Numbas 32 - Chahta Holisso Holitopa 1886

¹ Yohmi ma Luben im ʋlla ʋhleha, micha Kat im ʋlla ʋhleha hʋt wak im apakna chinto fehna tuk atuk osh Chaasa yakni micha Kiliat yakni ya̱ pisa ma, yakeh, yʋmmʋt wak aiasha ya̱ achukma tok.

² Yohmi mʋt Kat im ʋlla ʋhleha, micha Luben im ʋlla ʋhleha hʋt Moses micha naholitompa isht ʋtta Eleasa, micha okla moma i̱ holitopa ʋhleha aiena kash im ona cha.

³ Atalolh, micha Tibon, micha Chaasa, micha Nimlah, micha Heshbon, micha Elealah, micha Shebam, micha Nebo, micha Beon.

⁴ Islael okla moma itikba ya̱ Chihowah yʋt issot a kanchi tok yakni pulla kʋt wak i̱ yakni achukma hoke, mihma hʋchin tishu ʋhleha hʋt wak im ashʋshke,

⁵ Okla achi mʋt, yʋmohmi hoka chim isht i̱ kana ya̱, e chi ai ahaiyuchi tuk ma, yakni ilʋppak o̱ chin tishu ʋhleha i̱ yakni ya chi̱ ho̱ ibbak fohkashke, micha Chatan a̱ chik pi hlopullecho kashke, im achi tok.

⁶ Mihma Moses ʋt Kat im ʋlla ʋhleha, micha Luben im ʋlla ʋhleha, Hʋch itibapishi ʋhleha hʋt tʋnʋp ia na, lumʋt ilʋppa hʋsh chieya chi̱ cho?

⁷ Micha nanta katiohmi ho̱ Islael im ʋlla ʋhleha hʋt yakni Chihowah yʋt ima tok a̱ chukowa he tuk o chu̱kʋsh hʋsh illechi cho?

⁸ Hʋch i̱ki ʋhleha hʋt yakni ya̱ pisa chi̱ ho̱ Katesh‐bania ʋttʋt pila li ma, yakohmi tok.

⁹ Eshkol okfa ha̱ ona cha yakni ya̱ pisa mʋt, Islael im ʋlla ʋhleha chu̱kʋsh a̱ illechi na, yakni Chihowah ima tok a̱ ik chukowo tok.

¹⁰ Atuk o̱ mih makinli ma Chihowah im ai i̱ nukkilli ʋt libbi mʋt, anumpa kʋllo anumpulit,

¹¹ Afʋmmi pokoli tuklo ishtiʋt ʋba ma̱ya hosh Echip yakni ya̱ kohchʋt minti tok ʋt, hatak achʋfa kia, anumpa kʋllo anumpulit, Ebleham, Aisaak, micha Chekob a̱ im issa li tok yakni ya̱ pisa chi̱ keyu pulla hoke; aioklu̱hʋt ʋm antia tuk keyu hokʋt,

¹² Kenesait Chefʋnneh ushi Kaleb, micha Nʋn ushi Choshua ak illa hi oke; yʋmmak okʋto aioklu̱hʋt Chihowah im antia tuk okʋt, achi tok.

¹³ Micha Chihowah im ai i̱ nukkilli ʋt libbi mʋt yakni haiaka itʋnowʋchi na afʋmmi pokoli ushta ma, ai unchololi yʋmma moma Chihowah itikba nan ik achukmo yʋmihchi tuk ʋt taha tok.

¹⁴ Atuk o̱ yakeh! hʋch i̱ki ʋhleha ʋlhtobʋt, Chihowah im ai i̱ nukkilli ʋt Islael a̱ i̱ sanalit libbit isht i̱ shalit isht ia chi̱ ho̱ hatak nanashʋchi ai iti shali hʋsh wakaiyʋshke.

¹⁵ Hʋsh iakaiya tuk ʋt hʋsh i̱ filʋmmikma, himakma anonti yakni haiaka ya̱ akancha chi̱ hoke; mikma okla ilʋppa moma ka̱ ʋbit hʋsh tahla chi̱ hoke, im achi tok.

¹⁶ Mihma okla hash ot bili̱ka, im ona cha, Pi̱ nan ʋlhpoa aiasha he chukfi‐holihta, micha pim ʋlla ʋhleha aiasha he tʋmaha holihta ilʋppa il ai ikba chi̱ hoke.

¹⁷ Amba pishno ʋto na halupa pim ʋlhtaiyaha hosh Islael im ʋlla ʋhleha itikba e maha̱ya cha, aiasha chi̱ ka̱ isht il onashke: mikma pim ʋlla ʋhleha hʋt yakni ya̱ okla aiasha pulla kak o̱ tʋmaha aholihta puta ho̱ aiasha chi̱ hoke.

¹⁸ Islael im ʋlla ʋhleha moma kʋt i̱ yakni aiyukali kʋt ik abinilo ki̱sha hokʋno, falamʋt pin chuka ela he keyu hoke.

¹⁹ Chatan tʋnnʋp yʋmma, micha tikba pilla hokʋno yakni ya̱ il ibai isha he keyu; pi̱ yakni ʋt Chatan ola tʋnnʋp hʋshi akohcha ka̱ pilla kak o̱ pin talaia hokʋt, im achi tok.

²⁰ Mihma Moses ʋt, Nana ilʋppa hʋsh yʋmihchi hokmʋt, na halupa hʋchim ʋlhtaiyaha cha Chihowah itikba ya̱ tʋnʋp hʋsh iakmʋt.

