Numbas 30 - Chahta Holisso Holitopa 1886

¹ Mihma Islael im ʋlla ʋhleha puta ka̱, Moses ʋt apehlichi i̱ noshkoboka puta ka̱ isht im anumpulit, Ilʋppak o̱ Chihowah yʋt apesʋshke.

² Hatak ʋt anumpa il onochit Chihowah im il onochi tukmʋt, keyukmʋt anumpa kʋllo anumpulit imishilombish a̱ anumpa ho̱ isht ile takchi tuk mʋt, im anumpa ha̱ kobʋffa he keyu, itih ha̱ akohcha tuk moma kʋt yʋmihcha hi oke.

³ Ohoyo hʋt himita yosh i̱ki in chuka ahantʋt anumpa il onochi cha, Chihowah im il onochit anumpa isht ile takchi mʋt,

⁴ Mikma anumpa il onochi, micha anumpa isht ile takchi yo̱ imishilombish a̱ ishit takchi ka̱, i̱ki ʋt ha̱klo, mihmʋt i̱ki yash osh nana ik im achokma; yohmikma anumpa il onochi tuk moma kʋt aia̱hla hi oke; michaanumpa isht ile takchi imishilombish ishit takchi puta kʋt aia̱hla hi oke.

⁵ Amba i̱ki ʋt haklo nitak akinli hosh ʋlhpesa ik im ahno tukma, anumpa il onochi, micha anumpa moma isht iletakchi imishilombish a̱ ishit takchi tuk ʋt ik aia̱hlo ka hi oke, mihma i̱ki ak osh ʋlhpesa ik im ahno hatuk o̱, Chihowah yʋt i̱ kashoffa hi oke.

⁶ Micha i̱ hatak ʋt a̱sha tuk osh anumpa il onochi ma, itih ha̱ nana kia kohchit im ishilombish a̱ ishit takchi ma.

⁷ Yohmi ma i̱ hatak ʋt haklo, mihmʋt ha̱klo nitak ʋt nana ik im achokma: yohmikma anumpa il onochi tuk ʋt aia̱hla hi oke, micha anumpa isht ile takchi im ishilombish a̱ ishit takchi tuk ʋt aia̱hla hi oke.

⁸ Amba i̱ hatak ʋt haklo nitak ʋt ʋlhpesa ik im ahno tuk mʋt, yohmikmʋt anumpa il onochi il onochi tuk a̱, micha itih ha̱ kohchichit imishilombish anumpa isht ile takchi tuk a̱ ik a̱hlecho kashke, mikma Chihowah yʋt i̱ kashoffa hi oke.

⁹ Amba ohoyo ʋlhtakla, micha ohoyo i̱ hatak ʋt i̱ kʋnia hokʋto anumpa il onochi ilap imishilombish ishit takchi tuk ʋt moma kʋt a̱hlit takala hi oke.

¹⁰ Mikma i̱ hatak in chuka anta hosh anumpa il onochi, keyukmʋt anumpa isht ile takchi imishilombish a̱ anumpa kʋllo ishit takchi tuk ma,

¹¹ Yohmi ma i̱ hatak ʋt ha̱klo kia nana ik acho, micha ʋlhpesa ik im ahno: yohmikma anumpa il onochi tuk moma kʋt aia̱hla hi oke; micha anumpa isht ile takchi imishilombish ishit takchi tuk ʋt aia̱hla hi oke.

¹² Amba i̱ hatak ʋt haklo nitak ʋt im akshochit kanchikma, yohmikma nana hosh anumpa il onochi tuk, keyukmʋt imishilombish a̱ anumpa ishit takchi itih ha̱ kohcha tuk ʋt ik a̱hlo ka hi oke; i̱ hatak ʋt im akshochi hoke; mikma Chihowah yʋt i̱ kashoffa hi oke.

¹³ Anumpa il onochi puta, micha anumpa kʋllo isht iletakchi imishilombish isht ilbʋshali puta ka̱, i hatak ʋt a̱hlecha hinla, keyukmʋt i̱ hatak ʋt akshocha hinla hoke.

¹⁴ Amba i̱ hatak ʋt onna hosh onna ka̱ nan ik acho kash osh imomakʋt; yohmikmʋt anumpa il onochi tuk moma, micha anumpa isht ile takchi onʋtola tuk moma ka kʋllochi hoke; haklo nitak ʋt nana ik im acho tuk okʋt, kʋllochi hoke.

¹⁵ Amba haklo ha ya̱ tuk osh kaniohmit akshochikmʋt, yohmikmʋt i̱ nanashʋchi ya̱ shaiyala hi oke, im achi tok oke.

¹⁶ Nan ʋlhpisa ilʋppa puta kak osh hatak micha tekchi ita tuklo iti takla ya̱ itoyula he, micha i̱ki micha ushetik himita moma hosh i̱ki in chuka ahanta iti takla ka̱ itoyula hi yo̱ Chihowah yʋt Moses a̱ im apesa tok oke.