʋt issi kosoma ushi achʋfa;

²⁹ Micha isht itin nanaiyʋchi im issa ya chi̱ ka̱, wak hobʋk tuklo, chukfi nakni tahlapi issi kosoma nakni tahlapi, chukfi ushi afʋmmi ʋmmona tahlapi aiena tok. Ilʋppak osh Helon ushi Eliab nan im issa ya tok.

³⁰ Nitak ont ai ushta ma, Sheteu ushi Elisu, Luben im ʋlla ʋhleha i̱ holitopa ak osh im issa tok.

³¹ Micha i̱ nan im issa yʋt tʋli hʋta ampo chito achʋfa, weki kʋt shekel tahlepa achʋfa cha pokoli tuchina tʋli hʋta ampo achʋfa, shekel pokoli untuklo, ʋlhtipo holitopa i̱ shekel ʋlhpisa hatok; ita tuklo kʋt bota tohbi lipehbi bila itaiyoma ilhpak im issa ya chi̱ hosh alota bi̱ka tok.

³² Isht impa achʋfa tʋli holisso lakna shekel pokoli hosh na balama alota;

³³ Hukmit im issa ya chi̱ ka̱ wak hobʋk himita achʋfa, chukfi nakni achʋfa, chukfi ushi afʋmmi ʋmmona achʋfa,

³⁴ Nan ashʋchi im issa yʋt issi kosoma ushi achʋfa;

³⁵ Micha isht itin nanaiyʋchi im issa ya chi̱ ka̱, wak hobʋk tuklo, chukfi nakni tahlapi, issi kosoma nakni tahlapi, chukfi ushi afʋmmi ʋmmona tahlapi aiena tok, Ilʋppak osh Sheteu ushi Elisu nan im issa ya tok.

³⁶ Nitak ont ishit tahlapi ma Sulishattai ushi Shelumiel, Simeon im ʋlla ʋhleha i̱ holitopa ak osh im issa tok.

³⁷ Micha i̱ nan im issa yʋt tʋli hʋta ampo chito achʋfa, weki kʋt shekel tahlepa achʋfa cha pokoli tuchina, tʋli hʋta ampo achʋfa shekel pokoli untuklo, ʋlhtipo holitopa i̱ shekel ʋlhpisa hatok; ita tuklo kʋt bota tohbi lipehbi bila itaiyoma ilhpak im issa ya chi̱ hosh alota bi̱ka tok.

³⁸ Isht impa achʋfa tʋli holisso lakna shekel pokoli hosh na balama alota;

³⁹ Hukmit im issa ya chi̱ ka̱ wak hobʋk himita achʋfa chukfi nakni achʋfa, chukfi ushi afʋmmi ʋmmona achʋfa,

⁴⁰ Nan ashʋchi im issa yʋt issi kosoma ushi achʋfa,

⁴¹ Micha isht itin nanaiyʋchi im issa ya chi̱ ka̱, wak hobʋk tuklo, chukfi nakni tahlapi, issi kosoma nakni tahlapi, chukfi ushi afʋmmi ʋmmona tahlapi aiena tok. Ilʋppak osh Sulishattai ushi Shelumiel nan im issa ya tok.

⁴² Nitak ont ishit hannali ma Teuel ushi Eliasaf, Kat im ʋlla ʋhleha i̱ holitopa ak osh im issa tok.

⁴³ Micha i̱ nan im issa yʋt tʋli hʋta ampo chito achʋfa, weki kʋt shekel tahlepa achʋfa cha pokoli tuchina, tʋli hʋta ampo achʋfa shekel pokoli untuklo ʋlhtipo holitopa i̱ shekel ʋlhpisa hatok; ita tuklo kʋt bota tohbi lipehbi bila itaiyoma, ilhpak im issa ya chi̱ hosh alota bi̱ka tok.

⁴⁴ Isht impa achʋfa tʋli holisso lakna shekel pokoli hosh na balama alota.

⁴⁵ Hukmit im issa ya chi̱ ka̱ wak hobʋk himita achʋfa, chukfi nakni achʋfa, chukfi ushi afʋmmi ʋmmona achʋfa;

⁴⁶ Nan ashʋchi im issa yʋt issi kosoma ushi achʋfa;

⁴⁷ Micha isht itin nanaiyʋchi im issa ya chi̱ ka̱, wak hobʋk tuklo, chukfi nakni tahlapi, issi kosoma nakni tahlapi, chukfi ushi afʋmmi ʋmmona tahlapi aiena tok. Ilʋppak osh Teuel ushi Eliasaf nan im issa ya tok.

⁴⁸ Nitak ont ishit untuklo ma Ammihʋt ushi Elishama Eflaim im ʋlla ʋhleha i̱ holitopa ak osh im issa tok.

⁴⁹ Micha i̱ nan im issa yʋt tʋli hʋta ampo chito achʋfa, weki kʋt shekel tahlepa achʋfa cha pokoli tuchina, tʋli hʋta ampo achʋfa shekel pokoli untuklo, ʋlhtipo holitopa i̱ shekel ʋlhpisa hatok; ita tuklo kʋt bota tohbi lipehbi bila itaiyoma, ilhpak im issa ya chi̱ hosh, alota bi̱ka tok.

