Numbas 31 - Chahta Holisso Holitopa 1886

¹ Mihma Chihowah yʋt Moses a̱ im anumpulit,

² Islael im ʋlla ʋhleha ha̱ Mitianait okla ha̱ ish im il ai okha pullashke, i̱ himmak o̱ chim okla ha̱ ish iba holhtina hi oke, im achi tok.

³ Mihma Moses ʋt okla ha̱ im anumpulit, Hʋsh kaniohmi kʋt tʋnʋp hʋsh ia chi̱ kʋt na halupa isht hʋsh il atahlashke, micha iʋt Mitianait okla ha̱ ont in tanampashke, micha Mitian ak o̱ Chihowah ya̱ im il ai okhashke.

⁴ Islael apehlichi puta moma hlopulli ka̱ tahlepa sipokni achʋfa bieka ho̱, tʋnʋp a̱ hʋsh ai i̱ pilashke.

⁵ Yohmi ho̱ Islael tahlepa sipokni puta ka̱ akohchʋt apehlichi achʋfakma, tahlepa sipokni achʋfʋt ia hosh tahlepa sipokni auahtuklo kʋt ai i filʋmmit na halupa isht im ʋlhtaha tok.

⁶ Yohmi ma Moses ʋt tʋnʋp a̱ pila tok, apehlichi achʋfakma tahlepa sipokni achʋfa ho̱, yʋmma micha naholitompa isht ʋtta Eleasa ushi Finehas aiena kʋt naholitopa isht asha, micha olacha chi̱ ho̱ isht pu̱fa yʋt ibbak foyuka yo̱ tʋnʋp a̱ pila tok.

⁷ Mihma Chihowah yʋt Moses a̱ im achi tuk mak o̱, Mitianait okla ha̱ in tanampi tok; micha nakni moma ka̱ ʋbit tahli tok.

⁸ Micha illi tuk ʋt a̱shakma, Mitian i̱ mi̱ko ʋhleha ha̱ ʋbi tok; ilʋppa puta kak atok, Efi, Lekem, micha Su, micha Hu micha Leba, Mitian i̱ mi̱ko tahlapi hatok; micha Beo ushi Balaam a̱ bʋshpo falaia isht ʋbi tok.

⁹ Micha Islael im ʋlla ʋhleha hʋt Mitian ohoyo moma, micha im ʋlla ʋhleha aiena ka̱ yukachi mʋt, na wehpoa yo̱ wak moma, micha ʋlhpoba chipunta moma, micha im ila̱yak moma aiena ka̱ ishi tok.

¹⁰ Micha in tʋmaha holihta puta aiasha yatuk moma, micha i̱ holihta moma ka̱ luak ishit hukmit tahli tok.

¹¹ Mihmʋt hatak, micha nan ʋlhpoa aiena, na wehpoa moma, micha nan ʋlhpoa moma ishi tok.

¹² Micha yuka ʋhleha hash micha ʋlhpoba na wehpoa yash micha nampoa yash, Moses micha naholitompa isht ʋtta Eleasa micha Islael im ʋlla ʋhleha okla moma aiena ka̱ isht im onʋt, binah Moab yakni matali ya̱ yʋmmʋt Chatan bili̱ka micha Cheliko bili̱ka talaia ka̱ isht ona tok.

¹³ Mihma Moses micha naholitompa isht ʋtta Eleasa, micha okla moma i̱ holitopa ʋhleha aiena kʋt binah ha̱ kocha afamʋt ia tok.

¹⁴ Mihma Moses ʋt tʋshka chipota i̱ pehlichi ʋhleha ha̱ micha tahlepa sipokni puta i̱ kʋpitʋni ʋhleha, micha tahlepa puta i̱ kʋpitʋni ʋhleha aiena kʋt tʋnʋp a̱yʋt ʋla tuk a̱ i̱ nuklibishla tok.

¹⁵ Mihmʋt Moses ʋt, Ohoyo moma hʋsh okchalinchi tuk oh cho?

¹⁶ Yakeh! ilʋppa puta kak osh Balaam ʋt i̱ miha na, Islael im ʋlla ʋhleha Pio pulla ka̱ Chihowah ishit i̱ yoshoba tok; micha ililli okpulo ʋt Chihowah im okla moma ai ititakla ya̱ itoyula tok.

¹⁷ Yʋmohmi hoka, himak a̱ ʋlla ʋhleha nakni moma ka̱ hʋshbashke, micha ohoyo hʋt iba tʋshki cha hatak ithana tuk moma aiena ka̱ hʋshbashke.

