Numbas 5 - Chahta Holisso Holitopa 1886

¹ Mihma Chihowah hʋt Moses a̱ im anumpulit,

² Islael im ʋlla ʋhleha hʋt lepa puta, micha hayihchchi yʋnahanli puta, micha kʋna hosh illi isht liteha tuk puta aiena ka̱ binah ha̱ akochicha chi̱ ka̱ ish im apesashke.

³ Nakni micha tek aiena hʋsh kohchashke; binah kohchit kocha ya̱ isht hʋsh onashke; yʋmohmi hosh i̱ binah ai iklʋnna aiahanta li ka̱ ik litehlo kashke, achi tok,

⁴ Mihma Islael im ʋlla ʋhleha hʋt yʋmihchi tok; micha binah ha̱ kohchit kocha isht ona tok; Chihowah yʋt Moses a̱ im anumpuli tuk mak o̱, Islael im ʋlla ʋhleha hʋt yʋmihchi tok.

⁵ Mihma Chihowah hʋt Moses a̱ im anumpulit,

⁶ Islael im ʋlla ʋhleha ha̱ ish im anumpulashke, Hatak okma, ohoyo hokma nana hosh nanashʋchi hatak ayʋmohmi chatuk a̱ yʋmohmit Chihowah i̱ yoshoba yʋmihchi cha hatak yʋmmʋt onʋtoyulakma.

⁷ Yʋmohmikma nana ashʋchi yʋmohmi tuk ʋt okla il ai anola hi oke, micha i̱ yoshoba tuk a̱ nana hatuk o̱ i̱ falʋmminchi cha ishit tahlapi ho̱ im apotola hi oke.

⁸ Amba i̱ yoshoba tuk ʋt i̱ falʋmmincha he ʋlhpesa i̱ kanomi ʋt iksho hokmʋno, yoshoba tuk ʋt Chihowah yak o̱ i̱ falʋmminchit naholitompa isht ʋtta ya̱ imashke, nan ashʋchi tuk ʋt isht i̱ kashofa chi̱ kʋt isht ʋlhtoba chukfi nakni aiena ho̱ ima hi oke.

⁹ Micha nan im issa puta Islael im ʋlla ʋhleha i̱ nana holitopa puta moma naholitompa isht ʋtta isht im ʋla kʋt immi ha hi oke.

¹⁰ Micha hatak puta i̱ nahullochi puta kʋt immi ha chi̱ hoke; hatak nana hosh nana ho̱ naholitompa isht ʋtta ya̱ imakma, immi ha chi̱ hoke; achi tok.

¹¹ Mihma Chihowah yʋt Moses a̱ im anumpulit,

¹² Islael im ʋlla ʋhleha im anumpulit, Hatak kʋna kia tekchi yosh naksika onʋt nayoshoba i̱ yoshobakma,

¹³ Yohmikma hatak ʋt iba tʋshkit itin luma̱kakma, i̱ hatak ʋt ik peso, yohmi na ik otano, mihma liteha, mihma i̱ sanalit atokola he ʋt iksho, micha yʋmohmi ka̱ ik peso,

¹⁴ Mikma hatak ash chu̱kʋsh nuktʋhla yʋt onʋtoyula cha, tekchi yash i̱ nuktʋhla, mikma ohoyo hʋt litehakma, keyukmʋt chu̱kʋsh nuktʋhla yʋt onʋtuyula cha tekchi yash i̱ nuktʋhla kia ohoyo hʋt liteha keyu,

¹⁵ Yohmikma hatak ash osh tekchi ya̱ naholitompa isht ʋtta isht im ona he, mikmʋt ohoyo hash nan im issa bali pushi efah ishit pokoli ho̱ isht im ʋlashke; bila on hlatʋbla he keyu, micha fila̱kinsen onocha he keyu; yʋmmʋt nuktʋhla nan im issa, isht ithaiyana nan im issa yosh nan ashʋchi ithʋnanchi yoka.

¹⁶ Mikma naholitompa isht ʋtta yʋt bili̱ka isht ʋlʋt Chihowah itikba binilecha hi oke.

¹⁷ Micha naholitompa isht ʋtta yʋt oka hullochi ya̱ lukfi ampo ʋnit isha hi oke, micha lukfi pushi ʋlhtipo holitopa asha ka̱ ishi cha, oka yash ʋna hi oke.