⁵⁰ Isht impa achʋfa tʋli holisso lakna, shekel pokoli hosh na balama alota.

⁵¹ Hukmit im issa ya chi̱ ka̱ wak hobʋk achʋfa, chukfi nakni achʋfa, chukfi ushi afʋmmi ʋmmona achʋfa;

⁵² Nan ashʋchi im issa yʋt issi kosoma ushi achʋfa;

⁵³ Micha isht itin nanaiyʋchi im issa ya chi̱ ka̱, wak hobʋk tuklo, chukfi nakni tahlapi, issi kosoma nakni tahlapi, chukfi ushi afʋmmi ʋmmona tahlapi aiena tok. Ilʋppak osh Ammihʋt ushi Elishama nan im issa ya tok.

⁵⁴ Nitak ont ishit untuchina ma Petashu ushi Kamaliel, Manasseh im ʋlla ʋhleha i̱ holitopa ak osh im issa tok.

⁵⁵ Micha i̱ nan im issa yʋt tʋli hʋta ampo chito achʋfa, weki kʋt shekel tahlepa achʋfa cha pokoli tuchina, tʋli hʋta ampo achʋfa, shekel pokoli untuklo, ʋlhtipo holitopa i̱ shekel ʋlhpisa ha tok: ita tuklo kʋt bota tohbi lipehbi bila itaiyoma, ilhpak im issa ya chi̱ hosh alota bi̱ka tok.

⁵⁶ Isht impa achʋfa tʋli holisso lakna shekel pokoli hosh na balama alota;

⁵⁷ Hukmit im issa ya chi̱ ka̱ wak hobʋk himita achʋfa, chukfi nakni achʋfa, chukfushi afʋmmi ʋmmona achʋfa;

⁵⁸ Nan ashʋchi im issa yʋt issi kosoma ushi achʋfa;

⁵⁹ Micha isht itin nanaiyʋchi im issa ya chi̱ ka̱ wak hobʋk tuklo, chukfi nakni tahlapi, issi kosoma nakni tahlapi, chukfushi afʋmmi ʋmmona tahlapi aiena tok. Ilʋppak osh Petashu ushi Kamaliel nan im issa ya tok.

⁶⁰ Nitak ont ishit chakkali ma Kiteoni ushi Abitan, Benchamin im ʋlla ʋhleha i̱ holitopa ak osh im issa tok.

⁶¹ Yohmi kʋt i̱ nan im issa yʋt tʋli hʋta ampo chito achʋfa, weki kʋt shekel tahlepa achʋfa cha pokoli tuchina, tʋli hʋta ampo achʋfa shekel pokoli untuklo, ʋlhtipo holitopa i̱ shekel ʋlhpisa ha tok; ita tuklo kʋt bota tohbi lipehbi bila itaiyoma ilhpak im issa ya chi̱ hosh alota bi̱ka tok.

⁶² Isht impa achʋfa tʋli holisso lakna shekel pokoli hosh nabalama alota;

⁶³ Hukmit im issa ya chi̱ ka̱ wak hobʋk himita achʋfa, chukfi nakni achʋfa, chukfushi afʋmmi ʋmmona achʋfa;

⁶⁴ Nan ashʋchi im issa yʋt issi kosoma ushi achʋfa;

⁶⁵ Micha isht itin nanaiyʋchi im issa ya chi̱ ka̱, wak hobʋk tuklo, chukfi nakni tahlapi, issi kosoma nakni tahlapi, chukfushi afʋmmi ʋmmona tahlapi aiena tok. Ilʋppak osh Kiteoni ushi Abitan nan im issa ya tok.

⁶⁶ Nitak ont ishit pokoli ma Ammishattai ushi Ahiesa, Tan im ʋlla ʋhleha i̱ holitopa ak osh im issa tok.

⁶⁷ Yohmi kʋt i̱ nan im issa yʋt tʋli hʋta ampo chito achʋfa, weki kʋt shekel tahlepa achʋfa cha pokoli tuchina, tʋli hʋta ampo achʋfa shekel pokoli untuklo, ʋlhtipo holitopa i̱ shekel ʋlhpisa ha tok; ita tuklo kʋt bota tohbi lipehbi bila itaiyoma ilhpak im issa ya chi̱ hosh alota bi̱ka tok.

⁶⁸ Isht impa achʋfa tʋli holisso lakna shekel pokoli hosh nabalama alota;

⁶⁹ Hukmit im issa ya chi̱ ka̱ wak hobʋk himita achʋfa chukfi nakni achʋfa, chukfushi afʋmmi ʋmmona achʋfa;

⁷⁰ Nan ashʋchi im issa yʋt issi kosoma ushi achʋfa;

⁷¹ Micha isht itin nanaiyʋchi im issa ya chi̱ ka̱, wak hobʋk tuklo, chukfi nakni tahlapi, issi kosoma nakni tahlapi, chukfushi afʋmmi ʋmmona tahlapi aiena tok. Ilʋppak osh Ammishattai ushi Ahiesa nan im issa ya tok.

