Numbas 35 - Chahta Holisso Holitopa 1886

¹ Mihma Chihowah yʋt Moses a̱ Moab yakni matali Chatan bili̱ka, micha Cheliko bili̱ka ya̱ ai im anumpulit,

² Islael im ʋlla ʋhleha hʋt Lefait ʋhleha hʋt aiasha chi̱ ka̱ ai isha he ʋlhpesa yakni ya̱ tʋmaha holehta puta ka̱ isht ima he, ish im apesashke; micha Lefait ʋhleha ha̱ tʋmaha holihta puta a bili̱ka fullota ka hʋsh imashke.

³ Micha tʋmaha holihta puta aiasha chi̱ kʋt im a̱shashke; mikma a bili̱ka puta ka̱ i̱ wak, im ila̱yak micha i̱ nan ʋlhpoa moma aiena kʋt aiashashke.

⁴ Micha tʋmaha holihta puta bili̱ka apakfoyupa Lefait ʋhleha hʋsh ima chi̱ kʋt holihta ya̱ hikiʋt kocha pilla ia hosh kubit tahlepa sipokni achʋfa banot apakfoyupa chi̱ hoke.

⁵ Mikma tʋmaha holihta yʋmma ʋttʋt kocha ia kʋt hʋshi akochaka in tʋnnʋp, kubit tahlepa sipokni tuklo, micha oka mahli in tʋnnʋp ʋt kubit tahlepa sipokni tuklo, micha hʋshi ai okatula in tʋnnʋp ʋt kubit tahlepa sipokni tuklo, micha falʋmmi in tʋnnʋp ʋt kubit tahlepa sipokni tuklo ho̱ hʋsh apesashke: mikma tʋmaha holihta yʋt ai iklʋnna hikiashke: ilʋppak osh in tʋmaha holihta ya̱ im a bili̱ka a puta yashke.

⁶ Micha Lefait ʋhleha ha̱ tʋmaha holihta puta hʋsh ima ka̱ tʋmaha holihta a hlakofi yʋt hannalashke, yʋmmak oka hatak bi̱ka ʋbi yʋt om malela hi yo̱ hʋsh im apesashke: micha yʋmma tʋmaha holihta pokoli ushta akucha tuklo ho̱ hʋsh im aienʋchashke.

⁷ Yohmi ho̱ Lefait ʋhleha ha̱ tʋmaha holihta hʋsh ima moma kʋt pokoli ushta akucha untuchina hi oke, yʋmmak oka abili̱ka fullota aiena ho̱ hʋsh imashke.

⁸ Micha tʋmaha holihta puta hʋsh ima kʋt Islael im ʋlla ʋhleha i̱ yakni ak o̱ hʋsh im ai ishashke: in lauakma, im ai ishit laua ho̱ hʋsh imashke; amba ik in lauokma im ai ishit ik lauo ho̱ hʋsh imashke: moma kʋt ai isha he ʋlhpesa ya̱ i̱shi kak osh ʋlhpi̱sa ho̱ Lefait ʋhleha ha̱ tʋmaha holihta ya̱ imashke, im achi tok.

⁹ Mihma Chihowah yʋt Moses a̱ im anumpulit,

¹⁰ Islael im ʋlla ʋhleha im anumpulit, Chatan a̱ hlopullit Kenaan yakni ya̱ ont hʋsh chukowakmʋt,

¹¹ Yohmikmʋt tʋmaha holihta, yʋmmʋt tʋmaha holihta ahlakofi ya chi̱ ho̱ hʋsh apesashke; mikma hatak nana hosh ik nukta̱hlo hosh kʋna ha̱ ʋbikmʋt, yʋmmak o̱ nan ʋbi ʋt pit mallelashke.

¹² Mikma yʋmmʋt il aiokha hʋsh im ahlakoffit aiokcha̱ya tʋmaha holihta puta hashke; yʋmohmi na hatak ʋbi ʋt okla moma itikba hikiʋt nan ik im ʋlhpiso ki̱sha kʋt ik illo kashke.

¹³ Micha tʋmaha holihta puta hʋsh ima chi̱ kʋt tʋmaha holihta hannali kʋt hʋsh ahlakofi ya chi̱ hoke.

¹⁴ Chatan ola in tʋnnʋp a̱ tʋmaha holihta tuchina ho̱ hʋsh imashke, micha Kenaan yakni ya̱ tʋmaha holihta tuchina ho̱ hʋsh imashke, yʋmmʋt ahlakofi tʋmaha holihta yashke.

¹⁵ Tʋmaha holihta hannali ilʋppak osh Islael im ʋlla ʋhleha, micha okla inla, micha nowʋt a̱ya tuk osh takla ahanta aiena ka̱ ahlakofi ya chi̱ hoke: yʋmohmi ka̱ kʋna hosh ik nukta̱hlo hosh hatak ʋbikmʋt yʋmmak o̱ malelit onashke.