¹⁸ Amba ohoyo‐ʋlla moma, iba tʋshki cha hatak ithana tuk keyu kano, hʋchimmi ha chi̱ hosh okchalinchit hʋsh i̱shashke.

¹⁹ Micha bina ha̱ kucha hʋsh aiasha na nitak untuklashke; kʋna hosh hatak ʋbi tukmʋt, micha kʋna hosh illi ya̱ haleli tukmʋt, hʋchishno, micha hʋchi̱ yuka aiena kʋt, nitak ont isht atuchina, micha nitak ont isht untuklo ka̱ hʋsh ile kashoffashke.

²⁰ Micha hʋchi̱ nafohka moma, micha nahakshup osh toba, micha issi kosoma hishi yosh toba moma, micha iti yosh nana toba moma ka̱ hʋsh kashoffashke, im achi tok.

²¹ Mihma naholitompa isht ʋtta Eleasa ʋt hatak tʋnʋp a̱ya tʋnʋp ia tuk a̱, Ilʋppak osh nan ʋlhpisa mak o̱ Chihowah yʋt Moses a̱ im apesa tuk mak oke.

²² Peh tʋli lakna, micha tʋli hʋta, asonak lakna, tʋli, asonak hʋta micha naki,

²³ Nana hoh kia lua he keyukma, luak o̱ hʋsh hlopullechikma kashofa hi oke; yohmi kia filʋmmichi oke ya̱ ishit kashofa hi oke: micha lua hinla moma ka̱ oka yak o̱ hʋsh hlopullecha hi oke.

²⁴ Micha nitak ont isht untuklokma hʋchi̱ nafohka ya̱ hʋsh achefa cha hʋchi kashofa hi oke; yohmi ha yosh binah ha̱ ant hʋsh chukowa hi oke, im achi tok.

²⁵ Mihma Chihowah yʋt Moses a̱ im anumpulit,

²⁶ Chishno, micha naholitompa isht ʋtta Eleasa, micha okla moma i̱ki i̱shahli ʋhleha aienʋt, hatak, micha nan ʋlhpoa nawehpoa tuk holhtina ka̱ hʋsh ishashke.

²⁷ Micha na wehpoa kashapa tuklo ita kʋshʋplit, tʋnʋp ilonochit tʋnʋp ia tuk, micha okla moma ka̱ hʋsh im itakashʋblashke.

²⁸ Hatak tʋnʋp a̱ya puta tʋnʋp ia tuk a̱ noshkobo atobbi Chihowah immi ya chi̱ ho̱ hʋsh onochashke; hatak puta kash, micha wak puta kash, micha issuba nashoba puta kash, micha chukfi puta kash aiena ka̱ tahlepa tahlapikma shilombish achʋfa,

²⁹ Im iklʋnna hʋsh ai ishi cha, Chitokaka i̱ walit im issa chi̱ ho̱, naholitompa isht ʋtta Eleasa ya̱ hʋsh imashke.

³⁰ Mikmʋt Islael im ʋlla ʋhleha im iklʋnna ya̱ hatak puta kash, micha wak puta kash, micha issuba nashoba puta kash, micha nan ʋlhpoba chipunta kash micha nan ʋlhpoba ilaiyuka moma kash pokoli tahlapikma, achʋfa ho̱ ai ishit Lefait ʋhleha, yʋmmʋt Chihowah in tabenakel nan isht ai ahanta ka̱ apistikeli chatuk a̱ hʋsh imashke, im achi tok.

³¹ Mihma Chihowah yʋt Moses a̱ im apesa tuk mak o̱ Moses micha naholitompa isht ʋtta Eleasa ita tuklo kʋt yʋmihchi tok.

³² Mihma nawehpoa tʋnʋp a̱ya hatak ʋhleha hʋt yukachi tuk atampa mak osh chukfi tahlepa sipokni bat tahlepa hannali, tahlepa sipokni pokoli untuklo, micha tahlepa sipokni tahlapi tok,

³³ Micha wak tahlepa sipokni pokoli untuklo akucha tuklo tok,

³⁴ Micha isuba nashoba tahlepa sipokni pokoli hannali akucha achʋfa tok,

³⁵ Micha iba tʋshkit hatak a̱ ithana tuk keyu moma kʋt ohoyo tahlepa sipokni pokoli tuchina akucha tuklo tok.

³⁶ Micha iklʋnna kʋt, yʋmmʋt kohchʋt tʋnʋp ia tuk i̱ kashapa holhtina kʋt chukfi tahlepa sipokni bat tahlepa tuchina, micha tahlepa sipokni pokoli tuchina akucha untuklo, micha tahlepa tahlapi tok.

