Numbas 36 - Chahta Holisso Holitopa 1886

¹ Mihma Chosef ushi ʋhleha in chuka achʋfa puta ka̱ aiachʋfa Manasseh ushi Maki ushi Kileat im ʋlla ʋhleha in chuka achʋfa puta i̱ki i̱shahli ʋhleha hʋt bili̱ka ona cha, Moses, micha holitopa ʋhleha, Islael im ʋlla ʋhleha i̱ki i̱ shahli ʋhleha itikba anumpulit,

² Micha a̱ shahli hʋt Islael im ʋlla ʋhleha i̱ yakni ya chi̱ ho̱, yakni ya̱ na shoeli hosh ima he ya̱ Chihowah yʋt im apesa tok oke; micha a̱ shahli hʋt il itibapishi Selofehat i̱ yakni yatuk a̱ ushetik ʋhleha hak o̱ ima hi a̱ Chihowah yʋt apesa tok.

³ Atuk o̱ Islael im ʋlla ʋhleha apehlichi inla ushi kanima ho̱ auwayakma, i̱ yakni yash pi̱ki ʋhleha i̱ yakni ya̱ ai ishi cha, ishi tuk ash apehlichi i̱ yakni ak o̱ ibafohka hi oke: yohmi hosh nashoelit il ishi tuk, pi̱ yakni yash pim ai isha hi oke.

⁴ Micha Islael im ʋlla ʋhleha in chubili ʋt ʋlakma, i̱ yakni yash, ishi tuk ash apehlichi i̱ yakni ya̱ ibafohka chi̱ hoke; yʋmohmi ho̱ i̱ yakni yash pi̱ki ʋhleha im apehlichi ha̱ im ai isha hi oke, im achi tok.

⁵ Mihma Moses ʋt Chihowah im anumpa hatuk mak o̱ Islael im ʋlla ʋhleha ha̱ im apesʋt, Chosef ushi ʋhleha apehlichi hʋt ʋlhpesa ho̱ achishke.

⁶ Nana ilʋppak o̱ Selofehat ushetik ʋhleha pulla ka̱ Chihowah hʋt apesʋshke, kʋna ho̱ ʋlhpesa ahnikmʋt auwayashke: yohmi kia i̱ki apehlichi chuka achʋfa yak o̱ auwayashke.

⁷ Yʋmohmi ho̱ Islael im ʋlla ʋhleha i̱ yakni ʋt kanʋllit apehlichi achʋfa ʋttʋt apehlichi inla onʋt ik maha̱yo kashke: Islael im ʋlla ʋhleha hʋt ilap i̱ki ʋhleha apehlichi aiyukali kak o̱ ibafoyuka chi̱ hoka.

⁸ Mihma ushetik aiyukali kʋt Islael im ʋlla ʋhleha apehlichi kanima ho̱ yakni ai i̱shi tuk mʋt, ilap i̱ki apehlichi aiachʋfa ya̱ aiauwaya hi oke; yʋmohmikma Islael im ʋlla ʋhleha hatak puta kʋt i̱ki ʋhleha i̱ yakni aiyukali ho̱ ai isha hi oke.

⁹ Micha i̱ yakni ʋt apehlichi achʋfa ʋttʋt apehlichi inla onʋt maha̱ya he keyu hoke; amba Islael im ʋlla ʋhleha apehlichi aiyukali kʋt ilap i̱ yakni ak inli ho̱ ibafoyuka hi oke, achi tok.

¹⁰ Chihowah yʋt Moses a̱ im apesa tuk mak o̱, Selofehat ushetik ʋhleha hʋt yʋmihchi tok.

¹¹ Mahlah, Tisah micha Hoklah micha Milkah micha Noah, Selofehat ushetik ʋhleha hʋt i̱ki itibapishi ushi ʋhleha ho̱ auwaya tok okʋt:

¹² Micha Chosef ushi Manasseh ushi ʋhleha chuka achʋfa ʋhleha ai auwaya tok, micha i̱ki in chuka achʋfa apehlichi ak o̱ i̱ yakni ʋt ibafoyuka moma tok.

¹³ Nan ʋlhpisa, micha ai ʋlhpiesʋt im apesʋt yʋmihchi ilʋppa puta kak o̱ Chihowah yʋt Moses a̱ tohnot Moab yakni matali Chatan bili̱ka, micha Cheliko bili̱ka ya̱ Islael im ʋlla ʋhleha ha̱ ai im apesa tok oke.