Numbas 4 - Chahta Holisso Holitopa 1886

¹ Mihma Chihowah hʋt Moses micha Alon a̱ im anumpulit,

² Kohalh ushi ʋhleha Lefai ushi ʋhleha ai iti takla aiasha ka̱ i̱ki ʋhleha in chuka achʋfa ʋlhpisa, micha in chuka achʋfa ʋlhpisa ho̱ holhtina ka̱ ish ishashke.

³ Afʋmmi pokoli tuchina ai ʋhlit ʋba ma̱yʋt afʋmmi pokoli tahlapi ont ai ʋhlit okla moma i̱ binah nana a toksʋli isht ai ahanta chi̱ hosh okla ho̱ ibafohka moma kak ashke.

⁴ Ilʋppak osh Kohalh ushi ʋhleha nana isht aiaha̱shwa ya̱ chi̱ hoke, okla moma i̱ binah anu̱kaka, naholitopa moma i̱ shahli ak achi̱ hoke.

⁵ Atuk osh binah hʋt tikba iakma, Alon micha ushi ʋhleha aiena kʋt ʋla cha, isht ompoholmo on hlipia ya̱ akʋchi cha, nan isht atokowa afohka itombi holitopa ya̱ isht ompohomashke.

⁶ Micha bacha hakshup isht ompoholmo yo̱ isht om patali cha nantʋnna okchamali bieka ho̱ om patali cha in tʋbi a̱ apitta chi̱ hoke.

⁷ Micha pʋska otʋni im ai impa paknaka ya̱ nantʋnna okchamali yo̱ isht ompohomo cha, ampo, micha isht impa puta, micha ampo puta micha isht ompoholmo aiena ompohoma chi hosh on ashacha chi̱ hoke; mikma pʋska tala̱ya bilia yʋt on aiasha chi̱ hoke.

⁸ Micha nantʋnna tishepa ya̱ isht ompohoma cha, yʋmma bacha hakshup isht ompoholmo yo̱ isht ompohomokmʋt in tʋbi a̱ apitta chi̱ hoke.

⁹ Micha pʋla ai o̱ hikia, micha pʋla i̱ bila ai ʋlhto, micha in tobaksi isht kiseli, micha i̱ pʋla tuptua ai ʋlhto, micha bila ai ʋlhto puta im isht ai ahanta chatuk a̱ nantʋnna okchamali ho̱ ishi cha isht ompohoma chi̱ hoke.

¹⁰ Micha yʋmma, micha nan ai ʋlhto moma ka̱ bacha hakshup isht ompoholmo anu̱kaka ashachi cha, iti fabʋssa ya̱ on talala chi̱ hoke.

¹¹ Micha tʋli holisso lakna alta ya̱ nantʋnna okchamali yo̱ om patali cha, bacha hakshup isht ompoholmo yo̱ isht ompohomokmʋt, in tʋbi ya̱ apitta chi̱ hoke.

¹² Micha nan isht pilesa puta ʋlhtipo holitopa ya̱ ishit atoksʋli chatuk moma ka̱ eshi cha nantʋnna okchamali ho̱ apitta cha, bacha hakshup isht ompoholmo cha iti fabʋssa ya̱ on talala chi̱ hoke.

¹³ Micha hituk chubbi alta ya̱ on asha ka̱ ishit kanchi cha nantʋnna humma ho̱ om patala chi̱ hoke.

¹⁴ Micha nan aiʋlhto puta, isht toksʋli chatuk puta, na balama a hukmi, micha nipi isht okhawi, micha luak isht pehli, micha ampo mahaia chipunta, micha alta i̱ nan aiʋlhto puta aiena ka̱ on ashacha chi̱ hoke, micha bacha hakshup isht ompoholmo yo̱ isht ompohoma chi̱ hoke, micha in tʋbi apitta chi̱ hoke.

¹⁵ Atuk o̱ Alon micha ushi ʋhleha aiena kʋt ʋlhtipo holitopa, micha ʋlhtipo holitopa i̱ nan ai ʋlhto puta aiena ka̱ ompohomot ont im ʋlhtaiyaha na, binah hʋt iakma, yohmikma Kohalh ushi ʋhleha hʋt shala chi̱ hosh ʋla chi̱ hoke; amba nana holitopa ya̱ potola he keyu, yohmikmʋt illa chi̱ hoke. Ilʋppa puta kak osh okla moma i̱ binah aiasha kʋt Kohalh ushi ʋhleha i̱ shapoh ha chi̱ hoke.