³⁷ Micha noskobo Chihowah im atobbi ʋt chukfi tahlepa hannali, micha pokoli untuklo akucha tahlapi tok.

³⁸ Mikma wak ʋt tahlepa sipokni pokoli tuchina akucha hannali tok; yʋmma noshkobo Chihowah im atobbi akohcha kʋt pokoli untuklo akucha tuklo tok.

³⁹ Mikma issuba nashoba yʋt tahlepa sipokni pokoli tuchina micha tahlepa tahlapi tok; yʋmma noshkobo Chihowah im atobbi ʋt akohcha kʋt pokoli hannali akucha achʋfa tok.

⁴⁰ Mikma hatak ohoyo hʋt tahlepa sipokni auahannali tok; yʋmma noshkobo Chihowah im atobbi ʋt akohcha kʋt ohoyo pokoli tuchina akucha tuklo tok.

⁴¹ Mihma Chihowah yʋt Moses a̱ im apesa tuk mak o̱ Moses ʋt noshkobo atobbi yash, yʋmmʋt Chihowah i̱ walit im issa yatuk o̱ naholitompa isht ʋtta Eleasa ya̱ ima tok.

⁴² Mihma Islael im ʋlla ʋhleha im iklʋnna, yʋmma Moses ʋt hatak tanampi tuk ash im ita kashʋbli tok.

⁴³ Yohmi ka̱ okla moma ka̱ im iklʋnna kʋt chukfi tahlepa sipokni bat tahlepa tuchina micha tahlepa sipokni pokoli tuchina akucha untuklo, micha tahlepa tahlapi tok,

⁴⁴ Micha wak tahlepa sipokni pokoli tuchina akucha hannali tok,

⁴⁵ Micha isuba nashoba tahlepa sipokni pokoli tuchina micha tahlepa tahlapi tok,

⁴⁶ Micha hatak ohoyo tahlepa sipokni auahhannali tok.

⁴⁷ Islael im ʋlla ʋhleha im iklʋnna ka̱ Moses ʋt, hatak micha nan ʋlhpoba aiena pokoli tahlapikma achʋfa ho̱ ai ishi cha Lefait ʋhleha, yʋmmʋt Chihowah in tabenakel nan isht aiahanta apistikeli yatuk o̱ Chihowah yʋt Moses a̱ im apesa tuk mak o̱ ima tok.

⁴⁸ Mihma okla tahlepa sipokni puta i̱ nan ʋlhtoka ʋhleha, micha tahlepa sipokni puta i̱ kʋpitʋni ʋhleha, micha tahlepa puta i̱ kʋpitʋni ʋhleha aiena kʋt Moses a̱ bili̱ka im ona tok.

⁴⁹ Micha Moses a̱, Chin tishu ʋhleha hʋt tʋnʋp a̱ya hatak ʋhleha e pehlichi tuk aiyukali holhtina ka̱ il ishi ma, hatak achʋfa kia iksho kʋt ikshoshke.

⁵⁰ Yʋmohmi hatuk osh Chihowah isht aiokpʋchi isht elʋshke, pim ishilombish isht atobbi Chihowah itikba il ai ikba chi̱ hosh hatak il aiyukali kʋt nana il ishi tuk, tʋli lakna isht shema, itatakʋli, micha shakba abeha, chʋnaha, micha haksobish atakali chʋnaha, micha tʋli lakna inochi aiena ka̱ isht e lʋshke, im achi tok,

⁵¹ Mihma Moses micha naholitompa isht ʋtta Eleasa ita tuklo kʋt tʋli lakna isht il akshema moma ka im ishi tok.

⁵² Micha tʋli lakna im issa, tahlepa sipokni puta i̱ kʋpitʋni ʋhleha, micha tahlepa puta i̱ kʋpitʋni ʋhleha aiena kʋt Chihowah im issa tuk moma kʋt shekel tahlepa sipokni auahhannali micha tahlepa untuklo pokoli tahlapi tok.

⁵³ Tʋnʋp a̱ya hatak puta kʋt nawehpoa ya̱ ilap aiyukali kʋt ishi tok okʋt.

⁵⁴ Mihma Moses micha naholitompa isht ʋtta Eleasa itatuklo kʋt tʋli lakna yash, tahlepa sipokni puta i̱ kʋpitʋni ʋhleha, micha tahlepa puta i̱ kʋpitʋni ʋhleha ha̱ im ai ishi cha, Islael im ʋlla ʋhleha isht ithana bilia hosh Chihowah itikba itoyula chi̱ ho̱ okla moma in tabenakel a̱ ont fohki tok.