¹⁶ Atuk o̱ tʋli ishit toksʋli yo̱ isht isso na illikma, yʋmmʋt hatak ʋbi yoke: hatak ʋbi ʋt illi pullashke.

¹⁷ Micha tʋli yo̱ pila hosh isso na isht illa he ʋlhpesa tuk o̱ illikma, hatak ʋbi yoke: hatak ʋbi ʋt illi pulla hi oke.

¹⁸ Keyukmʋt iti, ibbak isht itibi yosh isht illa he ʋlhpesa ho̱ isht isso na illikma, hatak ʋbi yoke: hatak ʋbi ʋt illi pullashke.

¹⁹ Issish hlatapa ka̱ il aiokha hʋt ilap akinli hosh hatak ʋbi yash ʋbashke: itafamakmʋt ʋbashke.

²⁰ Amba i̱ nukkilli hosh ishit bahli na illi, keyukmʋt in luma tuk osh pit ishit bahli na illi;

²¹ Keyukmʋt i̱ nukkilli hosh ibbak isht isso na, illikma, isso tuk ʋt illi pullashke; hatak ʋbi yokʋt; issish hlatapa tuk il aiokha yʋt afamakmʋt hatak ʋbi yash ʋbashke.

²² Amba i̱ nukkilli keyu hosh yakosi itin takla ho̱ ishit bahli, keyukmʋt im aiehchi tuk keyu hosh nana kia pit om pila,

²³ Keyukmʋt tʋli yosh hatak isht illa he ʋlhpesa ho̱ pi̱sa keyu hosh pit om pila na illikma, mikma in tʋnʋp atuk keyukma, micha hotopali bʋnna hatuk keyukma:

²⁴ Yohmikma okla moma kʋt hatak ʋbi micha im issish hlatapa il aiokha ita tuklo nan ʋlhpisa ilʋppak o̱ iakaiya hosh nan im apesashke:

²⁵ Micha okla moma kʋt hatak ʋbi yash issish hlatapa il aiokha ibbak ash akohchit hlakoffichashke, micha okla moma kʋt tʋmaha holihta ai okcha̱ya malelit ai ona tuk, falʋmminchit fohkashke: mikma yʋmma ahanta na naholitompa isht ʋtta moma i̱shahli bila holitopa ahama tuk ʋt illashke.

²⁶ Yohmi tuk kia hatak ʋbi yash osh nitak kaniohmi ho̱ in tʋmaha holihta aiokcha̱ya malelit ona tuk ʋt kocha a̱ya hokma,

²⁷ Atuk o̱ issish hlatapa il aiokha yʋt in tʋmaha holihta aiokcha̱ya kocha ya̱ ai ahayuchi cha, issish hlatapa il aiokha yʋt hatak ʋbi yash ʋbi kia: issish hlatʋbli kʋt im ʋlhpisa he keyu hoke.

²⁸ In tʋmaha holihta aiokchaya anu̱kaka ahanta na, naholitompa isht ʋtta moma i̱ shahli ʋt illi ha yak a hi atuk oka: amba naholitompa isht ʋtta moma i̱ shahli ʋt illi hayokmʋno, hatak ʋbi ʋt falamʋt i̱ yakni ya̱ ona hi oke.

²⁹ Yʋmohmi hoka, ilʋppa puta kak osh nan ʋlhpisa isht apesa yosh hʋchi aionchuloli puta hlopulli ka̱ hʋsh aiasha moma ka̱ itoyula chi̱ hoke.

³⁰ Kʋna hosh hatak ʋbikmʋt nishkin pi̱sa itih pulla ho̱ hatak ʋbi ʋt illa hi oke: amba witness achʋfa hosh hatak nana ho̱ i̱ sanalit atokoli na illa he keyu hoke.

³¹ Micha hatak ʋbi ʋt illa he ʋlhpesa ka̱ im ilhfiopak a̱ nan aiʋlli hʋsh isha he keyu hoke: amba illi pulla hi oke.

³² Micha malelit tʋmaha holihta aiokcha̱ya ont chukowa tuk, nan aiʋlli hʋsh ishi na, naholitompa isht ʋtta yʋt ik illo ki̱sha ho̱ anonti i̱ yakni ai ʋtta chi̱ hosh ʋla he keyu hoke.

³³ Yʋmohmi hosh yakni hʋsh aiasha kʋt hʋchik litehlo kashke: issish yʋmmak osh yakni ya̱ litehli hoka: micha yakni ʋt issish on hlatapa tuk ʋt kashofa he keyu, amba hlatʋbli tuk im issish ak o̱ ishit kashofa hi oke.

³⁴ Yʋmohmi hoka yakni hʋsh aiasha chi̱, micha ai ahanta li ya̱ hʋchik litehlo kashke: Ʋno, Chitokaka sia hʋt Islael im ʋlla ʋhleha takla ahanta li hoka, ish im achashke, im achi tok.