¹⁶ Mihma naholitompa isht ʋtta Alon ushi Eleasa nan ʋlhtoka kʋt, pʋla ha chi̱ bila, micha na balama champuli, micha nitak moma ilhpak im issa, micha ahʋmmi bila, micha binah moma, micha ʋlhtipo holitopa micha nana aiasha moma, micha aiʋlhto aiasha aiena ka̱ apistikela chi̱ hoke, achi tok.

¹⁷ Mihma Chihowah yʋt Moses, micha Alon a̱ im anumpulit,

¹⁸ Kohalhait ʋhleha in chukachʋfa puta apehlichi ka̱ Lefait ʋhleha ai ishit tʋblit hʋch ik kancho kashke.

¹⁹ Amba ilʋppak o̱ ish i̱ yʋmihchi na, naholitompa moma i̱ shahli bili̱ka onakmʋt okcha̱ya cha ik illo kashke; Alon micha ushi ʋhleha aiena kʋt iba chukowa cha, isht ai ʋtta, micha i̱ shapoh aiyuka ka̱ im anola chi̱ hoke.

²⁰ Yohmi kia naholitopa puta kʋt ompoholmo ta̱kla ka̱ chukowʋt pisa he keyu, yohmikmʋt illa hi oke, achi tok.

²¹ Mihma Chihowah yʋt Moses micha Alon a̱ im anumpulit,

²² Keshon ushi ʋhleha ha̱ i̱ki ʋhleha in chuka achʋfa puta hlopullit chukachʋfa ʋlhpisa ho̱ holhtina ka̱ ish ishashke.

²³ Afʋmmi pokoli tuchina ai ʋhlit ʋba mayʋt afʋmmi pokoli tahlapi ont ʋhli kak o̱ ish hohtenashke; nan isht ahanta chi̱ hosh okla moma i̱ binah atoksʋli isht ahanta chi̱ hosh chukowa moma kak a chi̱ hoke.

²⁴ Nan isht ahanta ilʋppak osh Keshonait in chukachʋfa puta isht ahanta, micha i̱ shapoh ha chi̱ hoke.

²⁵ Micha binah nantʋnna takali puta micha okla moma i̱ binah, micha im isht ompoholmo, micha bacha hakshup isht ompoholmo paknaka ompoholmo tuk, micha okla moma i̱ binah okhissa ya̱ in takali,

²⁶ Micha wanuta ya̱ in takali puta, micha wanuta i̱ holihta okhissa in takali, yʋmmʋt binah ha̱ i̱ bili̱ka, micha alta ya̱ bili̱ka apakfoyupa, micha im isht talakchi, micha isht pilesa i̱ moma, micha nan im ikbi tuk moma kak a hi oke, yʋmohmi hosh isht ahantashke.

²⁷ Alon micha ushi ʋhleha aiena kak osh Keshonait ushi ʋhleha nan im isht aiahanta he moma, i̱ shapoh moma micha im isht aiahanta he moma aiena kʋt im ʋlhpisashke i̱ shapoh, nan isht aiahanta moma hʋsh im apesa hi oke.

²⁸ Ilʋppak osh Keshonait ushi ʋhleha in chuka achʋfa puta okla moma i̱ binah ha̱ isht aiahanta ya chi̱ hoke; mihma naholitompa isht ʋtta Alon ushi Ihlama ak osh pehlicha chi̱ hoke.

²⁹ Melali ushi ʋhleha hano i̱ki ʋhleha in chuka achʋfa, in chuka achʋfa ʋlhpisa ho ish hohtenashke.

³⁰ Afʋmmi pokoli tuchina ai ʋhlit ʋba ma̱yʋt afʋmmi pokoli tahlapi ont ʋhli nan isht aiahanta okla moma i̱ binah atoksʋli isht aiahanta chi̱ hosh iba chukowa ya̱ ish hohtenashke.

³¹ Mikma okla moma i̱ binah nan im isht aiahanta moma i̱ shapoh aiena kʋt ilʋppak achi hoke; binah im iti bʋsha, micha im iti okhowat kʋchi micha in toni̱k, micha ai o̱ hikia im puta,

³² Micha wanuta apakfoyupa toni̱k puta, micha im ai o̱ hikia puta, micha im isht ahonahla puta, micha im isht talakchi puta, nan im isht pilesa puta; micha nan im isht aiahanta puta aiena kak achi̱ hoke; micha i̱ shapoh ieshi nan isht pilesa puta ka̱ hochifo hosh ish hohtena chi̱ hoke.