¹⁸ Micha naholitompa isht ʋtta yʋt ohoyo hash Chihowah itikba binilechit, ohoyo noshkobo ompoholmo im ai ishi cha isht ithaiyana nan im issa yash, yʋmmʋt nʋktʋhla nan im issa yash ibbak fohka hi oke, micha naholitompa isht ʋtta yʋt oka homi, nan ik achukmo tobachi yʋt ibbak fohka chi̱ hoke.

¹⁹ Micha naholitompa isht ʋtta yʋt anumpa kʋllo anumpulit, ohoyo hash atokolit i̱ mihʋt, Hatak nana kia chiba tʋshki tuk keyu, micha naksika onʋt chi̱ hatak ak keyu, amba inla yo̱ na liteha iti̱ yʋmohmi ya̱ chik yʋmohmo tuk mʋt oka homi ilʋppa nan ik achukmo tobachi ya̱ nan isht ik chi̱ kaniohmo kashke.

²⁰ Amba naksika onʋt inla ho̱ chi̱ hatak ak keyu ho̱ ish im ona tuk osh chi litehakma, micha chi̱ hatak keyu, hatak nana hosh chiba tʋshki tuk ma,

²¹ Yohmikma naholitompa isht ʋtta yash osh ohoyo hash anumpa kʋllo anumpulit atokolit i̱ miha hi oke, micha naholitompa isht ʋtta yʋt ohoyo hash, Chihowah yʋt chiyubi ya̱ shuachikmʋt micha chikfoka ya shatʋblichikmʋt chim okla ai ititakla ya̱ nan ik achukmo onʋtonla, anumpa kʋllo onʋtonla Chihowah yʋt chikbashke.

²² Mikma nan ik achukmo tobachi oka ilʋppʋt chikfoka ya̱ shatʋblicha chi̱ hosh micha chiyubi ya̱ shuacha chi̱ hosh chi takoba ya̱ chukowa chi̱ hoke, im acha hi oke. Mikma ohoyo hash ot Amen, Amen, acha hi oke.

²³ Mikma naholitompa isht ʋtta yʋt nan ik achukmo ilʋppa puta ka̱ holisso ho̱ aholissochi cha oka homi yash ishit kashoffa hi oke.

²⁴ Micha ohoyo hash nan ikachukmo tobachi oka homi ya̱ ishkochecha hi oke, mihma nan ikachukmo tobachi oka yʋt chukowakmʋt homa hi oke.

²⁵ Yohmikma naholitompa isht ʋtta yʋt nuktʋhla nan im issa ohoyo ibbak foyuka kash ishi cha nan im issa yash Chihowah itikba ya̱ wali cha alta onochit im issa hi oke.

²⁶ Mihma naholitompa isht ʋtta yʋt nan isht ithaiyana nan im issa yash, ibbak alota achʋfalit ishi cha, alta onochit hukma hi oke, yʋmihchi ha yosh oka yash ohoyo hash o̱ ishkochecha hi oke.

²⁷ Atuk o̱ oka ya̱ ishkochechikma, yohmikma yakohma hi oke, liteha tuk okma, micha i̱ hatak a̱ i̱ yoshoba tuk okma nan ik achukmo tobachi oka yash osh chukowakmʋt homa hi oke, micha ikfoka yʋt shatʋblikma iyubi ʋt shua hi oke, mikmʋt ohoyo hash osh im okla ai iti takla ya̱ nan ikachukmo onʋtuyula yosh ahanta hi oke.

²⁸ Amba ohoyo hash osh liteha hatuk keyu, amba kashofa hatuk okmʋt yohmikmʋt nan ik i̱ kaniohmo ka he, micha ʋlla shala hi oke.

²⁹ Ohoyo hʋt i̱ hatak ak keyu inla ho̱ im onʋt naksika ona cha litehakma nuktʋhla nan ʋlhpisa ilʋppak a hi oke.

³⁰ Keyukmʋt chu̱kʋsh nuktʋhla ʋt onʋtoyula cha tekchi ya̱ i̱ nuktʋhlakmʋt, Chihowah itikba binilecha na, naholitompa isht ʋtta yʋt nan ʋlhpisa ilʋppa moma ka̱ onocha hi oke.

³¹ Yohmikma hatak ash osh nan ashʋchi ik onʋtoyulo ho̱, ohoyo ilʋppak osh nan ashʋchi ʋt onʋtoyula hi oke, ish im achashke, im achi tok.