Numbas 34 - Chahta Holisso Holitopa 1886

¹ Mihma Chihowah yʋt Moses a̱ im anumpulit,

² Islael im ʋlla ʋhleha ha̱ im apesʋt, Kenaan yakni ya̱ ont hʋsh chukowakmʋt, hʋsh aiasha he ʋt ilʋppak osh Kenaan yakni, micha aiʋhli fullota yakni hʋsh ai isha chi̱ mak oke,

³ Yohmikma hʋchim oka mahli kashapa kʋt yakni haiaka Sin ak o̱ ʋttʋt ia hosh Etom ai ʋhli ak o̱ ʋhlit a̱ya hi oke; micha oka mahli hʋchim ai ʋhli ʋt okhʋta hʋpi hʋshi akocha ka̱ ont ai ʋhli fehna ak a hi oke,

⁴ Atuk osh hʋchim ai ʋhli ʋt oka mahli ya̱ ʋttʋt fullota kʋt Aklabbim atuya onakmʋt hlopullit Sin a̱ ona hi oke: micha ont akohcha ʋt oka mahli ha̱ ʋttʋt ia hosh Katesh‐bania ya̱ onakmʋt, ont a̱yʋt Hasa‐atta ona cha, ont a̱yakmʋt Asmon a̱ ona hi oke.

⁵ Atuk osh ai ʋhli ʋt Asmon a̱ ʋttʋt et fullotakmʋt Echip okhina ya̱ ona hi oke, micha akohcha yʋt okhʋta yak a hi oke.

⁶ Mihma hʋshi ai okatula ai ʋhli hokʋto okhʋta ak inli kak osh hʋchim ai ʋhla hi oke: ilʋppak osh hʋshi ai okʋtula hʋchim ai ʋhla hi oke.

⁷ Mihma ilʋppak osh falʋmmi hʋchim ai ʋhla chi̱ hoke: okhʋta chito ya̱ ʋttʋt nʋnih Ho ya̱ ona ka̱ hʋsh apesashke.

⁸ Ho nʋnih ha̱ ʋttʋt, Hamalh ont achukowa ont ʋhli ho̱ hʋchim ai ʋhli ya̱ hʋsh apesashke, micha ai ʋhli ont a kohcha kʋt Setat ak o̱ ona hi oke,

⁹ Micha ai ʋhli ʋt ont a̱yʋt Siflon a̱ ona hi oke, micha ont akohcha kʋt Hasa‐enan ak a hi oke: ilʋppak osh falʋmmi hʋchim ai ʋhla hi oke.

¹⁰ Micha hʋshi akochaka hʋchim ai ʋhli ya̱ Hasa‐enan a̱ ʋttʋt ia hosh Shefam ont ʋhli ka̱ hʋsh apesashke.

¹¹ Micha ai ʋhli ʋt Shefam ʋttʋt okʋtahʋt ia hosh Ain hʋshi akochaka in tʋnnʋp a̱yʋt Liblah ya̱ onashke; mihmʋt ai ʋhli ʋt okʋtahʋt iakmʋt okhʋta Chinnelolh lapalika hʋshi akochaka pilla kak o̱ onashke.

¹² Mikmʋt ai ʋhli ʋt okʋtahʋt iʋt Chatan a̱ ona hi oke: mikma ont akohcha ʋt okhʋta hʋpi yak a hi oke. Ilʋppak osh ai ʋhlit apakfoyupa aiena kʋt hʋchi̱ yakni ya chi̱ hoke, ish im achashke, achi tok.

¹³ Mihma Moses ʋt Islael im ʋlla ʋhleha ha̱ im apesʋt, Yakni ilʋppak o̱ na shoeli hosh hʋsh abinila chi̱ ho̱ apehlichi hʋsh chakkali cha iklʋnna aiena kak o̱ hʋchima he Chihowah yʋt apesa tuk oke,

¹⁴ Luben apehlichi im ʋlla ʋhleha ʋto i̱ki ʋhleha in chuka achʋfa ʋlhpi̱sa hosh, micha Kat apehlichi im ʋlla ʋhleha i̱ki ʋhleha in chuka achʋfa ʋlhpi̱sa hosh i̱ yakni ya̱ ishi tuk oka; mikma Manasseh apehlichi iklʋnna aiena kʋt i̱ yakni ishi tuk oka,

¹⁵ Apehlichi tuklo, micha apehlichi iklʋnna kʋt i̱ yakni ya̱ Chatan ola in tʋnnʋp hʋshi akochaka pilla, Cheliko bili̱ka hʋshi akochaka ak o̱ ai ishi tuk oke, im achi tok.

¹⁶ Mihma Chihowah yʋt Moses a̱ im anumpulit,

¹⁷ Hatak ilʋppa puta hohchifo kak osh yakni ya̱ hʋchim ita kʋshkola chi̱ hoke: naholitompa isht ʋtta Eleasa, micha Nʋn ushi Choshua ita tuklo kak a chi̱ hoke.

¹⁸ Micha apehlichi puta ka̱ holitopa achʋfa ho̱ hʋsh atokoli na ai isha he ʋlhpesa ʋlhpi̱sa ho̱ yakni yash ita kʋshkolashke.

¹⁹ Micha hatak ʋhleha hohchifo hʋt ilʋppak oke; Chutah apehlichika Chefʋnneh ushi Kaleb ak a hi oke.

²⁰ Simeon im ʋlla ʋhleha apehlichika Ammihʋt ushi Shemuel ak a hi oke.

²¹ Benchamin apehlichika Chislon ushi Elitat ak a hi oke.

²² Mihma Tan apehlichika ai achʋfa holitopa Chokli ushi Bukki ak a hi oke.

²³ Chosef im ʋlla ʋhleha ai achʋfa holitopa Manasseh im ʋlla ʋhleha apehlichika Efot ushi Hanniel ak a hi oke.

²⁴ Mihma Eflaim im ʋlla ʋhleha apehlichika aiachʋfa holitopa ʋt Shiftan ushi Kemuel ak a hi oke.

²⁵ Mikma Sebulon im ʋlla ʋhleha apehlichi aiachʋfa holitopa ʋt Panak ushi Elisafan ak a hi oke.

²⁶ Mikma Issaka im ʋlla ʋhleha apehlichi aiachʋfa holitopa yʋt Assan ushi Paltiel ak a hi oke.

²⁷ Mihma Asha im ʋlla ʋhleha apehlichi aiachʋfa holitopa ʋt Shelomi ushi Ahihʋt ak a hi oke.

²⁸ Mihma Naftali im ʋlla ʋhleha apehlichi aiachʋfa holitopa ʋt Ammihʋt ushi Petahel ak a hi oke.

²⁹ Ilʋppa puta kak osh Islael im ʋlla ʋhleha ha̱ Kenaan yakni ya̱ im ita kʋshkola chi̱ ho̱ Chihowah hʋt apesa tuk mak oke.