⁷² Nitak ont ishit auachʋfa ho̱ Oklan ushi Pachiel, Asha im ʋlla ʋhleha i̱ holitopa ak osh im issa tok.

⁷³ Yohmi kʋt i̱ nan im issa yʋt tʋli hʋta ampo chito achʋfa weki kʋt shekel tahlepa achʋfa cha pokoli tuchina, tʋli hʋta ampo achʋfa shekel pokoli untuklo, ʋlhtipo holitopa i̱ shekel ʋlhpisa hatok; ita tuklo kʋt bota tohbi lipehbi bila itaiyoma ilhpak im issa ya chi̱ hosh alota bi̱ka tok.

⁷⁴ Isht impa achʋfa tʋli holisso lakna shekel pokoli hosh nabalama alota;

⁷⁵ Hukmit im issa ya chi̱ ka̱ wak hobʋk himita achʋfa chukfi nakni achʋfa, chukfushi afʋmmi ʋmmona achʋfa;

⁷⁶ Nan ashʋchi im issa yʋt issi kosoma ushi achʋfa;

⁷⁷ Micha isht itin nanaiyʋchi im issa ya chi̱ ka̱, wak hobʋk tuklo, chukfi nakni tahlapi, issi kosoma nakni tahlapi, chukfushi afʋmmi ʋmmona tahlapi aiena tok. Ilʋppak osh Oklan ushi Pachiel nan im issa ya tok.

⁷⁸ Nitak ont ishit auahtuklo ho̱ Enan ushi Ahila, Naftali im ʋlla ʋhleha i̱ holitopa ak osh im issa tok.

⁷⁹ Micha i̱ nan im issa yʋt tʋli hʋta ampo chito achʋfa weki kʋt shekel tahlepa achʋfa cha pokoli tuchina, tʋli hʋta ampo achʋfa shekel pokoli untuklo, ʋlhtipo holitopa i̱ shekel ʋlhpisa hatok; ita tuklo kʋt bota tohbi lipehbi bila itaiyoma ilhpak im issa chi̱ hosh alota bi̱ka tok.

⁸⁰ Isht impa achʋfa tʋli holisso lakna shekel pokoli hosh nabalama alota;

⁸¹ Hukmit im issa ya chi̱ ka̱, wak hobʋk himita achʋfa, chukfi nakni acʋhfa, chukfushi afʋmmi ʋmmona achʋfa;

⁸² Nan ashʋchi im issa yʋt issi kosoma ushi achʋfa;

⁸³ Micha isht itin nanaiyʋchi im issa ya chi̱ ka̱, wak hobʋk tuklo, chʋkfi nakni tahlapi, issi kosoma nakni tahlapi, chukfushi afʋmmi ʋmmona tahlapi aiena tok. Ilʋppak osh Enan ushi Ahila nan im issa ya tok.

⁸⁴ Ilʋppak osh Islael holitopa ʋhleha nan ahʋmmit alta ya̱ (ahama nitak ma) hullochi mak atok oke, tʋli hʋta ampo chito auah tuklo, micha tʋli hʋta ampo auah tuklo, tʋli holisso lakna isht impa auahtuklo.

⁸⁵ Tʋli hʋta ampo chito ʋt shekel tahlepa achʋfa cha pokoli tuchina bieka tok, micha ampo ʋt pokoli untuklo bieka tok; tʋli hʋta nan aiʋlhto moma kʋt ʋlhtipo holitopa shekel ʋlhpisa hosh shekel tahlepa sipokni tuklo cha tahlepa ushta tok.

⁸⁶ Tʋli holisso lakna isht impa na balama alota yash ʋto auahtuklo hosh ʋlhtipo holitopa shekel ʋlhpisʋt shekel pokoli bieka tok, tʋli holisso lakna isht impa moma kʋt shekel tahlepa achʋfa cha pokoli tuklo tok.

⁸⁷ Hukmit im issa wak moma kʋt wak hobʋk auahtuklo, chukfi nakni auahtuklo, chukfushi afʋmmi ʋmmona auahtuklo, ilhpak im issa aiena; micha nan ashʋchi im issa issi kosoma ushi ʋt auahtuklo tok.

⁸⁸ Micha isht itin nanaiyʋchi ʋbit im issa wak hobʋk moma kʋt pokoli tuklo akucha ushta, chukfi nakni pokoli hannali, issi kosoma nakni pokoli hannali, chukfushi afʋmmi ʋmmona pokoli hannali tok. Ilʋppak osh alta nan ahama ha yo̱ hullochi mak atok.

⁸⁹ Atuk o̱ Moses ʋt itim anumpula chi̱ hosh okla moma i̱ binah ha̱ ont chukowa mʋt, achʋfa hosh ai i̱ nukha̱klo nan itim apesa afohka itombi holitopa paknaka ompoholmo chelubim tuklo ka̱ iti takla et ai im anumpohonli na haklo tok, mihma im anumpuli tok.