Numbas 6 - Chahta Holisso Holitopa 1886

¹ Mihma Chihowah yʋt Moses a̱ im anumpulit,

² Islael im ʋlla ʋhleha ha̱ im anumpulit, Hatak okmá, ohoyo hokmá, nana hosh ila filʋmmichit Chihowah ya̱ il im issa chi̱ hosh Nasalait anumpa il onochi ya̱ anumpa il onochikmʋt,

³ Oka pa̱ki micha nan ishko kʋllo ya̱ ila filʋmmichi cha, oka pa̱ki hauwʋshko, micha nan ishko kʋllo hauwʋshko ya̱ ik ishko ka hi oke, micha oka pa̱ki okchi nana kia ik ishko kashke, micha pa̱ki nuna, keyukmʋt pa̱ki shila yoh kia ikpo kashke.

⁴ Ile filʋmmichit ahanta nitak moma ka̱ nana hosh pa̱kʋpi̱ atohomba, nihi ʋttʋt hakshup ont ʋhli atoba ka̱ ʋpa he keyu hoke.

⁵ Ile filʋmmichit anumpa ilonochit ahanta nitak moma ka̱ nutakhish isht ʋlmo nana kia noshkobo ha̱ ik onʋtoyulo ka hi oke, ile filʋmmichi Chihowah ya̱ im il issa tok nitak ʋt ik taho ki̱sha ka̱ holitopa cha noshkobo pa̱shi ya̱ apoacha hi oke.

⁶ Ile filʋmmichit Chihowah ya̱ im il issa nitak ta̱kla kʋt nipi illi ya̱ bili̱ka ik ono ka hi oke.

⁷ I̱ki atuk oh kia, keynkmʋt ishki atuk oh kia, itibapishi atuk oh kia, keyukmʋt in tek atuk osh illi kia, isht ile litehla he keyu hoke, Chitokaka ya̱ im ile hullochi tuk ʋt noshkobo ha̱ onʋtoyula hoke.

⁸ Ile filʋmmichit ahanta nitak moma hokʋt Chihowah ya̱ i̱ holitopa hoke.

⁹ Atuk o̱ yakosi itin takla fehna ho̱ bili̱ka ho̱ hatak ʋt illi na ile hullochi noshkobo onʋtonla kash litehli tukmʋt ile kashoffi nitak akinli hosh noshkobo ha̱ sha̱fa hi oke, nitak isht untuklokma sha̱fa hi oke.

¹⁰ Atuk osh nitak isht untuchinakma pʋchi yoshoba tuklo, Keyukmʋt pʋchi himita tuklo ho̱ na holitompa isht ʋtta isht im onʋt okla moma i̱ binah okhissa ya isht ona hi oke.

¹¹ Mikma naholitompa isht ʋtta yʋt achʋfa ka̱ nan ashʋchi im issa yo̱ im issakmʋt, achʋfa ya̱ hukmit im issa yo̱ im issa cha i̱ kashoffashke, illi yo̱ ishit yoshoba hoka, micha nitak yʋmmakinli ho̱ noshkobo ha̱ hullocha hi oke.

¹² Mikma ile filʋmmichit ahanta he nitak puta ka̱ Chihowah ya̱ i̱ hullocha hi oke; micha yoshoba tuk im issa ya̱ chukfi ushi afʋmmi ʋmmona yo̱ isht ona hi oke; Yohmi kia nitak tikba hatuk ʋto kʋnia chi̱ hoke, ile filʋmmichi tuk ʋt liteha hatuk oka, achi tok.

¹³ Micha ilʋppak osh Nasalait i̱ nanʋlhpisa hoke; ile filʋmmichi nitak ʋt ont tahakma, okla moma i̱ binah okhissa ya̱ isht ʋla hi oke.

¹⁴ Mikma Chihowah nan im issʋt hukmit im issa ya̱ chukfi ushi nakni afʋmmi ʋmmona aiokpuloka iksho achʋfa micha nanashʋchi im issa yo̱ chukfi ushi tek afʋmmi ʋmmona ai okpuloka kʋt iksho, achʋfa micha iti̱ nanaiyʋchit im issa yo̱ chukfi nakni aiokpuloka kʋt iksho achʋfa ho̱,

¹⁵ Micha pʋska ik shatʋmmo kishi achʋfa, bota tohbi lipehbi pʋska lumbo bila itaiyoma, micha pʋska ikshatʋmmo tapʋski bila ahama, micha ilhpak im issa, micha nan ishkot im issa aiena ho̱ im issa hi oke.

¹⁶ Mikma naholitompa isht ʋtta yʋt Chihowah itikba isht ʋla cha, nanashʋchi im issa, micha hukmit im issa ya̱ im issa hi oke.

¹⁷ Micha chukfi nakni ya̱ itin nanaiyʋchi im issa ʋbit im issa mak o̱, pʋska ik shatʋmmo kishi achʋfa aiena ka̱ Chihowah im issa hi oke. Naholitompa isht ʋtta yʋt ilhpak im issa micha nan ishko im issa ak kia im issa hi oke.

¹⁸ Mikma Nasalait ash osh ile filʋmmichi noshkobo ha̱ okla moma i̱ binah okhissa ya̱ a sha̱fa hi oke, mikmʋt ile filʋmmichi noshkobo pa̱shi yash luak yʋmmʋt itin nanaiyʋchi im issa ʋbit isht aiokpʋchi nutaka a̱sha tuk a̱ itʋcha hi oke.

¹⁹ Mikma naholitompa isht ʋtta yʋt chukfi nakni yash fullup honni ya̱, micha pʋska ikshatʋmmo lumbo achʋfa ho̱, kishi ha̱ akohchit, micha pʋska ik shatʋmmo tapʋski achʋfa aiena ho̱, ishi cha ile filʋmmichi pa̱shi ʋt ʋlmo ha yo̱ ibbak fohka hi oke.

²⁰ Micha naholitompa isht ʋtta yʋt walit im issa yo̱ Chihowah itikba ya̱ walashke, ilʋppak okʋt ikkishi wali, micha fullup wali aiena kʋt naholitompa isht ʋtta ya̱ i̱ hullocha hi oke, mikma i̱ himmakmʋno Nasalait ash ot oka pa̱ki ishka hinla hoke.

²¹ Ilʋppak osh Nasalait yʋmmʋt anumpa ilonochi tuk i̱ nan ʋlhpisa hoke, micha ile filʋmmichit Chihowah nan im issa, micha ibbak ʋt ishi tuk aiena hoke; anumpa ha̱ il onochi tuk mak ash yakohmit ile filʋmmichi nan ʋlhpisa iakaiyʋt yʋmihchi pulla hi oke, ish im achashke im achi tok.

²² Mihma Chihowah yʋt Moses a̱ im anumpulit,

²³ Alon micha ushi ʋhleha ha̱ im anumpulit, yakohmichi hosh Islael im ʋlla ʋhleha ha̱ yukpali anumpa ha hʋsh onochashke.

²⁴ Chihowah yʋt hʋchi yʋkpalashke, micha hʋchi halanlashke.

²⁵ Chihowah yʋt i̱ nashuka ya̱ hʋchi on tohwikelichashke; micha hʋchi̱ kanashke.

²⁶ Chihowah yʋt i̱ holhponayo hanta hʋchi onochi cha a nuktaiyala hʋch imashke, hʋsh im achashke, ish achashke, im achi tok.

²⁷ Micha sa hohchifo ha̱ Islael im ʋlla ʋhleha ha̱ onocha hi oke, mikma yukpali la hi oke, achi tok.