³³ Nan isht ahanta ilʋppak o̱ naholitompa isht ʋtta Alon ushi Ihlama yʋt pehlichi ho̱ Melali ushi ʋhleha in chuka achʋfa puta kʋt okla moma i̱ binah nan im isht aiahanta moma ka̱ isht aha̱shwa chi̱ hoke, achi tok oke.

³⁴ Mihma Moses micha Alon micha okla moma i̱ shahli aiena kʋt Kohalhait a̱ in chuka achʋfa ʋlhpi̱sa ho̱ micha i̱ki ʋhleha in chuka achʋfa ʋlhpi̱sa ho̱ hohtena tok.

³⁵ Afʋmmi pokoli tuchina ai ʋhlit ʋba ma̱yʋt afʋmmi pokoli tahlapi ont ʋhli isht aiahanta okla moma i̱ binah atoksʋli iba chukowa tuk puta kak a tok.

³⁶ Mihma in chuka achʋfa ʋlhpisa ho̱ holhtina kʋt tahlepa sipokni tuklo cha tahlepa untuklo pokoli tahlapi tok.

³⁷ Ilʋppa puta kak osh Kohalhait ʋhleha in chuka achʋfa puta, okla moma i̱ binah atoksʋli isht aiahanta ʋlhpesa, Chihowah hʋt Moses a̱ tohnʋt apesa na, Moses micha Alon ita tuklo kʋt hohtena na holhtina tok.

³⁸ Mikma Keshon ushi ʋhleha in chuka achʋfa puta hlopullit i̱ki in chuka achʋfa ʋlhpisa hosh,

³⁹ Afʋmmi pokoli tuchina ai ʋhlit ʋba ma̱yʋt afʋmmi pokoli tahlapi ka̱ ont ʋhli nan isht aiahanta okla moma i̱ binah atoksʋli iba chukowa puta,

⁴⁰ In chuka achʋfa puta hlopullit i̱ki in chuka achʋfa ʋlhpisa hosh holhtina tuk ʋt tahlepa sipokni tuklo cha tahlepa hannali pokoli tuchina tok,

⁴¹ Ilʋppa puta kak osh Keshon ushi ʋhleha in chuka achʋfa puta okla moma i̱ binah ha̱ nan isht aiahanta hinla moma ka̱, Chihowah hʋt apesa tuk mak o̱, Moses micha Alon ita tuklo kʋt hohtena na holhtina tok.

⁴² Mihma Melali ushi ʋhleha in chuka achʋfa puta holhtina kʋt chuka achʋfa puta hlopullit i̱ki ʋhleha in chuka achʋfa ʋlhpisa hosh,

⁴³ Afʋmmi pokoli tuchina ai ʋhlit ʋba ma̱yʋt afʋmmi pokoli tahlapi ont ʋhli nan isht ahanta okla moma i̱ binah atoksʋli iba chukowa puta,

⁴⁴ In chuka achʋfa puta ʋlhpi̱sa hosh holhtina tuk ʋt tahlepa sipokni tuchina cha tahlepa tuklo tok.

⁴⁵ Ilʋppa puta kak osh Melali ushi ʋhleha in chuka achʋfa puta, Chihowah hʋt Moses a̱ tohnot apesa tuk mak o̱, Moses micha Alon ita tuklo kʋt hohtina na holhtina tok,

⁴⁶ Lefait ʋhleha moma ka̱ Moses micha Alon micha Islael i̱ shahli ʋhleha aiena kʋt in chuka achʋfa puta ʋlhpi̱sa, micha i̱ki ʋhleha in chuka achʋfa puta ʋlhpi̱sa ho̱ hohtena na holhtina tok.

⁴⁷ Afʋmmi pokoli tuchina ai ʋhlit ʋba mayʋt afʋmmi pokoli tahlapi ont ʋhli moma hosh nan isht aiahanta isht ʋtta chi̱, micha okla moma i̱ binah shapoh ai asha ka̱ isht ʋtta chi̱ hosh ʋla tuk ʋt,

⁴⁸ Holhtina tuk ʋt tahlepa sipokni untuchina cha tahlepa tahlapi pokoli untuchina tok.

⁴⁹ Chihowah hʋt Moses a̱ tohnot apihi̱sa tuk mak o̱, isht aiahanta aiyukali ʋlhpi̱sa hosh micha i̱ shapoh aiyukali ʋlhpi̱sa hosh holhtina tok, yakohmi hosh Chihowah yʋt Moses a̱ im apesa tuk mak o̱ holhtina tok.