²¹ Micha hʋsh moma kʋt na halupa hʋchim ʋlhtaiyaha cha Chatan a̱ hlopullit Chihowah itikba ya̱ hʋsh ia na, in tʋnʋp ʋhleha ha̱ itikba a tihlelit kocha wehlit tahlikma.

²² Mikma yakni ʋt Chihowah itikba ya̱ ai i̱ nutaka, yohmikma i̱ himmak a yo̱ Chihowah itikba ya̱ micha Islael itikba ya̱ nanashʋchi ʋt onʋtola keyu hosh hʋsh falamashke, mikma yakni ilʋppʋt Chihowah itikba ya̱ hʋchi̱ yakni ya̱ chi̱ hoke.

²³ Amba hʋsh yʋmohma he keyukmʋt, yakeh! Chihowah ya̱ hʋsh i̱ yoshobʋshke, yohmi ka̱ oh ithana na hʋsh ashʋchi ʋt hʋchi ahayucha chi̱ hoke.

²⁴ Hʋchim ʋlla tʋmaha holihta hʋsh im ikbashke; micha hʋchin chukfi ha̱ holihta hʋsh im ikbashke; micha hʋch itih ha̱ kohcha tuk mak osh hʋsh yʋmihchashke, im achi tok.

²⁵ Mihma Kat im ʋlla ʋhleha, micha Luben im ʋlla ʋhleha hʋt Moses a̱ im anumpulit, A̱ shahli hʋt anumpuli tuk mak o̱ chin tishu ʋhleha hʋt yʋmihcha chi̱ hoke.

²⁶ Pim ʋlla ʋhleha, pin tekchi ʋhleha, pi nanʋlhpoa chipunta, micha pi̱ wak moma aiena kʋt Kiliat tʋmaha holihta puta yʋmmak o̱ aiasha chi̱ hoke.

²⁷ Amba a̱ shahli hʋt achi tuk mak o̱, chin tishu ʋhleha hatak moma kʋt tanampa chi̱ kʋt na halupa im ʋlhtaha hosh hlopullit Chihowah itikba ya̱ tanampit ia chi̱ hoke, im achi tok.

²⁸ Yohmi ho̱ yʋmma pulla ka̱ Moses ʋt naholitompa isht ʋtta Eleasa, micha Nʋn ushi Choshua, micha Islael im ʋlla ʋhleha apehlichi puta i̱ki ʋhleha i̱ shahli aiena ka̱ im apesa tok.

²⁹ Micha Moses ʋt, Kat im ʋlla ʋhleha, micha Luben im ʋlla ʋhleha aiena hatak puta kʋt na halupa im ʋlhta ha hosh hʋchi awant Chatan a̱ hlopullit Chihowah itikba tʋnʋp ia na, yakni ʋt hʋchi tikba ya̱ nutaka hokma; yohmikma ai ahanta chi̱ ka̱ Kiliat yakni ak o̱ hʋsh ima hi oke.

³⁰ Amba nahalupa im ʋlhtaha hosh hʋchi awant hlopulla he keyukma, Kenaan yakni ak o̱ hʋch ibai asha hi oke, im achi tok.

³¹ Mihma Kat im ʋlla ʋhleha, micha Luben im ʋlla ʋhleha aiena kʋt afalaminchit, Chihowah yʋt in tishu ʋhleha ha̱ im achi tuk mak o̱ e yʋmihcha chi̱ hoke.

³² Na halupa pim ʋlhtaha hosh hlopullit Chihowah itikba a̱yʋt Kenaan yakni ya̱ e chukowa chi̱ hoke; yohmi hosh yakni il isha chi̱ kʋt Chatan ola in tʋnnʋp ak osh pimmi ha chi̱ hoke, achi tok.

³³ Mihma Moses ʋt Kat im ʋlla ʋhleha, micha Luben im ʋlla ʋhleha, micha Chosef ushi Manasseh apehlichi iklʋnna aiena ka̱, Amolait okla i̱ mi̱ko Sihon im apehlichika, micha Bashan i̱ mi̱ko Ok im apehlichika, yakni yash, micha im ai ʋhli tʋmaha holihta puta ai iti eshi, micha yakni kucha apakfoyupa tʋmaha holihta puta ka̱ ima tok.

³⁴ Mihma Kat im ʋlla ʋhleha hʋt Tibon micha Atalolh, micha Aloe,

³⁵ Micha Atlolh, Shofan, micha Chaasa, micha Chokbehah,

³⁶ Micha Belh‐nimbah, micha Belh‐halan tʋmaha holihta, micha chukfi i̱ holihta aiena ai ikbi tok.

³⁷ Mihma Luben im ʋlla ʋhleha hʋt Heshbon micha Elealah micha Kichalh‐chealim,

³⁸ Micha Nebo, micha Baal‐meon (hohchifo inla hochifo hosh) micha Shibmah aiena ka̱ ikbi tok: micha tʋmaha holihta ikbi tuk ʋt hohchifo inla ima tok.

³⁹ Mihma Manasseh ushi Maki im ʋlla ʋhleha hʋt Kiliat a̱ ona cha ishi tok; micha Amolait ʋt yʋmma a̱sha tuk a̱ im ai ishi tok.

⁴⁰ Mihma Moses ʋt Kiliat a̱ Manasseh ushi Maki ya̱ ima na, abinili tok.

⁴¹ Mihma Manasseh ushi Chai ʋt iʋt in tʋmaha ushi puta ka̱ ishi cha Hafolh‐Chai hochifo tok.

⁴² Mihma Nobah hʋt iʋt Kenalh, micha in chuka lokoli aiena ishi cha, ilap hohchifo kak o̱ ahochifochit Nobah hochifo tok.